សេចក្ដីផ្ដើម

ពេញមួយប្រវត្តិសាស្ត្រ ព្រះបានប្រើប្រាស់ឧបករណ៍ដ៏ទេវភាពដើម្បីពង្រីកព្រះបំណងទ្រង់ ។ ឧទាហរណ៍ យូរីម និង ធូមីម បានជួយនៅក្នុងការបកប្រែព្រះបន្ទូលព្រះ រីឯលីអាហូណាបានផ្ដល់នូវការដឹកនាំដល់លីហៃ និង ក្រុមគ្រួសារលោក នៅពេលពួកគាត់បានធ្វើដំណើរទៅកាន់ដែនដីសន្យា ។ ប្រធាន ស្ពែនស៊ើរ ដបុលយូ ឃឹមបឹល បានថ្លែងអំពីឧបករណ៍ដ៏ទេវភាពនៅក្នុងជំនាន់របស់យើងថា « ខ្ញុំជឿថា ព្រះអម្ចាស់ពិតជាមានព្រះទ័យប្រទានឲ្យយើងនូវការច្នៃប្រឌិត ដែលយើងជាមនុស្សលោកនេះពុំអាចយល់ដល់បានឡើយ » ( « When the World Will Be Converted » Ensign ខែ តុលា ឆ្នាំ ១៩៧៤ ទំព័រ ១០ ) ។ ចាប់តាំងពីសុន្ទករថារបស់ប្រធាន ឃឹមបឹល មក មានឧបករណ៍ខាងបច្ចេកវិទ្យាជាច្រើនត្រូវបានបង្កើតឡើង ដើម្បីពង្រីកព្រះបំណងរបស់ព្រះអម្ចាស់ ហើយឥឡូវនេះ អ្នកអាចប្រើប្រាស់ឧបករណ៍ទាំងនេះនៅក្នុងកិច្ចការរបស់អ្នក ។ អែលឌើរ អិល ថម ភែរី បានប្រកាសថា « ឥឡូវនេះ អ្នកផ្សព្វផ្សាយសាសនាត្រូវបានអនុញ្ញាតឲ្យប្រើប្រាស់អ៊ិនធើរណិតក្នុងកិច្ចការផ្សព្វផ្សាយរបស់ពួកគេ ។ … អ្នកផ្សព្វផ្សាយសាសនានឹងប្រើប្រាស់កុំព្យូទ័រនៅក្នុងសាលាប្រជុំ និង អគារដទៃទៀតរបស់សាសនាចក្រ » ( « Missionary Work in the Digital Age » [ worldwide leadership training meeting ខែ មិថុនា ឆ្នាំ ២០១៣ ] lds.org/broadcasts ) ។

