Lesona 1: O Le Tusi a Mamona O Se Tasi Molimau ia Iesu Keriso
Lesona 1
O Le Tusi a Mamona O Se Tasi Molimau ia Iesu Keriso
Folasaga
O i latou o e suesue i aoaoga ma aoaoga faavae o le Tusi a Mamona o le a iloaina o Iesu o le Keriso. I lenei lesona, o le a aoao tamaiti aoga faapea o tusitala autu o le tusi na avea ma ni molimau o le Alo o le Atua ma o a latou upu e fesoasoani e faateleina ai lo tatou malamalama ma le molimau ia Iesu Keriso ma Lana talalelei.
Faitauga Faaopoopo
Gordon B. Hinckley, “O Se Molimau Moni ma Faamaoni,” Liahona, Aok. 2005, 2–6.
O le Tusi a Mamona o se tasi molimau ia Iesu Keriso.
Faaali atu le saunoaga lenei a le Perofeta o Iosefa Samita (1805–44), ma fai i se tamaitiiti e faitau leotele.
Ata
Perofeta o Iosefa Samita
“Sa ou ta’u atu i le usoga e faapea, o le Tusi a Mamona o le tusi sili lea ona sa’o o soo se tusi o i ai i le lalolagi, ma o le maauau o lo tatou talitonuga, ma o le a latalata atu ai se tagata i le Atua e ala i le usitaia o ona mataupu, nai lo se isi lava tusi” (faatomuaga i le Tusi a Mamona).
O le fea o lauga a le Perofeta e uiga i le Tusi a Mamona e i ai sau molimau, ma aisea?
E faapefea ona faateleina e le saunoaga a le Perofeta le uunaia o oe e suesue le Tusi a Mamona?
Valaaulia tamaiti aoga e maka lenei fuaitau ia latou lava tusitusiga paia i le palakalafa lona ono o le faatomuaga i le Tusi a Mamona, ma fautuaina i latou e tusi i talaane ma faafesootai i le 1 Nifae 13:40 ma le 2 Nifae 25:17–18. (Manatua: O le faafesootaiga o se tomai faalesuesuega o tusitusiga paia e mafai ona e filifili e faamamafa atu i lenei kosi atoa. A o faamalosia e tamaiti aoga o latou tomai i le suesueina o tusitusiga paia, e faateleina ai lo latou ola tutoatasi faaleagaga.)
Valaaulia ni nai tamaiti aoga e feauauai i le faitauina leotele mai le 1 Nifae 13:40 ma le 2 Nifae 25:17–18 a o vaavaai le vasega mo se faamoemoega autu o le Tusi a Mamona.
E tusa ai ma nei fuaiupu, o le a se tasi o faamoemoega autu o le Tusi a Mamona? (O tamaiti aoga e tatau ona faailoa mai le mea lenei: Na aumaia e le Atua le Tusi a Mamona i aso e gata ai e faatalitonu ai tagata uma o Iesu o le Keriso. [Tagai foi i le itulau autu o le Tusi a Mamona.])
E faapefea e le Tusi a Mamona ona faatalitonu tagata o Iesu o le Keriso?
Faaali atu le fuaitau lenei mai ia Peresitene Ezra Taft Benson (1899–1994), ma valaaulia se tamaitiiti aoga e faitau leotele:
Ata
Peresitene Ezra Taft Benson
“Ua teena e le toatele o le lalolagi Kerisiano o ona po nei le paia o le Faaola. Ua latou fesiligia Lona soifua mai faavavega, le atoatoa o Lona soifuaga, ma le moni o Lona toetu mamalu. Ua aoao mai e le Tusi a Mamona i upu manino ma le le mafaaseseina le moni o ia mataupu uma. Ua tuuina mai ai foi se faamalamalamaga atoatoa o le aoaoga faavae o le Togiola. E moni o lenei tusi paia musuia, o se maa‘au‘au lea o le molimau atu i le lalolagi o Iesu o le Keriso” (Aoaoga a Peresitene o le Ekalesia: Ezra Taft Benson [2014], 129–30).
