O a tatou taumafaiga e mulimuli ia Iesu Keriso ma tausi Ana poloaiga e manaomia ae le lava tatou te agavaa ai mo le faaolataga. O lo tatou faaolataga faatoa mafai e ala mai i galuega, alofa mutimutivale, ma le alofa tunoa o Iesu Keriso. O le aoaoga faavae a Keriso ua fesoasoani ia i tatou e malamalama ai faapea e ala mai i Lona alofa tunoa, e mafai ai ona tatou aoao le talalelei, maua sauniga, ma fetaomi atu i luma i le ala lena e taitai atu i le ola e faavavau.
Faaali atu le saunoaga lenei a Elder L. Tom Perry (1922-2015) o le Korama a Aposetolo e Toasefululua:
Ata
Elder L. Tom Perry
“E toatele tagata e manatunatu, ‘O fea na tatou o mai ai? Aisea ua tatou i ai iinei? O fea tatou te o i ai?’ E lei auina mai i tatou e lo tatou Tama Faavavau i le lalolagi i se faigamalaga e leai se faamoemoega ma leai se uiga. Ua Ia saunia se fuafuaga mo i tatou e mulimuli ai. O Ia o le tusitala o lena fuafuaga. Ua fuafuaina mo le alualu i luma o le tagata, le faaolataga ma le faaeaga” (“O le Fuafuaga o le Faaolataga,” Ensign po o le Liahona, Nov. 2006, 69–70).
Pe a iloa e tagata e lei tuua i latou e le Atua ina ia feoai toatasi i le olaga faitino ae ua saunia se fuafuaga mo lo latou faaolataga, o le a sou manatu i o latou lagona e mafai ona i ai?
Valaaulia tamaiti aoga e faitau le 2 Nifae 2:6-9, ma vaavaai mo mea na fai mai le perofeta o Liae e mafai ai le faaolataga.
E tusa ai ma Liae, o le a le mea na mafai ai ona faia le faaolataga i le fuafuaga a le Atua? (O tamaiti aoga e tatau ona faailoa mai le mea lenei: E faatoa mafai ona faaolaina i tatou e ala i galuega, alofa mutimutivale, ma le alofa tunoa o Iesu Keriso. E mafai ona e faasoa atu le faamatalaga lenei o le uiga o le faaolaina po o le mauaina o le faaolataga: “Faaolataga i lona uiga moni ma le atoatoa e tutusa ma le faaeaga po o le ola e faavavau ma e i ai le mauaina o se tofi e sili ona maualuga i lagi e tolu i totonu o le malo selesitila. Faatasi ai ma ni nai eseesega laiti o le faaolataga lenei o loo aoao mai i tusitusiga paia” [Bruce R. McConkie, Mormon Doctrine, lom. lona 2. (1966), 670].)
O le a le uiga o galuega, alofa mutimutivale, ma le alofa tunoa o Iesu Keriso? (O galuega a Iesu Keriso o Ana faatinoga amiotonu, ae maise lava Lana Togiola. O le alofa mutimutivale e faatatau i le agaalofa ma le onosai ua Ia ofoina mai ia i tatou e ui lava ia tatou agasala. O le alofa tunoa e faatatau i le fesoasoani ua Ia ofoina mai ia i tatou i le tulaga o le alofa mutimutivale, alofa, agalelei, ma le mana gafatia lena e faatagaina i tatou e maua le ola e faavavau ma le faaeaga pe a uma ona tatou faia la tatou taumafaiga silisili. Tagai foi i le Taiala i Tusitusiga Paia, “Alofa Tunoa.”)
Ina ia fesoasoani i tamaiti aoga ia malamalama i lenei aoaoga faavae, faaali atu le saunoaga lenei a Peresitene Dieter F. Uchtdorf, ma fai i se tamaitiiti aoga e faitau leotele:
Ata
Peresitene Dieter F. Uchtdorf
“E le mafai ona tatou mauaina lo tatou ala i le lagi; o manaoga o le faamasinotonu e tu o se papupuni, lea e leai ai so tatou malosi e faatoilalo ai e i tatou lava ia.
