“Malupuipuiga 1,” Malupuipuiga mo le Faaaogaina o Tekinolosi (2015)
“Malupuipuiga 1,” Malupuipuiga mo le Faaaogaina o Tekinolosi
Malupuipuiga 1
Ia Ogatusa ma Uunaiga Faaleagaga
O loo folafola mai e Nifae i le 2 Nifae 32:5, “Afai tou te ulu atu i le ala, ma maua le Agaga Paia, o le a faaali mai e ia ia te outou mea uma e tatau ona outou faia.” O le faaaoga ma le amiotonu o lou faitalia i lalo o le taitaiga a le Agaga Paia, o au auala sili ia ona lelei mo le faia o mea lelei a o faaaoga ai le tekinolosi, ma o le a avea ma au puipuiga sili ona lelei e faasagatau atu ai i le leaga.
O polokalama ua tuuina atu i luga o lau masini feaveai ua i ai faamama ua mamanuina ia puipuia ai oe mai anomea le talafeagai. Ae peitai, e oo lava i faamama aupito sili ona malolosi, e le mafai ona puipuia ai oe i le 100 pasene o le taimi. O lau faamama sili ona lelei o loo i ai, o lou lava lea loto ma le naunau e fai filifiliga sao. Na saunoa mai Elder David F. Evans: “Na pau lava le faamama e aoga moni mo le faaaogaina o tekinolosi i le olaga atoa, o le loto ma le mafaufau lea o le tagata talavou lava ia. … Matou te matuai faatuatua lava … e faitau afe [faifeautalai o le a] atiaeina ni mausa i masini faafuainumera e aoga i le olaga atoa, o le a faapea ona manuia ai e faavavau o latou olaga ma o latou aiga” (“Elder David F. Evans Discusses Expanded Missionary Efforts,” mormonnewsroom.org). E tatau ona manatu mamafa faifeautalai i le tiutetauave o le taumafai pea ia “faamama o [latou] loto” (Mataupu Faavae ma Feagaiga 88:74).
Ua tuuina atu e lou Tama Faalelagi ia te oe ni meaalofa e sili ona faapitoa ma mamana o le a faapea ona fesoasoani ia te oe: o lou faitalia e fai ai mea lelei ma le meaalofa o le Agaga Paia. Ua ta’u mai e le Alii Lona finagalo: “ina ia mafai e tagata taitoatasi ona faia e tusa ma mataupu faavae ma mataupu autu e faatatau i le lumanai, e tusa ma le faitalia ua ou tuu atu ia te ia, ina ia mafai e tagata taitoatasi ona tali mo ana lava agasala i le aso o le faamasinoga” (Mataupu Faavae ma Feagaiga 101:78). Na aoao mai Peresitene Boyd K. Packer, “E leai se tagata o lenei Ekalesia—o lona uiga o outou taitoatasi—o le a faia se measese matuia e aunoa ma le muai lapataiina e uunaiga a le Agaga Paia” (“How to Survive in Enemy Territory,” New Era, Ape. 2012, 3).