Pene 13

Te mau ture no te parururaa i te pae moni

Ia faaore ana‘e tatou i te tarahu e ia aufau ana‘e tatou i ta tatou tuhaa ahuru e te mau ô haapaeraa maa, e haamaitai te Atua ia tatou i te pae no te moni e i te pae varua, ma te horo‘a mai ia tatou i te rave‘a no te tauturu i te paturaa i To’na basileia.

No roto mai i te oraraa o Heber J. Grant

I te matahiti 1893 ua tupu te hoê fifi rahi i te pae faarava‘iraa faufaa i roto i te mau tuhaa e rave rahi o te fenua Marite, e ua topatari e rave rahi hanere fare moni, te mau taiete pereoo auahi, te mau taiete heru repo faufaa, e te tahi atu mau taiete. Ua parauhia taua fifi ra, te Mata‘u no 1893, e ua topa atoa o Elder Grant i roto i te reira fifi mana‘o-ore-hia; e melo oia no te Pŭpŭ Tino Ahuru Ma Piti Aposetolo i taua taime ra. E ua topa oia i roto i te tarahu ta’na i aufau e rave rahi matahiti te maoro. I roto i te hoê a‘oraa ta’na i horo‘a i taua taime ra, te parau ra oia e: “Te hinaaro nei au e faaite i mua ia outou e, ua hape roa matou, o vau nei e e rave rahi atu mau taata. No te aha? No te mea, ua vai tera hinaaro rahi i roto ia matou ia roaa te moni, e no reira, ua ô matou i roto i te tarahu, e i teie nei, eita e ti‘a ia matou ia aufau oioi i ta matou tarahu…A tahi ra i roto i to‘u oraraa ua haere mai te taata e ani ia‘u ia aufau i te moni ta‘u i tarahu ia ratou, e ua ani au ia ratou ia faaroa rii te taime. Ahiri te Atua e faaore mai i ta‘u hapa hoê a‘e taime, eita vau e na reira faahou. E taata tarahu roa vau i te moni mai te ahuru ma va‘uraa o to‘u matahiti; tera râ, ahiri ta‘u e nehenehe e faaho‘i i ta‘u mau tarahu i teie nei, te ti‘aturi nei au e, e ravai noa ïa vau i te mau haamaitairaa a te Fatu, noa’tu te huru o te reira, e mea rahi anei e aore râ, e mea iti anei.”¹

I roto i to’na ti‘araa ei Peresideni no te Ekalesia, ua haapii o Heber J. Grant i te Feia Mo‘a i te mau mea no ni‘a i te parururaa i te pae moni, ma te turuhia te reira e to’na iho mau iteraa e te hi‘oraa o te taata tei na mua atu ia’na, oia te Peresideni Joseph F. Smith. Ua haapapu mai te Peresideni Grant e piti na ture tumu: te hau e roaa mai ia ore tatou e tarahu, e te mau haamaitairaa pae tino e te pae varua e roaa ia tatou ia aufau ana‘e tatou i ta tatou tuhaa ahuru e te mau ô. I te ava‘e Eperera 1932, ua haapii oia i teie mau parau tumu i roto i te hoê amuiraa rahi na te Totaiete Tauturu. I taua tau ra, tei roto te fenua Marite i te Fifi Rahi, oia ho‘i, ua topa roa te tereraa o te ohipa faarava‘iraa faufaa e ua rahi te taata aita e ohipa faahou ta ratou. Ua faahapa te Peresideni Grant i te Feia Mo‘a i te mea e, aita ratou i haapa‘o i te a‘oraa a te Peresideni Smith:

“Ahiri te mau taata tei parauhia e, te Feia Mo‘a i te mau Mahana Hopea nei, i faaroo i te a‘oraa tei horo‘ahia’tu na teie atu nei vahi, na te taata tei na mua’tu ia‘u nei, i raro a‘e i te faaururaa a te Fatu, i te tiaororaa e te faaitoitoraa i te Feia Mo‘a i te mau Mahana Hopea nei eiaha e tarahu, e mea iti roa ïa te fifi ta teie ati rahi e faatupu i ni‘a i te Feia Mo‘a i te mau Mahana Hopea nei, mea iti roa… I to‘u feruriraa, te tumu rahi no teie fifi i te fenua Marite nei, no te tarahu ïa a te taata e no te varua faahotu moni atoa e vaira i roto i te taata.”

