Veivuke ni Vuli

iTaba ni iVolatabu

iTaba ni iVolatabu

iTaba ni iVolatabu

iVakamacala Taumada
Na itaba eso oqo ni veivanua kilailevu e ivakaraitaki ni vanua a lako voli kina ko Jisu, na vanua era a bula ka veivakavulici kina na parofita ena ivolatabu, kei na vanua era a yaco kina e vuqa na veika era tukuni ena ivolanikalou.
Raici vakararaba
Na mape e ra e vakaraitaka na vanua e tiko kina na itaba ni iwasewase oqo. Ena veidraunipepa e tarava, na itaba nabataki yadua ena salavata mai kei na dua na kena ivakamacala lekaleka. Oti qai tuvai yani na veika vakaivolanikalou a yaco, kei na kena idusidusi mo kila kina na vanua e rawa ni o wilika kina eso tale na ka me baleta na veika a yaco oqori.
1. Uciwai na Nile kei Ijipita
Era tubu na kau ena bati ni Uciwai na Nile. Ena dua na vanua vaqo, a vunitaka kina o tinai Mosese na luvena tagane dramidrami. Ka tu yani e muri na veivanua dravusiga ka robota tu na iwase levu kei Ijipita.
2. Ulunivanua ko Saineai (Orepi) kei na Lekutu e Saineai
E vica vata na vanua e rawa ni tu kina na Ulunivanua o Saineai. E dua na vanua sa matau tu o Jepeli Musa (na Ulunivanua i Mosese), taba tu oqo.
3. Lekutu e Jutia
Na lekutu e Jutia e koto ena tokalau kei Jerusalemi ka sirova yani na Waitui Mate.
4. Ketesa-bania
Oqo ni laurai mai na vua-i-cake ni bucabuca ni vanua dravuisiga levu (ka vakatokai talega me qakilo) na vanua e koto kina ko Ketesa-bania. Na uciwai ka drodro mai ki ke ena vulaiuca sa yaco kina na vanua oqo me tikina suasua ka vuavuaivinaka ena lekutu e Sini.
5. Nodra iBulubulu na Peteriaki
Na vale oqo, e dua vei ira ka kilai levu duadua ena Vanua Tabu, a tara na Tui ko Eroti mai Epironi ena vanua a dau tu kina na qara e makipila, ka ratou a volia na matavuvale nei Eparaama me nodratou ibulubulu vakamatavuvale (iVakate. 23).
6. Colo kei Jutia
Na colo kei Jutia e rauta ni 56 na kilomita na kena balavu ka 27 na kilomita na kena raba. E vuqa na vanua oqori e veivatu ka dredre na kena teivaki. E wasei na veidelana ena buca, ka bulabula cake na kena qele. Era a vakaitikotiko ena veidelana oqo ko ira na Isireli e liu sara, ka ra vakayagataka me nodra itataqomaki mai vei ira na meca.
7. Peceliema
Na itaba e vakaraitaki kina na veidelana veivatu kei na nodra lomanibai na ivakatawa ni sipi e liu, kei na siti vou ko Peceliema mai muri.
8. Jerusalemi
Ni rai vaka ki na vualiku ki Jerusalemi. Ena lomadonu ni iyaloyalo e tu kina e dua na valenilotu ni Musulomani ka koula na dokana ka momokiti, ka vakatokai me Dome of the Rock. Era dau sokalou na Jiu ena veigauna makawa ena valetabu ka tu eke. Na lalaga voleka ki na Dome of the Rock e vakavolivolita na koro makawa ko Jerusalemi. Ena yasa ni lalaga ki na imatau na Buca o Kitironi. Ena imatau vakayawa ena taudaku ni itaba na Ulunivanua ni Veiolive. Ki na vualiku, ni sivi yani na Dome of the Rock, e dua na vanua ka rawa ni o Kolikoca, se ko Kalivari.
9. Valetabu i Eroti
Na itaba oqo e vakaraitaka e dua na ivakatakarakara vakalailaitaki (1:50) ni valetabu i Eroti me vaka e vakasamataki ni a vakakina ena yabaki 67 ni noda Turaga. Na lalaga e vakavolivolita na valetabu e kovuta na vanua tabu ka tu kina na tikina Tabu vei ira na vanua Tabu kecega, na vanua tabu, kei na tolu na iwasewase lelevu.
10. iKabakaba ki na Valetabu
A vidavidai ki na veiwasewase na valetabu, ka ra tu ena itagede sara e ra na iwasewase e taudaku. E vica tu na matamata me ra curuma yani na laki sokalou, ka okati kina na kena era curu yani mai na ikabakaba oqo ki na veiwasewase e taudaku ka qai curu sara ki na veiwasewase e loma. E udolu vakaudolu na tamata era sa kabata cake na ikabakaba oqo, ka okati kina na Luve ni Kalou. Ena nodra vakarusa na valetabu oqo na mataivalu nei Taito ena yabaki 70 ni noda Turaga, a ubia tu na ikabakaba oqo na icaca ni vale. Era a qai kelivaka tani ena gauna era samaka kina e dua na tiki ni koro makawa ko Jerusalemi o ira na dauvakadikeva na iyau ni lomaniqele ena 1970 vakacaca.
