31. Efesas
Olfala mitingples blong Ol Man Gris long Efesas, ples we Aposol Pol i bin stap prij long hem. Long taem blong Niu Testeman, Efesas i bin popula raon long wol from naesfala tempol we oli bin bildim blong ona long giaman woman god blong Ol Man Rom, Daeana. Naoia, ples ia i olfala mo ol brokbrok samting nomo i stap long hem; be Efesas i bin kapitol blong provins blong Esia antap long rul blong Ol Man Rom, mo i bin wan bigfala senta blong mekem bisnis. Ol man blong wokem samting wetem silva we oli bin stap long siti ia, oli bin developem wan bisnis blong salem ol pikja blong Daeana, mo bisnis ia bin wok gud.
Ol Impoten Samting we oli bin Hapen: Aposol Pol i bin visitim Efesas kolosap long en blong nambatu misinari wokbaot blong hem (Wok 18:18–19). Long nambatri wokbaot blong hem, hem i bin stap long siti blong 2 yia. Hem i mas aot from bigfala toktok blong ol man we oli wokem bisnis long silva we oli stap lus long bisnis blong olgeta taem Pol i bin stap prij agensem wosip blong giaman woman god ia, Daeana (Wok 19:1, 10, 23–41; 20:1). Mitingples blong Efesas i bin ples we i bigwan evriwan we Ol Man Gris oli bin bildim, mo i bin ples we ol kompanion blong Pol oli bin fesem wan grup blong ol rabis man (Wok 19:29–31). Pol i bin raetem wan leta i go long ol memba blong Jos long Efesas long taem we oli holem hem i prisena long Rom. Wan long ol seven branj blong Jos long Esia we buk blong Revelesen i go long olgeta, i bin stap long Efesas (Rev 1:10–11; 2:1).