O a ni mea moni o le soifuaga ma le galuega a Iesu Keriso ua faamautuina i le Tusi a Mamona?
Valaaulia se tamaitiiti aoga e faitau leotele mai le faamatalaga lenei mai ia Elder Russell M. Nelson o le Korama a Aposetolo e Toasefululua:
Ata
Elder Russell M. Nelson
“Ua ou faitau [le Tusi a Mamona] i le tele o taimi. Ua tele foi mea ua tusia e uiga i ai ua ou faitau i ai. O nisi tusitala ua taulai atu i ona tala, o ona tagata, po o faamatalaga puupuu o le talafaasolopito. O isi ua fiafia i lona gagana po o ona faamaumauga o auupega, laufanua, olaga o meaola, auala e fausiaina ai fale, po o le faatulagaga o mamafa ma fua.
“O le matagofie e pei ona i ai nei mea, o le suesueina o le Tusi a Mamona e matuai sili atu ona tauia pe a taulai atu se tasi i lona faamoemoega faavae —o le molimau atu lea ia Iesu Keriso. I le faatusatusa atu i ai, o isi lomiga uma e faaletaua.
“Afai e te faitau i le Tusi a Mamona, ia tausisi lava i le tagata autu o loo i le tusi—e amata mai lava i lona uluai mataupu e oo atu i le mulimuli—le Alii o Iesu Keriso, le Alo o le Atua Soifua,” (“O se Molimau o le Tusi a Mamona,” Ensign, Ian. 2000, 69).
Mai savali uma lava o le Tusi a Mamona, aisea i lou manatu e sili ai le taulai atu i le savali e uiga ia Iesu Keriso?
Faamatala i tamaiti aoga faapea ina ua uma ona aoao e Alema sa Sorama e uiga i le galuega a le Faaola (tagai Alema 33:22, na ia valaaulia ana tagata faalogologo e toto le afioga a le Atua i o latou loto ina ia mafai ona tupu. Valaaulia tamaiti aoga e faitau le leoa le Alema 33:22 ma faailoa mai upumoni na uunaia e Alema ana tagata faitau e “toto” i o latou loto.
O le a le savali na manao Alema i ana tagata faalogologo e toto i o latou loto?
O a taunuuga na folafola atu e Alema pe afai latou te toto ma tausia nei talitonuga e uiga ia Iesu Keriso? (O le a tupu a latou molimau “i le ola tumau faavavau”; o le a mama a latou avega.)
Ua faapefea e le suesueina o le Tusi a Mamona ona fesoasoani ia te oe ia maua faamanuiaga ua faamatalaina e Alema?
O tusitala o le Tusi a Mamona na avea ma molimau o Iesu Keriso
Faamatala atu faapea o le Tusi a Mamona na tele lava ona tusia e ni tusitala autu se toafa: Nifae, Iakopo, Mamona, ma Moronae. (E ese mai ai tusi a Enosa, Iaroma, ma Ominae.)
Tuu le siata lenei i luga o le laupapa. Ina ia fesoasoani i tamaiti aoga e aoao e uiga i nei tusitala autu e fa, valaaulia i latou e filifili ma faitau le leoa se tasi o fuaitau nei. Fai ia i latou e vaavaai mo mea e agavaa ai le tusitala e avea ma molimau malosi o Iesu Keriso.
Faataga tamaiti aoga e faasoa mai mea na latou aoaoina mai fuaitau taitasi e fa. Ona fesili atu lea:
Aisea e taua ai le malamalama, o tusitala autu o le Tusi a Mamona o molimau o Iesu Keriso? (Ao e talanoaina lenei fesili, fesoasoani i tamaiti aoga e faailoa mai le upumoni lenei: I le suesueina o le Tusi a Mamona, tatou te aoao ai e uiga ia Iesu Keriso ma lana misiona mai ia i latou na vaai ma iloa o Ia. E mafai ona e faasino atu o le tagata na faaliliua le Tusi a Mamona, o Iosefa Samita, o se molimau foi o Iesu Keriso.)
Faaopoopo atu se koluma lona tolu i le siata i le laupapa, e pei ona faaalia:
Fai i tamaiti aoga taitasi ia faitau le leoa se fuaitau i le koluma lona tolu, ma vaavaai mo mafuaaga na faamaumau ai e tusitala taitasi lana savali.
