១. ដឹងជាមុន និង ទទួលស្គាល់
ដើម្បីអ្នកអាចរៀនធ្វើតាមវិធីបង្ការទាំងនេះបានដោយសភាវគតិ អ្នកត្រូវតែដឹងនៅពេលដែលគំនិត ឬ ទង្វើរបស់អ្នកមិនស្របទៅតាមសេចក្ដីណែនាំទាំងនេះ ។ អ្នកក៏ត្រូវតែដឹងផងដែរនៅពេលអ្នកមានអារម្មណ៍ថា មានអ្វីមួយកំពុងកើតឡើង ដែលអាចធ្វើឲ្យអ្នកទន់ខ្សោយ និង ងាយរងឥទ្ធិពល ។ ឧទាហរណ៍ ការមានអារម្មណ៍ធុញទ្រាន់ ឯកោ ខឹង អន្ទះអន្ទែង ភ័យខ្លាច តានតឹង ឃ្លាន ឬ នឿយហត់ អាចធ្វើឲ្យអ្នកកាន់តែមានការលំបាកក្នុងការប្រើប្រាស់បច្ចេកវិទ្យាដោយឆ្លាតវៃ ។ ការដឹងអំពីស្ថានភាព និង អារម្មណ៍ទាំងនេះ នឹងអនុញ្ញាតឲ្យអ្នកឆ្លើយតបទៅនឹងអារម្មណ៍ដែលអ្នកកំពុងមាន តាមរបៀបត្រឹមត្រូវ និង មានប្រយោជន៍ ។ ស្ដេចបេនយ៉ាមីនបានបង្រៀនថា « បើសិនជាអ្នករាល់គ្នាពុំប្រយ័ត្នខ្លួន ទាំងគំនិតរបស់ខ្លួន និងពាក្យសម្ដីរបស់ខ្លួន និងកិច្ចការរបស់ខ្លួន ហើយគោរពតាមព្រះបញ្ញត្តិទាំងឡាយនៃព្រះ ហើយបន្តទៅក្នុងសេចក្ដីជំនឿជឿដល់អ្វីដែលអ្នករាល់គ្នាបានឮអំពីការយាងមកនៃព្រះអម្ចាស់របស់យើង រហូតដល់ថ្ងៃចុងក្រោយនៃជីវិតខ្លួនទេ នោះអ្នករាល់គ្នានឹងត្រូវវិនាស ។ ហើយឥឡូវនេះ ឱមនុស្សលោកអើយ សូមចងចាំ ហើយកុំវិនាសបង់ឡើយ » ( ម៉ូសាយ ៤:៣០ ) ។
អ្នកផ្សព្វផ្សាយសាសនាទាំងអស់ទទួលបទពិសោធន៍នៃភាពទន់ខ្សោយ ។ ជំនួសឲ្យការលាក់បាំង ឬ ការមិនអើពើនឹងអារម្មណ៍ទាំងនេះ អ្នកត្រូវទទួលស្គាល់ពួកវាដោយស្មោះត្រង់ ដើម្បីជួយខ្លួនអ្នកឲ្យជ្រើសរើសការឆ្លើយតបកាន់តែប្រសើរ ហើយយកឈ្នះលើការល្បួង ។ ចូរទទួលស្គាល់នូវអារម្មណ៍របស់ខ្លួន រួចសម្រេចចិត្តថាតើមានព្រឹត្តិការណ៍ ឬ កាលៈទេសៈជាក់លាក់ណាមួយ ដែលអ្នកអាចឆ្លើយតប ។ ចូរពិភាក្សាដោយបើកចំហជាមួយដៃគូអ្នក និង អ្នកផ្សព្វផ្សាយសាសនាដទៃទៀត ដើម្បីពួកគេអាចជួយអ្នកឲ្យដឹងអំពីអារម្មណ៍របស់អ្នក និងផលប៉ះពាល់ដែលវាមានដល់អ្នក ។ ចូរទូលទៅកាន់ព្រះវរបិតាសួគ៌ដោយបើកចំហនៅក្នុងការអធិស្ឋាន អំពីអារម្មណ៍របស់អ្នក ដើម្បីទ្រង់អាចជួយអ្នក ហើយប្រទានកម្លាំងឲ្យអ្នកយកឈ្នះលើការល្បួងបានតាមរយៈដង្វាយធួនរបស់ព្រះយេស៊ូវគ្រីស្ទ ។
ចូរទទួលស្គាល់អារម្មណ៍ដោយស្មោះត្រង់ ដើម្បីជួយខ្លួនអ្នកឲ្យជ្រើសរើសការឆ្លើយតបកាន់តែប្រសើរ ហើយយកឈ្នះលើការល្បួង ។