Wase 7

Na Kena Bibi na Tucaketale

Ni mai bula tale na Karisito ni oti na mate, ena yaco vakakina vei ira na tamata taucoko, me ra vakatikori yani ki na bula era veiganiti vata kaya ena vuravura ka tarava.¹

iVakamacala Taumada

Ena yabaki 1912, erau a sotava kina o Elder David O. McKay ka a lewe tiko ni Tinikarua kei Emma Ray na marama watina na imatai ni gauna ni rarawa bibi vakaitubutubu ni a mai mate kina na luvedrau tagane yabaki rua veimama, o Royle. Ena nona talanoataka oqo o Elder McKay e vakaraitaka kina na mosi ni yalona ia e a vakaraitaka talega kina na nona vakabauta tiko na tucaketale ka na salamuria mai:

“Oqo ena bogi ni Moniti, 8 ni Epereli, 1912. Sa qai dua na bogi ni nona rarawa na neirau cauravou lailai lomani oqo. Sa vaka e ka ni voraki vua ni cegu tiko! Era a mai vakadikevi koya ena mataka nikua o ira na vuniwai, ka ra raica rawa ni nona mosi sa baleta ni sa vuce ruarua na nona yatevuso. Sa vaka me vakayalolailaitaki keirau na itubutubu na macala ni veika oqo; ia ni oti o ya e a mai tukuna tale vei keirau na vuniwai ni nona vakadidike sa raica rawa kina na manumanu ni mate ka vakavuna na gaga ka sa tiko vua na kena wai, keirau a mani yaloqaqa tale kina.

“Ia sa malumalumu tikoga mai o Royle, ka sa vaka me levu cake ga mai na mate oqo. Ena siga taucoko o ya e a sasaga bula tikoga o Royle, e a ciqoma kece tikoga me vaka e dua na cauravou levu na veiqaravi vakavuniwai e vakayacori tiko vua. Ena veimama ni ciwa ena bogi o ya keirau a tu yani kei tamaqu o Thomas E. [McKay] ka masulaki Royle tale. E vaka me marau cake mai kina o Ray, ka laki koto volekati Royle ena nona idavodavo. Ni oti vakalailai sa vaka me malumalumu mai na nona icegu, ka keitou sa kila ni sa na vakarau biuti keitou na luvei keirau oqo. E a qai voqa mai gusuna ‘Nana’ na iotioti ni nona vosa. Ni sa voleka ni yaco mai na iotioti ni gauna, e a dodoka mai na ligana ruarua lalai, ia niu cuva yani meu mokoti koya, e a mokota mai o koya na domoqu ka sa kena iotioti ni veimokoti ena loloma ni dua na tama mai vua e dua na luvena lomani. Sa vaka me vakila o koya ni sa na gole yani, ka vinakata me kaya, ‘Moce mada, Tata’ ia na voqa lailai ni domona sa tabonaka na malumalumu kei na mosi. Ni oti vakalailai o ya, au kila ni a vakilai Tinana rawa. E a mai vakacegu toka ga vakalailai o tinana; ka raici iratou rawa yani na nasi ni vaka me ratou veilecayaki, e a cuvara yani na luvena lomani oqo ka sega ni via laivi koya me yacova ni keitou sa tuberi koya vakatikitiki mai na rumu ni sa mai kauta o Mate na neirau cauravou lailai.

“Sa mai cavuka na icegu ni vo toka e tini na miniti me rua na kaloko ena mataka lailai, ka a sega mada ga ni dua na masela e a yavala kina. ‘Sa sega ni mate ko koya, sa moce ga’ sa yaco dina vakakina ki na tamata yadua, ni sa moce dina ga o koya. E a sega ni mate.²

iVakavuvuli nei David O. McKay

Era vakadinadinataka na iApositolo i Jisu na Nona Tucaketale.

