Wase 1

O Jisu Karisito: “Na Sala, Na Dina, kei na Bula”

Kevaka o na vakasaqara na inaki dina ni bula, sa dodonu ki na tamata yadua me segata e dua na ka e cecere cake mai vua. Ena rogoca na domo ni iVakabula ni kaya, “Oi au na sala, kei na vu-ni-dina, kei na vu-ni-bula. … ” (Joni 14:6.)¹

iVakamacala Taumada

Ena i ka 4 ni Tiseba 1920, erau tekivuna kina o Elder David O. McKay kei na nona itokani lako, o Hugh J. Cannon, e dua na peresitedi ni iteki ka edita ni mekesini ni Lotu na Improvement Era, e dua na ilesilesi mai vei iratou na Mataveiliutaki Taumada me ra sikovi ka vaqaqacotaki na lewe ni Lotu e vuravura raraba. E a taura e dua taucoko na yabaki na ilakolako oqori ka 60, 000 na maile na kena balavu, e sivia ni veimama ni ilakolako oqori e kosovi kina na wai. Ena yakavi bogi ni ka 10 ni Me 1921, ni rau soko yani vaka ki na vanua sa vakatokai tu nikua me Ra kei Samoa. E sotava kina o Elder McKay na veika oqo:

“Ni sa lutu sobu na karobo, sa dua na ka talei ni da raica na rarama ni matanisiga ena kena sa dromu sobu yani vakamalua!. … Niu se vakananuma voli ga na totoka ni irairai o ya, au davo sobu ena noqu idavodavo ena 10 na kaloko ena bogi o ya. … e lutu na noqu moce, kau qai raica e dua na raivotu lagilagi ka vakaturaga. Au raica tu yani vakayawa e dua na koro levu vulavula ka totoka. E dina ga ni tu sara mai vakayawa, ia e vaka meu raica tu na veivunikau kei na vuana taleitaki, na veikau duiroka na drauna, kei na senikau uasivi na kedra irairai e veiyasana kecega. E vaka me solia lesu mai na totoka ni duiroka oqori na lomalagi savasava vinaka. Au qai raica e dua na ibinibini tamata levu ni ra lako tiko yani ki na koro levu oqo. Era daramaka tu na icurucuru yara balavu vulavula kei na iubi ni ulu. E gole na mataqu ki vua na nodra iliuliu, ka dina ga ni rawa walega niu raica yani na ivatuka ni bulitaki ni yagona, ia au kilai koya ena gauna vata oqori ni sai koya na noqu iVakabula! Sa dua na ka lagilagi ni da raica yani na rokana kei na iserau ni kena irairai. E koto vua e dua na vakacegu vakaturaga ka qai uasivi–e vakalou.

“Au kila ni Nona na koro levu oqo. Sai koya na Koro levu ko Tawamudu; kei ira na tamata era muri koya tiko me ra na laki tiko vata kina ena vakacegu kei na marau tawamudu.

“Ia o cei beka o ira oqo?

“E vaka me kila mai na lomaqu na iVakabula, e qai sauma mai ena nona dusia e dua na iwirini veimama ka basika mai buradeladra, ka volai tu kina ena matanivola koula na veivosa oqo:

“Oqo O Ira Era sa Vakadruka na Vuravura—

O Ira Era sa Sucu Tale Vakaidina Sara!” ²

Ena imatai ni nona koniferedi raraba ni sa kacivi me Peresitedi ni Lotu, e vakadeitaka tale kina o Peresitedi McKay na nona ivakadinadina me baleta na iVakabula kei na veivakalougatataki ena sobuti ira era muri Koya:

“Ena sega ni dua e rawa ni liutaka na Lotu oqo kevaka erau sega ni veiyaloni mada e liu kei Koya na kena iliuliu, na noda Turaga ka iVakabula, ko Jisu Karisito. Sai Koya na uluda. Oqo na Nona Lotu. Kevaka e sega na nona veidusimaki vakalou kei na veivakauqeti e veigauna, eda na sega ni rawata e dua na ka. Mai na nona veidusimaki, mai na nona veivakauqeti, eda na sega ni rawa ni lako cala kina. …

“… Au kila ni bula dina tiko, na nona gadreva me veituberi ka veidusimaki vei ira kece era qaravi koya, ”³

iVakavuvuli nei David O. McKay

O Karisito na Rarama ki na Kawatamata.

