Mataupu 19

Mulimuli i le Perofeta Soifua

A o tatou usiusitai ai i le afioga a le Alii ua faaalia i le perofeta soifua, o le a tatou mauaina le saogalemu ma le fiafia i lenei lalolagi ma le faaeaina i le lalolagi a sau.

Mai le Soifuaga o Wilford Woodruff

Sa i le fale Elder Wilford Woodruff i se tasi aoauli ae ona maua le faamatalaga faapea o loo fia feiloai Peresitene Polika Iaga ia te ia i le Ofisa o le Tusi Talafaasolopito a le Ekalesia. Ina ua ia mauaina lenei talosaga mai le Peresitene o le Ekalesia, sa “malaga atu loa lava i le ofisa i le taimi lena”¹ ia Elder Woodruff, lea sa ia auauna ai o le Tusi Talafaasolopito Fesoasoani a le Ekalesia. Sa ia mulimuli ane tusia i lana tusi talaaga:

“Sa faapea mai Peresitene Iaga ia te au a o o’u ulufale atu, ‘O i ai ni au [solofanua]?” Sa ou fai atu ia te ia o loo i ai ni a’u tama’i solofanua. Sa ia talosaga mai pe mafai ona ou tuuina atu ia te ia. Sa ou le mautonu mo sina taimi puupuu ona ou fai atu lea, ‘O lea lava lau susuga, e mafai ona ou faia soo se mea lava o loo manaomia.’ Ona ia faapea mai lea, ‘E i ai a’u solofanua lelei lava ou te manao e avatu ma oe, a o e galue ai iinei.’ Sa ou matuai te’i lava i lea tulaga. O se mea ou te lei mafaufauina lava. Sa ou taliaina ia solofanua ma le agaga faafetai, e ui lava atonu ou te lei fai atu ai i lena taimi.”²

Ina ua mautonu Elder Woodruff e tuuina atu lana solofanua, sa faigofie lava ona filifili o ia e usitai i faatonuga a Peresitene Iaga; na te lei mafaufau i se taui mo lana galuega. Ae peitai, sa silafia e ia faamanuiaga e maua pe afai e mulimuli i le perofeta soifua. I nai masina na mavae atu sa ia folafola atu ai, “O le a tatalaina e le Alii le mafaufau o Uso Polika ma taitai atu o ia i le tele o aoaoga faavae e faatatau i le faaolataga o lenei nuu, ma e le mafai ona tatou tapunia o tatou mafaufau ma faapea o le a na o sina mamao tatou te o ai ona gata lea; o lenei mea e le mafai ona tatou faia e aunoa ma le afaina ai o lo tatou tulaga i luma o le Atua.”³

O lenei folafolaga sa ogatasi ma lona faamaoni mausali i Peresitene o le Ekalesia a o auauna o ia o se sui o le Korama o le Au Aposetolo e Toasefululua. Ina ua avea o ia ma Peresitene o le Ekalesia, sa ia molimau ai i lona tofiga paia ma faamautinoa atu i le Au Paia o le a taitaiina pea lava pea i latou e se perofeta soifua. Sa ia faapea atu:

“Ina ua tuuina mai e le Alii ki o le malo o le Atua, ki o le Perisitua Mekisateko, o le tofi faa-aposetolo, ma faamauina i luga o le ao o Iosefa Samita, sa Ia faamauina ia mea i luga o lona ulu ina ia tumau ai iinei i luga o le fogaeleele seia oo i le afio mai o le Atalii o le Tagata. Atonu na mafai ona faaupuina faapenei e Polika Iaga, “Ua iinei ki o le malo o le Atua.” Sa ia te ia seia oo lava i le aso o lona maliu. Ona tuuina atu lea i luga o se isi alii— o Peresitene Ioane Teila. Sa ia umia na ki seia oo lava ina maliu. Ona tuuina atu ai lea o ki o le malo i luga o le tagata na sosoo atu ai, o Wilford Woodruff, i le finagalo o le Atua.

