សេចក្ដីផ្ដើម
ក្នុងនាមជាអ្នកផ្សព្វផ្សាយសាសនាម្នាក់ អ្នកត្រូវបានហៅឲ្យធ្វើជាតំណាងឲ្យព្រះយេស៊ូវគ្រីស្ទនៅក្នុងការបម្រើទៅដល់កូនចៅរបស់ព្រះវរបិតាសួគ៌ ។ព្រះអង្គសង្គ្រោះស្រឡាញ់អ្នក ហើយទ្រង់នឹងជួយអ្នកឲ្យទទួលបានជោគជ័យ ។ ទ្រង់បានសន្យាថា ៖ « យើងនឹងទៅពីមុខអ្នក ។ យើងនឹងនៅខាងស្ដាំដៃអ្នក ហើយខាងឆ្វេងដៃអ្នក ហើយព្រះវិញ្ញាណរបស់យើងនឹងសណ្ឋិតនៅក្នុងដួងចិត្តរបស់អ្នក ហើយពួកទេវតារបស់យើងនឹងនៅទ័ព្ធជុំវិញអ្នក ដើម្បីទ្រអ្នកឡើង » ( គ. និង ស. 84:88 ) ។
នៅពេលអ្នកអនុវត្តសេចក្ដីជំនឿរបស់អ្នក ហើយធ្វើតាមការសម្រេចចិត្តដែលអ្នកមានដើម្បីធ្វើកិច្ចការរបស់ព្រះអម្ចាស់ នោះអ្នកនឹងអភិវឌ្ឍនូវជំនាញ អំណោយទាន និងកម្លាំងដែលអ្នកត្រូវការបានកាន់តែឆាប់រហ័ស ។ អ្នកនឹងទទួលអារម្មណ៍ថាមានជំនួយពីទ្រង់ ហើយកើននូវទំនុកចិត្តនៅក្នុងសមត្ថភាពរបស់អ្នកដើម្បីបម្រើដល់ព្រះអម្ចាស់ ។
សូម្បីតែមានការសន្យាមួយពីជំនួយរបស់ព្រះអម្ចាស់ក្ដី ក៏មានពួកអ្នកផ្សព្វផ្សាយសាសនាដ៏អស្ចារ្យជាច្រើននៅក្នុងប្រវត្តិសាស្ត្របានកត់ត្រាថា ពួកគាត់បានរងទុក្ខ ហើយបានមានការលំបាកនៅក្នុងការងារជាអ្នកផ្សព្វផ្សាយសាសនារបស់ពួកគាត់ដែរ ។ អាម៉ូន និង បងប្អូនប្រុសរបស់គាត់ « [ បាន ] រងទុក្ខជាច្រើន ទាំងផ្លូវកាយ និងផ្លូវចិត្ត ដូចជាការអត់ឃ្លាន ការស្រេក និងការនឿយហត់ ព្រមទាំងការនឿយហត់ខាងផ្លូវវិញ្ញាណផង » ( អាលម៉ា 17:5 ) ។ ពេលខ្លះ ពួកគាត់ពិតជាចង់ត្រលប់ទៅផ្ទះវិញមែន ។ « ឥឡូវនេះ កាលណាយើងនឿយណាយក្នុងចិត្ត ហើយយើងសឹងតែត្រលប់ទៅវិញ មើលចុះ ព្រះអម្ចាស់ ទ្រង់បានកម្សាន្តចិត្តយើង ហើយមានព្រះបន្ទូលថា ៖ ចូរទៅក្នុងចំណោមបងប្អូនអ្នក គឺពួកសាសន៍លេមិន ហើយចូរទ្រាំដោយសេចក្ដីអត់ធ្មត់នូវការទុក្ខវេទនាទាំងឡាយរបស់អ្នកចុះ ហើយយើងនឹងប្រទានដល់អ្នកនូវជ័យជំនះ » ( អាលម៉ា 26:27 ) ។