E rauta ni rua na udolu na yabaki sa oti … era a bula voli ena rarawa e so na iapositolo. E a rarawa na yalo i Pita; e a vakaloloku voli o Joni; ka vakakina o Meri, na tinai Karisito. Era sa veidroyaki na vo ni apositolo. Sa mai kidava rawa o Jiutasa na cala bibi sa mai vakayacora. Sa qai dua na bogi ni rarawa!

Ena mataka lailai ka tarava, e a tucaketale na Karisito. … Ni a yaco dina ga, na tucaketale oqo ka sa na yaco me ra bula tawamudu kina na tamata, na nodra sa bula dina tiko mai na yasana ka dua o ira na noda daulomani, e tuvaki vinaka tu na nodra bula. Era bula dina tiko ena waqawaqa vakayalo oqo me vakataki Karisito ena gauna e a laki vunau kina vei ira na yalo era vesuki tu.³

Na nodratou raica rawa na nona tucaketale o Jisu sa vakalevutaka na kena yaga ni ivakadinadina ni ka oqo mai vei iratou na iApositolo. Na titobu ni nodratou ivakadinadina e laurai levu sara ga ena rarawa kei na veilecayaki ena gauna e a mate kina o Jisu. E rua veimama na yabaki na nodratou a tuberi ka vakauqeti tiko mai vei Karisito. Ia sa mai gole oqo o koya. Era sa mai biu tu, ka sa vaka me ra veilecayaki ka vakaloloma. …

“Na cava sara mada e a veisautaki iratou kina vakasauri na tisaipeli me ratou nuidei, sega ni rere, ka yaloqaqa ni ratou vunautaka yani na Kosipeli i Jisu Karisito? Sa ikoya na ivakatakila ni sa tucaketale mai na ibulubulu o Karisito. Sa mai yaco na nona yalayala, sa mai vakayacori na nona ilesilesi vaka-Mesaia. …

E a sega ni volaitukutukutaka rawa o Marika na nona a tucaketale mai na Turaga; ia e a vakaraitaka na agilosi ena bati ni ibulubulu sa mai vakatakila na tucaketale, ka yalataka ni Turaga ena sotavi iratou na nona tisaipeli. E voqataka vei keda o Marika na itukutuku veivakurabuitaki ni imatai ni ibulubulu e vuravura me lala didi tu. Sa imatai ni gauna ena ivolaitukutuku ni tamata na vosa “E davo tu oqo” me sosomitaka na itukutuku vakalou “Sa tucaketale ko koya.” E sega ni rawa me dua e vakabekataka ni a sega ni vakadeitaka e yalona o Marika na dina ni kena sa lala na ibulubulu. E sega ni dodonu vua me vakatitiqataki na tucaketale—e a yaco dina; kei na nona rairai na nona Turaga ka iVakavuvuli vei ira na tamata sa dua na ka dina ka sa vakadeitaka e lomana ka sega ni vakatitiqataka mada ga vakalailai. E a solia na nona bula ki na kena kaburaki na dina oqo, ia kevaka e dina na veika e baleti koya, e a dave na nona dra me vakadeitaki kina na nona itukutuku.

E dua tale ka a volaitukutukutaka na nodra ivakadinadina na tamata, o ya o Luke, e dua na kai matanitu tani, se, e vuqa era nanuma ni o koya e dua na dauveivakalotutaki mai Anitioki e Siriya, ka a laki veiqaravi talega vakavuniwai. (Kolosa 4:14.) E so sara mada ga era dau vakacacani koya era okati koya me dua na daunivolaitukutuku makawa, sa vakakina na nona veimaliwai kei ira na iapositolo ena gauna makawa ka muataka kina na nona itukutuku me veiganiti dina.

Na veika e a vola o koya e a vakavurea mai na vuku ni nona vakadidike kei na vakatataro, ka a rawati mai ena gacagaca vakaveiqaravi e so. Vakabibi na nona vakataroga ka vola na nodra ivakadinadina o ira “era a taumada raica dina sara kei ira na vunautaka na Vosa.” E kaya o koya ni “a vakamuria vakavinaka na veika kece sara mai na kena itekitekivu, ” me rawa kina vua me “vola vakadodonu sara.” [Raica Luke 1:1–4.] Sa kena ibalebale ni a vakasoqona mai o Luke na nodra ivakadinadina o ira “era a raica dina” mai vei ira sara ga ka sega ni mai vei ira era a vola taumada.