Te parau ra â te Peresideni Grant ma te haapapu maitai i te titauraa ia faaore i te tarahu. Ua faaitoito atoa oia i te mau taata e faaroo ra ia’na ia aufau i te tuhaa ahuru e te mau ô, noa’tu tei roto ratou i te fifi no te pae moni. Te faahi‘o ra oia i te mau tau e rave rahi na mua’tu, i te taime a tarahu ai oia i te moni no te hoo i te tuhaa (action) i roto i te Fare Teata taata ora no Roto Miti, ma te ti‘aturi e, eita teie fare e tupararihia:

“Te hinaaro nei au ia fana‘o te mau taata atoa e faaroo mai nei i to‘u reo, i to‘u iteraa i roto i te parau no to‘u hooraa mai i te tuhaa (action) no te fare teataraa. No te roaraa e 32 matahiti o to‘u oraraa, …te mau dollar atoa e roaa mai ia‘u, e mo‘e ïa te reira hou a roaa mai ai. E hopoia teimaha mau, e auraa parau teie, mai te mea e, e puahorofenua pohe ta oe, ia amo i te reira puaahorofenua e 32 matahiti te maoro hou a ti‘a ai ia oe ia tanu ia’na i raro i te repo. E mea fifi mau tera huru, e o te tarahu ïa te tumu no te reira. Mai taua taime ra, ua tamau noa vau i te ora ia au i te faufaa tei roaa ia‘u…

“…Mai te mea e, te vaira te hoê taata ora e nehenehe e parau e, ‘eiaha e tarahu, ‘ to’na i‘oa ra, o Heber J. Grant ïa. Mauruuru i te Atua i te mea e, ua ti‘a ia‘u ia aufau i te [taatoaraa o ta‘u mau tarahu], e ua aufau vau i te reira ma te ani ore ia haamamahia te reira. Aita vau e ti‘aturi e, e pee te reira ahiri e aita vau i riro ei taata parau ti‘a hope roa i mua i te Fatu. Ia roaa mai ta‘u moni, te tarahu matamua ta‘u e aufau, o te tarahu ïa a te Fatu, e te ti‘aturi nei au ma te feaa ore e, ahiri te Feia Mo‘a i te mau Mahana Hopea nei i haapa‘o i te a‘oraa a te Peropheta a te Fatu, ma te haapa‘o maitai i te aufauraa i ta ratou tuhaa ahuru, eita ïa ratou e vai i roto i teie huru to ratou i teie mahana. Ahiri ratou i haapa‘o maitai i te aufauraa i ta ratou [moni haapaeraa maa] ua nehenehe ïa ia tatou ia aupuru i te mau taata atoa e vai ra i roto i te ati i roto i teie Ekalesia.”²

Ua haapa‘o te Peresideni Grant i te mau ture ta’na iho i haapii ra, e ua manuia oia i roto i te parau no te moni, no’na iho e no te Ekalesia atoa. Ua parau tamau atoa oia e, te manuia mau e ere ïa tei te aravihi i te imiraa i te moni. Te parau ra oia e: “Te taata tei manuia i roto i te parau no te imiraa i te faufaa, tera râ, na roto i te reira, ua iti te here i roto i to’na aau, e aita i aroha i to’na ra taea‘e, eita ïa e parauhia e, ua manuia mau oia; te taata râ tei ora i te hoê oraraa e ua herehia oia e to’na mau taata tupu; e na te Atua tei ite mai i ta’na ohipa i rave e i te hohonuraa o to’na aau, e here atoa mai ia’na: e no taua huru taata ra, — noa’tu e, e pohe oia i roto i te veve—e parauhia ïa e, ‘e faatorona ia’na i te hei o te re.’ ”³

Te mau haapiiraa a Heber J. Grant

Ia ora ana‘e tatou ia au i ta tatou faufaa e vaira, te haapae ra ïa tatou i te ruuruu o te tarahu.

