« ការធ្វើឲ្យព្រះអម្ចាស់មានចំណែកនៅក្នុងការរៀនសូត្ររបស់អ្នក ៖ ព្រះអម្ចាស់នឹងតម្កើង ហើយពង្រឹងកិច្ចខិតខំប្រឹងប្រែងរបស់អ្នក » សៀវភៅសិក្សាព្រះគម្ពីរសញ្ញាចាស់សម្រាប់គ្រូបង្រៀនថ្នាក់សិក្ខាសាលា ( ឆ្នាំ២០២៦ )
« ការធ្វើឲ្យព្រះអម្ចាស់មានចំណែកនៅក្នុងការរៀនសូត្ររបស់អ្នក ៖ ព្រះអម្ចាស់នឹងតម្កើង ហើយពង្រឹងកិច្ចខិតខំប្រឹងប្រែងរបស់អ្នក » សៀវភៅសិក្សាព្រះគម្ពីរសញ្ញាចាស់សម្រាប់គ្រូបង្រៀនថ្នាក់សិក្ខាសាលា
ជោគជ័យនៅក្នុងសាលា ៖ មេរៀនទី ១៩២
ការធ្វើឲ្យព្រះអម្ចាស់មានចំណែកនៅក្នុងការរៀនសូត្ររបស់អ្នក
ព្រះអម្ចាស់នឹងតម្កើង ហើយពង្រឹងកិច្ចខិតខំប្រឹងប្រែងរបស់អ្នក
នៅក្នុងការសិក្សារបស់យើង យើងនឹងប្រឈមមុខនឹងឧបសគ្គ នៅពេលដែលយើងខិតខំដើម្បីបង្កើនចំណេះដឹង និងការយល់ដឹងរបស់យើងអំពីសេចក្តីពិត ។ យើងមិនចាំបាច់ប្រឈមមុខនឹងបញ្ហាទាំងនេះតែម្នាក់ឯងទេ ។ ព្រះវរបិតាសួគ៌ និងព្រះយេស៊ូវគ្រីស្ទ យកព្រះទ័យទុកដាក់អំពីយើង និងការរីកចម្រើនរបស់យើង ហើយទ្រង់ទាំងទ្វេចង់ជួយយើងជាមួយនឹងការខិតខំប្រឹងប្រែងរបស់យើងនៅក្នុងសាលា ។ មេរៀននេះអាចជួយសិស្សឲ្យរួមបញ្ចូលព្រះអម្ចាស់នៅក្នុងការរៀនសូត្ររបស់ពួកគេ ។
ការរៀបចំសិស្ស ៖ អញ្ជើញសិស្សឲ្យជញ្ជឹងគិតពីរបៀបដែលពួកគេបានឃើញព្រះអម្ចាស់ជួយពួកគេ ឬនរណាម្នាក់ដែលពួកគេស្គាល់រៀននៅសាលា ។ ពួកគេអាចរៀបចំដើម្បីចែកចាយបទពិសោធន៍នេះជាមួយសិស្សក្នុងថ្នាក់ ។
សកម្មភាពរៀនសូត្រដែលអាចមាន
បញ្ហាប្រឈមនៅសាលារៀន
សូមពិចារណាចាប់ផ្តើមមេរៀននេះ ដោយការអញ្ជើញសិស្សម្នាក់ឲ្យមកខាងមុខថ្នាក់ដើម្បីបំពេញកិច្ចការដែលទាមទារឲ្យមានជំនួយពីអ្នកដទៃ ។ ឧទាហរណ៍ សូមបិទភ្នែកសិស្ស ហើយស្នើឲ្យពួកគេតម្រៀបស្ករគ្រាប់ ឬអង្កាំតាមពណ៌ ។ ប្រសិនបើសិស្សពិបាកនៅពេលដំបូង អ្នកអាចសួរសំណួរមួយចំនួនដូចជា « តើអ្នកដទៃក្នុងបន្ទប់អាចជួយអ្នកដោយរបៀបណា ? »
-
តើការបង្ហាញនេះអាចប្រដូចទៅនឹងកិច្ចខិតខំរបស់យើងដើម្បីរៀននៅសាលាដោយរបៀបណា ?