រូបភាព

លីហៃ និង ក្រុមគ្រួសារជាមួយនឹងលីអាហូណា

បច្ចេកវិទ្យាដែលអ្នកកំពុងទទួលបាននាពេលនេះ ត្រូវបានផ្ដល់ឲ្យដើម្បីជួយអ្នកនៅក្នុងការបម្រើដល់ព្រះអម្ចាស់ ព្រោះទ្រង់កំពុងពន្លឿនកិច្ចការរបស់ទ្រង់ ។ ទោះជាបច្ចេកវិទ្យានេះត្រូវបានបង្កើតឡើងដើម្បីធ្វើកិច្ចការល្អក្ដី សាតាំងព្យាយាមប្រើប្រាស់បច្ចេកវិទ្យានេះដើម្បីផ្សាយអំពីសេចក្ដីអាក្រក់ ហើយដើម្បីធ្វើឲ្យកិច្ចការរបស់ព្រះអម្ចាស់មានភាពស្មុគស្មាញ ។ វាមានសារៈសំខាន់ណាស់ដែលអ្នកត្រូវប្រើប្រាស់ឧបករណ៍ទាំងនេះ ឲ្យស្របទៅនឹងគោលបំណងដែល វាត្រូវបានបង្កើតឡើង—ដើម្បីសម្រេចកិច្ចការនៃសេចក្ដីសង្គ្រោះឲ្យបានកាន់តែមានប្រសិទ្ធភាព ។ សៀវភៅនេះមាននូវវិធីបង្ការនានា ដែលនឹងជួយអ្នកឲ្យប្រើប្រាស់ឧបករណ៍ទាំងនេះយ៉ាងត្រឹមត្រូវ ដើម្បីបំពេញគោលបំណងអ្នកផ្សព្វផ្សាយសាសនារបស់អ្នក និង ពង្រីកព្រះបំណងរបស់ព្រះអម្ចាស់ក្នុង « [ ការ ] នាំឲ្យមានអមតភាព និងជីវិតដ៏នៅអស់កល្បជានិច្ចដល់មនុស្ស » ( ម៉ូសេ ១:៣៩ ) ។ វិធីបង្ការទាំងនេះក៏នឹងបំភ្លឺគំនិតរបស់អ្នកទៅកាន់របៀបផ្សេងៗដ៏បំផុសគំនិតអំពីការប្រើប្រាស់បច្ចេកវិទ្យា ដែលនឹងពង្រឹងសេចក្ដីជំនឿរបស់អ្នកទៅលើព្រះយេស៊ូវគ្រីស្ទ ព្រមទាំងសេចក្ដីជំនឿរបស់មនុស្សដែលអ្នកបម្រើផងដែរ ។ វាមានតួនាទីដូចជាសោចាក់ទ្វារព្រះវិហារបរិសុទ្ធ ដែលបង្ការមិនឲ្យអ្វីដែលមិនបរិសុទ្ធអាចចូលទៅក្នុងគំនិតរបស់អ្នកបានឡើយ ។ ប៉ុលបានបង្រៀនថា « តើអ្នករាល់គ្នាមិនដឹងទេឬអី ថាខ្លួនអ្នករាល់គ្នាជាព្រះវិហារនៃព្រះ ហើយថា ព្រះវិញ្ញាណនៃព្រះ ទ្រង់សណ្ឋិតក្នុងអ្នករាល់គ្នា ? » ( កូរិនថូសទី១ ៣:១៦ ) ។ វិធីបង្ការទាំងនេះនឹងការពារអ្នក ហើយជួយអ្នកឲ្យចៀសវាងពីព័ត៌មាន និង បទពិសោធន៍នាំឲ្យខូចប្រយោជន៍នានា ដែលបណ្ដាលឲ្យគ្មានព្រះវិញ្ញាណ រួមមានមាតិកាដែលមិនសមរម្យមានដូចជា រូបអាសគ្រាមជាដើម ។ វាក៏នឹងជួយអ្នកឲ្យចៀសវាងពីការខ្ជះខ្ជាយពេលវេលាទៅលើសកម្មភាពនានាដូចជា ហ្គេម ព័ត៌មាន កីឡា វីដេអូ និង ការប្រើប្រាស់មិនសមរម្យផ្សេងៗទៀតទៅលើប្រព័ន្ធផ្សព្វផ្សាយសង្គម ។ ការអនុវត្តតាមគោលការណ៍ទាំងនេះនឹងបង្កើនសមត្ថភាពរបស់អ្នក ដើម្បីជួយមនុស្សដទៃ ថែមទាំងនឹងប្រទានពរដល់អ្នកពេញមួយជីវិតផងដែរ ។

ចូររៀនធ្វើតាមវិធីបង្ការទាំងនេះឲ្យក្លាយជាទម្លាប់ ។ វិធីបង្ការទាំងនេះនឹងជួយអ្នកនៅពេលអ្នកព្យាយាមក្លាយដូចព្រះគ្រីស្ទ ។ « ព្រះអង្គសង្គ្រោះបានបង្ហាញផ្លូវ ។ ទ្រង់បានធ្វើជាគំរូដ៏ល្អឥតខ្ចោះ ហើយទ្រង់បញ្ជាយើងឲ្យប្រែក្លាយដូចជាទ្រង់ ( សូមមើល នីហ្វៃទី៣ ២៧:២៧ ) » ( ប្រកាសដំណឹងល្អរបស់យើង ៖ មគ្គុទេសក៍ចំពោះការបម្រើជាអ្នកផ្សព្វផ្សាយសាសនា [ ឆ្នាំ ២០០៤ ] ទំព័រ ១១៧ ) ។ ជម្រើសដែលអ្នកធ្វើឡើងទាក់ទងនឹងរបៀបដែលអ្នកប្រើប្រាស់បច្ចេកវិទ្យា នឹងជួយអ្នកឲ្យក្លាយដូចព្រះអង្គសង្គ្រោះ ។ ចូរពឹងផ្អែកលើព្រះគុណ—ដែលជាជំនួយ ឬ ភាពរឹងមាំបានផ្ដល់ឲ្យតាមរយៈដង្វាយធួនរបស់ព្រះគ្រីស្ទ—នៅពេលអ្នកព្យាយាមឲ្យក្លាយជាឧបករណ៍ដ៏មានប្រសិទ្ធភាពនៅក្នុងព្រះហស្តរបស់ព្រះអម្ចាស់ ។

អ្នកនឹងរៀន ហើយតាំងចិត្តធ្វើតាមវិធីបង្ការទាំងនេះដោយខ្លួនអ្នកផ្ទាល់ ជាមួយដៃគូរបស់អ្នក និង ជាមួយអ្នកផ្សព្វផ្សាយសាសនាដទៃៗទៀត ។ អ្នកក៏នឹងរៀនអំពីដំណើរការមួយ ដែលនឹងជួយអ្នកនៅពេលអ្នកមានអារម្មណ៍ទន់ខ្សោយ និង ងាយរងឥទ្ធិពលដែរ ។ ចូរអានព័ត៌មាននេះឲ្យបានញឹកញាប់ ។ ចូរសិក្សា ពិចារណា ហើយអនុវត្តតាមគោលការណ៍ទាំងនេះរហូតដល់វាក្លាយទៅជារឿងមួយធម្មតាសម្រាប់អ្នកក្នុងការគិត ហើយអនុវត្ត ។