Wase 24

Muri ni iVakaraitaki i Jisu Karisito

“Sa dodonu ena veimadigi kecega meda tarogi keda, ‘Na cava ena cakava o Jisu?’ ka qai doudou mo cakacaka ena isau ni taro.”

Mai na Bula nei Howard W. Hunter

A kaya o Peresitedi Thomas S. Monson, ka a veiqaravi vaka ikarua ni daunivakasala vei Peresitedi Hunter, ni o koya a “bula me vaka a veivakatavulici, vakataka na ivalavala ni iVakabula a qarava o koya.”¹

A raica e dua na itokani voleka ni “ivakarau ni bula a okati mai vua na noda Turaga ka iVakabula, o Jisu Karisito, a bulataka vinaka sara ena bula maqosa ka tawananumi koya o Peresitedi Hunter. Era nona itokani kecega na veimatatamata.”²

A kaya e dua tale na ivakalesilesi ka a cakacaka veivolekati sara kei Peresitedi Hunter me sivia na tolusagavulu na yabaki, “A kila sara ga [o koya] vakataki koya na gaunisala me na muria. Na gaunisala o ya me sa na vakamurimuria na ivakarau ni bula ni nona iVakabula o Jisu Karisito.”³

Ena nona ilesilesi taucoko, a vakayaloqaqataki ira na lewe ni Lotu o Peresitedi Hunter ena yalololoma mera muria na ivakaraitaki ni iVakabula. Ena imatai ni nona vosa vaka Peresitedi ni Lotu, a kaya okoya:

“Au na sureti ira taucoko na lewe ni Lotu mera tiko ena kauwai vakalevu cake ki na bula kei na ivakaraitaki ni Turaga o Jisu Karisito, vakauasivi na loloma kei na nuinui kei na veikauwaitaki a vakaraitaka o Koya.

“Au masuta ni da na veikauwaitaki vakaikeda ena yalololoma e levu cake, na veidokai e levu cake, na yalomalumalumu kei na yalomalua kei na veivosoti e levu cake. Sa tiko vei keda na nanamaki cere me baleti keda vakayadua, ka da rawa ni cakavinaka taucoko. Sa tagica tu na noda vuravura e levu cake na bula vakaivakarau ena bulataki na ivunau ni Kalou. Ia na sala meda vakayaloqaqataka kina, me vaka a tukuna na Turaga vua na Parofita o Josefa ena boto ni yasana batabata ni Valeniveivesu e Liberty, o ya ’ena veivakauqeti, na vosota vakadede, na yalomalua, na yalomalumalumu, kei na loloma e sega ni veivakaisini; … ka sega [kina] na veivakaisini kei na lawaki’ (V&V 121:41–42).”⁴

“Kevaka meda na muria na ivakaraitaki i Karisito ka muria na mawe ni yavana, sa dodonu meda vaqara ni cakava na veika vataga sa vakataka na ivalavala sa tuva tu o koya.”

iVakavuvuli nei Howard W. Hunter

A tuva o Jisu Karisito na ivakaraitaki vinaka sara me baleti keda.

Mo dua na rarama sa ikoya mo na dua na daunivakaraitaki—dua ka virikotora na ivakaraitaki ka sa dua na idewadewa mera muria tale eso. … [Eda sa veiyalayalati] meda muri Karisito, na daunivakaraitaki levu. Sa noda na itavi meda vulica mai vua, na veika a vakatavulica kei na veika a cakava donuya na nona ilesilesi e vuravura. Na kena vulici rawa na veilesoni oqo, eda sa vakaroti meda muria na nona ivakaraitaki, ka sa ikoya oqo na ivakaraitaki eso sa tuva o koya vei keda:

1 O Karisito a talairawarawa ka yaloqaqa ena bula taumada, ka rawata kina na madigi me lako mai ka bula e vuravura ka ciqoma e dua na yago vakalewe ka vakasui.