Ena vuku ni veiivakadinadina nuitaki, eda sa mai ciqoma na Kosipeli i Luke ka vola sara ga o koya. Ena wase 24, e a vakadinadinataka na itukutuku vakalou oqo: “Ena cava dou sa mai vakasaqarai koya sa bula ena kedra maliwa na mate? Sa sega eke ko koya, sa tucaketale.” [Luke 24:5–6.]

Ena kena sa mai vakadeitaki tikoga na kedra dodonu sa rawa me da ciqoma na nona itukutuku kei na ivakadinadina ka baleta na ivakadinadina i Pita kei Paula kei ira na iapositolo tale e so me baleta na tucaketale. “Ka sa vakarairaitaki koya talega [na Karisito] vei ira, ka sa levu na kena ivakadinadina, ni sa bula tale mai na nona mate, ka ni sa daurairai vei ira ka bogi vasagavulu, ka vosataka na veika ni matanitu ni Kalou.” [Raica Cakacaka 1:3.] O cei beka ena vakatitiqataka rawa na yalo nuidei nei Luke ena dina ni tucaketale?

E dina ni sega ni dua vei rau o Marika kei Luke e vakadinadinataka rawa ni rau a raica dina na Turaga ni sa tucaketale, o koya gona e so na tamata era tukuna ni sega ni rawa me vakabauti na nodrau itukutuku me ivakadinadina bula. Era sega ni vakadinadinataka, ia erau a kila ni ra a raici Koya o ira e so, ka sa vakaraitaka tiko ni sa kaukauwa dina sara na ivakadinadina oqo ena kedra maliwa na iapositolo kei na tisaipeli tale e so ni a yaco dina ga na tucaketale.

Ia, e tiko talega oqo e dua na itukutuku ka vakaraitaka tiko na nona ivakadinadina e dua ka a raici Jisu dina ni oti na nona mate ka bulu. Na ivakadinadina ni tamata oqo e tokona na nodrau ivakadinadina oi rau na tagane au a tukuna taumada kei ira talega na tamata e so tale. Au tukuni Saula tiko, e dua na Jiu mai Tarisu ka a vakavulici koya o Kamalieli, e dua na Farisi bula dodonu, ia ena gauna a se bera kina veisau e a dua e dau vakacacani ira era vakabauti Jisu na kai Nasareci ni a tucaketale mai na mate. Ia sa tu oqo na ivolatukutuku dina makawa ka sa baleta se vakadinadinataka na nona tucaketale o Karisito, ka da sa mai kila na veika oqo e tukuna o Paula vei ira na kai Korinica:

“Niu a tukuna taumada vei kemudou na ka kau a rawata, ni sa mate na Karisito ena vuku ni noda ivalavala ca me vaka na iVola Tabu; ni sa bulu talega, ka ni sa tucake talega ena ikatolu ni siga me vaka na iVola Tabu; ni sa riarai talega vei Kifa, vei ira e muri na le tinikarua; ka rairai e muri vei ira vata na veiwekani era lewe lima na drau ka vakacaca; e lewe vuqa vei ira era sa bula ka yacova na siga oqo, a sa moce tu e so. Sa rairai e muri ko Koya vei Jemesa; sa qai rairai vei ira kecega na iapositolo. Sa rairai e muri sara vei au talega, me vaka vua e dua sa lutu dole.” [1 Korinica 15:3–8.]⁴

Na vakatitiqa vakavuravura ena sega ni rawa ni vakacala na nodra itukutuku na ivakadinadina.

