Wase 21

Vakabauta kei na iVakadinadina

“Na usutu cecere ni rawaka ni bula oya meda kunea na Kalou ka kila ni bula tiko o Koya.”

Mai na Bula nei Howard W. Hunter

A tekivu me taracake na nona ivakadinadina o Howard W. Hunter ni se gone lailai sara e Boise, Idaho. Dina ga ni a se bera ni lewe ni Lotu kina o tamana, a tuberi koya o tinana ena kosipeli. “Ena duruna keitou a vulica kina na masu,” a nanuma lesu okoya. “Au a ciqoma e dua na ivakadinadina ni’u se gonetagane ena duru i tinaqu.”¹

A tubu na ivakadinadina nei Howard ena veiyabaki veitaravi. Ena gauna sa yabaki ruasagavulu vakacaca kina okoya ka bula voli e Los Angeles, California, a tekivu me vakila okoya na bibi ni vuli kosipeli ena yalodina. A vola okoya: “Dina ga ni’u a tiko ena veikalasi ni Lotu ena vuqa na noqu bula, na imatai ni noqu veivakayadrati dina ki na kosipeli a yaco mai ena dua na kalasi ni Matawilivola ni Sigatabu e [na] Tabanalevu o Adams ka vakatavulici mai vei Baraca Peter A. Clayton. A sinai vutuvutu tu okoya ena kilaka ka dau rawata me vakauqeti ira na tamata gone. Au a vulica na lesoni eso, wilika na ilesilesi ni vuli mai vale a solia vei keimami okoya, ka vakaitavi ni vosa ena ulutaga eso a lesi. … Au dau raica na gauna oqo ni noqu bula me gauna a tekivu tadolavi kina na dina ni kosipeli. A dau tiko voli ga vei au e dua na ivakadinadina ni kosipeli, ia vakasauri noqu sa tekivu kila vakamatata mai.”²

Ena vuqa na yabaki emuri, a vakamacalataka o Peresitedi Hunter: “Ena yaco mai na gauna meda kila vakamatata kina na ivakavuvuli eso ni noda buli vakakina ocei o keda. Vakasauri na kena sa vakacaudrevi kivei keda na veika oqo ka sa tekivu yavala na isema eso ni utoda. Oqo na gauna e curuma kina na noda bula na ivakadinadina ka sega ni dua na vakataratutu ni sa tamada na Kalou—ni sa bula o koya, ni sa dua na ituvaki dina o koya, ka da sa luvena vakaidina.”³

Me baleta na vakabauta kei na ivakadinadina nei Peresitedi Hunter, a kaya o Peresitedi Gordon B. Hinckley:

“Me baleti Peresitedi Hunter … a tiko kina na kaukauwa vakaiyanaqa ni vakabauta. A tiko kina na veivakadeitaki ni kilaka me baleta na veika vakalou kei na veika tawamudu. … A tiko [vua] na ivakadinadina donu ka dei me baleta na bula vakaidina ni Kalou, na Tamada Tawamudu. A cauraka okoya ena veivakadeitaki levu na nona ivakadinadina me baleta na ilesilesi vakalou ni Turaga o Jisu Karisito, na Dauveivueti ni kawatamata.”⁴

“Na sasaga levu duadua sa ikoya na vakasaqarai ni Kalou—me vakatakilai na nona ituvaki dina sara, nona ivakarau ni bula vakaikoya, ka me vakadeitaki e dua na kilaka me baleta na kosipeli ni Luvena o Jisu Karisito.”

iVakavuvuli nei Howard W. Hunter

Mai na vakabauta, sa rawa ni da kunea na Kalou ka kila ni bula tiko o Koya.

Na usutu cecere ni rawaka ni bula oya meda kunea na Kalou ka kila ni bula tiko o Koya. Me vakataka eso tale na rawaka kilikili, oqo ena rawati duadua ga mai vei ira era vakadinata ka vakabauta voli na ka ena rairai sega taumada ni vakavotukana.⁵

Ni sa tavuki na vakasama ni tamata kivua na Kalou kei na veika e nona na Kalou, sa lakocuruma na tamata e dua na veisau vakayalo. E vakaturi koya cake mai na vanua matau ka solia kivua e dua na ivakarau ni bula vakaturaga ka va-Kalou. Kevaka eda vakabauta na Kalou, eda sa vakayagataka tiko e dua na lawa levu ni bula. Na vu ni kaukauwa levu duadua ena ituvaki ni bula vakatamata oya na kaukauwa vakayalo ni vakabauta.⁶

