28. Dan
Siti blong Dan, bifo olgeta oli bin stap singaotem Lejem (Jos 19:47) o Laes (Jajes 18:7, 14) bifo Ol Man Isrel oli bin tekova long graon ia. Ol springwota we oli stap long ples ia, wetem springwota long Sisaria Filipae, oli ol stamba ae blong wota blong Jodan Reva. Ples blong tempol blong Jeroboam i stap long foto ia.
Ol Impoten Samting we oli bin Hapen: Ebraham i sevem Lot (Jen 14:13–16). Traeb blong Dan i tekova long eria ia, mo givim nem ia, Dan (Jos 19:47–48). Jeroboam i setemap wan giaman tempol wetem wan buluk we oli wokem long gol, we i mekem se ol ten traeb we oli bin stap long Not oli bin foldaon (1 King 12:26–33). Dan i siti blong Isrel we i stap long Not saed evriwan—from hemia nao ol skripja oli tokbaot se graon blong Isrel, i stat long Bereseba i go kasem Dan (2 Kron 30:5; Bereseba i siti we i stap long Saot saed evriwan). (Luk long GS Dan.)