វិធីបង្ការទី ១
ធ្វើតាមការបំផុសគំនិតខាងវិញ្ញាណ
នីហ្វៃសន្យានៅក្នុង នីហ្វៃទី២ ៣២:៥ ថា « បើសិនជាអ្នករាល់គ្នា នឹងចូលទៅតាមផ្លូវនោះ ហើយទទួលព្រះវិញ្ញាណបរិសុទ្ធ នោះព្រះវិញ្ញាណបរិសុទ្ធនឹងបង្ហាញដល់អ្នក នូវគ្រប់អ្វីទាំងអស់ដែលអ្នកត្រូវធ្វើ » ។ ការប្រើប្រាស់សិទ្ធិជ្រើសរើសយ៉ាងសុចរិតនៅក្រោមការដឹកនាំរបស់ព្រះវិញ្ញាណបរិសុទ្ធ នឹងជាមធ្យោបាយមួយដ៏ប្រសើរបំផុតក្នុងការធ្វើកិច្ចការល្អខណៈពេលដែលអ្នកកំពុងប្រើបច្ចេកវិទ្យា ហើយវានឹងជាខែលការពារមួយដ៏រឹងមាំប្រឆាំងនឹងសេចក្ដីអាក្រក់ ។
App ដែលមាននៅលើឧបករណ៍ចល័តរបស់អ្នក មានតម្រងដែលត្រូវបានបង្កើតឡើងដើម្បីការពារអ្នកពីមាតិកាមិនសមរម្យ ។ យ៉ាងណាក៏ដោយ ទោះជាតម្រងនោះរឹងមាំប៉ុណ្ណាក្ដី វាមិនអាចការពារអ្នកបានគ្រប់ពេល ១០០ ភាគរយនោះទេ ។ តម្រងដ៏ប្រសើរបំផុតដែលអ្នកមាន គឺជាឆន្ទៈ និង បំណងប្រាថ្នាផ្ទាល់ខ្លួនរបស់អ្នកក្នុងការជ្រើសយកជម្រើសដ៏សុចរិត ។ អែលឌើរ ដាវីឌ ហ្វែ អ៊ីវីនស៍ បានថ្លែងថា ៖ « តម្រងដ៏មានប្រសិទ្ធភាពតែមួយគត់សម្រាប់ការប្រើប្រាស់បច្ចេកវិទ្យាគ្រប់ពេលទាំងអស់នោះ គឺជាដួងចិត្ត និង គំនិតរបស់យុវវ័យម្នាក់ៗ ។ … យើងមានជំនឿយ៉ាងមុតមាំថា … [ អ្នកផ្សព្វផ្សាយសាសនា ] រាប់ម៉ឺននាក់ នឹងបង្កើតទម្លាប់ល្អៗក្នុងការប្រើប្រាស់ឧបករណ៍ឌីជីថលគ្រប់ពេលទាំងអស់ ដែលវានឹងប្រទានពរដល់ជីវិតពួកគេ និងក្រុមគ្រួសាររបស់ពួកគេជារៀងរហូត » ( « Elder David F. Evans Discusses Expanded Missionary Efforts » mormonnewsroom.org ) ។ អ្នកផ្សព្វផ្សាយសាសនាគួរតែទទួលខុសត្រូវយ៉ាងហ្មត់ចត់ ទៅលើការព្យាយាមដ៏ឥតឈប់ឈរដើម្បី « ជំរះចិត្ត [ របស់ពួកគេ ] ឲ្យបានបរិសុទ្ធ » ( គ. និង ស. ៨៨:៧៤ ) ។
ព្រះវរបិតាសួគ៌របស់អ្នកបានប្រទានឲ្យអ្នកនូវអំណោយដ៏សំខាន់ និង មានអានុភាពចំនួនពីរ ដែលនឹងជួយអ្នកគឺ ៖ សិទ្ធិជ្រើសរើសខាងសីលធម៌ និង អំណោយទាននៃព្រះវិញ្ញាណបរិសុទ្ធ ។ ព្រះអម្ចាស់មានព្រះបន្ទូលប្រាប់អំពីព្រះឆន្ទៈរបស់ ទ្រង់ដូចនេះ ៖ « ថាមនុស្សគ្រប់រូបអាចប្រព្រឹត្តនូវគោលលទ្ធិ និងគោលការណ៍ ដែលទាក់ទងទៅនឹងពេលខាងមុខតាមសិទ្ធិជ្រើសរើសខាងសីលធម៌ ដែលយើងបានប្រទានដល់គេ ប្រយោជន៍ឲ្យមនុស្សគ្រប់រូបអាចបានទទួលការខុសត្រូវចំពោះអំពើបាបទាំងឡាយរបស់ខ្លួននៅថ្ងៃជំនុំជំរះ » ( គ. និង ស. ១០១:៧៨ ) ។ ប្រធាន ប៊យដ៏ ឃេ បានបង្រៀនថា « គ្មានសមាជិកណាម្នាក់ក្នុងសាសនាចក្រនេះ—ហើយនោះមានន័យថា គ្មានអ្នករាល់គ្នាណាម្នាក់—ដែលនឹងធ្វើកំហុសធ្ងន់ធ្ងរណាមួយដោយពុំបានទទួលការព្រមានជាមុន មកពីការបំផុសគំនិតនៃព្រះវិញ្ញាណបរិសុទ្ធនោះឡើយ » ( « How to Survive in Enemy Territory » New Era ខែ មេសា ឆ្នាំ ២០១២ ទំព័រ ៣ ) ។