Na sasaga levu duadua sa ikoya na vakasaqarai ni Kalou—me vakatakilai na nona ituvaki dina sara, nona ivakarau ni bula vakaikoya, ka me vakadeitaki e dua na kilaka me baleta na kosipeli ni Luvena o Jisu Karisito. E sega ni ka rawarawa meda kunea e dua na kila matata vakaoti me baleta na Kalou. Na vakasaqaqara e gadrevi kina na sasaga vagumatua, ka sa tiko eso era sega ni tosoi ira mera sasagataka na kilaka oqo. …

Se qarai tiko na kilaka ni dina ni veika ni bula se me kunei na Kalou, sa dodonu me tiko vua e dua na vakabauta. Sa yaco oqo me itekitekivu ni toso. Na vakabauta e sa vakamacalataki tu ena vuqa na sala, ia na ibalebale matata levu duadua a tukuna na dauvolaivola ena ivola kivei ira na Iperiu ena vosa vakaibalebale eso oqo: “Ia na vakabauta sa vaka ni sa vakayacori na veika sa vakanuinuitaki, e vaka ni sa vakaraitaki na veika sa tawa kune.” (Ipe. 11:1.) Ena vosa tale eso, e vakayalodeitaki keda na vakabauta ena ka eda vakanuinuitaka ka vakadeitaki ena ka eda sega ni raica. … O ira na vakasaqara matua na Kalou era sega ni raici koya, ia era kila na kena ituvaki dina mai na vakabauta. E sa levu cake mai na inuinui. Na vakabauta sa vakavuna kina me yalayala—vaka ni sa vakaraitaki na veika sa tawa kune.

A kuria na dauvolaivola ni vola kivei ira na Iperiu [na iApositolo o Paula]: “Na vakabauta eda sa kila kina ni sa ia na veibuli ena vosa ni Kalou, ia sa sega ni caka na veika sa rairai mai ena veika sa kune tiko.” (Ipe. 11:3.) Sa vakamacalataki eke na vakabauta me vakadinati se na rawati ni yalayala ni a buli na vuravura ena vosa ni Kalou. Era sega ni rawa ni kau mai na ivakadinadina mera vakadinadinataka na dina oqo, ia na vakabauta e solia na kilaka ni veika vakasakiti eso eda raica e vuravura kei na veika bula kecega a bulia na Kalou. …

Sa tiko vei au e dua na yalayala veivakadeitaki ni Kalou e ka dina—ni sa bula o koya. O Koya na Tamada Vakalomalagi, ka sa i keda na luvena vakayalo. A bulia o koya na lomalagi kei na vuravura kei na veika kece e tu e vuravura ka sa daunivola ni veilawa tawamudu e sa vakatulewataki kina na vuravura kei na lomalagi. A raici rawa vakalalai na veilawa oqo ni tomana voli na tamata na nona vakasaqaqara, ia era sa dau tu ga ka na vaka tu kina me tawaveisau rawa.⁷

Me rawati na kilaka me baleta na ituvaki dina ni Kalou, sa dodonu meda sasagataka ena yalodina, cakava na Lomana, ka masulaka na kila matata.

Me rawa ni kunei na ituvaki dina ni Kalou, sa dodonu meda muria na kosi a dusimaka o koya me baleta na sasaga. Na salatu e sa dua ka muataki cake; e taura na vakabauta kei na sasaga, ka sa sega ni kosi rawarawa. Ena ka oqo e vuqa na tamata ena sega ni soli ira vakaoti ki na itavi drakidrakita ni kena vakadinadinataki kivei ira na ituvaki dina ni Kalou. Ena kena veibasai, eso era taura na salatu rawarawa ka cakitaka na nona bula voli se muria tu ga na kosi ni vakatitiqa ni tawamacala. …

… So na gauna e vakaibalebaletaki na vakabauta ki na vakadinati ni dua na ka me dina ka sa sega kina ni veiganiti na vakadinadina me yavutaka na kilaka. Sa dodonu meda tomana na sasaga ka muria na veivakadreti: “Dou kerekere, ka na soli vei kemudou; dou vakasaqara, ka dou na kunea; dou tukituki, ka na dolavi vei kemudou: ni sa rawata ko koya yadua sa kerekere; ka sa kunea ko koya sa vakasaqara; ka na dolavi vua sa tukituki.” (Mac. 7:7–8.) …