O Karisito na rarama ki na kawatamata. Ena rarama oqori ena raica kina vakavinka na tamata na nona sala; ni sega ni taurivaki, sa na tarabe na yalo ni tamata ena butobuto. E sega ni dua na tamata, se dua na ilawalawa, se dua na matanitu ena rawata vakavinaka e dua na ka kevaka era sega ni muri Koya ka a kaya:

“Oi au na rarama kei vuravura: ko koya sa muri au ena sega ni lako ena butobuto, ena tu ga vei koya na rarama ni bula.” ( Joni 8:12.)

Sa dua na ka rarawa ni ra bokoca na rarama oqori na tamata kei ira na veimatanitu—ni sa vakaisosomitaki na Karisito kei na nona kosipeli mai na lawa ni veikau kei na kaukauwa ni seleiwau. Na leqa levu duadua e vuravura ena gauna oqo sai koya na nodra sega ni vakabauta na nona vinaka na Kalou ka vakakina na nodra sega ni vakabauta na ivakavuvuli kei na ivunau ni kosipeli.⁴

E vakabauta na Lotu i Jisu Karisito ni Yalododonu Edaidai ni nona bula kei na nona ivakavuvuli, sa vakatakila kina o Jisu Karisito e dua na ivakatagedegede ni bula yadua kei na veimaliwai kei ira na tani, kevaka ena vakamuri ena bula ni tamata yadua ka vakakina ena veisoqosoqo vakatamata, ena vakalailaitaka na veika ca ka basika tiko ena keda maliwa, ka na kauta talega mai na marau kei na vakacegu ki na kawatamata.

Kevaka ena tukuni ni … so na matanitu vakabauta va-Karisito era sa sega ni rawata na veitakete vakaoqo, eda na sauma ni kena sega ni rawati oqo e rawa ni vakaraitaka ni ra a sega ni vakayagataka na ivakavuvuli kei na veituberi Vakarisito dina. …

… Sa sotava na kawatamata na veika dredre mai na veiivakaraitaki kei na ivakatakilakila sega ni vunitaki rawa ni kocokoco, veicati, vuvu, nanumi koya vakaikoya—na gagano vakamanumanu ka yaco kina na veivaluvaluti, veivakarusai, na mate rerevaki, kei na mate. Kevaka beka me a rokovi na nona ivakavuvuli rawarawa duadua na iVakabula, ke a duatani beka na itukutuku makawa.⁵

Ena gauna era sa rawata kina na tamata Lotu va-Karisito na vakabauta oqo [me baleti Karisito] me drodrova na nodra dra, ena gauna era sa vakila kina na dina ni yalodra me baleta na Karisito vakaturi cake tale mai na mate, kei na ivakavuvuli ka salavata kaya, sa na cavuta kina na kawatamata na imatai ni kalawa cecere ka na kauti keda yani ki na vakacegu tawamudu eda dau masuta tiko e veisiga: Kevaka eda besetaki Koya ena vakasinaiti tu ga na vuravura ena veicati, ka na luvuci ena dra ni veivaluvaluti.⁶

Na kosipeli i Jisu Karisito sai koya na kuro ni sava kaukamea ka na tiloma na veicati, na yalovuvu, kei na kocokoco, ka na qai vo tu na loma vinaka, na dauloloma, kei na veivakauqeti e loma ka dau bula ka tara cake kina na tamata.