2 A papitaiso o koya me rawa ni tadolavi kina na katuba ki na matanitu vakasilesitieli.

3 A taura tu o koya na matabete ka ciqoma na cakacaka tabu vakalotu taucoko ni veivakabulai kei na veisaututaki ni kosipeli.

4 A veiqaravi o Jisu me rauta e tolu na yabaki ena ilesilesi ni kena vakatavulici na kosipeli, tukuni ni ivakadinadina me baleta na ka dina, kei na nodra vakatavulici na tamata ena ka mera cakava mera kune reki kina kei na marau ena bula oqo kei na lagilagi tawamudu ena vuravura ka lako mai.

5 A qarava o koya na cakacaka tabu vakalotu okati kina na vakalougatataki ni gonelalai, papitaiso, veivakabulai vei ira na tauvimate, kei na veivakatikori ki na matabete.

6 A vakayaco cakamana o koya. Ena nona veivakaroti era a rai na mataboko, rogo na didivara, lade na lokiloki, ka ra vakaturi cake ki na bula na mate.

7 Ni vakamuri vata na nanuma kei na loma ni Tamana, a tikora o Jisu e dua na bula vinaka sara e tawacala ka rawata taucoko na ivakarau ni bula va-Kalou.

8 A ra-wa o koya na vuravura; oya ni, tarovi koya mai na veilasa kecega ka sa ulabaleta na ivakatabutubutu vakayago ka vakasisila me rawa ni tiko ka lako voli ena veituberi ni Yalotabu.

9 A mai vakayacora o koya na Veisorovaki, ka sa sereki ira kina na tamata mai na mate [vakayalo ka vakayago] ka a vu mai na lutu i Atama.

10 Oqo, ni sa tucaketale ka vakalagilagi, e sa rawata taucoko o koya na kaukauwa e lomalagi kei vuravura, sa ciqoma na taucoko ka sa duavata kei na Tamana.

Kevaka meda na muria na ivakaraitaki i Karisito ka muria na we ni yavana, sa dodonu meda vaqara ni cakava na veika vataga sa vakataka na ivalavala sa tuva tu o koya.⁵

E sa ka bibi me nanumi ni o Jisu a rawa ni valavala ca, ni a rawa ni rawai, ni a rawa ni vakacalai na yavu ni bula kei na veivakabulai, ia a tokadei ka dina tu ga o koya. Kevaka me a sega ni rawa na nona veivakadonui ki na veibacani nei Setani, ke a sega ni dua na veivakatovolei dina sara, e sega na qaqa dodonu ena kena vatuka. Kevaka me a kautani vua na dodonu me valavala ca, sa na rawa ni a kautani vua na nona digidigi saraga. Sa ikoya ka a lako mai me taqomaka ka vakadeitaka na digidigi ni tamata. Sa dodonu me na matai ka rawata voli o koya me valavala ca kevaka me a lomana taumada me cakava.⁶

Ki na icavacava sara ni nona bula vakayago, o Jisu a vakatakarakarataka voli na vakaturaga ni yalona kei na rabailevu ni nona kaukauwa. O koya a sega, ena aua bera madaga oqo, ni luvuci vakocokoco ena nona rarawa vakaikoya se vakananuma voli na mosi veivakarerei. A sa vakaogai koya voli ki na nodra gagadre oqo ka vakakina mai muri na nona imuri daulomani. A kila o koya na nodra bula taqomaki, vakayadua ka vaka ena lotu, e koto duadua ga ena nodra loloma tawavakaiyalayala vakaiira. Na nona igu taucoko e sa vaka me vagolei ki na nodra gagadre, ka sa mai vakatavulici ena ivakaraitaki na ka a vakatavulica voli ena ivakavuvuli. A solia vei ira o koya na vosa eso ni veivakacegui kei na ivunau kei na ivakasala.⁷

Donuya ruarua na nona ilesilesi vakayago ena kedra maliwa na nona qelenisipi ena Vanua Tabu kei na nona ilesilesi vakayago emuri ena kedra maliwa na nona sipi veiseyaki ena Yasayasa Vakara, a vakaraitaka na Turaga na nona loloma kei na kauwai me baleta na tamata.

