Pene 11
Te Autahu‘araa, “te mana o te Atua ora”
Te mau taea‘e tei mau i te Autahu‘araa o te haapa‘o i te mau parau tumu o te parau ti‘a e nehenehe ratou e riro ei mauhaa i roto i te rima o te Fatu no te tavini ia vetahi ê.
No roto mai i te oraraa o Heber J. Grant
Ua parau te Peresideni Heber J. Grant e, “Eita roa’tu e mo‘ehia ia‘u te taime a titau mai ai hoê hoa to‘u i te tauturu, i muri a‘e i to te taote faaiteraa e, e pohe ta’na tamahine hou te poipoi, tei pohehia i te ma‘i arapoa pe e te fiva (diphterie). Ua ani mai oia ia‘u ia pure no taua tamahine ra, e i muri a‘e i to‘u faaru‘eraa’tu i to’na piha toro‘a, ua pure au ma te puai hope o to‘u varua ia faaora mai te Atua i taua tamahine ra. Te pure noa ra vau, ua tae maira te faaururaa ia‘u e: ‘Tei ni‘a i te fenua nei te mana o te Atua ora. Tei ô nei te Autahu‘araa. Haaviti! Haaviti!…A haere a tiavaru i te mana o te haamou, e ora te tamahine i reira.’
“Ua parau te taote e tiai ra i taua tamahine ra e, eita ta’na e nehenehe e faaru‘e ia’na e tae roa’tu i te poipoi; tera râ, ia poipoi a‘era, ua parau a‘era oia e, aita oia i taa faahou, e ua ti‘aturi oia e ua maitai taua tamahine ra. Aita ta’na e nehenehe eiaha e parau i to’na maere i te tauiraa te huru o taua tamahine ra i tera pô. Na te mana o te Atua ora i tiavaru i te haamou.”1
Ua oaoa te Peresideni Grant no te faaururaa tei roaa ia’na i taua pô ra: “Tei ni‘a i te fenua nei te mana o te Atua ora. Tei ô nei te Autahu‘araa.” I roto i ta’na mau a‘oraa no te amuiraa rahi, ua haapii pinepine oia i te Feia Mo‘a i te parau no te mau haamaitairaa e ti‘a ia ratou ia farii na roto i te puai e te mana o te autahu‘araa.
Te mau haapiiraa a Heber J. Grant
Ua faaho‘ihia mai te mau taviri, te mana, te mau oro‘a, e te mau horo‘a o te autahu‘araa.
A tere noa ai te iritiraa o [te Buka a Moromona], ua ite a‘era o Iosepha Semita e, ua haapii e ua faaohipa na te Ati Nephi i te parau haapiiraa no te bapetizoraa. No to’na hinaaro ia rahi atu to’na maramarama i taua parau tumu ra, ua rave oia mai ta’na i rave na, oia ho‘i, ua haere oia e o Olive Cowdery, to’na papa‘i parau, i roto i te uru raau, e ua pure. Teie ta’na mau parau:
“A pure ai maua ma te tiaoro atu i te Fatu, ua fâ maira te hoê ve‘a no te ra i mai na roto i te ata maramarama, e ua tuu maira oia i to’na rima i ni‘a iho ia maua, e ua faatoro‘a maira ia maua, i te na oraa mai e:
“‘I ni‘a iho ia orua, e to‘u na taea‘e tavini, i te i‘oa o te Mesia ra, te horo‘a’tu nei au i te Autahu‘araa a Aarona, o tei mau i te mau taviri no te utuuturaa a te mau melahi, e no te Evanelia no te tatarahapa, e no te bapetizoraa utuhi, ia matara te hara; e e ore roa te reira e rave-faahou- hia’tu mai nia’tu i te ao nei, e tae noa’tu i te taime e pûpû faahou atu ai te mau tamarii tamaroa a Levi i te hoê ô i te Fatu na roto i te parau ti‘a ra.’
“Te ve‘a o tei fâ mai ia maua i taua taime ra, e o tei tuu mai i teie nei Autahu‘araa a Aarona i ni‘a iho ia maua, ua parau mai oia e, o Ioane to’na i‘oa, e o taua iho Ioane i parauhia o Ioane Bapetizo i roto i te Faufaa Apî; e ua haere mai oia i raro a‘e i te faatereraa a Petero, Iakobo, e Ioane, tei mau i te mau taviri no te Autahu‘araa a Melehizedeka, e taua autahu‘araa ra, e tuu-atoa-hia mai ïa i ni‘a iho ia maua i te taime ti‘a.” [A hi‘o Iosepha Semita — Aamu 1:68–69, 72.]