“Ou te fai atu i le Au Paia o Aso e Gata Ai, ua iinei ki o le malo o le Atua, ma o le a tumau ai pea iinei, seia oo i le afio mai o le Atalii o le Tagata. Ia malamalama Isaraelu uma i lena mea. Atonu o le a le umi se taimi ou te umia ai ki, ona tuuina atu foi lea i luga o le ao o se isi Aposetolo, ma le isi e sosoo mai ia te ia, ma faaauau ai pea lava seia oo ina afio mai le Alii o Iesu Keriso i ao o le lagi.”⁴

Aoaoga a Wilford Woodruff

Mai aso o Atamu, sa faatuina ai e le Alii ia perofeta e pulea Lana Ekalesia ma lapatai i tagata o le lalolagi.

Na taitaiina e le Atua lenei Ekalesia mai lava i le amataga, e ala i perofeta ma alii musuia. O le a Ia taitaiina pea lava lenei Ekalesia seia oo i le iuga o le lalolagi.⁵

E lei i ai lava se ekalesia po o se nuu o le Atua, i soo se augatupulaga o le lalolagi, sa pulea ma taitaia se’i vagana ai e ala i faaaliga. Sa ia i latou perofeta soifua a le Atua—o e sa umiaina ki o le malo, ma sa manaomia lo latou mauaina o faaaliga e fesoasoani ia i latou i a latou galuega uma.⁶

E lei i ai lava se augatupulaga ua tatou iloaina ua tuuina mai i ai e le Alii se faamasinoga i luga sei vagana ua ia faatuina mai ni perofeta ma ni alii musuia e lapataia tagata o le lalolagi. O le auala lea sa feutagai ai le Alii ma tagata mai aso o le Tama ia Atamu e oo mai lava i le taimi nei.⁷

O perofeta soifua, e faaalia mai i ai e le Alii Lona finagalo mo le Ekalesia ma taitaiina i tatou i le ala e tau atu i le ola e faavavau.

Sa aoaoina i tatou e le Alii… faapea e le afaina pe fetalai mai o ia mai le lagi i lona lava siufofoga, pe ala i le auaunaga a agelu, pe ala mai i fofoga o ana auauna pe a uunaia i latou e le Agaga Paia, o le mafaufau lava lea ma le finagalo o le Atua [tagai i le MFF 1:38].⁸

O le tulafono a le Atua o loo i fofoga o i latou o e ua faatulagaina e taitaiina i tatou.⁹

Ana faapea e i o tatou luma faaaliga uma ua tuuina mai e le Atua i tagata; ana faapea e ia i tatou le Tusi a Enoka; ana faapea e i o tatou luma ia papatusi e lei faaliliuina i le gagana Peretania; ana faapea o ia i tatou faamaumauga a Ioane le Talifaaaliga ia sa faamaufaailogaina, ma isi uma faaaliga, ma faaputu ai iinei sei oo i se selau futu le maualuga, o le a le mafai ona tupu le ekalesia ma le malo o le Atua, i lenei tupulaga po o nisi lava augatupulaga o le lalolagi, e aunoa ma ni perofeta soifua a le Atua.¹⁰

O loo ia i tatou faaaliga. E moni, e lei toe lomiaina lava e taitai o lenei Ekalesia ni faaaliga se tele talu ona maliu le Perofeta o Iosefa Samita. Sa auina mai e le Perofeta o Iosefa Samita le Tusi o Mataupu Faavae ma Feagaiga, ma o se tusi maoae o faaaliga—o se tasi o faamaumauga matua silisili ona mamalu ua tuuina mai e le Atua i tagata i le lalolagi. Ae ou te fia faapea atu e lei faapea na soifua Uso Polika Iaga e aunoa ma ni faaaliga. Sa ia te ia faaaliga i taimi uma lava. Sa le mafai ona galue o ia e aunoa ma [faaaliga]; e lei mafai e ia ona aoao atu pe faia le finagalo o le Atua e aunoa ma [faaaliga]. E le mafai foi e se isi alii ona tulai mai i lena tofiga. E le faatagaina e le Alii se tagata e tu mai i le ulu o lenei Ekalesia vagana o loo pulea ma faatonutonuina o ia e ala i faaaliga. O i tatou o ni mea faigaluega vaivai—o anufe faatauvaa o le eleele; ae ua filifilia e le Atua mea vaivai o le lalolagi e faafememeaiina ai e popoto, ma atiina ae Lana Siona, ma ua Ia tuuina mai faaaliga ma faailoa mai ia i tatou Lona mafaufau ma Lona finagalo.¹¹