Ena veisugusugu ni lewevuqa, a vakila o koya na tatara duatani ni dua na marama ka a qara veivuke me baleta e dua na mate ka a tauvi koya voli mai ena loma ni tinikarua na yabaki. (Raica na Luke 8:43–48.) Ena dua tale na gauna, a raica curuma o koya na rai vovodea ni lewa vakatani ni dua na ilawalawa veivakacacani kei na cakacala nei koya ka a duri beitaki tu. Rairai ena nona vakila voli ni sa lomana dina me veivutuni, a digitaka o Karisito me raica na yaga ni [marama oya] ka talai koya yani me kakua ni valavala ca tale. (Raica na Joni 8:1–11.) Ena dua tale na gauna, “a sa keveti ira yadua na gone lalai ka vakalougatataki ira, ka masulaki ira vei Tamana.” (3 Nif. 17:21; vakuri ena vosa kala.)

Ni sa yaco kusarawa mai na veivakatovolei ni Kecisemani kei Kalivari, ka mai bikai tu vakabibi na nona vakasama, a taura na gauna na iVakabula me siqema na yada ni biuta voli yani na nona ilavo lailai. (Raica na Marika 12:41–44.) Vakaoya, na nona wadra a toboka na ituvaki lailai kei Sakiusa ka, sega ni raica rawa baleta na iwiliwili ni tamata era soqova wavolita voli na Turaga, a kabata e dua na vu ni lolo me raica kina na Luve ni Kalou. (Raica na Luke 19:1–5.) Ni a rube mosi voli ena kauveilatai, a raibaleta o koya na nona vakararawataki vakaikoya ka sudra yani ena kauwai veinanumi ki na marama tagi voli ka a soli bula kivua. (Raica na Joni 19:25–27.)

Sa dua dina na ivakaraitaki totoka kivei keda meda muria! Ena loma sara madaga ni noda rarawa levu kei na mosi, a sudra yani na noda Daunivakaraitaki me vakalougatataki ira tale eso. … Na nona bula a sega ni vakanamata ena veika e sega ni tu vua. E sa dua na bula ni sudra yani ena veiqaravi kivei ira tale eso.⁸

Me da sa muria na Luve ni Kalou ena sala kei na ilakolako taucoko ni bula.

Dua vei ira na taro bibi sara a bau tarogi vei ira na tamata vakayago a tarogi sara ga mai vua na Luve ni Kalou, na iVakabula kei vuravura. Ki na dua na ilawalawa ni tisaipeli ena Vuravura Vou, na ilawalawa ka lomaleqataka mera vakatavulici mai vua ka qai lomaleqa vakalevu cake baleta ni sa na vakarau biuta ira o koya, a taroga, “Ia a cava na ivalavala sa kilikili kei kemudou?” Ena icegu vata ga a solia na isaunitaro oqo o koya: “Mo dou vakataki au” (3 Nif. 27:27).

Sa sinai na vuravura ena tamata e sa lomadra voli mera tukuna vei keda, “Cakava me vaka au sa kaya.” Vakaidina sa sega ni lailai vei keda o ira na dausoli vakasala ena ulutaga cavaga e kilai rawa. Ia e tiko vei keda e lailai sara ka ra sa vakarau tu me kaya, “Cakava me vaka au sa cakava.” Ka, sa dina sara, e Dua ga ena itukutuku makawa ni tamata tabu yani sa rawa ni tukuna vakadodonu ka vakamaqosa na vosa oya. Na itukutuku makawa e vakarautaka e vuqa na ivakaraitaki vinaka ni turaga kei na marama, ia o ira sara madaga na tamata vakayago vinaka sara era sa luluqa ena so na sala se duatani. Sega ni dua e rawa ni veiqaravi vaka-ivakaraitaki vinaka sara se vaka e dua na ivalavala tudei me muri, se vakacava sara na kedra inaki vuni maqosa.

