“Malupuipuiga 2,” Malupuipuiga mo le Faaaogaina o Tekinolosi (2015)
“Malupuipuiga 2,” Malupuipuiga mo le Faaaogaina o Tekinolosi
Malupuipuiga 2
Ia Taulai Atu i Lou Faamoemoega o se Faifeautalai
Ua fetalai mai le Alii, “Ma afai e tau-tasi o outou mata i loʼu mamalu, o le a faatumulia o outou tino atoa i le malamalama, ma o le a leai se pouliuli e ia te outou; ma o lena tino ua faatumulia i le malamalama e malamalama i mea uma” (Mataupu Faavae ma Feagaiga 88:67). O le tau-tasi o lau vaai i le mamalu o le Atua, o lona uiga, o lou taulai atoa atu i le faamoemoega a le Atua—lea ua faapena foi ona avea ma ou faamoemoega o se faifeautalai.
O mea uma e te faia—e aofia ai le ala e te faaaoga ai nei tekinolosi—e tatau ona faatutotonu i lou faamoemoega, o le “ia valaaulia isi e o mai ia Keriso e ala i le fesoasoani atu ia i latou ia maua le talalelei toefuataiina e ala i le faatuatua ia Iesu Keriso ma Lana Togiola, salamo, papatisoga, mauaina o le meaalofa o le Agaga Paia, ma tumau e oo i le iuga” (Talai La’u Talalelei,1). O lou manao e faasoa atu le talalelei o le a fesoasoani e te aloese ai mai le faalavelaveina.
Ia na o le taimi lava e manino ai ou faamoemoega e ki ai lau masini. Ao le i kiina lau masini po o le komepiuta feaveai, pe tatala ai se polokalama, ia iloilo faatasi ma lau soa le mea o le a oulua faia. Mafaufau i le tele o le taimi o le a alu ai ma auala o le a oo atu ai nei gaoioiga e fesoasoani atu i tagata e faaaoga ai le faatuatua ia Iesu Keriso, salamo, osia ma tausia feagaiga, lagona ma mulimuli i le Agaga Paia, ma tumau ai seia oo i le iuga. Mulimuli i taiala a le peresitene o lau misiona e faatatau i le, po o le fea o gaoioiga faafuainumera e talafeagai. Ua faaalia mai i mea na tutupu, e ono fetaiai tagata ma anomea le talafeagai i luga o le initoneti pe a latou folau faasamasamanoa i le uepi e aunoa ma le i ai o se faamoemoega faapitoa i le mafaufau.