Era lewevuqa edaidai era sa vakataki ira na tamata mai na ulunivanua o Arisi ena rua na udolu na yabaki sa oti ena nodra tara e dua na icabocabo ni soro vua “Na Kalou e Tawakilai, ” ia era sega ni kilai koya. Eda wilika ni nona a gole yani o Paula ki Arisi e a raica kina ni ra wavu tu e so na ivakatakarakara ni kalou tani. … Oqo na vanua era dau mai soqoni kina o ira na tamata vuku kei ira na daunilewa, o ira na daurairai kei ira na daukilakila ni gauna makawa, era mai vakadidiketaka ka veivosakitaka na veika tawakilai ni bula kei na icavacava ni kawa tamata.

Ia sa mai maliwai ira tu oqo e dua na turaga lailai yaloka ni mata roka melomelota ka segata sara na nodra ivakavuvuli ni sa ka lasu ka sa cala bibi na nodra qarava tiko na ivakatakarakara, ka sa ikoya ga ena koro levu ni vuku oqo e kila mai na ka a sotava ni sa rawa vua na tamata me curuma yani na katuba ni mate ka bula tale. … Mai na nona veivakavulici vakamatata o Paula me baleta na ituvaki ni Kalou, era a vakarorogo vakavinaka sara vua me yacova ni sa laki tusanaka ni Kalou e a vakaturi Jisu tale mai na mate.

Ena gauna era rogoca kina na tucaketale e so era a vakalialiai koya ka ra lewe levu sara era sa lako laivi, ka biuti koya tu mai e tukuna tiko na ka dina me tu taudua ka sa qai galili ga. [Raica Cakacaka 17:22–23.] Edaidai, ena Ulunivanua mai Arisi, ni da veivosakitaka na nodra tucaketale na mate, e so era na veivakalialiai, ka so era vakatitiqa ka lako laivi. Edaidai, me vaka ga mai liu, e lewe levu sara na tagane kei na yalewa era vakalou tani tiko, ka ra vakanananu kina vakalevu cake ka sega vua na Turaga sa tucaketale. …

Ia sa ka dina sara ni a tucake ga vakataki koya o Karisito ka mataliataki me vaka e dua na Tamata lagilagi, sa tucaketale, ka sa mai saumi kina na lomatarotaro ni veigauna—“Kevaka sa ciba na tamata, ena bula tale ko koya?” [Raica Jope 14:14.]

Na kena yaco dina sara na tucaketale mai na ibulubulu sa ka dina vei iratou na tisaipeli ka ratou veikilai yalo sara vakavinaka kei Karisito. Sa sega tale ni dua na vakatitiqa e laurai vei iratou. Sa iratou sara ga na ivakadinadina bula ni dina oqo. Oqo e baleta ni ratou a raica e matadratou, ka rogoca e daligadratou, ka veitaratara vakayago kei koya na Dauveivueti.⁵

Na yalo ni tamata ena curuma yani na katuba ni mate ka basika yani ki na bula tawamudu, ka sa ikoya oqo e dua vei ira na itukutuku lagilagi sa vakaraitaka mai vei keda o Karisito na noda Dauveivueti. Na nona ilesilesi e vuravura oqo sa dua ga na siga ni cakacaka vua ka sa mai dromu na kena siga. Na mate, sa gauna ga ni moce, ka qai yadra ena mataka ka tarava ki na itikotiko tawamudu. Oi rau ko Meri kei Marica erau raici ganedrau ni sa dua na tamata mate ena dua na ibulubulu butobuto, ia ko Karisito e raica ni o koya e dua na tamata sa bula. E vakamacalataka o koya na ka oqo ena vica ga na vosa: “… Sa moce na wekada ko Lasarusa. …” (Joni 11:11.) Kevaka me da kila na tamata kecega ni sa tucaketale mai na mate na Karisito ena ikatolu ni siga—ni oti o ya e a laki sikovi ira tale e so ka laki tiko ena kedra maliwa o ira mai na vuravura ni yalo, na yalona sa mai vakavoutaka na yagona e a vakamavoataki, ka a tiko vata kei ira na tamata me vasagavulu na siga, ka qai lesu cake o koya e dua na tamata lagilagi vua na Tamana—sa na vakaitamera na vakavinakataki ni yalo ni tamata era vakaleqai tu ena lomatarotaro kei na veilecayaki!