Sa rawa duadua ga me noda ivakaraitaki o Karisito, na noda “kalokalo ivolasiga” (Vakata. 22:16). O koya ga e rawa ni kaya ka sega na kena veitalanoa, “Muri au, vuli vei au, [ka] kitaka na ka kecega dou sa raica ni’u sa kitaka. Gunuva na mequ wai ka kania na kequ madrai. Oi au na sala, kei na vu ni dina, kei na vu ni bula. Ko i au na vu ni vunau kei na rarama. Rai mai kivei au ka ko na bula. Dou veilomani me vaka au sa lomani kemudou” (raica na Mac. 11:29; 16:24; Joni 4:13–14; 6:35, 51; 7:37; 13:34; 14:6; 3 Nif. 15:9; 27:21).

Io, sa dua dina na kaci matata ka rogoyawa! Sa dua dina na veivakadeitaki ka ivakaraitaki ena dua na siga tawaveivakadeitaki kei na yali ni ivakaraitaki. …

… Sa dodonu me da vakavinavinaka ni sa tala mai na Kalou na Luvena e Duabauga ki vuravura … me tuva e dua na ivakaraitaki vinaka sara ena bulataki ni dodonu, ni yalovinaka kei na loloma veivueti kei na veikauwaitaki, me rawa ni da kila na vo ni tamata kece sara na iwalewale meda bula kina, kila na iwalewale meda vakavinakataki keda kina, ka kila na iwalewale meda bula va-kalou cake kina.

Me da sa muria na Luve ni Kalou ena sala taucoko kei na ilakolako taucoko ni bula. Me da sa tauri koya me noda daunivakaraitaki ka noda dauveituberi. Sa dodonu meda tarogi keda ena veimadigi kecega, ‘Na cava ena cakava o Jisu?’ ka qai mai tu vakadoudou voli mo cakacakataka na isau ni taro…Sa dodonu meda muri Karisito, ena vakasama uasivi duadua ni vosa oya. Sa dodonu meda qarava voli na nona cakacaka me vaka a qarava voli o koya na cakacaka i Tamana. Sa dodonu meda tovolea me vakataki koya, me vaka era dau lagata na gone ena Lalai, “Try, try, try” (Children’s Songbook, p. 55). Ki na kena levu e vakatarai kina na noda kaukauwa vakayago, sa dodonu meda saga vakataucoko meda vakataki Karisito—na ivakaraitaki ni dua e sa vinaka sara ka tawacala e se qai bau raica na vuravura oqo.⁹

Dau vakawasoma e donuya na qaravitavi vakayago ni noda Turaga me solia o koya e dua na veikacivi ka sa yaco ena gauna oya me dua na veisureti kei na bolebole. Kivei Pita kei na tacina o Adriu, a kaya na Karisito, “Drau muri au mai, ka’u na qisi kemudrau mo drau gonedau ni tamata.” (Mac. 4:19.) Ki na cauravou vutuniyau ka a taroga se cava na ka vinaka me kitaka me rawata kina na bula tawamudu, a sauma o Jisu, “Mo lako mo volitaka na nomui yau, ka solia vei ira sa dravudravua … ia mo lako mai mo muri au.” (Mac. 19:21.) Ka sa kaya kivei keda yadua o Jisu, “Kevaka sa qaravi au e dua, me muri au ga.” (Joni 12:26.)¹⁰