E ese lava lo tatou tulaga mai le lalolagi; e i ai so tatou auala autu o loo maua mai ai lo tatou malamalama, poto ma faamanuiaga. … E mafai ona e aveina tagata sili ona popoto ua maua mai i taleni ma aoaoga ma tuu i latou i le ekalesia a le Atua, ma e le mafai lava ona sili atu i latou nai lo lo latou taitai. O lo latou poto o le a liua e avea ma mea faavalea. Aisea? Aua e lei valaauina i latou e taitai. Ae afai e lei aoaoina lava se tagata i se mataitusi o se tusi, ae valaauina o ia e le Alii e taitai le ekalesia ma le malo o le Atua, o le a Ia tuuina atu ia te ia le mana e faia ai. Ua maea ona tuuina mai i o tatou luma nei lesona i lea aso ma lea aso, ma valaau mai ia i tatou ina ia lotogatasi, ma ia tasi o tatou loto e pei o le loto o le tagata e toatasi, ina ia tuufaatasia ai a tatou tatalo ma a tatou galuega i se autu e tasi i le faataunuuina o fautuaga a lo tatou taitai.

O le a taitaiina e le Alii [le Peresitene o le Ekalesia] i le mea e finagalo i ai o ia e alu i ai. Tatou te iloa o loo faatasi le Atua ma ia, ma o loo Ia taitaiina o ia i taimi uma. … E manaomia ai e [le perofeta] ona tau mai ia i tatou po o le a le mea e sa’o ae o le a le mea e sese i le tele o mea, aua o lona tulaga ma lona valaauga lena. … O loo i ai se fesootaiga atoatoa i le va o le Alii ma ia, lea o loo maua mai ai lona malamalama, lea o loo faasalalauina atu e ala i isi auala ina ia oo atu ai i tagata. O loo tatou iloa le mea lena. Ua matua tatau lava ona tatou faaaogaina ma faatinoina lenei malamalama.¹²

O le a le faatagaina lava a’u e le Alii po o se isi lava alii e tu o se Peresitene o lenei Ekalesia e taitaieseina outou. E le o i ai i le polokalama. E le o i ai i le finagalo o le Atua. A faapea ou te taumafaia lena mea, o le a aveesea a’u e le Alii mai lo’u tulaga.¹³

Ou te faamoemoe o le a tatou mulimuli uma lava i le ala ua faataatia mai e auauna a le Alii mo i tatou, aua afai tatou te faia lea ou te iloa o le a saogalemu i tatou i lenei lalolagi, ma faamautuina le fiafia ma le faaeaina i le lalolagi a sau. … Afai tatou te faatuatua o le a taitaiina i tatou i le ala o le ola, ma afai lava tatou te faatuatua e talitonu i a latou faatonuga, i aoaoga a le Agaga Paia e ala mai ia i latou, o le a tatou i ai pea i le ala saogalemu, ma o le a tatou mautinoa lo tatou taui.¹⁴

Tatou te lagolagoina le perofeta soifua ma isi taitai o le Ekalesia e ala i le tatalo mo i latou ma le mulimuli i a latou fautuaga.