Sa lawa raraba tu ni da na sega ni taura na veika yaga vakavo ke da sa lomasoli ni sauma e dua na isau. Na dauvuli ena sega ni yaco me tamata vuli vakavo ke vakabibitaka na cakacaka kei na sasaga me rawaka. Kevaka e sega ni lomasoli okoya me cakava vakakina, e rawa li ni tukuna okoya ni sa sega na ka vaka na sikolasivi? … Sa na ka lialia kivua na tamata me kaya ni sa sega na Kalou baleta ga ni a sega ni makututaka me vakasaqarai koya.

… Me rawa kivua e dua me rawata na kilaka tawavakatitiqa me baleta na ituvaki dina ni Kalou, sa dodonu vua me bulataka na ivakaro kei na ivunau a kacivaka na iVakabula donuya na nona kaulotu vakaikoya. … O ira na sa lomasoli ni cakava na vakasaqaqara, tutaka vakaiira, ka cakava na loma ni Kalou, ena lako mai vei ira na kilaka me baleta na ituvaki dina ni Kalou.

Ni dua na tamata e sa kunea na Kalou ka kila vakamatata na nona sala, sa vulica okoya ni sega ni dua na ka e vuravura kei lomalagi a lako mai vakailoa, ia na ka kece a vu mai na dua na ituvatuva cokonaki taumada vakalou. Sa na qai mai vakaibalebale vakalevu cake ki na nona bula! Na kilaka matata e sivia na vuli vakavuravura e nona. Na totoka eso ni vuravura e sa totoka cake tikoga, na ituvatuva ni vuravura kei na lomalagi e sa vakaibalebale cake tikoga, kei na ibulibuli taucoko ni Kalou sa mai kilai vakamatata cake ni vakadinadinataka okoya na basika mai kei na lako ni veisiga ni Kalou ka ra veimuri na itabagauna yadua ena kedra ituvatuva.⁸

O Karisito, donuya na nona kaulotu, a vakamacalataka na ivakarau e rawa kina vua e dua me kila na dina me baleta na Kalou. A kaya o koya, “Kevaka e dua na tamata sa via cakava na lomai koya, ena kila se sa ka mai vua na Kalou nai ivakavuvuli, se’u vosa vakai au ga.” (Joni 7:17.) A vakamacalataka talega na iVakavuvuli na lomai Tamana kei na ivunau levu ena ivakarau oqo: “Mo lomani Jiova na nomu Kalou ena lomamu taucoko, kei na yalomu taucoko, kei na nomu nanuma kecega.” (Mac. 22:37.) O ira ka na saga mera cakava na loma ni Kalou ka muria na nona ivunau era na ciqoma na vakatakila vakaiira ki na ilesilesi vakalou ni cakacaka ni Turaga ena cavuti ni ivakadinadina me baleta na Tamada.

Kivei ira na gadreva mera kila vakamatata, na vosa nei Jemesa e vakamacalataka na iwalewale me na rawati kina: “Ia kevaka sa lailai na vuku vua e dua vei kemudou, me kerea vua na Kalou, o koya sa solia vakalevu kivei ira kecega na tamata, a sa sega ni dauveivakadirideini; ka na soli ga vua.” (Jemesa 1:5.) E sega ni vaka me a veivagolei voli o Jemesa ki na kilaka matata ena vakasama ni veika ni bula, ia ki na vakatakila ga e lako mai lagi ka sa sauma na vakatataro ni tamata me sa vatuka ni kena muri voli na ivakadre oqo ni masu. …

Ia sa tiko vei keda na idusidusi ena vakasaqarai ni Kalou kei na iyaya ni cakacaka me vakacavari kina na sasaga—vakabauta, loloma, kei na masumasu. E sa cakava na veika ni bula na ka vakasakiti eso ki na tamata, ia e sega ni rawa ni vakacavara na veika me cakava me baleti koya, na ka levu duadua oya na kunei ni ituvaki dina ni Kalou. Sa sega ni rawarawa na itavi; sa sega ni mamada na cakacaka; ia me vaka a cauraka na Vakavuvuli, “Ia ena levu sara na kedra isau; io ena tawamudu na nodra lagilagi.” (V&V 76:6.)⁹

Sa dodonu meda vakadinata me rawa ni da raica.