Me da sa vulica na ivakavuvuli taucoko ni Vakavuvuli ka soli keda vakataucoko sara ki na nona ivakaraitaki. Sa solia vei keda o koya “na ka kecega sa yaga ena noda bula kei na lotu talega.” O koya sa “kacivi keda ki na vanua vakaiukuuku kei nai valavala vinaka” ka sa “soli kina vei keda na vosa ni yalayala e levu sara ka talei: [me da] rawata kina na ka sa vakalou” (2 Pit. 1:3–4).¹¹

O ira na muri Karisito era vakasaqara ni muria na nona ivakaraitaki. Na nona vakararawataki ena vuku ni noda ivalavala ca, tawadodonu, yaluma, kei na mate tauvi eso sa dodonu me vakayaloqaqataki keda ni sudra yani vakatautauvata ena loloma cecere kei na veikauwaitaki kivei ira na wavoliti keda. …

… Vakasaqara na madigi eso ni veiqaravi. Kakua ni kauwaitaka soti na itutu. O nanuma lesu li na ivakasala ni iVakabula me baleti ira na vakasaqara nai “tikotiko ni qase” se nai “tikotiko vakaturaga”? “Ia ko koya sa uasivi cake vei kemudou me nomudou tamata ko koya.” (Mac. 23:6, 11.) Sa ka bibi meda taleitaki. Ia na noda rai sa dodonu me toka ena yalododonu, sega ni veivakatakilai; ena veiqaravi, sega ni itutu. Na dauveisiko yalodina, ka dau cakava galugalu ga na nona cakacaka ena veivula, e sa bibi vataga ki na cakacaka ni Turaga me vakataki ira na taura tu na ka era raica eso me itutu cecere cake ena Lotu. Na veika raici e sega ni veiraurau ki na ka yaga.¹²

Dua na sala eda rawa ni vakatauvatana kina na noda bula vata na ivakaraitaki ni iVakabula oya me muri na Nona ivakaro kivei Pita: “Vakani ira na noqu lami. … Vakani ira na noqu sipi” (Joni 21:15–17).

Na noda vakabulai sa vakatau ki na noda tutaka na muri ni iVakabula.

Na veisureti ni Turaga meda muri koya e sa ka vakayadua ka vakaikeda, ka sa ka vakatubuoca. Eda sega ni rawa ni duri vakadua tu ena tadrua ni rua na vakasama. O keda vakayadua eda na sotava ena dua na gauna na taro veivaqaqai, “Ia dou sa kaya se ko cei koi au?“ (Mac. 16:15.) Na noda vakabulai vakaikeda sa vakatau ena noda isaunitaro ki na taro oya kei na noda tutaka na isaunitaro oya. Na isaunitaro vakatakilai nei Pita oya “Oi kemuni na Karisito, na Luve ni Kalou bula” (Mac. 16:16). Levu sara na ivakadinadina e rawa ni sauma na isaunitaro ena kaukauwa vataga, ka sa oka vata kei na vakavinavinaka yalomalumalumu. Ia sa dodonu meda dui sauma yadua na taro me baleti keda—ke sega ni oqo, qai malua; ni ena icavacava ni siga, ena tekiduru na duru vakayadua ka vakatusa na yame kecega ni o Jisu na Karisito. Na noda bolebole oya me saumi vakadodonu ka bulataki voli ni bera ni silimi vakatawamudu na gaunidali. Me vaka ni sa Karisito vakaidina o Jisu, na cava sa dodonu meda cakava?

Na veisorovaki cecere i Karisito sa rawa duadua ga ni vakavotukana taucoko ena noda bula ni da vakadonuya na veisureti meda muri koya [raica na V&V 100:2]. Na kaci oqo e sega ni tawayaga, tawadinati, se tawarawa. Me muri e dua na tamata sa kena ibalebale mo vakaraici koya se vakarogoci koya voleka; mo ciqoma na nona dodonu ni vakatulewa, mo vakatokai koya me dua na iliuliu, ka talairawarawa vua; mo tokona ka tutaka na nona nanuma eso; ka vakatokai koya me dua na ivakatakarakara. Sa rawa ni da vakadonuya vakayadua na bolebole oqo. A kaya o Pita, “Ni sa vosota talega na Karisito na rarawa ena vukumudou, a sa laiva vei kemudou na ivakarau, mo dou muria na we ni yavana” (1 Pit. 2:21). Me vaka ni ivakavuvuli eso e sega ni salavata na ivunau i Karisito e ka lasu, sa vakakina na kena vagolei vakatani na bula e sega ni salavata na ivakaraitaki i Karisito, ka na rairai sega ni rawata na icavacava cecere me yacova. …