អាថ៌កំបាំងភាគច្រើនដើម្បីប្រឈមមុខនឹងការបាក់ទឹកចិត្ត និង ភាពតានតឹងដែលជារឿងទូទៅសម្រាប់ការបម្រើជាអ្នកផ្សព្វផ្សាយសាសនាគឺដើម្បីរំឭកឡើងវិញជាមួយនឹងព្រះអម្ចាស់នូវការសម្រេចចិត្តរបស់អ្នកដើម្បីបម្រើ ។ ប្រធាន ហ្គរដុន ប៊ី ហ៊ិងគ្លី ប្រាប់ពីបទពិសោធន៍របស់លោក នៅពេលលោកចាប់ផ្ដើមបេសកកម្មរបស់លោកដំបូងនៅក្នុងប្រទេសអង់គ្លេស ។
« នៅពេលខ្ញុំទៅដល់ ខ្ញុំមានអារម្មណ៍មិនស្រួលនៅក្នុងខ្លួនសោះ ។ ដោយសារតែជំងឺ និង វិបត្តិដែលយើងមាន នៅប៉ុន្មានសប្ដាហ៍ដំបូង នោះខ្ញុំបានបាក់ទឹកចិត្ត ។ ខ្ញុំបានសរសេរសំបុត្រមួយទៅកាន់ឪពុកដ៏ល្អរបស់ខ្ញុំ ហើយបាននិយាយថា ខ្ញុំមានអារម្មណ៍ថា ខ្ញុំកំពុងតែខ្ជះខ្ជាលពេលវេលារបស់ខ្ញុំ និង ប្រាក់របស់គាត់ ។ គាត់ជាឪពុករបស់ខ្ញុំ និង ជាប្រធានស្តេករបស់ខ្ញុំ ហើយគាត់ជាបុរសម្នាក់ដ៏ឈ្លាសវៃ ហើយបំផុសគំនិត ។ គាត់បានសរសេរសំបុត្រយ៉ាងខ្លីមួយមកឲ្យខ្ញុំថា ‹ កូន ហ្គរដុន មាសឪពុក ឪពុកទើបបានទទួលសំបុត្ររបស់កូន ។ ឪពុកមានយោបល់តែមួយគត់គឺ ៖ បំភ្លេចពីខ្លួនឯង ហើយទៅធ្វើការចុះ › ។ នៅព្រឹកព្រលឹមនាថ្ងៃនោះ នៅក្នុងការសិក្សាព្រះគម្ពីររបស់យើង ដៃគូរបស់ខ្ញុំ និង ខ្ញុំបានអាននូវព្រះបន្ទូលរបស់ព្រះអម្ចាស់ទាំងនេះថា ៖ ‹ ត្បិតអ្នកណាដែលចង់ឲ្យរួចជីវិត នោះនឹងបាត់ជីវិតទៅ តែអ្នកណាដែលបាត់ជីវិតដោយព្រោះយល់ដល់ខ្ញុំ ហើយនិងដំណឹងល្អ នោះនឹងបានជីវិតវិញ › ។ ( ម៉ាកុស 8:35 ) ។
« ព្រះបន្ទូលទាំងនោះរបស់លោកចៅហ្វាយ រួមជាមួយនឹងសំបុត្ររបស់ឪពុកខ្ញុំដែលមាននូវពាក្យទូន្មានរបស់គាត់ឲ្យខ្ញុំបំភ្លេចខ្លួនឯង ហើយទៅធ្វើការ បានចាក់ចូលទៅក្នុងដួងចិត្ត និងគំនិតរបស់ខ្ញុំ ។ ដោយកាន់សំបុត្ររបស់ឪពុកខ្ញុំនៅក្នុងដៃ នោះខ្ញុំបានចូលទៅក្នុងបន្ទប់ដេករបស់យើងនៅផ្ទះលេខ 15 ផ្លូវវ៉ាដហែម ជាទីកន្លែងដែលយើងរស់នៅ ហើយបានលត់ជង្គង់ចុះ ហើយបានធ្វើការទូលអង្វរមួយទៅកាន់ព្រះអម្ចាស់ ។ ខ្ញុំបានធ្វើសេចក្ដីសញ្ញាថា ខ្ញុំនឹងព្យាយាមបំភ្លេចខ្លួនឯង ហើយលះបង់ខ្លួននៅក្នុងការបម្រើរបស់ទ្រង់ ។
