វិធីបង្ការទី ២
ផ្ដោតទៅលើគោលបំណងផ្សព្វផ្សាយសាសនារបស់អ្នក
ព្រះអម្ចាស់បានមានព្រះបន្ទូលថា « បើសិនជាភ្នែករបស់អ្នកស្មោះស្ម័គ្រទាំងស្រុងទៅចំពោះសិរីល្អរបស់យើង នោះរូបកាយអ្នកទាំងមូលនឹងបានពោរពេញទៅដោយពន្លឺ ហើយនឹងពុំមានសេចក្ដីងងឹតនៅក្នុងអ្នកឡើយ ហើយរូបកាយនោះដែលបានពោរពេញទៅដោយពន្លឺ យល់គ្រប់ទាំងអស់ » ( គ. និង ស. ៨៨:៦៧ ) ។ ការមានភ្នែករបស់អ្នកស្មោះស្ម័្រទាំងស្រុងទៅចំពោះសិរីល្អរបស់ព្រះ មានន័យថា ការផ្ដោតអារម្មណ៍ទាំងស្រុងទៅលើព្រះបំណងរបស់ព្រះ—ដែលនោះក៏ជាគោលបំណងផ្សព្វផ្សាយសាសនារបស់អ្នកដែរ ។
អ្វីគ្រប់យ៉ាងដែលអ្នកធ្វើ—រួមមានទាំងរបៀបដែលអ្នកប្រើប្រាស់បច្ចេកវិទ្យាផ្សព្វផ្សាយទាំងនេះ—គួរតែផ្ដោតសំខាន់ទៅលើគោលបំណងរបស់អ្នក គឺត្រូវ « អញ្ជើញមនុស្សដទៃមកកាន់ព្រះគ្រីស្ទដោយការជួយពួកគេឲ្យទទួលដំណឹងល្អដែលបានស្ដារឡើងវិញ តាមរយៈសេចក្ដីជំនឿនៅលើព្រះគ្រីស្ទ និង ដង្វាយធួនរបស់ទ្រង់ ការប្រែចិត្ត ពិធីបុណ្យជ្រមុជទឹក ការទទួលអំណោយទាននៃព្រះវិញ្ញាណបរិសុទ្ធ និង កាន់ខ្ជាប់ដរាបដល់ចុងបំផុត » ( ប្រកាសដំណឹងល្អរបស់យើង ទំព័រ ១ ) ។ បំណងប្រាថ្នារបស់អ្នកក្នុងការចែកចាយដំណឹងល្អ នឹងជួយអ្នកឲ្យចៀសវាងពីការរំខាន ។
បើកឧបករណ៍របស់អ្នកតែនៅពេលដែលអ្នកដឹងថាត្រូវធ្វើអ្វីប៉ុណ្ណោះ ។ ពីមុនអ្នកបើកឧបករណ៍ចល័ត ឬ កុំព្យូទ័រ ឬ បើក app ណាមួយ ចូរសម្រេចជាមួយដៃគូរបស់អ្នកអំពីអ្វីដែលអ្នកនឹងធ្វើ ។ ចូរពិចារណាអំពីចំនួនម៉ោងដែលអ្នកនឹងប្រើ និង អំពីរបៀបដែលសកម្មភាពទាំងនេះនឹងដឹកនាំទៅរកការជួយមនុស្សឲ្យអនុវត្តសេចក្ដីជំនឿលើព្រះយេស៊ូវគ្រីស្ទ ប្រែចិត្ត ចុះសេចក្ដីសញ្ញានានា ហើយរក្សាសេចក្ដីសញ្ញាទាំងនោះ ទទួលអារម្មណ៍ ហើយធ្វើតាមព្រះវិញ្ញាណបរិសុទ្ធ ហើយកាន់ខ្ជាប់ដរាបដល់ចុងបំផុត ។ ចូរធ្វើតាមសេចក្ដីណែនាំរបស់ប្រធានបេសកកម្មរបស់អ្នក ទាក់ទងទៅនឹងសកម្មភាពសមរម្យនៃការប្រើប្រាស់ឧបករណ៍ឌីជីថល ។ បទពិសោធន៍បានបង្ហាញថា មនុស្សដែលជួបប្រទះនឹងមាតិកាមិនសមរម្យញឹកញាប់នៅលើអ៊ិនធើរណែត គឺនៅពេលដែលពួកគេចូលមើលគេហទំព័រនោះធម្មតា ដោយគ្មានគោលបំណងជាក់លាក់ក្នុងគំនិត ។