Mai te mea e, te vaira te hoê mea o te faatupu mai i te hau e te oaoa i roto i te aau o te taata, e i roto ho‘i i te utuafare, o te oraraa ïa ia au i ta tatou faufaa e vaira. E mai te mea e, te vaira te hoê mea o te faatupu mai i te auauraa niho e te oto e te peapea, o te tarahu ïa e te mau mea eita e ti‘a i te hoê taata ia haapa‘o.⁴

Te hinaaro nei au e faaara i te Feia Mo‘a i te mau Mahana Hopea nei e, e ti‘a ia ratou ia hoo mai i te pereoo uira e i te mau mea rii no te oraraa, mai te mea e, e moni ta ratou no te hoo mai i te reira, eiaha râ e aitarahu i to ratou oraraa no a muri a‘e… Te hinaaro nei au e parau atu ia outou e, te feia aita e feruri maite i te parau no to ratou oraraa a muri a‘e, o te tarahu no te mau mea rii o te oraraa nei, e no te mau mea hinuhinu o te oraraa nei, te tuu ra ïa ratou i te teimaha i ni‘a ia ratou iho, na roto i te aufauraa i te moni taime, o te faatupu mai i te ati rahi e te haama.⁵

Mai te mea e, na te taata iho ta’na mau mea atoa, e aita e titauhia ia’na ia aufau i te moni taime, e te hoo mai nei oia ia au i te moni ta’na e vaira, eita ïa te rahiraa taata e fifi…Ua tuu tatou ia tatou iho i roto i te tarahu ma te ore e haapa‘o i te mau fifi e nehenehe e tupu mai—te ma‘i, te tapu, e te vai atura.⁶

Eita tatou e ite i te mau mea atoa e tupu mai i mua nei. Te vaira ra râ hoê mea e nehenehe ta tatou e parau, oia ho‘i, e moni anei ta tatou no te hoo i te hoê ratio, hoê pereoo, e aore râ, te tahi atu mea, e e hoo tatou i te reira, noa’tu e, ehia ta tatou e toe mai, ua roaa râ te reira ia tatou.⁷

Te ti‘aturi nei au e, e mo‘e ê te mau fifi atoa o te rahiraa o te taata mai te mea e, e faaru‘e ratou i te peu hoohaere noa i te mau mea faufaa ore, e ia ho‘i mai i ni‘a i te mau peu haehaa no te ahuraa; ia faaiti e iva i ni‘a i te ahuru i te haere e mata‘ita‘i i te hoho‘a teatea; e ia ho‘i mai i ni‘a i te mau peu no te tarani e te faarava‘i.⁸

Te aufauraa i te tuhaa ahuru e te mau ô ma te parau ti‘a, na te reira e horo‘a mai i te mau haamaitairaa no te pae tino e no te pae varua.

Te hinaaro nei au e parau faahou atu i te Feia Mo‘a i te mau Mahana Hopea nei i to‘u ti‘aturiraa papu e, e haamanuia te Atua to tatou Metua i te Ao ra, e e haamaitai e e horo‘a mai ho‘i oia i te paari i te mau taata e aufau i ta ratou tuhaa ahuru ma te parau ti‘a. Te ti‘aturi nei au e, ia fifi te hoê taata i te pae no te moni, te rave‘a maitai roa a‘e no te tatara ia’na i rapae i te reira fifi (te parau nei au na roto i to‘u iho iteraa, no te mea te ti‘aturi nei au e, ua hau atu i te hoê taime i roto i to‘u oraraa to‘u fifiraa i te pae moni i te fifi aitâ i fifihia a‘e nei e te tahi atu taata) o te riroraa ïa ei taata parau ti‘a hope roa i mua i te aro o te Fatu, e eiaha e vaiiho hoê noa a‘e dollar ia topa mai i roto i to tatou rima ma te ore e horo‘a na te Fatu i te ahuru i ni‘a i te hanere o te reira.