O a’u ma isi tamalii, le au aposetolo, ma isi o loo ua valaauina e galulue i le suafa o le Alii e manaomia tele le faatuatua ma tatalo a le Au Paia o Aso e Gata Ai.¹⁵

A o o’u ola ou te manao ou te faamaoni ma ou faatuatua i lo’u Atua ma le Au Paia. O se tasi o faamanuiaga sili a le Atua ia te a’u o le moni o le tulaga o lo matou i ai ma o’u fesoasoani i loto o le Au Paia o Aso e Gata Ai, ma ou te lagonaina le agaga o le lotomaualalo i luma o le Alii mo lenei mea. Matou te iloa o loo outou tatalo mo i matou. Matou te iloa tou te faaaloalo ia i matou. Matou te ola i luga o lenei aoaoga faavae. … O le Alii ua “filifilia mea vaivai a le lalolagi e faamaina ai mea malolosi; atoa ma mea e leai, ina ia faaleaogaina e ia mea o i ai.” [Tagai i le 1 Korinito 1:27–28.] Matou te lagonaina lo matou vaivai. Ou te moomoo lava a’u maimau pe ana sili atu a’u nai lo le mea o loo o’u i ai. E moni lava, o loo o’u taumafai e faia le mea sili ou te mafaia i a’u auala vaivai. Ou te moomoo pea e faia faapena. Ae ou te faalagolago i le Alii ma tatalo a le Au Paia, e faapena foi la’u usoga.¹⁶

Ou te faamoemoe o le a lagonaina e o’u uso ma tuafafine i o latou loto ina ia lagolagoina le Au Peresitene o lenei Ekalesia e ala i lo latou faatuatua, o a latou galuega, ma tatalo, ma ia aua nei tuuina atu latou te tauaveina uma le avega, a o tatou lalafi i tua. Afai tatou te faia faapea tatou te le o agavaa, tatou te le o agavaa mo o tatou tulaga o ni Toeaiina o Isaraelu, ma tama ma tina i Isaraelu. Ia tatou taitoatasi ma tauave la tatou vaega; ma afai tatou te faasa’oina o tatou sese, ma faatulaga lelei o tatou aiga, ma faia le mea sa’o, o le a tatou faia se mea lelei, ma fesoasoani e siitia le avega o loo taatia mai i luga o i latou o loo taitai. … O se tulaga faanoanoa tele i le [Peresitene o le Ekalesia] pe a tagai atu i tagata o loo faatamala i le tuliloaina lea o lo latou ala lea e tau atu i le faafanoga; pe a latou le naunau e faaaoga ana fautuaga ma tumau i mataupu faavae na te aoaoina atu; ae a vaai atu o ia i tagata o loo naunau e usitaia fautuaga matagofie, ma galulue e faapaiaina i latou lava i luma o le Alii, na te lagonaina lona faamalosiauina ma lona lagolagoina.¹⁷

E le tatau ona tatou manatu mama i fautuaga mai le Peresitene o le Ekalesia.

A oo ina musuia e le Alii tagata ma auina mai i latou i soo se tupulaga, na te faamasinoina lena tupulaga i le auala na latou taliaina ai le molimau a ana auauna.¹⁸

E matua tatau lava ona faaaogaina e tagata uma o le Ekalesia o latou mana o le fetuunai ma le tomanatu, ma ia atoatoa ona malamalama i le mafuaaga e tatau ai ona latou mulimulitai i le ala ua faasino mai e le Atua. O le usiusitai ma le poto o Lana Au Paia o loo finagalo i ai lo tatou Tama oi le Lagi. Ua ia tuuina mai lo tatou saolotoga e mafaufau ma gaoioi ai mo i tatou lava, i luga o la tatou lava filifiliga, ina ia maua ai se molimau mai ia te Ia e uiga i le moni o aoaoga faavae o loo Ia aoaoina mai, ona mausali ai lea ma le le maluelue i le faatinoina o mea uma lava e tatau ai mo le faaolataga.¹⁹

