“Malupuipuiga 3,” Malupuipuiga mo le Faaaogaina o Tekinolosi (2015)
“Malupuipuiga 3,” Malupuipuiga mo le Faaaogaina o Tekinolosi
Malupuipuiga 3
Ia Lotopulea
I le 2 Nifae 2:26, o loo aoao mai ai Liae, “Ma ona ua togiolaina i latou mai le paʼū ua saoloto ai [le fanauga a tagata] e faavavau i le iloa o le lelei mai le leaga; e fai mo i latou lava ae lē faamalosia.” Faaaoga lou faitalia e pulea ai lou loto ma fai filifiliga amiotonu e faatatau i le auala e te faaaoga ai le tekinolosi. E faatatau i le fesootaiga i le va o le faitalia ma le lotopulea, na saunoa mai ai Elder D. Todd Christofferson, “O le amio pulea i mea lelei o le faaaogaina pea lava pea o le faitalia e filifili ai le mea sa’o ona e sa’o, e tusa lava pe e faigata” (“Amio Pulea,” Ensign po o le Liahona, Nov. 2009, 105). Ona o le malosi tele o le sootaga o le lotopulea i le faitalia, ia faia se taumafaiga malamalama lelei e filifili ina ia lotopulea a o e faaaogaina masini feaveai i lau galuega faafaifeautalai.
Atiina ae le lotopulea e faaaoga lau masini feaveai i na o taimi lava e talafeagai ai ona faaaoga. Pe a outou talanoa faafesagai ma ni tagata, aua le siakia au feaufeaveai pe tali ni valaau atu. Ia e pulea le ala e te faaaogaina ai nei meafaigaluega. Aua nei e tuua i latou e pulea oe. Atonu e te iloa ni tagata o e ua fai ma vaisu a latou masini feaveai. E foliga mai latou te le iloa le siosiomaga faaagafesootai o loo siomia ai latou, a o latou auina atu ma siaki ia tesi, taalo i taaloga vitio, pe fai isi gaoioiga i a latou masini.
I le avea ai ma se faifeautalai, aua nei faalavelaveina oe e au masini feaveai. Na aoao mai Peresitene M. Russell Ballard: “O masini e uu i lima, e pei o telefonipoto, o se faamanuiaga, ae e mafai foi ona latou faalavelave ia i tatou mai le lagonaina o le ‘leo malu, itiiti.’ E tatau ona avea i latou ma ni a tatou auauna, ae le o ni o tatou matai” (“Be Still, and Know That I Am God” [faigalotu a le Ofisa o Aoga a le Ekalesia, 4 Me, 2014]; lds.org/broadcasts).