Na Lotu i Jisu Karisito ni Yalododonu Edaidai e duavata kei Pita, Paula, vata kei Jemesa kei ira talega na iapositolo ena gauna makawa ka ra sa ciqoma ni sega walega ni a yaco dina sara na tucaketale, ia sa mai vakacavari kina na ilesilesi vakalou nei Karisito e vuravura.⁶

Na veivakadeitaki vou ka cecere duadua ni a tucake mai na ibulubulu o Jisu sa ikoya na nodrau a rairai vua na Parofita o Josefa Simici na Tamada kei na Luvena, ni mai oti e dua na udolu ciwa na drau na yabaki mai na gauna o ya. … Na cakamana ni bula oqo sa sega ni veika e a yaco kina ia sa umani sara tikoga kina na ibalebale ni yavu ni ivakavuvuli ni bula Vakarisito dina.⁷

Na nona tucaketale na Karisito sa vakadeitaka ni sa tawayalani na kaukauwa ni Kalou kei na bula tawamudu ni tamata.

E sivia e va na udolu na yabaki, na nodra sa kila tu ga mai na tamata ni sa dau cava ga na bula ena ibulubulu. Vei ira na milioni vakamilioni na tamata era a mate, e sega ni bau dua vei ira e a tucaketale ka yaco me tamata bula. “Ena lomai vuravura taucoko, e sega ni bau dua na ibulubulu e a lala. E sega ni dua na tamata e a vakabauta; e sega ni dua na voqa ni domo me kaya ni a dua tiko na ibulubulu vakaoqo—e dua na ibulubulu ka cawadrutaka na kaukauwa nei koya na Qaqa ka kaukauwa cake mai vei Mate na kedra meca na tamata.”

Sa qai koya o ya, e dua na itukutuku vou ka lagilagi ka a vakaraitaka na agilosi vei rau na marama ka rau a torova yani na ibulubulu nei Jisu ena loloma kei na rere: “… Dou sa vakasaqarai Jisu na kai Nasareci, ko koya ka lauvako ki na kauveilatai: sa tucaketale ko koya: sa sega eke: raica na tikina era a vakotora kina.” (Marika 16:6.)

Kevaka me sa dua na kaukauwa cecere na cakamana kei na ka e vakavuna e ulabaleta na vuku vakatamata, ia sa qai dua na cakamana veivakurabuitaki ni veigauna na nona tucaketale o Jisu Karisito. Sa kena ivakadinadina tiko ni sa tawayalani na Kalou kei na bula tawamudu ni tamata.

E dua dina na cakamana na tucaketale, ia, sa kena vakasama ni sa ulabaleta na nodra kila kei na vakasama na tamata. Vei ira kece sara era sa vakadinata na dina oqo, sa ikoya ni sa vakaraitaki ni dua na ituvatuva ni vakarau ni bula. Oqo e sa baleta ni ra lecava na tamata na ivakarau ni bula oqo, ka kaya kina ni dua na cakamana o ya.⁸

Erau veiwekani vakavoleka na Tucaketale kei na Vulaitubutubu, e sega ni baleta ni ka vakayago na tucaketale, ia sa rui levu sara na kena vakatututaki e dua na vakanananu ni VEIVAKAYADRATI. Me vaka ga na vakanomodi ni mate sa kovuta vakakina ko Vulaililiwa Makawa na nodra bula na kakana draudrau, ia ena gauna e tadu mai kina na Volaitubutubu e vakavuna na ivurevure ni bula kaukauwa ni katakata kei na rarama me dolava na veika e kovuta tu, kei na veika era sa vaka me mate era sa mataliataki ki na dua na bula vou, savasava, veivakaukauwataki, veivaqaqacotaki ni oti e dua na moce e veivakacegui.