Me ra vagoleya tikoga na nodra rai na tagane kei na yalewa ki vei koya ka sa cila tiko me Rarama ki vuravura taucoko—ni sai Karisito na Sala, kei na Vu ni Dina, kei na Vu ni Bula, ni sai Koya na Dauveidusimaki vinaka duadua ki na ivakaruru sautu ka ra masuta tiko vagumatua na tamata e vuravura raraba.⁷

E vakavuvulitaka ka vakaraitaka o Karisito na sala ki na bula sautu kivei ira na wekada.

“Eda na kila vakacava na sala?” e taroga o Tomasi, ni dabe sobu vata kei ira na nona itokani iApositolo kei na nodra Turaga ena teveli ni oti na ivakayakavi ena bogi guiguilecavi dredre o ya ka a soli yani kina vei ira na meca; E kaya kina na nona isau ni taro vakalou: “Koi au na sala kei na vu-ni-dina kei na vu-ni-bula. … ” ( Joni 14:5–6.) Io e vakadina kina! Sai Koya na ivurevure ni vakacegu, na dauveivakauqeti ki na noda bula, o koya na noda dauveivakabulai. Kevaka eda vinakata me da kila na keda isema vua na Kalou, eda na gole vei Jisu Karisito. Kevaka me da na kila na sega ni mate rawa ni yalo, sa vakaraitaki vei keda mai na nona vakaturi cake tale mai na mate na iVakabula.

Kevaka eda gadreva me da vulica na ivakarau ni bula vinaka me da liu kina ena kedra maliwa na wekada, e rawa ni da raica kina e dua na ivakaraitaki uasivi ena nona bula o Jisu. Se cava ga na noda gagadre vakaturaga, na noda tatadra cecere, na noda vinaka ena yasa ni bula cava ga, ena rawa ni da rai yani vei Karisito ka raica na veika uasivi cake. O koya ni da vakasaqara e dua na ivakatagedegede ni bula savasava vakatamata me da lako vua na Tagane ni Nasareci ka da na raica vua ne veitiki ni bula uasivi kece ena gadrevi me tara cake kina e dua na tamata uasivi sara.

Oqo na ivakarau ni bula vinaka ka ra dau umani vata me rawa kina na ituvaki ni bula e uasivi sara, na dina, dodonu, yalomatua, vosota vakadede, kei na lewai koya vinaka. Na nona vakasama, vosa, kei na ivalavala e salavata kei na lawa vakalou ka sa dina kina. Na sala ni veitaratara mai vua kivei Tamana e dau dola tu e veigauna, me rawa kina ni da kila tiko na dina ka koto ena ivakatakila.⁸

Na Lotu i Jisu Karisito ni Yalododonu Edaidai e vakadinata ni sa dina sara na malanivosa nei Jisu: “Au sa lako mai me rawa na bula ia me rawa vakalevu sara.” ( Joni 10:10.) Eda vakabauta ni bula vakalevu oqo ena sega ni rawa walega mai na veivakacerecerei vakayalo, ia mai na kena vakayagataki talega ena noda bula ni veisiga na ivakavuvuli e vakavuvulitaka o Jisu.

Na veivakavuvuli oqo e lailai wale ka rawarawa ka na rawa ni vakayagataka na tamata kece sara e tu vinaka tu na nodra vakasama. Na imatai vei ira oqo, sai koya na yavu e yavutaki kina e dua na isoqosoqo Vakarisito dina, sai koya na: “Ia mo lomani Jiova na nomu Kalou ena lomamu taucoko, kei na yalomu taucoko, kei na nomu nanuma kece, kei na nomu kaukauwa kece …” (Marika 12:30.) Na vakabauta ni dua na Ka Bula Cecere e bula tiko ka dau lomani ira na luvena—na vakabauta ka solia na kaukauwa kei na igu ki na yalo. Na veivakadeitaki ni rawa ni da golevi koya me baleta na veidusimaki, ka ni na vakaraitaki koya vei ira era vakasaqarai koya.

