Ia Tasi

Na fetalai mai le Alii, “Ou te fai atu ia te outou, ia tasi outou; ma afai tou te lē tasi e lē a aʼu outou” (Mataupu Faavae & Feagaiga 38:27). Fesoasoani i lau misiona ia atiae se aganuu o le lotogatasi, usiusitai, agaalofa, agalelei, mataala, ma le tali atu mo le tagata lava ia, ina ia mafai e outou uma ona faamalosia, uunaia, ma lagolagoina le tasi ma le isi. E tatau ona uunaia faifeautalai uma ia mulimuli i nei malupuipuiga ma e tatau ona lagona le lagolelei e fesili atu mo se fesoasoani pe a manaomia. O le atiaeina o lenei aganuu o le faatuatuaina o le a fesoasoani ia te oe ma isi faifeautalai e aloese ai mai le faaesea, fausia ma faamalosia mausa amiotonu, ma puipui ai le tasi ma le isi mai faaosoosoga.

A o e taumafai e fausia ni mausa amiotonu, ia saili atu le fesoasoani mai isi faifeautalai ma ia saunia e fesoasoani atu i faifeautalai e siomia oe. I le avea ai o se soa ma o se itu, ia tasi i le puipuiga ma le faamalosia o le tasi ma le isi: “Ma afai e i ai … tagata i totonu o outou ua malosi i le Agaga, ia tuu atu ia te [i latou] [latou] te ave faatasi ma [i latou ē] [ua] vaivai, ina ia faagaeetiaina [ē ua vaivai] i le agamalu atoa, ina ia faamalosia foi [i latou]” (Mataupu Faavae & Feagaiga 84:106). Ia manatua foi, ia tasi ma le Alii ma ia faalagolago ia te Ia i au taumafaiga uma e mulimuli i malupuipuiga.

Talanoa ma lau soa ma tagata o lau itu pe afai e te le mautinoa pe o e faaaoga sese le tekinolosi pe leai. Afai e i ai soo se pogai e te manatu ua faaosoosoina ai oe, talosaga atu i lau soa po o le taitai o le misiona mo se fesoasoani. Ia manatua, e toetoe lava o luitau uma e fesootai ma le initoneti po o ma ponokalafi, e tupu i le faaesea. O le mea lea, e le tatau ai ona faaaoga lau masini pe a tuua na o oe. O le taiala lenei, ua aofia ai lou le alu i le faletaele ma ave lau masini, ma le le faaaogaina o lau masini ao i ai lau soa i le faletaele. Ia faataga lau soa ma isi faifeautalai e fesoasoani atu ina ia e iloa tulaga e te ono manaomia ai le fesoasoani. O le fesoasoania’i i le tasi ma le isi, o se faiga lelei lea e faateleina ai lou malosi faaleagaga, ma o se avanoa e faaali atu ai lou alofa.

Talu ai o nei fegalegaleaiga i le va o faifeautalai e ono le lagolelei pe faigata, ia manatua ia mataupu faavae nei, a o e saili e fesoasoani atu i isi faifeautalai pe sailia le fesoasoani mai isi faifeautalai:

“O soa … e faamalosi e le tasi le isi i taimi o faigata. E mafai ona latou tuuina atu le puipuiga mai tulaga faaletino e lamatia ai, tuuaiga sese, ma faaosoosoga. Alofa ma faaaloalo i au soa” (Tusitaulima a Faifeautalai [2006], 33).
Ia mafaufau i taimi uma i faamoemoega sili ona lelei. Mo se faataitaiga, afai e le o mulimuli lau soa i se tasi o malupuipuiga, ia mafaufau e faapea, na te le o iloa e le o mulimuli ai. Ia aua le manatu e faapea, o loo ia le usitaia ma le iloa lelei ia tulafono.
Aua le talanoa ma isi faifeautalai i au solitulafono ua mavae. O le aapa atu i isi mo le fesoasoani, e le faapea o lona uiga, o le faasoa atu o aafiaga mai lou olaga ua tuanai pe faamatala foi pe aisea e ono osofaia ai oe. Talanoa nao oulua ma le peresitene o le misiona pe afai o i ai ni au fesili e uiga i le agavaa. Ia manatua, “E muamua lou faamaoni i le Alii, sosoo ai ma lou peresitene o le misiona, ona sosoo ai lea ma lau soa” (Tusitaulima a Faifeautalai, 35).
Afai e te iloa pe vaaitino i se mea patino e uiga i se isi faifeautalai, ia tausisia i taimi uma le le faalauaiteleina ma aua le feaveai tala i isi e uiga i lena faifeautalai. Tau lava o le faaali atu o le alofa ma le lagolago i le faifeautalai o loo tauivi, ma aua le fai atua ni fesili fiailoa. “O faifeautalai uma lava—ae maise lava i [taitai o le misiona] ma i latou e i le ofisa o le [misiona]—e tatau ona tausisia le le faalauaiteleina e ala i le le talanoa atu i isi e uiga i mataupu faalilolilo” (Tusitaulima a le Peresitene o le Misiona [2006], 20).
Afai e foliga mai e le o mulimuli nisi o faifeautalai i malupuipuiga, ia talanoa atu ia i latou i se auala e le taufaamatau ma lē faamasino atu. I se ala agalelei ma le loto malamalama, fai atu fesili e pei o le, “E mafai ona e fesoasoani mai ina ia ou malamalama i le pogai na e faia ai lena mea?” Ona fai faatasi lea o se fuafuaga. Fesili atu, “O le a sou manatu i se mea e tatau ona ta faia?” ma le “E mafai faapefea ona ta fesoasoani i le tasi ma le isi?”
Mulimuli i le faagasologa i le itulau e 15 o le taiala lenei: (1) ia nofouta ma faailoa atu, (2) filifili e faatino, ma (3) aoao ma faaleleia.
Afai e tauivi se faifeautalai e mulimuli i nei malupuipuiga, ia faaaafia ai le peresitene o le misiona po o se isi taitai e tatau ai o le misiona. Saili fautuaga i auala e sili ona lelei e mafai ona e fesoasoani ai i le faifeautalai o loo tauivi.
O faifeautalai o loo tauivi ma le faaaoga sese o le tekinolosi, e masani lava ua uma ona latou iloa o le mea o loo latou faia e sese. Pe a latou aapa atu mo se fesoasoani, latou te mananao e lagona le agaalofa, lagolago, alofa, ae le o le faalumaina po o le ta’usalaina. Ia tali atu ma le faato’ato’a, ma saili i taimi uma le taitaiga a le Agaga.
Galulue ma lau soa ma le itu ia malilie i ni auala e lagolago ai e le tasi le isi. Afai ua faasolo fai ifo ou mausa, ia talanoa ma lau soa po o se taitai o le misiona. Faatasi ai ma la laua fesoasoani e mafai ai ona e:
- Faia se fuafuaga fou.
- Faatulaga ni malupuipuiga faaopoopo.
- Talosaga atu ia i laua e fesoasoani atu ina ia e tali atu mo oe lava.
- Iloilo soo se tulaga e tatau ona e suia e fesoasoani ai ia tumau lou taulai atu i lou faamoemoega.

Ia galulue faatasi i le lotogatasi o se soa i soo se taimi e faaaoga ai au masini feaveai.

Ia manatua, ua i ai le talitonuga o le Alii ia te oe ma i faifeautalai taitoatasi ua Ia valaauina. Ua Ia tuuina atu ni soa ma taitai e puipui ma lagolago atu ia te oe. Ua Ia silafia luitau o feagai ma oe, ma ua Ia saunia e fesoasoani atu a o e fesoasoani ia te Ia i lenei galuega tele. O le tasi i le avea ai o ni faifeautalai o le a le gata ina siitia ai le galuega; ae o le a saunia ai oe mo tiutetauave o lou aiga ma le Ekalesia i le maea ai o lau misiona.

Ata

tamaitai faifeautalai e toalua o loo faaaoga ni komepiuta e i luga o kesi.