A vinakata me raica o Tomasi ni bera ni qai vakadinata.

Ena bogi ni siga ni tucaketale, a rairai o Jisu ka duri tu ena kedra maliwa na nona tisaipeli ena rumu tasogo. A vakaraitaka o koya kivei ira na ligana ka a lauvako kei na sarisarina ka a lausua ena moto. O Tomasi, e dua vei ira na tinikarua, a sega ni tiko ni yaco na ka oqo, ia era tukuna vua na kena vo ni ra a raica na Turaga ka sa vosa vei ira o koya. … A vakatitiqa o Tomasi, ka kaya vei ira na tisaipeli:

“… Kevaka ka’u na sega ni raica na we ni vako ena ligana ka daramaka na noqui qaqalo ki na we ni vako, ka daramaka na ligaqu ki na sarisarina, au na sega ni vakadinata.” (Joni 20:25.)

… Ena dua na vakasama, a matataka o Tomasi na yalo ni noda gauna ni bula. Ena sega ni vakacegu okoya ena dua na ka a sega ni raica, dina ga ni a tiko vata voli kei na Vakavuvuli ka kila na nona ivakavuvuli me baleta na vakabauta kei na vakatitiqa. … E sega ni vakaliuci na vakabauta mai na vakatitiqa ni dodonu vua e dua me vakila se raica taumada me rawa ni qai vakadinata.

A sega ni lomasoli o Tomasi me tutaka na vakabauta. A vinakata okoya na vakadinadina matata ni dina eso. A vinakata okoya na kilaka, sega ni vakabauta. Na kilaka sa semati ki na veika sa oti baleta na veika eda sa sotakaya oti sa ikoya na ka eso e solia vei keda na kilaka, ia na vakabauta sa semati ki na veika e liu—ki na ka tawakilai eda se bera ni lakova.

Eda vakasamataki Tomasi me dua ka a lako ka veivosaki vata na Vakavuvuli, ka dua a digitaki mai vua. Mai loma eda vakanuinui me a rawa ni tagole o Tomasi ki na veika e liu ena yalodei ki na veika a sega taumada ni raici rawa, mai na kena kainaki vakaibalebale, “Me raici oya me vakadinati.” …

Na vakabauta e solia vei keda na yalodei ena veika e sega ni laurai rawa.

Ni oti e dua na macawa, era mai toka vata tale na tisaipeli ena vale vata ga e Jerusalemi. Ena gauna oqo sa tiko vata kei ira o Tomasi. A sogo tu na katuba, ia a basika mai o Jisu ka tu ena kedra maliwa ka kaya, “Dou vakacegu.

“Sa qai kaya vei Tomasi ko koya, Dodoka mai na nomui qaqalo, ka raica na ligaqu; ia dodoka na ligamu, ka daramaka ki na sarisariqu; ia mo kakua ni vakatitiqa, mo vakadinata ga.” (Joni 20:26–27.) …

“Sa kaya vua ko Jisu, Ni ko sa raici au Tomasi, ko sa vakadinata: sa kalougata ko ira era sa sega ni raica, ka ra sa vakadinata.” ([Joni] 20:29.)

Na ka a yaco oqo e sa mai dua na lesoni levu ni veigauna. E a kaya o Tomasi, “Me raici oya me vakadinati,” ia a sauma o Karisito: “Me vakadinati oya me raici.” …

Na ivakaraitaki matata ni vakabauta e sa vagolei ki na iApositolo o Paula ena nona iVola vei ira na Iperiu: “Ia na vakabauta sa vaka ni sa vakayacori na veika sa vakanuinuitaki, e vaka ni sa vakaraitaki na veika sa tawa kune.” (Ipe. 11:1.)

Na malanivosa oqo e sega ni navuca me vakakina e dua na kilaka vinaka sara, ia e vakamacalataka na vakabauta me ka e solia kivua e dua na ivakadei se dua na yalodei ena veika e se na tu mai liu. Na veika oqo e sa na rairai tiko rawa tu, ia sa qai mai vakilai ga ena vakabauta. Na vakabauta e solia na yalodei ena veika e sega ni raici rawa se na veisautaki rawarawa ni vakadinadina donu.