-
តើមានស្ថានភាពអ្វីខ្លះនៅក្នុងសាលា ឬជាមួយនឹងការសិក្សាដែលអាចជាការលំបាកសម្រាប់ក្មេងជំទង់ ?
ចម្លើយរបស់សិស្សអាចរួមបញ្ចូលនូវរឿងមួយចំនួនដូចជា ការពិបាកជាមួយនឹងមុខវិជ្ជាជាក់លាក់ណាមួយនៅក្នុងសាលា បញ្ហាប្រឈមក្នុងការរៀនសូត្រ ឬបញ្ហាក្នុងការគ្រប់គ្រងពេលវេលា ។ អ្នកអាចសរសេរចម្លើយទាំងនេះនៅលើក្ដារខៀន ។ អ្នកអាចលើកទឹកចិត្តសិស្សឲ្យសរសេរបញ្ហាប្រឈមមួយដែលពួកគេកំពុងប្រឈមមុខនៅក្នុងការរៀនសូត្ររបស់ពួកគេ ។ បញ្ជីនេះនឹងមានប្រយោជន៍ដើម្បីយោងនៅពេញមួយមេរៀននេះ ។
ព្រះអម្ចាស់ប្រទានពរដល់ការខិតខំប្រឹងប្រែងដ៏សុចរិតរបស់យើង
សូមអានសេចក្ដីថ្លែងការណ៍ខាងក្រោមពី អែលឌើរ ក្លាក ជី ហ្គីលប៊ឺត នៃពួកចិតសិបនាក់ ដោយរកមើលកន្លែងដែលយើងអាចបែរទៅរកជំនួយជាមួយនឹងបញ្ហាប្រឈមនានានៅក្នុងកិច្ចខិតខំប្រឹងប្រែងរបស់យើងដើម្បីរៀននៅសាលា ។
ខ្ញុំដឹងថា ការស្វែងរកការអប់រំរបស់អ្នកអាចមានការលំបាក ហើយទាមទារឲ្យមានការលះបង់ ។ ខ្ញុំដឹងថា អ្នកកំពុងខិតខំខ្លាំងណាស់ ហើយថាមានយប់ដ៏លំបាកជាច្រើន ពេលអ្នកត្រូវនៅដល់យប់ជ្រៅដើម្បីបញ្ចប់កិច្ចការសាលា រៀនគំនិតថ្មី និងគ្រប់គ្រងការប្តេជ្ញាចិត្តដ៏សំខាន់ផ្សេងទៀតក្នុងជីវិតរបស់អ្នក ។ ប៉ុន្តែសូមកុំទាន់ចុះចាញ់ ។ សូមបន្តបង្ហាញភាពរឹងមាំដ៏ពិតប្រាកដ ។ ប៉ុន្តែក៏ត្រូវត្រៀមខ្លួនដើម្បីផ្លាស់ទីពីភាពរឹងមាំទៅរកព្រះគុណផងដែរ ។ សូមទុកចិត្តលើព្រះអម្ចាស់ ។ អធិស្ឋានសូមជំនួយពីទ្រង់ ហើយទ្រង់នឹងពង្រីកកិច្ចខិតខំរបស់អ្នក ។ សូមដឹងថាយើងស្រឡាញ់អ្នកប៉ុនណា ។ សំខាន់ជាងនេះទៅទៀត សូមដឹងថាព្រះអម្ចាស់ស្រឡាញ់អ្នកប៉ុនណា ហើយនឹងពង្រឹងអ្នកនៅក្នុងការខិតខំប្រឹងប្រែងដ៏សុចរិតរបស់អ្នកទាំងអស់ដើម្បីរៀនសូត្រ និងរីកចម្រើន ហើយក្លាយកាន់តែដូចទ្រង់ ។ ( « From Grit to Grace » [ BYU–Pathway Worldwide devotional ថ្ងៃទី២៥ ខែកញ្ញា ឆ្នាំ២០១៨ ] ទំព័រ ២ byupathway.edu )
-
តើអ្នកបានរកឃើញអ្វីដែលនាំឲ្យអ្នកមានសេចក្ដីសង្ឃឹម ឬអាចលើកទឹកចិត្តក្មេងជំទង់នៅក្នុងការរៀនសូត្ររបស់ពួកគេ ?