Aisea na faamaumau ai e nei tusitala a le Tusi a Mamona a latou savali?
Aisea e te manatu ai o nei tusitala sa matua tinou lava e valaaulia isi e o mai ia Keriso?
E faapefea ona faaaogaina a latou valaaulia e o mai ia Keriso ia te oe lava ia? O a mafaufauga ma lagona o loo e maua ao e mafaufau loloto i nei valaaulia?
O le Tusi a Mamona e fesoasoani ia i tatou e talitonu ai ia Iesu Keriso
Faamatala atu faapea a o suia le tele o olaga o tagata e ala ia latou molimau o le Tusi a Mamona, o isi o loo tauivi ma masalosaloga e uiga i lona moni ma le sao.
O le a le lapataiga o le a e tuuina atu e fesoasoani i se tasi e faamalosia pe maua se molimau o le Tusi a Mamona?
Fai i se tamaitiiti aoga e faitau leotele le 2 Nifae 33:1–2 a o faailoa mai e le vasega le mana lena e faatagaina le savali o le Tusi a Mamona e ulufale i le loto o se tasi.
O le a le mana na fai mai Nifae o le a faatagaina lana savali e ulufale atu i le loto o se tagata? (O le mana o le Agaga Paia.)
O le a le mea na tau mai e Nifae o le a taofia ai nisi tagata mai le mauaina o le Agaga Paia?
Valaaulia tamaiti aoga e tau mai ma talanoaina se mataupu faavae o loo aoao mai e nei fuaiupu. (Fesoasoani i tamaiti aoga e faailoa mai le mataupu faavae lenei: E mafai e le Agaga Paia ona moliooina le savali o le Tusi a Mamona i o tatou loto pe afai tatou te le faamaaaina o latou loto agai i le Agaga Paia. Mafaufau e tusi le mataupu faavae lenei i luga o le laupapa.)
Tuu atu i tamaiti aoga se taimi e suesue ai 2 Nifae 33:4–5, ma vaavaai mo nisi faamanuiaga na e mafai ona tatou maua mai le suesueina o le Tusi a Mamona. Valaaulia tagata o le vasega e faasoa mai mea na latou maua.
Faaali atu le saunoaga lenei a Elder Gary J. Coleman o le Fitugafulu ma fai i se tamaitiiti aoga e faitau leotele:
Ata
Elder L. Whitney Clayton
“Ua tatau ai foi ia i [tatou] ona filifili e tatala o tatou loto i le moni paia o le Faaola. … E le faamalosia i tatou e le Atua e talitonu. Ae Na te valaaulia i tatou ia talitonu e ala i le auina mai o perofeta soifua ma aposetolo e aoao i tatou, e ala i le aumaia o tusitusiga paia, ma faatauanau mai ia i tatou e ala i Lona Agaga. … O le faaiuga e talitonu, o le filifiliga aupito taua lea e mafai ona tatou faia. E mamanuina ai isi a tatou faaiuga uma e faia” (“Filifili e Talitonu,” Ensign po o le Liahona, Me 2015, 38).
E faapefea e le taliaina o le valaaulia a tusitala o le Tusi a Mamona e talitonu ia Iesu Keriso ona mamanuina uma isi a tatou filifiliga?
Faaauau e ala i le valaaulia o se tamaitiiti aoga e faitau leotele le 2 Nifae 33:10–11 ao vaavaai le vasega mo le ala ua faamatalaina ai e Nifae le faia i le va o le talitonu i ana upu ma le talitonu ia Iesu Keriso.
E tusa ai ma le saunoaga a Nifae, o le a le sootaga i le va o le talitonu i ana upu ma le talitonu ia Iesu Keriso?
O le a le mea na fai mai Nifae o le a tupu “i le aso gataaga” ia i latou e teena ana upu?
Valaaulia tamaiti aoga e faasoa mai a latou molimau pe na faapefea ona fesoasoani le Tusi a Mamona ia i latou e faalatalata atili ia Iesu Keriso.