E dua tale sai koya na kena ciqomi na dina ni bula e isolisoli ni Kalou, ka sa ka vakalou. Na kena ivakavakayagataki dodonu na isolisoli oqo e vakavuna me turaga na tamata, e sega ni bobula, ena veika vakalou. Me lewai vakamatau na gagadre ni lomana ka vakayagataki me yaga ki na nona bula ka me vakabalavutaki kina. Na gagadre ni lomana me lewai vakavinaka ka dau qarauni me baleta na nodra marau kei na nodra vakalougatataki na tani kei na tomani tikoga ni kawatamata.

Na ikatolu ni ivakavuvuli sai koya na bula dokai yadua. Au vakaibalebaletaka eke na dina ena veisiga kece sara, na tu vinaka ni vakasama, kei na vakarokorokotaki ni dodonu ni tamata yadua, ka me da veiyaloni kina kei ira era tu vakavolivoliti keda. Na tikina oqo ena yaga ki na veimatanitu ka vakakina ki na tamata yadua. Sa cala sara ki vua e dua na matanitu me vakayagataka na nona kaukauwa me butako ka vakacacana kina e dua tale na matanitu, me vaka ga na kena cala vua e dua na tamata me butakoca se vakamatea na wekana.

Na ikava ni ka e gadrevi sai koya na nanumi ni kawatamata ka dau vakabasikata ki na tamata yadua me kila ni sa nona itavi me vakavinakataka na vuravura me vaka ni sa mai bula voli kina.⁹

E a dusimaki na nona bula na iVakabula mai na ivakavuvuli… Bula Savasava kei na Veiqaravi. E a vakataucokotaka na nona bula ka sega ni vakadukadukalitaka mai na ivalavala ca ni vuravura, ka dau solia na nona bula ena nodra kauwaitaki na tani, na kena vakabulai na kawatamata. E dau kauwaitaki ira tiko ga vakalevu na vakararawataki tu, vakacegui ira na tauvimate, vakabulai ira na lokiloki kei na wamalai, ka solia na nona bula me baleta na vuravura.¹⁰

Sa gadrevi vakalevu sara me yaco e dua na veisau levu ena nodra dau veidinadinati na tamata. E se bera ni bau yaco vakadua ena itukutuku kei vuravura me dua na gauna me gadrevi vakalevu duadua kina na veisau ki na vinaka me vakaoqo. Me vaka ni sa dau yaco vakalevu na veileqa lelevu ena kena dau sega ni ciqomi na ivakavuvuli i Karisito, kei na veigauna vakatovotovo e so ni vakacegu kei na sautu kei na tubu, na cava beka na vuna era sega ni dau vakaisosomitaka kina na tamata na itovo kocokoco ni nodra dau vakalevulevui ira ki na ivakavuvuli va-Karisito ni veikauwaitaki vakaveitacini, dau cakadodonu, ena yaga kei na bibi ni bula vakatamata, ena ivalavala uasivi ni veivosoti, ena kena sega ni taleitaki na ivalavala ca ni dauveivakacacani kei na daukocokoco, ena kaukauwa ni veivakabulai ena loloma.¹¹

Sa nodra itavi na lewe ni Lotu i Karisito me ra vakayacora me nodra takete cecere duadua na Luve ni Tamata. Sai Koya na ka bula ka sega ni dua na nona cala me lakova na dela ni vuravura oqo; na ivakaraitaki cecere duadua ni bula e vakaturaga; e Vakalou ena kena ivatuka; e taucoko ena nona loloma; na noda Dauniveisereki; noda iVakabula; na Luvena tawacala na Tamada Tawamudu; na Rarama, na Bula, na Sala.¹²

Au ciqomi Jisu Karisito ni sai ivakaraitaki taucoko ni bula vakatamata e uasivi sara.¹³

Na ivakavuvuli i Karisito e yaga ena bula ni veisiga.