នៅពេលសិស្សចែកចាយ សូមជួយពួកគេឲ្យសម្គាល់គោលការណ៍មួយដូចជា នៅពេលយើងរួមបញ្ចូលព្រះអម្ចាស់នៅក្នុងការរៀនសូត្ររបស់យើង ទ្រង់នឹងតម្កើង ហើយពង្រឹងកិច្ចខិតខំប្រឹងប្រែងរបស់យើង ។
-
តើព្រះអម្ចាស់អាចប្រទានពរ តម្កើង ឬពង្រឹងកិច្ចខិតខំប្រឹងប្រែងរបស់យើង នៅពេលយើងរួមបញ្ចូលទ្រង់នៅក្នុងការរៀនសូត្ររបស់យើងបានយ៉ាងដូចម្ដេច ?
សិស្សអាចលើកឡើងអំពីការណ៍ទាំងឡាយដូចជា របៀបដែលព្រះអម្ចាស់អាចជួយពួកគេចងចាំអ្វីដែលពួកគេបានសិក្សា មានភាពអត់ធ្មត់ជាមួយគ្រូ និងមិត្តរួមថ្នាក់ ឬមានអារម្មណ៍សុខសាន្តអំឡុងពេលប្រឡង ។ អ្នកអាចពន្យល់ថា ជាញឹកញាប់ព្រះអម្ចាស់នឹងជួយយើងរៀនតាមរយៈព្រះវិញ្ញាណបរិសុទ្ធ ដែលអាចបំពេញដល់យើងនូវភាពសុខសាន្ត ជួយយើងឲ្យស្គាល់សេចក្តីពិត និងបំភ្លឺចិត្តរបស់យើង ( សូមមើល រ៉ូម ១៥:១៣; មរ៉ូណៃ ១០:៥; គោលលទ្ធិ និងសេចក្ដីសញ្ញា ៦:១៥ ) ។
របៀបដើម្បីឲ្យព្រះអម្ចាស់មានចំណែកនៅក្នុងការរៀនសូត្ររបស់អ្នក
ដើម្បីជួយសិស្សគិតអំពីរបៀបផ្សេងៗដែលយើងអាចរួមបញ្ចូលព្រះអម្ចាស់នៅក្នុងការរៀនសូត្ររបស់យើងនៅសាលា អ្នកអាចផ្តល់ដល់ពួកគេនូវឧទាហរណ៍ចេញពីព្រះគម្ពីរ ។ របៀបមួយដើម្បីធ្វើបែបនេះគឺដោយប្រើសំណៅមេរៀន « ការធ្វើឲ្យព្រះអម្ចាស់មានចំណែកនៅក្នុងការរៀនសូត្ររបស់យើង » ។ អ្នកអាចរៀបចំសិស្សជាក្រុមតូចៗ ហើយចាត់តាំងផ្នែកនៅក្នុងសំណៅមេរៀនដល់ក្រុមនីមួយៗ ។ ជាជម្រើសផ្សេងទៀត សិស្សអាចជ្រើសរើសផ្នែកមួយនៃសំណៅមេរៀនដើម្បីសិក្សា និងធ្វើការជាមួយសិស្សផ្សេងទៀតដែលបានជ្រើសរើសផ្នែកដូចគ្នា ។
បន្ទាប់ពីសិស្សបានបញ្ចប់កិច្ចការនៅលើសំណៅមេរៀនហើយ សូមពិចារណាអញ្ជើញពួកគេឲ្យជ្រើសរើសអ្នកតំណាងម្នាក់ ដើម្បីចែកចាយអ្វីដែលក្រុមបានពិភាក្សា ។
-
ផ្អែកលើអ្វីដែលអ្នកបានសិក្សា តើមានអ្វីជាក់លាក់ខ្លះដែលយើងអាចធ្វើដើម្បីឲ្យព្រះអម្ចាស់មានចំណែកនៅក្នុងការរៀនសូត្ររបស់យើងបាន ?