Na roto i teie faatoro‘araa e na roto i te faaho‘i-raa-hia mai te Autahu‘araa a Melehizedeka tei horo‘ahia mai i muri a‘e ra mai tei fafauhia mai, ua faaho‘ihia mai ïa te mau taviri e te mana o te Autahu‘araa o te Atua Manahope, tei mo‘e na e rave rahi tenetere te maoro, i te taata nei, e ua vai te reira i roto i te Ekalesia nei ma te mutu ore e tae roa mai i teie nei anotau.
Na roto i te faaho‘i-raa-hia mai te autahu‘araa, ua matara atoa te e‘a no te pororaa i te Evanelia, no te faatereraa i te mau oro‘a no te reira Evanelia, e no te faati‘araa i te Ekalesia.2
Ua ite au e, te mau horo‘a atoa, te mau maitai atoa, te mana, tei mauhia na e te mau aposetolo i te tau no te Faaora, ua hope paatoa ïa te reira i te mauhia e te mau taata o te Atua i teie mahana.3
Te faaite atu nei au ia outou i to‘u iteraa papu i teie mahana e, tei ia tatou nei te parau mau, ua paraparau faahou mai te Atua, te mau horo‘a atoa, te mau maitai atoa, te mau mana atoa e te mau horo‘araa atoa no roto mai i te Autahu‘araa mo‘a o te Atua ora i te tau o te Faaora ra, —te mau haamaitairaa, te mana faaora o te Atua Manahope, te faaururaa o To’na Varua e ti‘a ai i te tane e te vahine ia farii i te mau faaiteraa no ô mai Ia’na ra, te faaururaa o te Varua o te Atua e ti‘a ai i te taata ia parau i te parau êê e ia iriti i te parau êê, e te mau maitai e te mau horo‘a atoa—te fana‘ohia nei ïa te reira e te Feia Mo‘a i te mau Mahana Hopea nei i teie mahana.4
Tei roto i te Ekalesia nei te mana faaora o te autahu‘araa.
Ua ite au e, tei roto i teie nei Ekalesia te mana faaora o te Atua Manahope. Ua ite au e, ahiri e, aita te mana faaora o te Atua, aita ïa vau e ti‘a atu i mua ia outou i teie mahana. Ua ite au e, te vai nei i rotopu i teie nunaa taata, te mau taata tei riro ei faaiteraa no taua mana faaora ra o te Atua. Ahiri i papa‘ihia te hoê buka no te taatoaraa o te mau haamaitairaa nehenehe ta te Fatu i horo‘a mai na roto i te Autahu‘araa mai te tau a faati‘ahia ai te Ekalesia i ni‘a i te fenua nei, e riro ïa ei buka me‘ume‘u a‘e i te Faufaa Apî.5
I te hoê taime, te haapa‘o ra to‘u taea‘e o Joseph Hyrum Grant …i te hoê fare tarahuraa pereoo puaahorofenua, e ua haere mai te tahi mau rave ohipa no te fare hamaniraa tiaa Z. C. M. I. no te faaarearea ia ratou…O Joseph te taata e haapa‘o ra i te faahororaa i te pereoo, e ua faaite oia i te mau taata atoa i reira e, te faaineine ra te hoê vero, e ua faaitoito oia ia ratou paatoa ia ho‘i i te fare, no te mea …e nehenehe te pereoo e taahuri i roto i te vero e te pouri. Tera râ, ua hoê to ratou mana‘o e, eita ratou e faahapa i te fare tarahuraa pereoo mai te mea e, e tupu noa’tu te hoê fifi.
I to ratou ho‘iraa mai i te fare na roto i te pouri, ua taahuri a‘era to ratou pereoo, e e rave rahi taata tei pepe ino roa. Te vaira hoê o te mau tamahine ua fatifati te tahi mau ivi to’na, e na roto i te reira pepe to’na e to’na vai-noa-raa i roto i te vero, ua putahia oia i te to‘eto‘e. Te taote tei faataahia no te utuutu ia ratou, te parau ra oia e, eita taua tamahine ra e ora, e e pohe paha oia na mua a‘e i te poipoi. Ua peapea roa o [Joseph] i taua fifi ra, i te mea e, o oia ïa te taata faahoro no taua pereoo ra. Ua titau mai oia ia‘u ia haere na muri iho ia’na no te haamaitai i taua tamahine ra, ma te parau mai e, ua faaite mai te varua ia’na e, e ora oia.