Aita te Fatu e hinaaro i ta outou moni e aore râ i ta‘u. Te haapa‘oraa i te ture no te tuhaa ahuru e te mau moni ô no te mau fare pureraa, no te mau fare tĭtĭ, no te mau fare haapiiraa, te mau hiero, te ohipa misionare e teie mau hinaaro e rave rahi, no to tatou ana‘e ïa maitai. Ua riro teie mau mea ei haapiiraa ia tatou no te faaineine ia tatou ia riro mai te Atua te huru e ia ti‘a ia tatou ia ho‘i atu i mua i te aro o to tatou Metua i te Ao ra. Te haapiiraa tumu no ni‘a i te moni o tei horo‘ahia mai nei ia tatou, o te mau haapiiraa atoa ïa e horo‘ahia nei i te fare haapiiraa i te mau tamaroa e te mau tamahine na‘ina‘i ; no te maitai ho‘i te reira o te tamaroa; no te maitai te reira o te tamahine, no to ratou haereraa i mua, no to ratou poupou e to ratou oaoa no te oraraa a muri a‘e; na roto i te mau ite e te mau haamaramaramaraa atoa te roaa nei ia tatou, e to tatou iho hoturaa, o tatou iho ïa te fana‘o nei.

Ua haamau te Atua to tatou Metua i te Ao ra i te mau ture no te haamaitai i to’na mau taata i te pae no te tino, no te varua e no te ite, e te hoê o te mau ture maitai roa a‘e i te ao atoa nei no te faariro i te Feia Mo‘a i te mau Mahana Hopea nei ei feia maitai roa a‘e, o te ture ïa no te tuhaa ahuru. E rave rahi taata e ti‘aturi nei i te Evanelia e e farii ho‘i i te reira, tera râ, e au ratou mai taua taata apî ra ta tatou i ite i roto i te papa‘iraa mo‘a, tei parau atu i te Faaora e “ua hope te reira i te haapa‘ohia e au”, e a parau atu ai te Faaora ia’na ia haere e hoo i te mau mea atoa na’na ra, a hopoi atu ai na te taata rii [a hi‘o Mataio 19:16–22]. E rave rahi taata aita e maraa ia ratou ia haapa‘o i te Evanelia no te rahi o te mau titauraa moni e titauhia ia ratou, e te farii nei ratou i te mau mea o teie nei ao, o ta ratou ho‘i e tapea papu nei, ia eiâ i te horo‘a hau a‘e i te mau horo‘a atoa a te Atua, tei parauhia te ora mure ore. Te ani nei au i te Feia Mo‘a i te mau Mahana Hopea nei ia haapa‘o i te ture no te tuhaa ahuru.⁹

Te ture no te hoturaa i te pae faufaa a te Feia Mo‘a i te mau Mahana Hopea nei, na roto i te fafauraa i mua i te Atua, o te riroraa ïa ei taata aufau ti‘a i te tuhaa ahuru, eiaha râ i te eiâraa i ta te Fatu i roto i te tuhaa ahuru e te mau ô [a hi‘o Malaki 3:8]. E tupu te hoturaa no te feia e haapa‘o i te ture no te tuhaa ahuru. Ia parau vau e, te hoturaa, aita vau e parau nei no te pae moni noa…Ta‘u râ e faariro nei ei hoturaa mau, e tei riro ei hoê o te mau mea faufaa rahi roa no te tane e te vahine e ora nei, maori râ, ia rahi to tatou ite i te Atua, ia rahi atoa to tatou iteraa papu, ia rahi te mana no te oraraa i te Evanelia, e i te faaururaa ho‘i i to tatou utuafare ia rave atoa i taua mau mea nei. Tera ïa te hoturaa mau.¹⁰