Na buladodonu me na tekivu saraga ena noda bula yadudua. Sa dodonu me na veiuturi vata na bulataki ni matavuvale. Sa nodra itavi na itubutubu mera muria na ivakavuvuli ni kosipeli i Jisu Karisito ka vakatavulica vei ira na luvedra [raica na V&V 68:25–28]. Na lotu me sa tiki ni noda bula voli. Na kosipeli i Jisu Karisito me sa dauveivakayarayarataki dei ki na veika kece eda cakava. Sa dodonu me levu cake na sasaga eloma me rawa ni muri kina na ivakaraitaki levu sa tuva tu na iVakabula kevaka meda na vakataki koya vakalevu cake. Oqo sa yaco me noda bolebole levu.¹³

Kevaka eda rawa ni vakatauvatana na noda bula vata kei na Vakavuvuli, ka taura na nona ivakavuvuli kei na ivakaraitaki me sa ivalavala cecere duadua vei keda, ena sega ni dredre meda duavata ka veidokai ena veisalatu ni bula, ni da na tutaka e dua na ivakatagedegede tabu ni itovo kei na vakabauta. O tiko e vale se ena makete, e koronivuli se sa vakanadakui keda makawa na cava ni vuli, eda cakacaka duadua voli se veilasai vata eso tale na ilawalawa tamata, na noda gaunisala ena matata ka na dei na noda ivakatagedegede. Eda sa na vakananuma, me vaka a kaya na parofita o Alama, ni “vakadinadinataka na Kalou ena veigauna kecega, ena veika kecega kei na veivanua kecega [eda] sa tiko kina, me yacova na mate.” (Mosaia 18:9.)¹⁴

Sa dodonu meda vakarautaka na tiki ni bure me nei Karisito.

Ena bogi oya e Peceliema a sega na tiki ni bure me nona, ia oqo a sega ni gauna duadua ga donuya na tolusagavulu ka tolu na yabaki ni nona tiko voli ena bula vakayago me a sega na tiki ni bure me nona. A talai ira na sotia ki Peceliema o Eroti mera vakamatei ira na gonelalai. A sega na tiki ni bure me nei Jisu ena vakatulewa nei Eroti, ka rau a kauti koya na nona itubutubu ki Ijipita. Donuya na nona ilesilesi, vuqa era a sega ni vakarautaka na tiki ni bure me baleta na nona ivakavuvuli—sega na tiki ni bure ni kosipeli a vakatavulica. E a sega na tiki ni bure ni nona cakamana eso, ni nona veivakalougatataki, sega na tiki ni bure me baleta na dina vakalou a tukuna, sega na tiki ni bure ni nona loloma se vakabauta. A tukuna vei ira o koya, “Sa vaqara na fokisi, a sa vakairoro na manumanu vuka; ia na Luve ni tamata sa sega vua na tikina me kotora kina na uluna” (Maciu 8:20).