Sa vakakina vei keda na tamata. Eda vakatoka o keda me mate, ia e vakatoka o Jisu me moce. “Sa moce ga na wekada o Lasarusa” e a kaya oqo vei iratou na nona tisaipeli [raica Joni 11:11]. “Na goneyalewa sa moce ga, ” oqo na nona vosa ni veivakacegui vei rau na nona itubutubu rarawa na goneyalewa lailai o ya [raica Marika 5:39]. Sa ka dina sara, ki vua na iVakabula ni vuravura e sega ni dua na mate—na bula ga—na bula tawamudu. E dina ni sa kaya o koya, “Oi au na vu ni Tucaketale kei na vu ni Bula. Ko koya sa vakabauti au, kevaka sa mate, ena bula ga.” [Joni 11:25.]

Ena veivakadeitaki oqo, e dodonu me dua na ka marautaki na talairawarawa ki na lawa tawamudu, ka sega ni icolacola bibi, ni bula sa ka marautaki, na bula sa ikoya na loloma. … Na talairawarawa kivei Karisito kei na nona lawa e kauta mai na bula. Me kauta mai na vei-Siganimate na dina oqo, ka vakasinaita na lomada ena veivakadeitaki vakalou ni sa tucaketale vakaidina o Karisito, ka sa vakadeitaka o koya me ra bula tawamudu na tamata.⁹

Era na ciqoma o ira na yalodina na ivakadinadina veivakacegui ni Tucaketale.

E sega ni dua na vuna me rerevaki kina o mate; sa dua ga na gacagaca ni bula. Ena yaco ga me vaka na sucu. A cava na vuna me da rerevaka kina? E so era rerevaka baleta ni ra nanuma ni sa icavacava ni bula, ia na bula sa noda iyau cecere duadua. Na bula tawamudu sa ikoya na nona kalougata cecere duadua na tamata.

Kevaka ga me ra “cakava na loma i koya” [raica Joni 7:17], ka sega ni vakararai matewale ki na ibulubulu butobuto, ka me ra vagolea na matadra ki lagi ka kila ni sa tucaketale o Karisito!

E sega ni rawa vua e dua na tamata me ciqoma na dina ni tucaketale ka dei tikoga na nona vakabauta ka sega ni ciqoma talega ni bula dina tiko na Kalou. Ena tucaketale e a valuta kina o Karisito na mate ka yaco me tamata bula tawamudu. “Noqu Turaga ka noqu Kalou” (Joni 20:28) e sega walega ni kurabui kina eke o Tomasi ni sotava na nona Turaga ka sa tucaketale. Ena gauna ga eda sa kila kina ni sa vakalou o Karisito, sa na rawarawa sara me da na raitayaloyalotaki Tamana ni sa vakataki koya ga na kena ituvaki; e a kaya kina o Jisu, “… ko koya sa raici au sa raici Tamaqu. …” (Joni 14:9.)¹⁰

Ni mai bula tale na Karisito ni oti na mate ena yaco vakakina vei ira na tamata taucoko, sa mai vakatikori kina ena vuravura ka tarava ka sa veiganiti vua. Na itukutuku ni tucaketale, sa ikoya, e veivakacegui dina sa kena e lagilagi duadua e bau soli vua na tamata, ni gauna e kauta kina o mate e dua na noda daulomani, na yaloda rarawa sa vakacegui mai na inuinui kei na veivakadeitaki vakalou ena vosa oqo:

“Sa sega eke ko koya: sa tucake tale.” [Raica Maciu 28:6.] Ena vuku ga ni sa bula tiko na noda Dauveivueti eda na bula vakakina. Au sa vakadinadinataka vei kemuni ni sa bula dina tiko o Koya, kau vakabauta ni ko na kila na dina vakalou oqo.¹¹

E a sotava o Jisu na gacagaca kece ni bula e vuravura oqo me vakataki iko kei au. E a vakila o koya na marau, ka vakila talega na rarawa. E a marau vata kei ira e so ka tagi talega. E kila o koya na veitokani. E a yaco talega vua me rarawataka na nona a lasutaki ka beitaki vakailasu. E a mate me vaka ga ena yaco vei iko. Ena vuku ni sa bula tale mai na mate na Karisito, ena yaco vakakina vei kedaru. …