O lo tatou avanoa lo tatou ola ina ia maua le Agaga o le Atua e molimau mai i le moni o soo se faaaliga e aumai mai le Atua e ala mai i le fofoga o Lana perofeta o loo taitaia Ona tagata, ma o loo avea pea ma se vaega taua ia te a’u pe a oo ina tuuina mai e le perofeta o loo taitai se mataupu faavae po o se aoaoga faavae pe faapea mai “ua fetalai mai ai le Alii” ia ou mautinoa atoatoa ou te taliaina e tusa lava pe feteenai ma la’u aganuu po o o’u manatu, e ala i lo’u malie atoatoa o loo faaalia mai e le Alii le upumoni i Lana perofeta o le ua Ia valaauina e taitaia Lana Ekalesia a o lei faaalia maia e Ia ia te a’u. Ma o afioga a le Alii e ala mai i lana perofeta o le gataaga lena o le Tulafono ia te a’u.²⁰

Ou te fia faapea atu i o’u uso ma tuafafine [o le Peresitene o le Ekalesia] o lo tatou taitai, o ia o lo tatou faitulafono i le Ekalesia ma le Malo o le Atua. Ua valaauina o ia i lenei tofi; o lana aia le ta’u mai i lenei nuu o le mea e fai, ma o lo tatou tiute le usitai i le fautuaga na te tuuina mai i le taimi nei i uso ma tuafafine. O i tatou, o se nuu, e le tatau ona tatou tuumamaina lenei fautuaga, aua o le a ou ta’uina atu ia te outou i le suafa o le Alii, ma sa ou vaavaaia mai lava i le taimi sa avea ai a’u ma tagata o lenei Ekalesia, e leai lava se tagata e faatuiese i fautuaga a le ua i ai le pule e taitaia ai lenei nuu e manuia, ma e leai lava se tagata faapena e manuia.²¹

E tusa ai ma tu masani anamua, ua tatou iloaina ai o [leoleo mamoe] sa masani lava ona o atu ma saunia le ala, ina ia iloa ai muamua e le o i ai se tulaga leaga, ae afai o i ai, o le a iloa lelei lava e le leoleo mamoe ina ia vave ona laveaiina mamoe. Afai e faatagaina [mamoe] e tamomoe ane ma o atu i luma o le leoleo mamoe, e ono pueina i latou e luko ma faaumatia i latou, ma o le taimi foi e taumafai ai tagata o lenei malo e tamomoe i luma ma le usitaia o latou taitai, e le afaina po o le a le tulaga, o le taimi lava latou te faia ai lenei mea ua lamatia i latou i le faatamaiaina e luko.

O se mataupu lenei sa ou manatunatu mamafa tele i ai, ma ua ou mauaina na o se malamalamaaga aoga itiiti mai o’u aafiaga e ala i le vaavaai i amioga a tagata, ma i lo’u olaga atoa, ou te leiloaina ua i ai se taimi e sese ai, afai e faatuiese tagata i le fautuaga a o latou taitai, … e saisaitia lava i latou i taimi uma i faafitauli ma mafatia i lo latou faia o lea mea.

O lenei o le a lava se mea sa ou mauaina e ala i aoaoga, e ala i le sailiili ma le suesue i le faatufugaga ma le faasaienisi faaletagata, po o a lava ni aoaoga faavae atonu sa ou punouai i ai i le taimi o a’u sailiiliga faasaienisi, ae afai e ta’u mai e le perofeta a le Atua faapea o sea aoaoga faavae patino, po o se talitonuga sa mafai ona ou aoaoina faapea e le moni, ou te le popole lava po o a ni o’u manatu sa i ai, e tatau lava ona ou mafaufau o lo’u tiute, le lafoaiese o lea aoaoga faavae po o lea talitonuga pe a fautuaina a’u e lo’u taitai. …

Ua ou vaai i tagata i aso o Iosefa ua latou aumaia ni mataupu faavae, ma faitau ma aoao atu, ma fautuaina atu ni talitonuga ae o loo faapea mai le perofeta “e le sa’o le faia o lea mea, e le moni ia mea.” Ae sa finau atu pea na tagata, ma faatumauina lo latou talitonuga, ma latou tusia ni tusi e puipuia ai o latou talitonuga ae ua aoaiina i latou e le perofeta, ona latou fai mai lea “e leai so matou faatuatua i ou talitonuga, po o le faiga ua e aumaia.”