“Ae e le leiloloa tagata uma.
“O le alofa tunoa o le Atua o lo tatou faamoemoe sili ma le faavavau lea.
“E ala i le taulaga a Iesu Keriso, le fuafuaga o le alofa mutimutivale ua faamalieina ai manaoga o le faamasinotonu [tagai Alema 42:15]” (“O Le Meaalofa o le Alofatunoa,” Ensign po o le Liahona, Me 2015, 108).
Aisea e le lava ai le amiotonu patino o se tagata e agavaa ai mo “manaoga o le faamasinotonu” ma maua ai le ola e faavavau? (E ui lava e mafai ona tatou aoao i se taimi e ola i poloaiga i le atoatoa, e leai se tasi na ola i se olaga amiotonu sei vagana ai le Faaola [tagai Roma 3:23]. E ui lava e mafai ona tatou le toe agasala, e le mafai ona tatou tafieseina le afaina ma le leaga o a tatou faatinoga ua tuanai. O le mafuaaga lenei e manaomia ai le Togiola ma le alofa tunoa.)
Faamanatu i tamaiti aoga faapea e ui lava ua na o galuega, alofa mutimutivale, ma le alofa tunoa o Iesu Keriso e faaolaina ai i tatou, na aoao mai e perofeta o le Tusi a Mamona mea e tatau ona tatou faia e maua ai le mana laveai o le Faaola.
Valaaulia se tamaitiiti aoga e faitau leotele le Mosaea 4:6-8, ma fai i le vasega e vaavaai mo mea na aoao mai le Tupu o Peniamina e tatau ona tatou faia e maua ai le faaolataga e ala mai i le Togiola a Iesu Keriso.
E tusa ai ma le Tupu o Peniamina, o a mea e tatau ona tatou faia e maua ai le faaolataga e ala mai i le Togiola? (O mai i se malamalama o le Atua ma le Togiola, tuu atu lou faatuatuaga i le Atua, tausi poloaiga ma le filiga, ma faaauau i le faamaoni seia oo i le iuga o o tatou olaga.)
O le a le aoaoga faavae na aoao mai e Nifae e faatatau i lo tatou faaolataga? (O tamaiti aoga e tatau ona faailoa mai le aoaoga faavae lenei: Ona o le Togiola a Iesu Keriso, e mafai ona faaolaina ai i tatou i le alofa tunoa pe a uma ona tatou faia mea uma tatou te mafaia. Fesoasoani i tamaiti aoga ia malamalama ua na o Iesu Keriso lava e mafai ai ona tatou paia ma avea ai faapei o lo tatou Tama oi le Lagi.)
Ina ia fesoasoani i tamaiti aoga ia malamalama i lenei aoaoga faavae, valaaulia se tamaitiiti aoga e faitau leotele le saunoaga lenei a Peresitene Ezra Taft Benson (1899–1994):
Ata
Peresitene Ezra Taft Benson
“‘Pe a uma ona faia mea uma tatou te mafaia e aofia ai le faalautele atu o a tatou taumafaiga sili. E aofia ai le ola i ana poloaiga.
“‘Pe a uma ona faia mea uma tatou te mafaia e aofia ai le alofa i o tatou uso a tagata ma tatalo mo i latou ua fai i tatou ma o latou fili. O lona uiga ia faalavalava i e le lavalava, fafaga i e fiaaai, asiasi atu i e mamai, ma tuuina atu le ‘fesoasoani i e ua aoga i ai la [tatou] fesoasoani’—ma manatua o le mea tatou te faia i se tasi o le aupito itiiti o fanau a le Atua, ua tatou faia lava ia te ia.
