Faatomuaga

Mai lava i le amataga, na faaaoga ai e le Atua meafaigaluega faalelagi e faalautele ai Ana faamoemoega. Mo se faataitaiga, o le Urima ma le Tumema na fesoasoani i le faaliliuga o le afioga a le Atua, ae o le Liahona na tuuina atu ai ia Liae ma lona aiga le taitaiga a o latou malaga atu i le laueleele folafolaina. E faatatau i meafaigaluega faalelagi i o tatou aso, na folafola mai ai e Peresitene Spencer W. Kimball, “Ou te talitonu o loo naunau le Alii e tuu mai i o tatou lima ni fatufatuaiga faaonaponei ia e le i mafaufauina e i tatou o tagata faatauvaa” (“When the World Will Be Converted,” Ensign, Oct. 1974, 10). Talu mai le saunoaga a Peresitene Kimball, ua tele lava ni meafaigaluega faatekinolosi ua faaalia mai e faalautele ai faamoemoega a le Alii, ma ua mafai nei ona e faaaogaina nei meafaigaluega i lau galuega. Na fofoga mai e Elder L. Tom Perry: “Ua faatagaina nei faifeautalai e faaaoga le Initoneti ia latou galuega talai. … O le a faaaoga e faifeautalai komepiuta i falelotu ma isi fale o le Ekalesia” (“Missionary Work in the Digital Age” [fonotaga o aoaoga faaleautaitai i le lalolagi atoa, Iuni 2013]; lds.org/broadcasts).

Ata

Liae ma [lona] aiga ma le Liahona

O le tekinolosi lenei ua e tauaaoina ua faamoemoe e fesoasoani ia te oe i lau auaunaga i le Alii a o Ia faanatinatia Lana galuega. E ui o lenei tekinolosi ua fuafuaina e fai ai mea lelei, ae ua taumafai foi Satani e faaaoga lenei tekinolosi e faalauiloa ai le leaga ma ia taofia ai le galuega a le Alii. E taua lou aoao e faaaoga nei meafaigaluega e tusa ai ma le faamoemoega ua faapea ona fatufatuina ai i latou—e faalautele ai le galuega o le faaolataga. O lenei tamaitusi o loo i ai ni malupuipuiga o le a fesoasoani e te faaaoga ai ma le tatau ia nei meafaigaluega e faataunuu ai ou faamoemoega faafaifeautalai ma ia faalautele ai le faamoemoega a le Atua o le “aumaia le tino ola pea ma le ola faavavau o le tagata” (Mose 1:39). O nei malupuipuiga o le a tatala ai foi le faitotoa i auala musuia o le faaaogaina o le tekinolosi, o le a faapea ona faamalosia ai lou faatuatua ia Iesu Keriso ma le faatuatua o i latou e te auauna atu i ai. Latou te galulue e pei o se loka i se faitotoa o le malumalu, e taofia mea le paia mai le ulufale atu i lou mafaufau. Na aoao mai Paulo, “Tou te le iloa ea o le malumalu outou o le Atua, o loo nofo foi le Agaga o le Atua i totonu ia te outou? “ (1 Korinito 3:16). O nei malupuipuiga o le a puipuia ai oe ma fesoasoani e te aloese ai mai faamatalaga ma aafiaga leaga e faatiga i le Agaga, e aofia ai anomea le talafeagai e pei o ponokalafi. O le a latou fesoasoani foi e te aloese ai mai le faamaimau o le taimi i gaoioiga e pei o taaloga, talafou, faagatama, vitio, ma le faaaogaaga le talafeagai o ala o agafesootai. O le faaaogaina o nei mataupu faavae o le a faateleina ai lou gafatia e fesoasoani ai i isi ma o le a e manuia ai i lou olaga atoa.

Aoao e mulimuli i malupuipuiga e aunoa ma le tau mafaufau muamua. O le a fesoasoani ia te oe a o e taumafai e avea atili faapei o Keriso. “Ua uma ona faaali mai e le Faaola le ala. Ua Ia faatuina le faataitaiga atoatoa, ma ua Ia poloaiina i tatou ina ia avea e faapei o Ia (tagai 3 Nifae 27:27)”Talai La’u Talalelei: O Se Taiala mo le Galuega Faafaifeautalai [2018], 123). O filifiliga e te faia e faatatau i le auala e te faaaogaina ai le tekinolosi, e tatau ona fesoasoani e te avea atili ai e pei o le Faaola. Faalagolago i le alofa tunoa—o le fesoasoani po o le malosi e tuuina mai e ala i le Togiola a Keriso—a o e saili ia avea o se meafaigaluega tauaogaina i aao o le Alii.

I lou tulaga na’o oe, faatasi ma lau soa, ma faatasi ma isi faifeautalai, o le a e aoao ma tautino ai i e mulimuli i nei malupuipuiga. O le a e aoao ai foi i se faagasologa e fesoasoani ia te oe i taimi e te lagona ai le osofaia ma le afaina gofie. Ia iloilo soo lenei faamatalaga. Suesue, mafaufau loloto, ma faaaoga nei mataupu faavae seia oo lava ina avea ma se vaega masani o le ala e te mafaufau ma galue ai.