O le taimi lava e faia ai e se tagata lenei mea ua ia faatuiese i le auauna a le Atua o le ua faatuina e taitaia le ala e tau atu i le ola ma le faaolataga. O le tasi lenei o mea e tatau ona matuai aloese mai ai Toeaiina. O le mea moni lava o loo i ai le tele o mea o loo aoaoina mai i le atiina ae o lenei malo e pei e uiga ese ia i tatou, ona e feteenai ma a tatou aganuu, ma o loo faia e tofotofoina ai tagata. Sa faaaogaina e Uso Iosefa le tele o metotia e tofotofoina ai le faamaoni o tagata, ma sa ia aoao atu le tele o mea maoae ona o se taunuuga o aganuu e moomia ai le tatalo, faatuatua ma se molimau mai le Alii a o lei mafai ona talitonuina e le toatele o le Au Paia. …

Ou te faapea atu e faatatau i le faatuiese i soo se tasi ua tofia e taitaia i tatou, e le tatau lava ona tatou faia, ma e ou te le popole po o a lava ni o tatou lagona ma manatu e uiga i lea mataupu e tusa ai ma a tatou aganuu ma aoaoga.

Afai e i ai se mea e fia faaalia mai e le Atua, o le a ia faaalia mai i lena tamalii o le ua faauluulu i ai. … E leai lava se isi fuafuaga, e leai foi se isi faiga e taitaia ma puleaina ai tagata o lenei malo, ua na o lena lava ua uma ona faavaeina e ala i faaaliga a le Atua e ala i le faatulagaga o Lana ekalesia ma le malo, ma o le mea lena a le taitai e fai, sa fautuaina ma puleaina tisipenisione uma lea na faaalia mai ai le finagalo o le Atua i tagata.²²

Fautuaga mo Suesuega ma le Aoaoina Atu

Mafaufau i manatu nei a o e suesueina le mataupu po o lou sauniuni foi e aoao atu. Mo fesoasoaniga faaopoopo, tagai i itulau v–ix.

O a ni mataupu faavae e mafai ona tatou aoaoina mai le tala o loo i le itulau e 203.
O a tiutetauave o perofeta? (Tagai i itulau 205–207.) E faapefea ona faataunuuina e le Peresitene o loo i ai nei o le Ekalesia nei tiutetauave?
Toe iloilo atoa le parakalafa lona tolu i le itulau e 206. Aisea e sili ai ona taua le taitaia e se perofeta soifua nai lo le i ai o faamaumauga a perofeta anamua?
Toe iloilo atoa le parakalafa lona lua i le itulau e 207. E faapefea ona fesoasoani lenei faamautinoaga ia te oe?
O le a se mea e mafai ona tatou faia e lagolagoina ma sapasapaia ai le Peresitene o le Ekalesia? (Tagai i itulau e 208–211.) Mafaufau po o le a se mea o loo e faia e oe lava ia e lagolagoina ai le perofeta soifua.
O le a se fautuaga ua tatou maua mai le Peresitene o loo i ai nei o le Ekalesia? O le a se mea ua e faia e mulimuli ai i lena fautuaga? O a ni faamanuiaga ua e mauaina o se taunuuga o lou usiusitai?
O a ni lapataiga sa tuuina atu e Peresitene Woodruff ia i latou o e teena pe le amanaiaina ia upu a le perofeta soifua? (Tagai i le itulau e 211.)
Faitau atoa le parakalafa lona lua i le itulau e 209. O le a se mea ua e aoaoina mai i le faaupuga “usitai ma le poto”?
E faapefea ona tatou aoaoina fanau ina ia lagolagoina le Peresitene o le Ekalesia?

Mau E Faatatau I Ai: Amosa 3:7; Mataio 10:41; 1 Tesalonia 5:25; Mosaea 2:7–9; MFF 21:4–7; 28:6–7; 43:1–3; 107:22