Au vakabauta na veivosa kece e cavuta o Jisu, ia vei au na nona ivakavuvuli e yaga ki na noqu bula ka vakatalega kina ki na nomu. Me da nanuma tiko na dina ni o keda na luvena na Tamada mai lomalagi, ena noda vakasaqara taumada na matanitu ni Kalou, eda na vakila e dua na inaki vou ni bula. … Ena qai rawa walega ni da tubu sivita yani na bula kocokoco, kei na idre ni vuravura eda sucu vata kaya mai ena gauna eda sa vakamalumalumutaka kina na noda lewa e loma. …

E volekata ni rua na udolu na yabaki, era sa nanuma voli mai kina na tamata ni [ivakavuvuli i Karisito] e sa rui dredre—sa rui cecere, oya na ka era kaya, ia kevaka eda vakabauta vakaidina sara na vakalou ni Karisito, ni o koya “na sala, na dina, kei na bula” (raica na Joni 14:6), eda na sega ni rawa ni lomalomaruataka tikoga e veigauna na yaga ni nona ivakavuvuli ki na noda bula e veisiga.

E dina sara, ni tu eso na leqa bibi me da walia—na ca ni bula ena veivanua osooso, na veisaqasaqa wasoma ni tamata cakacaka kei ira na iliuliu ni cakacaka, na daumateni, na volitaki ni yago ena veiyacovi, na veicacati ni veimatanitu, kei na drau vakadrau ni veitaro ka tarogi tiko ena gauna oqo. Ia kevaka walega e rogoci, na nona kerekere na Karisito me baleta na bula dokai ni tamata yadua, na veirokorokovi, na veidinadinati savasava, kei na loloma, sai koya oqori na veika e taumada ena iwali dodonu ni veika dredre ena bula veimaliwai kei na bula vakailavo.

E dodonu sara me veisau taumada na yalo ni tamata ni se bera ni qai goleva yani na vuravura na veika cecere oqo. E a lako mai ki vuravura na Karisito me baleta vakatabakidua na inaki oqori. Na inaki taumada ni kena vunautaki tiko na kosipeli sai koya me veisautaki kina na yalo kei na bula ni tamata. … O ira era saumaki mai … e rawa ni ra vakadinadinataka na sala sa veisautaka kina na nodra bula na nodra sa saumaki mai. … Na mataqali saumaki mai vakaoqori era na kauta mai kina na loloma ka sega na veiqati [kei na] veivakararawataki.¹⁴

Me imatai ni kalawa, … me vakayagataki vakavinaka na idusidusi ni nomu biuti iko ena vanua e tu kina o koya o vakarau vakayacora vua e dua na ka, na ivalavala vinaka duadua ni kena tababokoci na ivalavala velavela ka dau basika kina na veilecalecavi.

E sega ni dua na tamata ka tu vinaka na nona vakasama me na rawa ni kaya ni na sega ni rawa ni yaco me vuravura vinaka na vuravura oqo kevaka era vakaitovotaki ira na lewena ena itovo rawarawa oqo!

E tautauvata na kena mana kei na kena yaga na Nona ivakavuvuli me baleta na yaga kei na bibi ni bula vakatamata, kei na ivalavala vinaka ni veivosoti, na kena gadrevi na veidinadinati savasava, na Nona sega ni duavata kei na ivalavala ca ni dau veivakacacani, kei na kocokoco, na Nona ivakavuvuli me baleta na kaukauwa ni veivakabulai ena loloma, kei na tawamate rawa ni yalo.¹⁵

Na bulataki ni ivakavuvuli i Karisito ena basika ki na bula cecere kei na marau.

Ena sega ni rawa ni dua na tamata me na vakatulewataka me na vakayagataka na ivakavuvuli i Jisu mai Nasareci kevaka e sega mada ni se vakila e dua na veisau ena nona bula. Na malanivosa na “sucu tale” e titobu cake na kena ibalebale mai na kena era nanuma e levu na tamata. Ena sega beka ni vakamacalataki rawa na veisau oqo, ia e ka dina.