“‘Pe a uma ona faia mea uma tatou te mafaia o lona uiga o le taimua i le ola legavia, mama, ola mama, ma matua faamaoni ia tatou fesootaiga uma ma faia le tasi i le faiga tatou te mananao e faia ai i tatou” (“O le Togiola e Ala Mai ia Iesu Keriso Pe a Uma Mea Uma Tatou te Mafaia,” Liahona, Tes. 1988, 5).
O a auala na e aafia ai i le fesoasoani a le alofa tunoa ia te oe i tua atu o lou mafaia ao e taumafai i le mea sili e sau ia te ia?
Faaaoga le saunoaga lenei, mai ia Peresitene Ezra Taft Benson foi, e fesoasoani i tamaiti aoga e mafaufau loloto ai i lenei fesili ae latou te lei tali mai:
Ata
Peresitene Ezra Taft Benson
“I le avea ai ma Ekalesia, tatou te ioe faatasi ma Nifae, o le na faapea mai, ‘E faaolaina i tatou i le alofa tunoa, pe a uma ona faia mea uma tatou te mafaia.’ (2 Nifae 25:23.) …
“E ala mai i le alofa tunoa ona faataunuuina e le Faaola lana taulaga togiola ina ia maua e tagata uma le tino ola pea.
“E ala mai lona alofa tunoa, ma lo tatou faatuatua i lana togiola ma le salamo i a tatou agasala, ona tatou maua le malosi e faia ai galuega e manaomia, lea semanu e le mafai ona tatou faia i lo tatou lava malosi.
“E ala mai lona alofa tunoa ona tatou maua o se faaeega o faamanuiaga ma le malosi faaleagaga, lea e mafai ona taitaiina i tatou i le ola e faavavau pe afai tatou te tumau e oo i le iuga.
“E ala mai lona alofa tunoa ona avea atili ai i tatou faapei o ona uiga paia” (“O le Togiola e Ala Mai ia Iesu Keriso Pea Uma ona Faia Mea Uma Tatou te Mafaia,” 4–5).
O le a sou manatu i mea e mafai ona tatou faia e faaali ai lo tatou faafetai mo mea ua mafaia ona o Iesu Keriso?
Molimau atu faapea ua na o le alofa tunoa lava na mafaia e ala mai le Togiola a Iesu Keriso e mafai ai ona tatou manumalo i taunuuga o le Pau o Atamu ma Eva, maua le faamagaloina o agasala, manumalo i le atoatoa, ma alualu i luma agai i le atoatoa. Uunaia tamaiti aoga e mafaufau loloto pe o latou faia mea uma latou te mafaia ia maua ai faamanuiaga o le alofa tunoa a le Alii.
Tofi le tasi vaega o le vasega e suesue le 2 Nifae 31:2, 10–21, le vaega lona lua e suesue le 3 Nifae 11:31–40, ma le vaega lona tolu e suesue le 3 Nifae 27:13–22. Ae lei amata tamaiti aoga, faasino atu faapea o nei fuaitau o loo i ai upu “aoaoga faavae a Keriso,” “lau aoaoga faavae,” po o “lau talalelei.” Faamatala atu faapea o le aoaoga faavae o le talalelei a Keriso e i ai mea na fai e Iesu Keriso ma ua faaauau ona faalatalata atu ai i tatou i le Tama. O loo maua ai foi mea e tatau ona tatou faia e maua ai faamanuiaga o le Togiola a Iesu Keriso. Valaaulia vaega taitasi e faailoa mai ma maka mea ua aoao mai e a latou fuaiupu na tofiaina e uiga i aoaoga faavae a Keriso—mea na fai e Keriso ma mea e tatau ona tatou faia.
A uma ona suesue fuaitau na atofaina a tamaiti aoga mo ni nai minute, fai ia i latou e lisi mea na latou maua i le laupapa i talaane o mau fesootai taitasi. Ona fesili atu lea:
O a mea na fai e Iesu Keriso e faalatalata atu ai i tatou i le Tama?
