24. Kapaneam
Kapaneam i stap long Not saed solwota blong Lagun blong Galili; i bin senta blong seves blong Jisas long Galili (Mat 9:1–2; Mak 2:1–5). Hem i wan impoten mo gudfala senta blong salem fis mo mekem bisnis; hem i bin homples blong Ol Jentael, mo tu, Ol Jiu. Populesen blong ol fas handred yia, maet i neva bitim 1,000 pipol. Kapaneam i stap long medel blong ol impoten rod blong mekem bisnis, mo i gat ol rij graon raon long hem. Ol soldia blong Rom oli bin bildim ol haos blong swim, mo ol ples blong storem ol samting long ples ia. Nomata long plante merikel we i bin hapen long ples ia, plante taem, ol pipol oli sakemaot seves blong Sevya. From hemia, Jisas i sakem wan strong nogud tok long siti ia (Mat 11:20, 23–24). Wetem taem, Kapaneam i go go we i no gat samting long hem, mo ol man oli nomo stap long hem.
Ol Impoten Samting we oli bin Hapen: Kapaneam, oli save long hem tu olsem stret siti blong Sevya (Mat 9:1–2; Mak 2:1–5). Hem i bin wokem plante merikel long ples ia. Eksampol, Hem i hilim plante pipol (Mak 1:32–34), mo i hilim wokman blong wan kapten blong Rom (Luk 7:1–10), i hilim mama blong waef blong Pita (Mak 1:21, 29–31), man ia we ful bodi blong hem i nomo save muv, we oli slakem bed blong hem tru long wan ruf (Mak 2:1–12), mo man ia we han blong hem i nogud (Mat 12:9–13). Long ples ia tu Jisas i bin ronemaot plante devel spirit (Mak 1:21–28, 32–34), i mekem gel blong Jaeras i girap long ded (Mat 9:18–19, 23–26; Mak 5:22–24, 35–43), mo i bin givim toktok ia long saed blong bred we i givim laef insaed long haos blong prea long Kapaneam (Jon 6:24–59). Sevya i lidim Pita blong hukum wan fis long Lagun blong Galili, blong openem maot blong hem, mo faenem wan selen blong yusum blong pem takis wetem (Mat 17:24–27).