Ena marau na tamata sa vakila dina na kaukauwa veilaveti, ka dau veisautaki keda ka yaco mai na noda voleka yani vua na iVakabula, na veiwekani voleka kei na Karisito bula. Au sa vakavinavinaka vakalevu niu kila ni noqu Dauveisereki na Karisito.¹⁶

Na vakasama sa qai cecere duadua sara sai koya na ivakavuvuli ka vakauasivi cake na bula nei Jisu mai Nasareci, ka sa tamata cecere duadua na tamata e volekata sara na bula e va-Karisito.

Na veika o dau vakananuma vakatitobu e yalomu me baleti Karisito ena vakatau mai kina na veika e baleti iko, ka na vakatau talega mai kina vakalevu na nomu ivalavala. E sega ni rawa ni dua na tamata me vulica na tiki ni bula vakalou oqo, me na ciqoma na nona ivakavuvuli ka sega ni vakila taumada e dua na veivakauqeti veilaveti ka veivakasavasavataki e lomana.¹⁷

Ena noda digitaki koya me noda ka cecere duadua, eda sa tauyavutaka kina e lomada na gagadre me da vakataki koya, me da veitokani vata kaya. Eda raica na bula me vaka na kena ivakarau e dodonu me da raica kina ka vakakina ena kena ivakarau e dodonu me na yaco kina.¹⁸

E sega ni yalataka o koya e dua na icocovi ka rawa beka ni da taura e ligada, ia sa yalataka ga o koya na bula vakatamata uasivi cake ka vakalou. … “O koya mo dou qai vinaka sara, me vaka sa vinaka sara na Tamamudou sa tiko mai lomalagi.” [Raica Maciu 5:48.] Ena salavata mai kei na bula vakalou oqori na kena marau, na marau dina sara.¹⁹

Na kosipeli, na itukutuku vinaka ni marau, sa ikoya na idusidusi dina ki na kawatamata; ka na tamata marau ka bula vakacegu duadua o koya na tagane se na yalewa ka na bula voleka duadua ki na kena ivakavuvuli, sai koya na veibasai ni veicati, veivakacacani, na veiliutaki ca, na veivakalolomataki, na lewa sega ni dodonu—na veika e dau vakavuna na duidui, na veivakarusai, kei na mate e vuravura raraba. Sai koya na matanisiga ni siga vinaka ki na vuravura ni vulaibatabata, sa vakakina na kosipeli i Jisu Karisito ki na yalo e rarawa ka gadreva tu e dua na ka e uasivi cake mai na veika kecega sa raica oti na tamata e vuravura

Sa na tu e vuravura e dua na ivakarau ni bula lagilagi kevaka sa rawa me tukuni vei Karisito, o koya na Dauveisereki ni kawatamata, “Sa vakasaqarai kemuni na tamata kecega.” (Marika 1:37.) Sa na sega kina na kocokoco, na vuvu, na veicati, na lasulasu, na butabutako, na lawaki, talaidredre, kei na veivaluvaluti ni veimatanitu!²⁰

Eda marautaka na nona sucu mai o koya ka nona cakacaka e vuravura me (1) vakalagilagi na Kalou; (2) yalataka na sautu e vuravura; (3) sa yalataki ki na tamata kecega na nona vakanuinui vinaka na Kalou vei ira!