Sa kena irairai ni sa vakayalia o Tomasi na nona yalodei ki na veika mai liu. A rai okoya ki na veika sa oti. A vinakata okoya na ivakadinadina ni veika a sega taumada ni raici rawa. O ira na vakayalia se malumalumu na nodra vakabauta, sa ra bula ena gauna sa oti—sa yali na vakanuinui me baleta na veika mai liu. Sa dua dina na veisau levu e lako mai ki na bula ni dua e kunea na vakabauta tikori me soli veivakadeitaki kei na yalodei.

“Na tamata mataboko a vakadinata ka sa vakatarai me rai.”

A sega ni vakatitiqa na tamata sucu mataboko; a vakadinata okoya na iVakabula.

Kevaka eda lesu ki muri ki na ika ciwa ni wase i Joni, eda wilika kina e dua tale na ka a yaco ena vanua o Jerusalemi ka a mai rai kina e dua na tamata ka a sucu mataboko. A sa siga ni Vakacecegu, ka a tiko voli o Jisu ena yasana ni valetabu ni sa raica na tamata mataboko, ka ra tarogi koya na nona tisaipeli:

“… Vakavuvuli, ko cei sai valavala ca, a tamata oqo, se tamana kei tinana, sa sucu mataboko kina ko koya?

“Sa kaya ko Jisu, Sa sega ni valavala ca ko koya oqo, se tamana kei tinana, me vakatakilai ga na cakacaka ni Kalou ena vukuna.

“Sa dodonu me’u kitaka na cakacaka i koya sa talai au mai, ni sa siga toka: sa voleka mai na bogi, sa sega ni cakacaka rawa kina e dua na tamata.

“Ni’u sa tiko e vuravura, au sa rarama kei vuravura.” (Joni 9:2–5.)

Sa qai kasivita na qele o Jisu ka ulia vata na soso kei nai kasivi e waki vata na kuvu ni qele ni vuravura. A sa boroya kina na mata ni tamata mataboko ka tukuna vua me laki tavoi ena isilisili ko Sailoama. Kevaka me oqo o Tomasi, ena rawa li ni a lako ni sa vakaroti vua se na rawa li ni a taroga na taro: “Na cava na ka vinaka ena lako mai na tavoi voli ena wai vuso ni isilisili duka oya?” se “Na veika vaka wainimate cava e tiko ena weli a waki vata kei na kuvu ni qele ni vuravura?” Oqo e vaka mera taro donu toka, ia kevaka a vakatitiqa ka vakataroga na tamata mataboko, ke a se mataboko tikoga oqo. Ni tiko voli na vakabauta, a vakadinata okoya ka cakava me vaka a dusimaki vua. A lako okoya ka tavoi ena isilisili ka tale mai ka rai rawa. Me vakadinati oya me raici …

“Sa kalougata ko ira era sa sega ni raica, ka ra sa vakadinata.”

Na tamata mataboko a vakadinata ka sa vakatarai me rai. A cata me vakadinata o Tomasi me yacova ni oti na nona raica rawa. Sa sinai tu o vuravura ena Tomasi, ia sa vuqa era vakataka na tamata mataboko mai Jerusalemi. Era sotavi ira ruarua oqo na daukaulotu ena veisiga ni ra kauta voli na nodra itukutuku ki na vuravura, na itukutuku ni kosipeli vakalesui mai i Jisu Karisito. … Eso era vakadinata, rawa vakabauta, ka sa papitaiso. Eso ena sega ni vakadonuya baleta ni ra sega ni rawa ni rai se vakila.

E sega na vakadinadina donu, taucoko, ka rawa ni laurai ni bula tiko na Kalou, ia e milioni vakacaca e tiko vei ira na kilaka ni sa vakakina mai na vakabauta oya e yavutaka na vakaraitaki ni veika sa tawa kune. E vuqa era kaya vei ira na daukaulotu, “Au na vakadonuya na papitaiso kevaka au na vakadinata ni a sikovi Josefa Simici mai na Tamada kei na Luvena.” Me baleta oqo sa sega na ivakadinadina matata, taucoko, rawa ni laurai, ia kivei ira na sa tarai mai na Yalotabu, na vakabauta ena sosomitaka na vakaraitaki ni veika sa tawa kune. Nanuma na vosa ni Vakavuvuli a lauvako ni a duri tu ena matai Tomasi:

“Sa kalougata ko ira era sa sega ni raica, ka ra sa vakadinata.” ([Joni] 20:29.)