Ia haere atu maua i to’na ra ro‘i, ua parau atu vau ia’na e, te pohe nei teie tamahine e e pohe oia hou a iriti mai ai taua i to taua rima mai ni‘a mai i to’na upoo. Ua ri‘ari‘a roa oia, e ua parau maira e, ua faaite mai te Fatu ia’na, e ua ite oia, mai ta’na i ite e e parau mau te Evanelia, mai te mea e, e haamaitai maua ia’na, e ora oia. Ua haamaitai ihora maua ia’na, e i te taime a haamau ai au i te faatahinuraa, ua faauruhia vau ia fafau i teie tamahine e, e ora papu to’na mau ivi, e ora faahou mai oia, e e ho‘i faahou oia i te fare hamaniraa tiaa Z. C. M. I. no te faatere faahou i ta’na matini. Aita vau i ite e, e faatere matini ta’na ohipa e aore râ, eaha ta’na ohipa. I taua pô ra ua farerei au i te raatira no taua fare toa ra e ua parau mai oia ia‘u e: “No ho‘i noa mai nei au na ô mai i te fare o Marie DeGray, e te fatata nei oia i te pohe. Ua papu ia‘u e, ua pohe atura ïa oia i teie nei.” Na ô atura vau e: “E te taea‘e Rowe, e ta‘uma oe i roto i ta oe piha toro‘a e parahi i raro e e papa‘i oe: ‘Aita o Marie DeGray i pohe. Eita o Marie DeGray e pohe, e maitai mai râ oia, e e ho‘i mai oia no te faatere faahou i ta’na matini i roto i ta oe fare toa.’ Ua faaitehia mai te reira ia‘u na te varua o te Atua ora.” Ua parau maira oia: “Aita e faufaa na‘u ia papa‘i i te reira, no te mea, ia au i te parau ta oe e parau mai nei, ua ite ïa vau e, e ora oia.”
E ua faati‘a maira oia ia‘u i te hoê fifi tei tupu i roto i to’na utuafare. Na ô maira oia e: “I London, hou a ratere mai ai au i teie fenua, e ma‘i rahi roa to te hoê tamahine ta‘u, e ua parau te taote e utuutu ra ia’na e, eita e taeahia ia’na te poipoi, e pohe oia.” Te haamana‘o ra vau e, ua titau oia ia Junius F. Wells e to-’na hoa, fatata e pae kilometera te atea i te tahi pae o te oire o London, ia haere mai e haamaitai i ta’na tamahine, e ua ora mai ta’na tamahine. Te parau ra te Taeae Rowe e, “Ia poipoi a‘e, ua haere mai te taote i to‘u fare e ua horo‘a mai i te hoê parau faaite, tei tarimahia, e te faaite ra e, ua pohe ta‘u tamahine. Ua arata‘i atura vau ia’na i roto i te piha faafaaearaa e ua faaite atura vau ia’na i te tino. No reira, ia parau mai oe ia‘u e, e ora teie tamahine, te farii nei au i ta oe parau, no te mea ua ite au e, tei roto te mana faaora o te Atua i teie nei Ekalesia, mai ta‘u i ite e te ora nei au.”6
Ma te arata‘ihia e te mau parau tumu o te parau ti‘a, e nehenehe ta te mau taea‘e tei mau i te autahu‘araa e faaohipa i te mau mana o te ra‘i ra.
E ere ïa i te hoê ohipa faufaa ore te mauraa i te Autahu‘araa o te Atua—te roaaraa te mana no te faauru i te mau mana o te ra‘i ia faatupu i te maitai.7
No ni‘a i te mana o te Autahu‘araa o te Atua e i te huru no te faaohiparaa i te reira: Ua tapeahia te Peropheta o te Atua ora i te fare tapearaa no Liberty, e e rave rahi taata e imi ra ia’na no te tamata e no te taparahi haapohe; tera râ, eita roa’tu e ti‘a i te mau uputa atoa o te fare tapearaa ia tapea i te heheuraa o te mana‘o e te hinaaro o te Atua i te feia tei faataahia no te farii i te reira; e a parahi ai oia i roto i te fare tapearaa no Liberty, ua farii te Peropheta Iosepha Semita i te hoê o te mau heheuraa rahi roa a‘e i te mau heheuraa atoa a te Atua e vaira i roto i Te Parau Haapiiraa e te mau Parau Fafau. E tai‘o atu vau i te tuhaa 121:
“Eaha te maoro o to te pape tahe vai-ateate-ore raa ra? Eaha te mana o te ti‘a ia tapea’tu i te mau ra‘i ? E au ho‘i ïa i te taata ia faatoro atu i to’na rima paruparu no te tapea’tu i te anavai Misouri i to’na taheraa mau, e a ore râ ia faaho‘i atu i te reira i ni‘a ra, i te tapearaa’tu i te Mana Hope ra eiaha ia manii atu i te ite mai ni‘a mai i te ra‘i ra i ni‘a i te mau upoo no te Feia Mo‘a i te mau Mahana Hopea nei.
