15. Jeriko
Foto ia i soem ol tri we oli stap gro tedei long Jeriko. Long taem bifo, hem i wan taon we stonwol i raonem vale blong Jodan Reva, 252 mita andanit long mak blong solwota. Hem i wan rif ples blong agrikalja, we ol pamtri mo bigfala lemon oli gro gud long hem. Biaen, i gat Hil blong Temtesen (Mat 4:1–11).
Ol Impoten Samting we oli bin Hapen: Kolosap long ples ia, Josua mo ol pikinini blong Isrel oli go krosem Jodan Reva blong fas taem, mo go long promes graon (Jos 2:1–3; 3:14–16). Long wan merikel, Lod i mekem ol wol ia oli foldaon long fored blong ol ami blong Ol Man Isrel (Jos 6; luk tu long Hib 11:30). Josua i sakem wan nogud strong tok long siti ia (Jos 6:26), we i bin kamtru (1 King 16:34). Elisa i hilim ol wota blong Jeriko (2 King 2:18–22). Sevya i bin pas tru long ples ia long las visit blong Hem i go long Jerusalem, i hilim blaen man ia Batimeas, mo i stap wetem Sakias, bos blong ol man blong tekem mane blong takis (Mak 10:46–52; Luk 18:35–43; 19:1–10). Rod we i aot long Jerusalem i go long Jeriko, oli tokbaot long parabol blong gudfala man Sameria (Luk 10:30–37). (Luk long GS Jeriko.)