« ថ្ងៃនោះដែលស្ថិតក្នុងខែ កក្កដា ឆ្នាំ 1933 គឺជាថ្ងៃនៃការសម្រេចចិត្តរបស់ខ្ញុំ ។ ពន្លឺថ្មីមួយបានចូលមកក្នុងជីវិតរបស់ខ្ញុំ ហើយសេចក្ដីអំណរមួយបានចូលមកក្នុងដួងចិត្តរបស់ខ្ញុំ ។ អ័ព្ទនៃប្រទេសអង់គ្លេសហាក់ដូចជាត្រូវបានរសាយបាត់ ហើយខ្ញុំបានមើលឃើញនូវពន្លឺព្រះអាទិត្យ ។ ខ្ញុំបានមាននូវបទពិសោធន៍ក្នុងបេសកកម្មមួយដ៏ល្អ ហើយអស្ចារ្យ ដែលខ្ញុំនឹងមានអំណរគុណជារៀងរហូត » ( « Taking the Gospel to Britain: A Declaration of Vision, Faith, Courage, and Truth » Ensign ខែ កក្កដា ឆ្នាំ 1987 ទំព័រ 7) ។
ប្រធាន ហ៊ិងគ្លី បានរកឃើញភាពជោគជ័យនៅក្នុងការប្រឈមមុខជាមួយនឹងការបាក់ទឹកចិត្តរបស់លោក នៅពេលលោកបានសម្រេចចិត្តរបស់លោកជាថ្មីដើម្បីបម្រើដល់ព្រះអម្ចាស់ ។ ក្រោយមក លោកបានមានប្រសាសន៍ថា « ដំណោះស្រាយដ៏ល្អបំផុតចំពោះការព្រួយបារម្ភដែលខ្ញុំដឹងគឺការធ្វើការ ។ ថ្នាំដ៏ល្អបំផុតសម្រាប់ភាពអស់សង្ឃឹមគឺការបម្រើ ។ ការព្យាបាលដ៏ល្អបំផុតសម្រាប់ភាពព្រួយបារម្ភគឺការខិតខំជួយដល់មនុស្សម្នាក់ដែលនឿយហត់ជាងនោះទៅទៀត » ( « >Words of the Prophet: Put Your Shoulder to the Wheel » New Era ខែ កក្កដា ឆ្នាំ 2000 ទំព័រ 7 ) ។
ការប្រើប្រាស់កូនសៀវភៅនេះ
កិច្ចការអ្នកផ្សព្វផ្សាយសាសនាអាចជារឿងដ៏អំណរ និងពោរពេញដោយភាពតានតឹង ។ កូនសៀវភៅនេះនឹងជួយយល់ដឹងកាន់តែប្រសើរពីភាពតានតឹង និង ពីរបៀបដែលវាជះឥទ្ធិពលលើអ្នក ប៉ុន្តែវាពុំមែនមានន័យថាត្រូវអានគ្រប់ផ្នែកក្នុងពេលតែមួយនោះទេ ។ ការប្រើសេចក្ដីណែនាំដែលមាននៅទំព័រទី 1 នោះអ្នកនឹងត្រូវបានដឹកនាំទៅរកសេចក្ដីណែនាំនានាស្ដីពីប្រធានដែលអ្នកជ្រើសរើស ។ គំនិតទាំងនេះក៏នឹងជួយដល់អ្នកផងដែរ នៅពេលអ្នកបម្រើដល់ដៃគូរបស់អ្នក និងពួកអ្នកផ្សព្វផ្សាយផ្សេងទៀត ។