វិធីបង្ការទី ៣
មានការលត់ដំ
នៅក្នុង នីហ្វៃទី២ ២:២៦ លីហៃបង្រៀនថា « ហើយពីព្រោះពួកគេត្រូវបានប្រោសលោះឲ្យរួចពីការធ្លាក់ ទើប [ កូនចៅមនុស្ស ] មានឥស្សរភាពរហូតតទៅ ដោយដឹងខុស និងត្រូវ ដើម្បីធ្វើសកម្មភាពដោយខ្លួនឯង ហើយពុំមែនទទួលសកម្មភាពទេ » ។ ចូរប្រើសិទ្ធិជ្រើសរើសរបស់អ្នកដើម្បីលត់ដំ ហើយធ្វើជម្រើសសុចរិតៗ ទាក់ទងទៅនឹងរបៀបដែលអ្នកប្រើប្រាស់បច្ចេកវិទ្យា ។ អែលឌើរ ឌី ថត គ្រីស្តូហ្វឺសិន បានមានប្រសាសន៍ទាក់ទងទៅនឹងទំនាក់ទំនងរវាងសិទ្ធិជ្រើសរើស និង ការលត់ដំថា « ការលត់ដំខាងសីលធម៌ គឺជាការអនុវត្តដ៏ខ្ជាប់ខ្ជួននូវសិទ្ធិជ្រើសរើសដើម្បីជ្រើសរើសធ្វើត្រូវ ព្រោះនោះជារឿងត្រឹមត្រូវ ទោះជារឿងនោះជារឿងពិបាកក្ដី » ( « Moral Discipline » Ensign ឬ Liahona ខែ វិច្ឆិកា ឆ្នាំ ២០០៩ ទំព័រ ១០៥ ) ។ ដោយសារតែការលត់ដំមានទំនាក់ទំនងយ៉ាងស្អិតរមួតជាមួយសិទ្ធិជ្រើសរើស ចូរខិតខំដោយមានមនសិការដើម្បីជ្រើសរើសយកការលត់ដំ នៅពេលដែលអ្នកប្រើប្រាស់ឧបករណ៍ចល័តនៅក្នុងកិច្ចការផ្សព្វផ្សាយសាសនារបស់អ្នក ។
ចូររឹតបន្តឹងការលត់ដំដើម្បីប្រើប្រាស់ឧបករណ៍ចល័តតែនៅពេលដែលសមនឹងប្រើប៉ុណ្ណោះ ។ នៅពេលអ្នកកំពុងជជែកជាមួយមនុស្សដោយប្រទល់មុខ ចូរកុំបើកមើលសារ ឬ ទទួលទូរសព្ទឲ្យសោះ ។ ចូរគ្រប់គ្រងលើរបៀបដែលអ្នកប្រើប្រាស់ឧបករណ៍ទាំងនេះ ។ ចូរកុំឲ្យវាគ្រប់គ្រងលើអ្នកឲ្យសោះ ។ អ្នកអាចនឹងស្គាល់មនុស្សដែលញៀនប្រើឧបករណ៍ចល័តរបស់ពួកគេ ។ ពួកគេហាក់ដូចជាភ្លេចពីបរិយាកាសសង្គមជុំវិញខ្លួន នៅពេលពួកគេផ្ញើសារ ហើយបើកមើលសារ លេងហ្គេមវីដេអូ ឬ ធ្វើកិច្ចការផ្សេងៗទៀតនៅលើឧបករណ៍របស់ពួកគេ ។ ក្នុងនាមជាអ្នកផ្សព្វផ្សាយសាសនា ចូរកុំបណ្ដោយឲ្យខ្លួនអ្នកត្រូវបានរំខានដោយឧបករណ៍ចល័តឡើយ ។ អែលឌើរ អិម រ័សុល បាឡឺដ បានបង្រៀនដូចនេះ ៖ « ឧបករណ៍មានក្នុងដៃដូចជា smartphones គឺជាពរជ័យ ប៉ុន្តែវាក៏អាចរំខានយើងពីការស្ដាប់ឮ ‹ សំឡេងតូចរហៀង › ដែរ ។ វាត្រូវតែធ្វើជាអ្នកបម្រើយើង ពុំមែនធ្វើជាចៅហ្វាយយើងនោះទេ » ( « ចូរបង្អង់សិន ហើយឲ្យបានដឹងថា យើងជាព្រះ » [ ការប្រជុំធម្មនិដ្ឋានរបស់ប្រព័ន្ធអប់រំសាសនាចក្រ ថ្ងៃទី ៤ ខែ ឧសភា ឆ្នាំ ២០១៤ ] lds.org/broadcasts ) ។