Kevaka era na biuta na tamata kece era sucu mai ki na vuravura oqo me bikeni ni nodra bula na tolu na veika cecere ka lagilagi oqo—sa na vakaevei mada na kamica kei na marautaki ni bula! Ena inaki vakako ya, sa na vaqara na tamata kecega na veika kece e savasava, dodonu, rokovi, dokai, ka dina—na veika kece ka na basika ki na uasivi sara. … Ena dau levea na veika e dukadukali, beci, se vakasisila. Kevaka ena gadreva na tamata kece sara me vakaraitaka na lomavinaka vua na wekana ka segata me vakaraitaka na gagadre oqori ena kena cavuti na veivosa ni loloma kei na veicakacaka lalai ka na vakavotui kina na sega ni kocokoco kei na sorovaki ka yadua, sa dua na cau levu eda na vakayacora ki na sautu raraba e vuravura kei na marau ni kawatamata!²¹

Sa na dua na vuravura taleitaki oqo kevaka, me kena ivakaraitaki mada, ena nodra segata vagumatua na tamata me ra vakayagataka na ivakasala i Karisito: “a sa nanuma mai kina sa dua na ka sa beitaki iko mai kina na wekamu, . … mo lako, mo drau veivinakati mada e liu kei na wekamu.” [Raica Maciu 5:23–24.] Se, vakadua tale, na nona veidusimaki: “Vakasaqara taumada na matanitu ni Kalou kei na Nona yalododonu” [raica Maciu 6:33], ka kena ibalebale rawarawa sara, kakua soti ni taura vakabibi na veika vakavuravura ka vakacerecerea na kena yaga mai na veika vakayalo.²²

Au vakila, ka kila, ni vukuna ga kei na vukuna duadua ga, kei na talairawarawa ki na kosipeli i Jisu Karisito, ena rawa ni da kunea kina na marau kei na vakabulai ena vuravura oqo kei na bula tawamudu ena vuravura sa bera mai.²³

Vakatutu ni Vuli kei na Veivosaki

Na cava beka e so na leqa lelevu ka sotava tiko na kawatamata ena gauna oqo? Na cava soti beka eso na ivakavuvuli bibi ka vakavuvulitaka o Jisu Karisito ena veivuke ena kena wali na veileqa oqo? Na sala cava beka e rawa ni ra veivuke kina ena kena wali?
Na cava na vuna e yaga kina na vakabauti Jisu Karisito mai na kena vakatorocaketaki na ivakarau ni bula e vuravura ena gauna oqo? Na cava beka na kena ibalebale vei iko ni o Jisu Karisito na “na sala, na dina, kei na bula”?
Na cava beka e dau tarovi ira kina na tamata ena gauna oqo mai na nodra vakayagataka ki na nodra bula na nona ivakavuvuli na iVakabula? Na sala cava beka e rawa kina vei keda ena Lotu ka vakakina ena noda dui bula yadua me da vakaraitaka na Nona ivakatagedegede e vuravura?
E kaya o Jisu Karisito ni lako mai ki vuravura “me rawa vei keda na bula, ia me rawa vakalevu sara” (Joni 10:10; raica tabana 4). Na sala cava beka sa vukei iko kina na iVakabula mo rawata vakalevu sara na bula?
E vakadinadinataki Jisu Karisito o Peresitedi McKay ni “sai ivakaraitaki taucoko ni bula vakatamata e uasivi sara” Raica (tabana [5]). Na cava beka e so na ivakarau ni Nona bula o Jisu Karisito ka yaco kina me ivakaraitaki ni bula e uasivi sara? (Raica tabana [4–5]) E vakaevei beka na levu ni ituvaki ni bula oqo e rawa ni da rawata ki na noda bula? Na cava beka eda rawa ni cakava me va-Karisito cake kina na noda bula?
E vakavuvulitaka o Peresitedi McKay ni o ira era dau vakayagataka na ivakavuvuli ni iVakabula era na vakila vei ira e dua na veisau (raica tabana [7]). Na sala cava beka o sa raica kina na dina ni veika oqo ki na nomu bula se na nodra bula na tani? Na cava beka na kena bibi ni nona vakayagataka o Peresitedi McKay na vosa oqo “sucu tale”? (Raica tabana [7–8].)

iVolanikalou e Veisemati: Maciu 11:28–30; Joni 13:15–17; 3 Nifai 27:21–22, 27; V&V 84:49–54