Te ti‘aturi papu nei e, te faaroo aore e ohipa e mea pohe ïa, e te ti‘aturi papu nei au e, e parau mau ta te Atua a parau ai oia e, e iriti oia i te mau haamaramarama o te ra‘i a ninii mai ai i te haamaitairaa i ni‘a ia tatou mai te mea e, e aufau tatou i ta tatou tuhaa ahuru [a hi‘o Malaki 3:10].¹¹

Te ti‘aturi nei au e, e haamaitaihia te taata ia au i to ratou aau horo‘a mau. Aita vau e parau nei e, ua hau atu ta ratou moni e roaa nei i ta vetahi ê, penei a‘e paha. No ni‘a iho râ i te tupuraa i te rahi i roto i te parau no te faaroo, e te iteraa papu e te iteraa i te hanahana o te ohipa ta tatou e rave nei, te parau nei ïa vau e, te feia tei haapa‘o maitai i te aufau i ta ratou tuhaa ahuru, e tupu ïa ratou i te rahi i te faito eita roa’tu e taeahia i te feia aufau ti‘a ore. Aita roa’tu to‘u mana‘o e tapitapi nei no te reira. Hau atu i te reira, e maamaa mau ïa to‘u ia ti‘aturi au e, e faarahi te Fatu i te feia e aufau i ta ratou tuhaa ahuru, e e hau a‘e ratou i te hotu, i te hoê faito tano noa, i te feia aita e aufau i ta ratou tuhaa ahuru. Te ti‘aturi nei au e, no te feia e horo‘a [i ta ratou mau ô] ma te aau tae mau, e horo‘a te Fatu ia ratou i te mana‘o, e e tupu ratou i te rahi i roto i te ite e te aravihi, hau atu i te vitiviti i te feia pipiri. Te vai nei taua faaroo ra i roto ia‘u, e ua roaa te reira ia‘u mai to‘u tamariiraa mai â.¹²

Mai te mea e, e horo‘a tatou ia au i te maraa ia tatou, mai te mea e, e aufau tatou i ta tatou tuhaa ahuru, noa’tu te na‘ina‘i o te faufaa e roaa nei ia tatou, …e faarahi te Atua to tatou Metua i te Ao ra i te iva toata i ni‘a i te ahuru e toe ra, e aore râ, i te maha ahuru ma pae toata i ni‘a i te pae ahuru, e e roaa te paari ia outou no te faaohipa maitai i te reira ia ore outou ia ere i te hoê mea na roto i to outou aufau ti‘araa.¹³

Te tatararaa a to te ao nei no te parau o te manuia, o to te taata ïa aravihi ia putu i te moni. Te hinaaro nei râ vau e parau atu ia outou e te Feia Mo‘a i te mau Mahana Hopea nei e, te ohipa puturaa i te moni, e ere te reira te manuia mau. Ia tupu te hoê taata i te paariraa e ia hotu atoa ho‘i oia i roto i te mau mea o te ao nei, mai te mea e, eita oia e ara maitai, e mo‘e ê te Varua o te Fatu ia’na, i reira oia e faatumu ai i to’na aau i roto i te mau mea o teie nei ao. E ia mo‘e ê ho‘i te Varua o te Fatu ia’na ra, e ia ore ho‘i oia e vai parau ti‘a faahou i mua i te Atua i roto i te parau no te aufauraa i ta’na tuhaa ahuru ma te parau ti‘a e te afaro, mai ta’na e faaite i te tiaauraa i mua i te hoê apiti ahiri e, tei roto oia i te ohipa puturaa faufaa, e iti ïa te puai o taua taata ra, e iti ho‘i to’na mana, e iti atoa to’na iteraa papu no ni‘a i te Varua o te Atua i roto i to’na ra aau. Aita roa’tu to‘u mana‘o e tapitapi nei no te reira.