Era na rai o ira na vakadinata ka vakabauta.

Au kuria na noqu vakadinadina ki na ivakadinadina ni udolu vakacaca na daukaulotu ni sa bula na Kalou, o Jisu sa iVakabula kei vuravura, ka na yaco mera rai o ira na vakadinata mai na vakabauta.¹⁰

Na cakacakataki ni noda vakabauta e muataki ki na noda dui ivakadinadina.

Ni da se gonelalai eda a vakadonuya vakaidina na veika a tukuni vei keda mai vei ira na noda itubutubu se noda qasenivuli baleta na yalodei a tiko vei keda kivei ira. Ena lade tawarere e dua na gonetagane lailai mai na dua na vanua cere kevaka e tukuna vua o tamana ni na ciqomi koya. E tiko vua na gone lailai na vakabauta ni na sega ni vakalutumi koya o tamana. Ni ra sa qase cake na gone, sa ra tekivu vakasama ga vakaiira, mera vakatataro ka rawa ni vakatitiqa me baleta na veika sa sega ni umani ki na vakadinadina malumu. Au sa lomani ira na cauravou kei na goneyalewa ni curuma na nodra vakasama na vakatitiqa yalodina ka ra vakaogai ena veivorati levu ni kena wali voli na vakatitiqa. Na vakatitiqa eso oqo e rawa ni wali, kevaka e tiko vei ira na gagadre yalodina mera kila na dina, ena cakacakataki ni sasaga yaga, vakayalo, ka vure vakasama. Era na basika mai na veivorati ki na vakabauta qaqaco, kaukauwa, ka levu cake baleta na sasaga. Era sa lako yani mai na dua na vakabauta rawarawa ka nuitaki, mai na vakatitiqa kei na veivorati, ki na dua na vakabauta tudei vakaoti e vakadeitaki ki na ivakadinadina.¹¹

Era vakayagataki auwa na gonevuli ena veitabana ni vulici ni tuvaki ni bula ena vakatovotovo me kunei na dina. Kevaka mera cakava vakakina ena vakabauta, masumasu, veivosoti, yalomalua kei na loloma, era na kunea e dua na ivakadinadina me baleti Jisu Karisito, na dausoli ivakavuvuli oqo.¹²

Na kosipeli i Jisu Karisito e sega walega ni dua na kosipeli ni vakadinata; sa ikoya e dua na ituvatuva ni cakacaka. … E sega ni tukuna o koya “dikeva” na noqu kosipeli; a kaya o koya “bula” taka! E sega ni tukuna o koya, “Raica matua na kena ituvaki totoka kei na tatadra”; a kaya o koya, “Lako, cakava, raica, vakila, solia, vakadinata!” …

Na cakacaka e sa dua na yavu cere ni noda ivakadinadina. Na vakadinadina dodonu duadua sa ikoya e lako vakailiu tani mai na ka eda a sotakaya. Ni ra bolea na Jiu na ivunau a vakatavulica o Jisu ena valetabu, a sauma o koya, “… sa sega ni noqu na noqui vakavuvuli, sa nona ga ka talai au mai.” A qai vakuria o koya na idola ki na noda ivakadinadina, “Kevaka e dua na tamata sa via cakava na loma i koya, ena kila se sa ka mai vua na Kalou nai vakavuvuli, se’u vosa vakai au ga.” (Joni 7:16–17.)

Eda rogoca li na vakatulewa ena veivakatakilai oqo ni iVakabula? “Kevaka e dua na tamata sa via cakava … ena kila!” A toboka o Joni na matalia ni vakatulewa oqo ka vakadreta na kena ibalebale ena nona [ivola]. A kaya okoya, “O koya sa kaya erau sa tu vata kaya, e kilikili kaya me ia nai valavala sa vaka na nonai valavala.” (1 Joni 2:6.)

Na kena tukuni, ciqomi, ka vakadinati wale tu ga e sega ni rauta. Era sa tawavakacavari me yacova ni sa veisautaki ki na cakacaka vakaiyanaqa ni bula ena veisiga na ka era sasagataka. Oqo, sa na qai ivurevure donu ni noda ivakadinadina. Sa kila e dua baleta ni a sotakaya oti. E sega ni dodonu me kaya, “E tukuna o baraca Jones ni sa dina, ka’u sa vakadinati koya.” E rawa ni kaya okoya, “Au sa bulataka na ivakavuvuli oqo ena noqu bula vakaiau, ka’u kila mai na veika au sa sotakaya oti ni sa cakacaka. Au sa vakila na kena veivakayarayarataki, vakatovotovotaka na kena yaga vakaidina, ka kila ni sa vinaka. Au sa rawa ni vakadinadinataka ena noqu kilaka ni sa ivakavuvuli dina.”