“Inaha, e rave rahi te parauhia, area râ aita rea te maitihia ra. E eaha te tumu aita ratou e maitihia ra?
“No te mea ua faatumu-hia’tu to ratou mau aau i ni‘a i te mau mea no teie nei ao, e te titau nei ratou i te mau faaturaraa o te taata, no reira aita ratou e haapii mai i teie haapiiraa hoe nei—
“I te mea e ua haamau-roa-hia’tu te mau ti‘araa no te autahu‘araa i te mau mana no te ra‘i ra, e ore roa e ti‘a ia faaterehia te mau mana no re ra‘i ra e ore roa atoa ho‘i e faaohipahia maori râ na roto i te parau tumu no te parau-tia ra.
“Parau mau ïa, e ti‘a ïa ia horo‘ahia mai teie mau mea nei i ni‘a ia tatou nei; tera râ, ia tamata tatou i te tapo‘i mai i ta tatou mau hara, e a ore râ ia haamauruuru i to tatou teoteo, to tatou ho‘i opuaraa hahavai ra, e a ore râ, ia faatere e a ore râ, ia hau e a ore râ, ia haavî atu i te mau varua o te tamarii o te taata nei, i roto i te hoê vahi iti a‘e o te parau-tia ore ra, inaha, e faananaue atu te mau ra‘i ia ratou iho; e oto te Varua o te Fatu; e ia iriti-ê-hia’tu te reira, ua Amene te autahu‘araa, oia ho‘i te mana, no te reira taata.
“Inaha, hou oia e araara mai ai, ua vai ihohia’tu ïa oia ia’na iho ra, ia tue atu i te mau tara ra, ia hamani ino i te feia mo‘a, e ia tama‘i atu i te Atua ra.
“Ua haapii mai tatou na roto i te rave-noa-raa i te ohipa oaoaore e, o te huru ïa e te hinaaro ho‘i no te pae rahi o te taata nei, ia noa iho mai na ia ratou te tufaa iti no te mana, i roto i to ratou iho mana‘o ra, e haamata iho ratou i te haavî atu i te taata mai te parau-tia ore ra.
“No reira e rave rahi te parauhia ra, tera râ, aita rea te maitihia ra.” [PH&PF 121:33–4.]
I teie nei, te hinaaro nei au e haapapu atu i te toe‘a o teie heheuraa tei horo‘ahia mai i roto i te hoê fare tapearaa. Na roto i te mana taatoa o te hoê Tuhaa fenua i te tamataraa i te haru i te tiamâraa o Iosepha Semita, aita i mau ia ratou i te tapea i te aparauraa i rotopu i taua peropheta ra e te mau ra‘i, e ua farii oia i teie mau parau faauruhia, te ore roa e mo‘e i te mau episekopo atoa, e aore râ, te mau peresideni tĭtĭ atoa, e aore râ, te mau aposetolo atoa, e aore râ, te mau peresideni atoa o te Ekalesia a ti‘a ai ratou i roto i to ratou toro‘a i roto i teie Ekalesia:
“E ore roa e nehenehe e e ore roa ho‘i e ti‘a ia haamauhia te hoê mana e aore râ te hoê vahi iti a‘e no te tura na roto i te au tahu‘araa, maori râ, na roto i te taparuraa, na roto i te faaoroma‘inoa-raa, na roto i te marû e te haehaa, e na roto ho‘i i te here mau ra;
“Na roto i te aroha, e te ite ateate ra, o te faarahi roa i te varua ma te faahua ore, e ma te haavare ore i roto i to’na aau—
“Ma te faahaparaa’tu i te tahi mau taime na roto i te parau papu roa, ia faauruhia râ e te Varua Maitai; e i reira e faaite mai ai i te rahiraa no te here ia’na o ta oe i faahapa na, oi mana‘o mai ai oia e ei enemi oe no’na ra;
“Ia ite mai ai oia e e mea puai a‘e ta oe ti‘aturiraa i te mau tapearaa no te pohe.
“Ia î noa atoa ho‘i to outou mau aau i te aroha i te mau taata atoa, e i te utuafare faaroo, e ia faaunauna noa te taiata ore i to outou mau feruriraa i te mau taime atoa; ei reira to outou ti‘aturiraa e puai roa ai i mua i te aro no te Atua; e e mairi mai ai te haapiiraa no te autahu‘araa i ni‘a i to outou aau mai te hupe no te ra‘i maira.