11. Ulunivanua ni Veiolive
Oqo ni rai vaka ki na tokalau ki na Ulunivanua ni Veiolive. Na vale ka laurai tu mai muri e vakatakilakilataka na vanua a rawa ni tu kina na Were mai Kecisemani. Ena 24 ni Okotova, 1841, a taubale cake kina ena Ulunivanua ni Veiolive ka cabora e dua na masu vakaparofita ni vakatatabu me baleta nodra lesu mai na luvei Eparaama kei na tarai cake ni valetabu o Elder Osoni Aidi.
12. Were mai Kecisemani
Na itaba oqo ni dua na vuni olive makawa a tauri ena dua na vanua a dau tu kina na Were mai Kecisemani. A masu voleka eke na iVakabula ni oti na nona biuta mai e dua na tikina e cake ena bogi a soli yani kina.
13. Kolikoca
Na vatu oqo e vaka na ibulibuli ni dua na qavokavoka ka tu ga ena taudaku ni Matamata kei Jerusalemi ka gole ki Tamasiko (Joni 19:17, 20), oqo e rawa ni o koya na vanua a mate kina ena kauveilatai ko Jisu Karisito.
14. iBulubulu ena Were
A rawa ni tu eke na ibulubulu ena were nei Josefa na kai Aramacea. Eso na parofita ena gauna e muri oqo era vakila ni a vakadavori ena ibulubulu ka taba tu oqo na yagona na iVakabula.
15. Jeriko
Na itaba oqo e vakaraitaka na veika e tubu e Jeriko ena gauna oqo. E liu a dua na koro vakabai ena bucabuca ni Uciwai na Joritani, ka 252 na mita ena ruku ni yalayala ni waitui. Oqo e dua na vanua bulabula ni teitei ka ra vuavuai vinaka kina na niu kei na loga ni moli. E muri na vanua a dau tu kina na Ulunivanua ni Veitemaki (Maci. 4:1–11).
16. Sailo
Ena rai oqo mai na ra, na icaca ni koro makawa ko Sailo ena imawi mai lomadonu.
17. Sikemi
Na vanua ko Sikemi. Mai muri na Ulunivanua ko Kerisimi, ka tu yani e dakuna na Ulunivanua ko Epali. O Sikemi e koto ena kedrau maliwa na ulunivanua e rua.
18. Tocani e Samaria
O Tocani na vanua veitokaitua kei na buca. E vanua bulabula ni vakana manumanu. Ni ra mai tikora na Isireli na vanua oqo, a soli na vanua oqo vei Manasa.
19. Sisaria kei na Bucabuca mai Seroni ki Kameli
Ni da rai vaka ki na vualiku kosova na ikelekele ni waqa makawa e Sisaria kei na Bucabuca mai Seroni ki Kameli. E laurai tale toka ga mai ena ulu ni yaloyalo na veiulunivanua na Kameli.
20. Jopa
Rai vaka ki na vua-i-ra ki na koro ikelekele ni waqa ko Jopa.
21. Bucabuca ko Jesireli
Rai ki na ceva-i-ra mai na dela ni Ulunivanua ko Tepori vaka ki na dua na iwase ni Buca ko Jesireli, ka dau kilai talega me Bucabuca ko Esidraloni. E dina ni dau nanumi tu na Buca ko Jesireli ni dua na buca levu, na ka dina ni oqo e vica na buca era semata vata na Bucabuca ko Ako ki na Buca ni Joritani kei na yasayasa ena Wasawasa e Kalili. Me vakaoqo, na buca mada ga o Mikito, e toka ena iwase ni buca oqo ki na ra. Na Buca ko Jesireli sai koya na sala kilai levu duadua me kosova na Vanua Tabu ena kedrau tadruwa na Wasawasa na Mediterenieni ki na ra kei na Buca ni Joritani ki na tokalau.
22. Ulunivanua ko Tepori
Rai vaka ki na vua-i-ra. Na vanua lolovira e vakavolivolita na Ulunivanua ko Tepori e tiki ni Buca ko Jesireli. Ko Nasareci e koto ena veidelana voleka ki na Ulunivanua ko Tepori.
23. Wasawasa e Kalili kei na Ulunivanua ni Vunau
Rai vaka ki na ceva-i-ra ena tutu ki na vua-i-ra ni Wasawasa e Kalili, e koto kina e dua na drano waidroka. Na delana e lomadonu na vanua ka dau tu kina na Ulunivanua ni Vunau. O Kapenaumi ki na imawi, e sega ni tiko ena itaba. O Taiperia e tiko vaka ki na ceva ena baravi ki na ra.