O a nisi o mea e tatau ona tatou faia e maua ai faamanuiaga o le Togiola a Keriso? (E tatau ona tatou maua le faatuatua, salamo, ia papatisoina, maua le meaalofa o le Agaga Paia, tumau seia oo i le iuga, ma maua faaaliga patino ma usiusitai i ai.)
E mafai faapefea ona e aoteleina le taua o le ola ai i le aoaoga faavae po o le talalelei a Iesu Keriso? (E tatau ona faailoa mai e tamaiti aoga se mataupu faavae faapenei: Ao tatou ola e tusa ai ma le aoaoga faavae a Keriso, e mafai ona tatou maua faamanuiaga o le Togiola ma maua le ola e faavavau.)
E tusa ai ma manaoga o tamaiti aoga, mafaufau e fai atu fesili faapenei e fesoasoani ia i latou e iloiloina atili ai fuaitau o mau na latou faitauina:
O le a le fuaitau i le 2 Nifae 31:20 e i ai se uiga faapitoa ia te oe, ma e faapefea ona fesoasoani ia te oe e maua ai faamanuiaga o le Togiola?
E pei ona aoaoina i le 2 Nifae 31:13–14, 17, o le a le uiga o le papatisoina “i le afi”? (E maua e se tagata le faamagaloina o agasala ma le faamamaina lena e oo mai le Agaga Paia.)
E tusa ai ma le 3 Nifae 11:39–40, aisea e taua tele ai mo tagata taitasi ona taliaina le aoaoga faavae a Keriso? (Atonu e te manao e valaaulia tamaiti aoga e faafesootai lenei fuaitau ma Helamana 5:12.)
E tusa ai ma le 3 Nifae 27:14–16, o le a le mea e tupu ia i tatou ao tatou ola e tusa ai ma le aoaoga faavae po o le talalelei a Iesu Keriso?
Faaiu i le faaali atu o le fuaitau lenei mai le Talai Lau Talalelei: O se Taiala mo le Galuega Faafaifeautalai. Valaaulia tamaiti aoga e faitau ma vaavaai mo auala lea e avea ai le ola ai i le aoaoga faavae a Keriso e mafai ai ona faamanuiaina i latou i o latou olaga atoa.
“E amata ona mulimuli tagata taitoatasi ma aiga ia Keriso a o latou faatinoina le faatuatua ia te Ia ma salamo ai i a latou agasala. Latou te maua se faamagaloga o agasala e ala i le papatisoga ma le mauaina o le meaalofa o le Agaga Paia mai se tasi ua i ai le pule mai le Atua e faia ai nei sauniga. Ona latou tumau ai lea e oo i le iuga, i se isi faaupuga, latou te faaauau pea i o latou olaga atoa ona faatinoina le faatuatua ia Iesu Keriso, salamo, ma faafou a latou feagaiga na osia. E le o ni laasaga nei e na o le faatasi ona latou oo i ai i o latou olaga; ae, o le faia soo i le olaga atoa e avea ai nei laasaga ma se faatulagaga tauia o le olaga e faatupula’ia pea. O le mea moni lava, e na o le pau lava lea o le ala o le olaga e aumaia ai le filemu o le mafaufau, ma mafai ai e fanau a le Tama Faalelagi ona toe foi atu e nonofo i Lona afioaga” (Talai Lau Talalelei [2004], 6).
O a auala ua avea ai le ola i le aoaoga a Keriso “o se faatulagaga tauia o le olaga e faatupula’ia pea” mo oe?
Uunaia tamaiti aoga e mafaufau loloto i le lelei o loo latou ola ai i le aoaoga faavae a Keriso. Fai ia i latou e mafaufau i mea e mafai ona sili atu ona latou faia e maua ai faamanuiaga o le ola i le aoaoga a Keriso.