៣. រៀនសូត្រ ហើយកែលម្អ
រៀនចេញពីបទពិសោធន៍របស់អ្នក នៅពេលអ្នកខិតខំធ្វើតាមវិធីបង្ការទាំងនេះ ។ ដើម្បីរៀនសូត្រ ហើយកែលម្អបាន អ្នកត្រូវប្រែចិត្ត ជាកិច្ចការដែលនាំអ្នកទៅកាន់តែជិតព្រះគ្រីស្ទនៅពេលអ្នកប្រើប្រាស់ដង្វាយធួនរបស់ទ្រង់ ។ នៅពេលអ្នកបែរទៅរកទ្រង់ ទ្រង់នឹងជួយអ្នកឲ្យរីកចម្រើន ។ ទ្រង់បានមានបន្ទូលសន្យាថា « បើសិនជា [ កូនចៅរបស់យើង ] មករកយើង នោះយើងនឹងបង្ហាញដល់ពួកគេនូវភាពទន់ខ្សោយរបស់ពួកគេ ។ … គុណរបស់យើងមានគ្រប់គ្រាន់សម្រាប់មនុស្សទាំងអស់ ដែលបន្ទាបខ្លួននៅចំពោះយើង ត្បិតបើសិនជាពួកគេបន្ទាបខ្លួននៅចំពោះយើង ហើយមានសេចក្ដីជំនឿជឿដល់យើង លំដាប់នោះ យើងនឹងធ្វើឲ្យអ្វីដែលទន់ខ្សោយក្លាយទៅជាខ្លាំងពូកែចំពោះពួកគេវិញ » ( អេធើរ ១២:២៧ ) ។ ព្រះនឹងជួយអ្នកឲ្យរៀនសូត្រ ហើយកែលម្អចេញពីកំហុសកាលពីមុនៗរបស់អ្នក ដើម្បីអ្នកអាចពង្រឹងភាពរឹងមាំយកឈ្នះលើភាពទន់ខ្សោយបាន ។ តាមរយៈដង្វាយធួនរបស់ព្រះយេស៊ូវគ្រីស្ទ ព្រះអភ័យទោស ហើយបំភេ្លចកំហុសពីអតីតកាលទាំងអម្បាលម៉ាន ។
នៅពេលអ្នកឃើញថាខ្លួនអ្នកកំពុងត្រូវបានល្បួងឲ្យប្រើប្រាស់បច្ចេកវិទ្យាមិនត្រឹមត្រូវ អ្នកអាចរៀនចេញពីបទពិសោធន៍របស់អ្នកដោយផ្ដោតអារម្មណ៍ទៅលើជម្រើសនានាដែលអ្នកធ្វើ និង លទ្ធផលនានាដែលអ្នកបានបង្កើតឡើង ។ កត់ត្រាបទពិសោធន៍ និង អារម្មណ៍របស់អ្នកនៅក្នុងទិនានុប្បវត្តិ ។ រៀនស្គាល់លំនាំនៅក្នុងគំនិត អារម្មណ៍ ឬ ឥរិយាបថរបស់អ្នក ដែលធ្វើឲ្យអ្នកមានភាពលំបាកក្នុងការប្រើបច្ចេកវិទ្យាដោយសុចរិត ។ អ្នកអាចចៀសវាងពីការល្បួងដោយការចៀសវាងពីលំនាំទាំងនេះ ។ ឧទាហរណ៍ អ្នកអាចឃើញថា ខ្លួនអ្នកកាន់តែ ត្រូវបានរំខានដោយឧបករណ៍ចល័តរបស់អ្នក នៅពេលអ្នកគ្មានផែនការសំខាន់ៗ និង ជាក់លាក់ប្រចាំថ្ងៃទេនោះ ។ តាមរយៈការជ្រើសរើសដាក់ផែនការធ្វើសកម្មភាពសំខាន់ៗជានិច្ច នោះអ្នកនឹងត្រូវបានរំខានដោយឧបករណ៍ចល័តរបស់អ្នកកាន់តែតិច ។
ដៃគូ និង អ្នកដឹកនាំក្នុងបេសកកម្ម ក៏នឹងជួយអ្នកឲ្យរៀនសូត្រ ហើយកែលម្អដែរ ។ ចូរចាំថា ទោះជាបច្ចាមិត្តប្រើប្រាស់ការលាក់កំបាំង និង ការនៅដាច់ដោយឡែកដើម្បីដឹកនាំមនុស្សទៅក្នុងភាពងងឹតក្ដី ព្រះអម្ចាស់មានបន្ទូលលើកទឹកចិត្តយើងឲ្យស្វែងរកពន្លឺតាមរយៈភាពទៀងត្រង់ និង សេចក្ដីពិត ។ ការបង្កើតទំនាក់ទំនងរឹងមាំ សុចរិតជាមួយដៃគូអ្នក និង សមាជិកក្នុងមណ្ឌលបេសកកម្មរបស់អ្នក គឺជាការការពារមួយដ៏ប្រសើរបំផុត ហើយវាអនុញ្ញាតឲ្យអ្នកបង្កើតវប្បធម៌នៃឥរិយាបថសុចរិត និង ពេញដោយគោលបំណង ។