24. Kapenaumi
O Kapenaumi, ka tiko ena baravi ena vualiku ni Wasawasa ko Kalili, sai koya na vanua a vakayacori kina vakalevu na nona veiqaravi e Kalili ko Jisu (Maci. 9:1–2; Marika 2:1–5). E dua na vanua ni qoli kei na caka bisinisi bibi ka vuavuai vinaka, ka nodra itikotiko na kai Matanitu tani ka vakakina vei ira na Jiu. Na lewena ena imatai ni senijiuri e sega ni sivia na 1,000. E koto o Kapenaumi ena lomadonu ni dua na sala rogolevu ni nodra veilakoyaki na dauveivoli, ka vakavolivolita na qele bulabula. Era tara eke na sotia ni Roma eso na vale ni sisili kei na vale ni maroroi iyaya. E dina ni levu na cakamana a vakayacori eke, era sega ga ni ciqoma na tamata na nona veiqaravi na iVakabula. Sa cudruva kina na koro ko Jisu (Maci. 11:20, 23–24). Ni sa yaco na gauna sa vakarusai ko Kapenaumi ka lala tu ga.
25. Uciwai na Joritani
Na Uciwai na Joritani e tekivu mai na vualiku ni Wasawasa ko Kalili, drodro yani ki lomana, ka qai drodro tikoga yani ki na ceva ki na Waitui Mate. A tabaki na itaba oqo volekata na gusuniwai ki na Wasawasa ko Kalili.
26. Sisaria Filipai
O Sisaria Filipai e toka ena boto ni Ulunivanua ko Erimoni. Na mataniwai oqo e dua vei ira ka vakasucuma na Uciwai na Joritani. Na Eroti ko Filipe, o koya a liutaka tu na vanua oqo, a tara eke e dua na koro levu me ivakananumi kei Sisa (na nona iliuliu) kei koya; a dau vakatokai tu e liu na koro levu oqo ko Paniasi ia nikua sa vakatokai ko Baniasi ka vakatalega kina ko Sisaria Filipai.
27. Nasareci
Na irairai oqo ni koro vou ko Nasareci e rai tiko vaka ki na ceva. Ko Nasareci e dua na koro lailai ena gauna vakaivolatabu.
28. Tani
Na koro makawa oqo ko Tani a dau vakatokai me ko Lesemi (Josu. 19:47) se ko Leisi (Dauvei. 18:7, 14) ni se bera ni ra rawa na Isireli na koro ko ya. Na ivurevure ni wai eso era tu ena vanua oqo, vata kei na ivurevure ni wai mai Sisaria Filipai, sai ira na idavedave ni wai lelevu ka vu mai kina na Uciwai na Joritani. E taba tu eke na vanua a tara tu kina na valetabu nei Jeropoami.
29. Aceni
Na itaba oqo, ka tauri mai Ariopakusi (Delana o Masi) e vakaraitaka na Akoropoli kei Aceni, na vanua e dau tu kina nodra itikotiko na veikalou eso. Ko Aceni na koro turaga kei Atika e Kirisi ena gauna e liu ia ena gauna ni Veiyalayalati Vou e tu ena yasana ko Akaia e Roma. A vakayacani me vakarokorokotaki kina na kalou yalewa ni Kirisi ko Aceni. Sa yali vei Aceni e vuqa na ka a dau vaqoroqoroi ka vakacerecerei kina ena gauna e liu, ia era se tu ga kina na matakau kei na ivakananumi ni veikalou e vuqa, ka oka kina na “Kalou Tawakilai” (Cakacaka 17:23).
30. Korinica
O Korinica a koro liu ena yasana ko Akaia e Roma. A tu ena vanua qiqo ka semata na Peloponisese ki na yanuyanu levu ko Kirisi, ka tiko e dua na kena toba ena yasana ruarua ena tokalau kei na ra. Oqo e dua na koro ikelekele ni waqa vutuniyau ka veivakauqeti.
31. Efeso
Na icaca ni vale ni vakatasuasua ni Kirisi mai Efeso, na vanua a vunau kina na iApositolo ko Paula. Ena gauna ni Veiyalayalati Vou, a kilai levu ko Efeso ena vuravura me baleta na kena veivaletabu vakasakiti ka tara me vakananumi kina ko Taiana na kalou yalewa ni Roma. Ni sa mai rusa ena gauna oqo, ia ko Efeso a koroturaga ena dua na gauna ni yasana ko Esia e Roma ka vanua ni caka bisinisi levu. Era a rawata na matai ni siliva ena koro ko ya e dua na cakacaka vuavuai vinaka ena nodra volitaka na ivakatakarakara kei Daiana.
32. Na Yanuyanu ko Patimo
O Patimo e dua na yanuyanu ena Wasa Veimama ka a talai kina ko Joni (iVakata. 1:9). Me vaka na ivalavala vakavanua, a cakacaka tiko e kea ena qara ni ta vatu.