Ei feia parau ti‘a tatou i mua i te Fatu e ti‘a ai. Te fifi rahi e vai nei, no te mea ïa e, ia tupu ana‘e te taata i te paariraa e ia puai ho‘i ratou i roto i te mau mea o te ao nei, e rave rahi o ratou o te faatumu i to ratou aau i roto i te reira mau mea, mo‘e ê atu ra te Varua o te Fatu ia ratou ra. No reira, te mea ta to te ao nei e parau nei e, te manuia, o te manuia ore ïa; no te mea, mai te mea e, e haamata te hoê taata na roto i te titau i te hoê perapeio e aita te reira i roaa ia’na fatata e pau to’na oraraa taatoa no te titau i te reira, tapa‘o ïa e, aita to’na oraraa i manuia. Mea rahi ta‘u taata i ite, ia roaa mai ta ratou moni, noa’tu e, mea na‘ina‘i roa, ua faaite mau ratou i to ratou parau ti‘a i mua i te Fatu, e ua aufau hoê tuhaa i ni‘a i te ahuru o te reira moni. Tera râ, ia rahi atu te moni tei roaa mai ia ratou, ua aufau ratou mai te hoê tuhaa haere atu i te piti e aore râ, e toru i ni‘a i te hanere, aita râ i aufau ahuru i ni‘a i te hanere. Eaha te fifi? No te aha, te hiaai moni i tupu ai i te rahi i roto i te hoê taata, e ua puai mai te au i te hiaai ava. Ua riro te reira taata i raro a‘e i te reira hiaai, e ua here oia i te moni, aita râ i here i te reira no te maitai ta’na e nehenehe e faatupu i te moni. Aita oia i faaau maitai i te faufaa o te mau mea atoa.¹⁴

Na te Atua teie ture, e ta te aufauraa i te tuhaa ahuru e faatupu ra, o te hau ïa e te oaoa i roto i te Feia Mo‘a i te mau Mahana Hopea nei e haapa‘o i te reira. E tupu te oaoa i roto i te aau o te taata e ti‘a ma te parau ti‘a hope roa i mua i te Fatu, na roto i te horo‘araa i ta’na tao‘a no te patu i te Ekalesia a te Mesia, e i roto atoa i te aau o te feia atoa e afau ti‘a i te tuhaa ahuru. Te mau haamaitairaa atoa ta outou e ta‘u atoa e fana‘o nei, no ô mai ïa i te Atua ra. E tarahu ta tatou Ia’na no te aho ora, e Na’na te mau mea atoa i horo‘a mai ia tatou nei. Te ani mai nei Oia ia tatou ia faaite i to tatou mauruuru e to tatou iteraa iTo’na maitai, na roto i te faaho‘iraa i te Ekalesia ra hoê i ni‘a i te ahuru o te mau mea tei roaa ia tatou, ei maitai no te Ekalesia e no te haaparareraa i te Evanelia i ô tatou iho e i te atea ê, inaha, no ô mai Ia’na ra te mau mea atoa i roaa ia tatou.

Te parau faahou atu nei au e, aita vau e taa nei e, no te aha te hoê taata haapa‘o maitai i roto i ta’na mau ohipa e te tahi atu mau taata, ma te feruri ore e, eita oia e aufau i ta’na tarahu i te fare toa, mai te mea e, e nehenehe ta’na e aufau, area i mua i te Atua ra, aita ïa oia e haapa‘o i te aufau i ta’na tarahu i te Atua…