Ena noda gauna mada ga, dina ni sa tasiri e rua na udolu na yabaki, vuqa era sa kaya na ka vata ga a tukuni ena bogi oya e Peceliema. “Sa sega na tiki ni bure, sega na tiki ni bure” (raica na Luke 2:7). Eda vakarautaka na tiki ni bure me baleta na iloloma eso, ia so na gauna e sega ni vakarautaki na tiki ni bure me baleti koya ka solia. Sa tiko vei keda na tiki ni bure me baleta na bisinisitaki ni Siganisucu kei na qara-marau ena siga ni Vakacecegu, ia sa tiko na gauna eso e sa sega kina na tiki ni bure ni sokalou. E sa vakatawani na noda vakasama ena veika tale eso—sa sega na tiki ni bure.¹⁵

Ni sa na rairai totoka tu me raici na veicina ni Siganisucu … , e sa bibi cake me cilavi na bula ni tamata vakayago mai na nona ciqomi o koya ka sa rarama kei vuravura [raica na Alama 38:9; V&V 10:70]. Sa dodonu vakaidina meda tauri koya cake me noda dauveituberi ka daunivakaraitaki.

Ena siga ni bera na nona sucu, era a lagata na agilosi, “A sa veivinakati rawa ko ira e vuravura, sa lomani ko ira na tamata” (Luke 2:14). Kevaka mera vakamuria na tamata na nona ivakaraitaki, e sa na dua na vuravura ni veivinakati kei na veilomani vei ira na tamata.¹⁶

Na cava sa noda itavi nikua vaka lewe ni Lotu i Jisu Karisito ni Yalododonu Edaidai? Sa ikoya me raici na noda bula yadua ni tautauvata kei na kosipeli ena vosa kei na ivalavala me vaka a vakatavulica na Turaga ka iVakabula, o Jisu Karisito. Na ka taucoko eda cakava ka tukuna sa dodonu me vakatauvatani ki na ivakaraitaki ni dua na tamata tawacala ka lakova na vuravura, sa ikoya o Jisu Karisito.¹⁷

Vakatutu ni Vuli kei na Veivakavulici

Taro

Railesuva na sala e vuqa a tuva kina na iVakabula na ivakaraitaki me baleti keda, me vaka e vakaraitaki toka ena iwasewase e 1. E sa vakayarayarataki iko vakacava na ivakaraitaki ni iVakabula? Na cava eda rawa ni vulica mai na Nona ivakaraitaki donuya na icavacava ni Nona bula vakayago?
Sa vakasalataki keda o Peresitedi Hunter meda “tarogi keda, ‘Na cava ena cakava o Jisu?’ ka qai mai tu vakadoudou voli mo cakacakataka na isau ni taro.” (iwasewase e 2). Navuca na iwalewale cava o na rawa ni tu vakadoudou kina ni muria na ivakaraitaki ni iVakabula. E rawa vakacava ni da vakatavulica na ivakavuvuli oqo ena noda matavuvale?
Na cava e rawa ni vukei keda ena ivakavuvuli ni iwasewase e 3 meda kila vakamatata kina na nona muri o Jisu Karisito? E rawa ni na duidui vakacava na nomu bula kevaka me sega vei iko na veivakayarayarataki ni ivakavuvuli kei na ivakaraitaki ni iVakabula? E rawa vakacava ni da cakava na noda lotu me tiki levu cake ni noda bula voli e veisiga?
Vakasamataka vagumatua na ka e tukuna o Peresitedi Hunter me baleta ni sa “sega na tiki ni bure” ni iVakabula (iwasewase e 4). E rawa vakacava ni da vakarautaka vakalevu cake na tiki ni bure me baleta na iVakabula ena noda bula? O sa bau vakalougatataki vakacava ena nomu vakarautaka vakalevu cake na tiki ni bure me baleti Koya?

iVolanikalou Veisemati

Maciu 16:24–27; Joni 10:27–28; 14:12–15; 1 Pita 2:21–25; 2 Nifai 31:12–13; 3 Nifai 12:48; 18:16; 27:20–22; V&V 19:23–24

Veivuke ni Veivakavulici

Vakarautaka na ivolanisere ki na tamata yadua. Sureti ira na vakaitavi mera raica ka wasea e dua na sere ka semati ki na tabana vakatabakidua eso era a wilika ena wase.