ប្រសិនបើសិស្សត្រូវការការណែនាំបន្ថែម អ្នកអាចចែកចាយនូវរបៀបមួយចំនួន ឬទាំងអស់ខាងក្រោមនេះជារបៀបដើម្បីរួមបញ្ចូលព្រះអម្ចាស់នៅក្នុងការរៀនសូត្ររបស់យើង ៖
-
សូមកត់សម្គាល់ ហើយមានអំណរគុណចំពោះការរីកចម្រើនតូចតាច ឬដែលមានលំនឹង ( នីហ្វៃទី២ ២៨:៣០ ) ។
-
នៅក្នុងការអធិស្ឋាន សូមទូលសុំព្រះវរបិតាសួគ៌សម្រាប់ពរជ័យជាក់លាក់ ដូចជាការមានភាពក្លាហានលើកដៃ សួរសំណួរ និងទទួលបានជំនួយបន្ថែម ( អេធើរ ២:១៨–២៣ ) ។
-
សូមស្គាល់ភាពទន់ខ្សោយរបស់អ្នក ហើយអនុវត្តសេចក្តីជំនឿលើព្រះអម្ចាស់ដើម្បីឲ្យទ្រង់នឹងជួយអ្នកយកឈ្នះលើភាពទន់ខ្សោយទាំងនោះ ( ម៉ូសេ ៦:៣១–៣៤; ម៉ូសេ ៧:១៣ ) ។
-
សូមសិក្សាកំណត់ចំណាំពីថ្នាក់រៀនជារៀងរាល់ថ្ងៃ ហើយសុំការប្រសិទ្ធពរបព្វជិតភាពមួយ ពីមុនធ្វើការប្រឡង ឬកិច្ចការសាលាសំខាន់មួយ ( គោលលទ្ធិ និងសេចក្ដីសញ្ញា ៨៨:១១៨ ) ។
សូមពិចារណាអញ្ជើញសិស្សឲ្យចែកចាយបទពិសោធន៍មួយអំពីរបៀបដែលព្រះអម្ចាស់បានតម្កើង ហើយពង្រឹងពួកគេ ឬនរណាម្នាក់ដែលពួកគេស្គាល់ នៅពេលពួកគេបានឲ្យព្រះអម្ចាស់មានចំណែកក្នុងការរៀនសូត្ររបស់ពួកគេ ។
ការធ្វើឲ្យព្រះអម្ចាស់មានចំណែកនៅក្នុងការរៀនសូត្ររបស់យើង
សូមទុកពេលដល់សិស្សដើម្បីធ្វើផែនការក្នុងការរួមបញ្ចូលព្រះអម្ចាស់ក្នុងការរៀនសូត្ររបស់ពួកគេ ។ អ្នកអាចដាក់បង្ហាញការណែនាំខាងក្រោម ហើយលើកទឹកចិត្តសិស្សឲ្យសរសេរផែនការរបស់ពួកគេនៅក្នុងសៀវភៅកំណត់ហេតុការសិក្សារបស់ពួកគេ ។
សូមគិតអំពីបញ្ហាប្រឈមដែលអ្នកកំពុងប្រឈមមុខជាមួយការរៀនសូត្រ ។ សូមបំពេញដូចតទៅនេះនៅក្នុងសៀវភៅកំណត់ហេតុការសិក្សារបស់អ្នក ។
-
តើអ្វីទៅនៅក្នុងកិច្ចការសាលារបស់អ្នកដែលអ្នកមានឆន្ទៈព្យាយាម ដើម្បីឲ្យព្រះវរបិតាសួគ៌ និងព្រះយេស៊ូវគ្រីស្ទមានចំណែក ? ត្រូវមានភាពជាក់លាក់អំពីអ្វីដែលអ្នកនឹងធ្វើ ។
អ្នកអាចសុំសិស្សដែលស្ម័គ្រចិត្ដឲ្យចែកចាយអ្វីដែលពួកគេមានទទួលការបំផុសគំនិតឲ្យធ្វើ ។ សូមពិចារណាចែកចាយសក្ខីភាពរបស់អ្នកអំពីព្រះវរបិតាសួគ៌ និងព្រះយេស៊ូវគ្រីស្ទ និងរបៀបដែលទ្រង់នឹងប្រទានពរដល់យើង នៅពេលយើងរួមបញ្ចូលទ្រង់ទាំងទ្វេនៅក្នុងការរៀនសូត្ររបស់យើង ។