Te tiaoro nei au i te Feia Mo‘a i te mau Mahana Hopea nei ia riro ratou ei feia parau ti‘a i mua i te Fatu e te fafau nei au ia ratou e, e roaa te hau, te hoturaa, e te manuia i te pae faufaa i te feia te vai parau ti‘a noa i mua i to tatou Metua i te Ao ra, no te mea te haapa‘o ra ratou i te ture e te hopoia. E haamaitai oia ia ratou no te raveraa i te reira. E ua riro te parau ti‘a hope i mua i te Fatu ei rave‘a faahiahia a‘e no te haapii i ta outou mau tamarii i te parau no te faaroo i te Evanelia a Iesu Mesia…Mai te mea e, e faatumu tatou i to tatou aau i ni‘a i te mau mea o teie nei ao e aita tatou e riro ei feia parau ti‘a hope roa i mua i te Fatu, eita ïa tatou e tupu i te rahi i roto i te maramarama e te mana e te puai o te Evanelia.¹⁵

Te haamauruuru nei au i te Atua no te haamaitairaa o te aufauraa i te tuhaa ahuru. Te oaoa nei au i te mea e, ua ti‘a ia‘u ia faaite i to‘u mauruuru i to‘u Metua i te Ao ra no To’na aroha ia‘u.¹⁶

E mea ti‘a ia tatou ia faaite i te aau horo‘a i roto i te faaohiparaa i to tatou mau haamaitairaa i te pae no te faufaa, no te tauturu i te paturaa i te basileia o te Atua i ni‘a i te fenua nei.

Te tahi atoa mea e ti‘a ia tatou te Feia Mo‘a i te mau Mahana Hopea nei ia haapii—ua roaa te reira ite ia‘u na roto i te faaohiparaa—maori râ, …te taaotiaraa ia tatou i roto noa i te mau mea faufaa o te oraraa nei, eiaha râ e haapii i te mau peu haamau‘a. Mai te mea e, te hau ra ta tatou faufaa, a faaohipa i te reira mai te au i ta te Atua e hinaaro ia faaohipa tatou—oia ho‘i, no te haereraa i mua o te Basileia e no te haaparareraa i te Evanelia…

No ni‘a i te mau tao‘a atoa i roaa ia tatou, aita to te reira e faufaa no tatou, maori râ, mai te mea e, ua ineine tatou e ua hinaaro tatou ia faaohipa i te reira no te haereraa i mua o te Basileia o te Atua. E hopoia na tatou ia imi i te ora no to tatou utuafare; e ere râ i te hopoia na tatou ia ora i roto i te haamau‘a faufaa- oreraa. E ere i te hopoia na tatou ia rave i te ohipa ia roaa te tao‘a rahi ia tatou no te faa‘una‘una ia tatou…

Mai te mea e, e haapii tatou ia faaohipa i te mau rave‘a ta te Atua i horo‘a mai ia tatou no te haereraa i mua o To’na Basileia, e ore ïa te Feia Mo‘a i te mau Mahana Hopea nei e roohia i te tahi mau fifi taaê i te pae no te faufaa; e haamaitai te Fatu ia ratou i te maitai rahi. Te mea te ti‘a ia tatou ia rave, o te imiraa ïa i te maramarama e te faaururaa a To’na Varua no te arata‘i ia tatou i te mau taime atoa, ei reira Oia e amui mai ai i te tahi atu mau mea faufaa ia tatou nei.¹⁷

Te taata horo‘a noa ta te Fatu ïa e here. Aita hoê taata i ni‘a i te fenua nei e nehenehe e aufau i te mau ô na te taata rii, e aufau ho‘i no te paturaa i te mau fare pureraa e te mau hiero, …e faaohipa ho‘i i ta’na mau rave‘a no te tono i ta’na tamaiti e ta’na tamahine e haere e poro i teie Evanelia, ma te ore e iriti i te nounou i rapae i to’na aau, noa’tu te huru nounou i roto ia’na a haamata ai oia i te horo‘a. O tera ïa te hoê o te mau mea nehenehe roa a‘e i te ao nei no te taata—oia ho‘i, ia mou roa te nounou i roto i to ratou huru taata ra. Ia mou ana‘e ho‘i te reira i roto ia ratou, e oaoa te roaa ia ratou e te hinaaro rahi ia imi i te rave‘a no te raveraa i te maitai ma te faaohipa i te mau rave‘a ta te Fatu i tuu mai i roto i to ratou rima, eiaha râ i te tamataraa e faaohipa i te reira ia rahi atu ta ratou tao‘a e roaa mai.¹⁸