Sa dua o Jisu me qai bula uasivi duadua. Mai na nona tucake mai na mate, sa valuta kina na mate ka sa yaco me Turaga ni vuravura oqo. Sa na dua na ka malumalumu sara, ka lialia vakalevu o koya na tamata ena besetaka vakaidina na sala ni bula nei Karisito, ka vakabibi ni sa matata vinaka tu ni talaidredre vakaoqo ena kauta mai na rarawa, vutugu, ka dau yaco kina na mate! …

Ni umani tu vei ira na lewenilotu Vakrisito e vuravura taucoko na vakabauti [Jisu Karisito] ni ra sa vakadeitaki tiko e lomadra, na nodra dina vua na Karisito sa Tucaketale kei na ivakavuvuli ni veika oqo, ena yaco me sa isevu ni kalawa me mua yani ki na vakacegu taleitaki eda dau masulaka tiko ena veisiga.¹²

E lewe vuqa vei ira era vakatokai me ra lotu Vakarisito era sega ni vakabauta ni a yaco dina na tucaketale, ka sa vakacolati vei kemuni kei ira tale … e so ena Lotu oqo na ilesilesi ni kena vakaraitaki yani ki vuravura ni sa Luve ni Kalou o koya, ka a tucake dina mai na ibulubulu, kei na nona rairai vakatamata ena matai Tamana vua na parofita o Josefa Simici.¹³

Vakatutu ni Vuli kei na Veivosaki

Na cava e so na ivakadinadina bula ni nona Tucaketale o Jisu Karisito? (Raica tabana 72–74, 76.) E sa vaqaqacotaki vakacava na nomu ivakadinadina ni nona Tucaketale o Jisu mai na nodra ivakadinadina o ira na Nona iapositolo makawa kei na gauna oqo?
Na sala cava e so e saga me veiletitaka na “vuku vakavuravura” na yaco dina ni nona Tucaketale o Jisu? (Raica tabana 74–75.)
E tiki bibi vakacava ni yavu ni veivakabulai na ivakavuvuli ni Tucaketale?
E vakavulica o Peresitedi McKay ni Tucaketale sa ikoya e dua na “ivakaraitaki ni dua na ituvatuva ni vakarau ni bula” ka rau “Veiwekani vakavoleka na Tucaketale kei na Vulaitubutubu.” Ena sala cava e vaka me rau tautauvata kina na Tucaketale ki na Vulaitubutubu? (Raica tabana 76–77.) Ko na taurivaka vakacava na veivakatautauavatataki oqo me vukei ira na gone na nodra kila vakavinaka na Tucaketale?
Eda na rawata se vaqaqacotaka rawa vakacava na noda ivakadinadina me baleta na Tucaketale? (Raica tabana 77–78.) Ena vakauqeta vakacava na nomu dau vakatulewa na nomu ivakadinadina baleta na Tucaketale? Na cava e so tale na ivakavuvuli ni kosipeli sa qai kilai vakavinaka ni da sa mai vakadinadinataka na Tucaketale?
Ena vakaseavutaka rawa vakacava na rarawataki ni mate ka vakacegui ira era tagi mai na nomu sa vakavukui baleta na Tucaketale? (Raica tabana 77–78.) Na ivakaraitaki cava ni tamata ko sa raica rawa mai na nodra vaqaqacotaki ena gauna ni vakatovolei ni sa tu vei ira na ivakadinadina ni Tucaketale?
Na cava e ka bibi kina vua na kawa tamata me kila ni sa bula tiko na Kalou ka a tucaketale?

iVolanikalou e Veisemati: Jope 19:25–27; Marika 16:1–6; Cakacaka 2:22–32; 4:33; 1 Korinica 15:3–8; 3 Nifai 11:15; V&V 76:22–24.