“E e riro te Varua Maitai ei apiti no outou i te mau taime atoa”,
Te riroraa te Varua Maitai ei apiti no tatou i te mau taime atoa, o tera ïa te mea faufaa roa’tu i te mau tao‘a atoa o te ao nei.
“e to outou sepeta ei sepeta taui ore no te parau-tia e te parau mau; e e riro to outou mana ei mana mure ore, e e tahe mai te reira ia outou ma te faahepo ore e a muri e a muri noa’tu.” [PH&PF 121:41–46.]8
Ia paraparau vau i te Feia Mo‘a i te mau Mahana Hopea nei, aita e heheuraa i roto i te taatoaraa o te buka Fafau ta‘u i faahiti pinepine mai te heheuraa e vaira i roto i te Tuhaa 121…tei na ô e “E ore roa e nehenehe e e ore roa ho‘i e ti‘a ia haamauhia te hoê mana e aore râ te hoê vahi iti a‘e no te tura na roto i te autahu‘araa, maori râ na roto i te taparuraa, na roto i te faaoroma‘i-noa-raa, na roto i te marû e te haehaa, e na roto ho‘i i te here mau ra.”
Aita e fifi to te hoê Autahu‘araa mai tera te huru—na roto i te marû, e te haehaa, e te here mau. Tera râ, mai te mea e, e faatere tatou e a ore râ, e hau e a ore râ, e haavî atu tatou i te mau varua o te tamarii a te taata nei, i roto i te hoê vahi iti a‘e o te parau-tia ore ra, inaha, e faananaue atu te mau ra‘i ia ratou iho; e oto te Varua o te Fatu; e ia iriti-ê-hia’tu te reira, ua Amene te autahu‘araa, oia ho‘i te mana, no te reira taata.” Na te Atua teie mau parau.9
E mea fifi anei ia faaohipa i te autahu‘araa o te Atua ora mai te au i ta te Fatu i faaite maira: “Na roto i te aroha e te marû”? Tera ana‘e to’na raveraa, e mai te mea e, aita e na reirahia, ua Amene te autahu‘araa e te mana o te feia tei mau i teie autahu‘araa i roto i te Ekalesia a te Mesia.10
Eiaha te mau taata tei mau i te Autahu‘araa e faaohipa i te reira no to ratou iho roo…Ia na reira ho‘i ratou ra, e mo‘e ê te varua o te Fatu ia ratou e e titau ratou i te mau mea o teie nei ao, eiaha râ i te mau mea na te Atua.11
Aita ta tatou e nehenehe e rave i te hoê atu mea, mai tei papa‘ihia i roto i taua heheuraa ra, maori râ, ia faaite i te here e te aroha e te maitai—te here mau. E faaohipa vau i te Autahu‘araa o te Atua tei horo‘ahia mai ia‘u nei, ma to‘u ite atoa, e na roto i te tautururaa a te Fatu.12
Te mau mana‘o tauturu no te haapiiraa e te aparauraa
-
E mea nahea outou e to outou utuafare i te haamaitai-raa-hia no to outou faaohiparaa i te autahu‘araa?
-
Nahea e nehenehe ai ia tatou ia faaite i te faatura i te autahu-‘araa? Nahea tatou ia tauturu i te mau melo no te utuafare ia faatura i te autahuaraa?
-
Eaha te mau mea tei tupu i ni‘a ia outou tei haapuai i to outou iteraa papu no ni‘a i te mana faaora o te autahu‘araa? I te mau taime ma‘i e aore râ, i te mau taime ati, eaha te ti‘a ia tatou ia rave no te faataa i to tatou iho mau hinaaro e te hinaaro o te Fatu?
-
Eaha ta outou i haapii mai na roto mai i te heheuraa tei papa-‘ihia i roto i te Parau Haapiiraa e te mau Parau Fafau 121: 33–46? No te aha e titauhia ai i te feia tei mau i te autahu‘araa ia haapa‘o ratou i te mau parau tumu i roto i teie heheuraa no te rave i te ohipa i roto i te i‘oa o te Fatu? Mai te aha te huru o te faaohiparaa o teie mau parau tumu i roto i ta tatou mau ohipa atoa e o vetahi ê?
-
Nahea te feia aita e autahu‘araa to roto i to ratou utuafare e nehenehe ai e farii i te mau haamaitairaa o te autahuaraa?
“Te mau horo‘a atoa, te mau maitai atoa, te mau mana atoa e te mau horo‘araa atoa no roto mai i te Autahu‘araa mo‘a o te Atua ora i te tau o te Faaora ra, te fana‘ohia nei ïa te reira i teie mahana.”