E ere te moni i te haamaitairaa no ô mai i te Atua ra. Te maramarama râ e roaa nei ia tatou, tae noa’tu i te paari, e te Varua o te Atua no te faaohipa i te reira ma te paari e te ti‘a ho‘i, e no te faahaere i te Basileia o te Atua i mua i ni‘a i te fenua nei, o te reira te parauhia e haamaitairaa. Mai te mea e, ua haamaitaihia tatou i te mau tao‘a rahi o teie nei ao, e ua matapohia to tatou mata… ua riro ïa te reira ei haamaitairaa eiaha no ô mai i te Atua ra, no ô mai râ i te diabolo ra.¹⁹

Ua pinepine au i te ite e, te huru mau o te taata nei, o te nounou ïa, te taviri, te haru faufaa, te feruri ia’na iho, te haapa‘o noa ia’na iho, e te haaraa no to’na iho maitai. Area ta te Evanelia e haapii nei ra, e mea taaê roa ïa i te reira. Te ite nei tatou e, te mau titauraa e titauhia nei ia tatou no te aufau i te tuhaa ahuru e te moni haapaeraa maa…e te horo‘araa i ta tatou mau rave‘a no te faatae i te Evanelia i te mau taata atoa o te fenua nei—te tiavaru nei taua mau titauraa ra i te ino i rapae i te aau o te taata. Te mea ra e tano i te Feia Mo‘a i te Mau Mahana Hopea Nei e rave moti râ, te horo‘araa i te taime, te here no te faahaereraa i te Basileia o te Atua i mua. Na te Evanelia e tatara i te nounou, te taviri fauraa e te haru faufaa mai te mea e faaroo tatou. E faaî te Evanelia ia tatou i te hiaai ia haapae i teie mau maa o te ao nei, e ia rave tatou i te maitai no te faaoraraa i to tatou mau taa tupu.²⁰

Te mau mana‘o tauturu no te haapiiraa e te aparauraa

Nahea te tarahu e riro ai ei faatitiraa? Eaha te mau haamaitairaa e roaa ia tatou ia ora ana‘e tatou ia au i ta tatou mau rave‘a e vai ra? Eaha te mau mea e tauturu ia tatara ia tatou i rapae i te tarahu, e aore râ, ia opani ia tatou ia faaô i roto i te tarahu?
Nahea tatou ia haamaitaihia i te pae faufaa e i te pae varua atoa ia haapa‘o ana‘e tatou i te ture no te tuhaa ahuru? Nahea i te mau metua ia haapii i ta ratou mau tamarii i te mau parau tumu o te tuhaa ahuru e te mau ô?
No te aha e mea faufaa ia riro ei taata parau ti‘a i mua i te Fatu e i mua atoa i to tatou mau taata tupu? Nahea te mau metua parau ti‘a i mua i te Fatu e riro ai ei haamaitairaa no te mau tamarii?
No te aha te manuia i roto i te mau mea o te ao nei e nehenehe ai e faaere ia tatou i te Varua o te Fatu? Eaha te ti‘a ia tatou ia rave no te tapea maite i te manuia i te pae faufaa i roto i te raveraa ti‘a?
Eaha ta tatou mau hopoia i muri a‘e i to te Atua horo‘araa mai ia tatou i te mau haamaitairaa no te pae tino nei? Eaha te mau mea o te faataupupu ia tatou ia rave i teie mau hopoi‘a?
Eaha te mana ta te moni e horo‘a mai ia tatou nei, mai te mea e, e faaohipahia te moni ia au i te raveraa ti‘a?