Vuqa na tamata era kauta voli na ivakadinadina vakaoqo ena nodra bula ka sega ni vakila na kena yaga. A kaya wale toka ga oqo e dua na marama gone, “E sega ni dua tiko na noqu ivakadinadina ni kosipeli. Au vakanuinui ni tiko. Au vakadonuya na kedra ivakavuvuli. Au kila ni ra cakacaka ena noqu bula. Au raica ni ra sa cakacaka voli ena nodra bula tale eso. Kevaka walega me sauma na Turaga na noqu masu ka solia vei au e dua na ivakadinadina, au sa na dua na tamata bula mamarau saraga.” Na ka a vinakata na marama oqo e dua na veivakameautaki veivakurabuitaki; ia e sa raica oti okoya na cakacaka mana ni kosipeli ni vakalevutaka ka tubera cake voli na nona bula. Na Turaga a sauma na nona masu. A tiko vua e dua na ivakadinadina, ia a sega ni vakila na betena.¹³

Me vaka e dua na iApositolo lumuti ka vakadinadina digitaki i Karisito, au sa solia kivei kemuni na noqu ivakadinadina cecekia ni o Jisu Karisito e sa Luvena vakaidina na Kalou. … mai na kaukauwa ni Yalo Tabu au cavuta kina na noqu ivakadinadina. Au kila na ituvaki dina i Karisito me vaka au a sa raica ena mataqu ka rogoca ena daligaqu. Au kila talega ni na vakadeitaka na Yalo Tabu na dina vakaoti ni noqu ivakadinadina ki na lomadra taucoko era vakarorogo ena daliga ni vakabauta.¹⁴

Vakatutu ni Vuli kei na Veivakavulici

Taro

E vakatavulica o Peresitedi Hunter “na usutu cecere ni rawaka ni bula oya meda kunea na Kalou ka kila ni bula tiko o Koya” (iwasewase e 1). Na cava na itavi ni vakabauta ena rawati ni sasaga oya? Na cava soti o sotakaya e sa vukei iko ni mai kunea na Kalou ka kila ni bula tiko o Koya?
E kaya o Peresitedi Hunter, “e sega ni rawarawa na itavi” ka “sega ni mamada na cakacaka” ena rawati ni kilaka me baleta na ituvaki dina ni Kalou. Cava na vuna o nanuma kina ni sa veiganiti kei keda na sasaga gugumatua meda rawata kina na kilaka oya? Cava na vuna e bibi kina na muri ni ivunau ni kena mai kilai na Kalou?
Ena iwasewase e 3, e vakayagataka kina o Peresitedi Hunter na duidui nei Tomasi kei na tamata sucu mataboko me vakatavulica ni kevaka eda vakadinata, sa na rawa ni da rai. Ena rawa vakacava ni vakaibalebale ki na nomu bula na raiyawa ni talanoa eso oqo nei Peresitedi Hunter? E sa vakayacoka vakacava na cakacakataki ni vakabauta mo rai rawa kina?
Railesuva na ivakavuvuli nei Peresitedi Hunter ni sa idola ni kena rawati e dua na ivakadinadina na cakacakataki ni noda vakabauta (raica na iwasewase e 4). Na cava eso na iwalewale o rawa ni cakacakataka kina na nomu vakabauta? E rawa vakacava ki na vakabauta me uabaleta na vakatitiqa? E sa vukea vakacava na vaqaqacotaki cake ni nomu ivakadinadina na cakacakataki ni nomu vakabauta?

iVolanikalou Veisemati

Joni 17:3; Iperiu 11:1–6; Alama 5:45–48; 30:40–41; 32:26–43; Ica 12:4, 6–22; Moronai 10:4–5; V&V 42:61

Veivuke ni Veivakavulici

“Dau taroga na taro e gadrevi kina vei ira na lewenikalasi me ra kunea mai na kena isau mai na ivolanikalou kei na nodra ivakavuvuli na parofita edaidai” (Veituberi Me iLutua Ni Noda Bula [1999], 70).