« ការកត់ចំណាំបទគម្ពីរ ៖ ការកែលម្អការសិក្សារបស់យើងតាមរយៈការគូសចំណាំ ការបន្ថែមកំណត់ចំណាំ និងការភ្ជាប់នៃបទគម្ពីររបស់យើង » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា ( ឆ្នាំ២០២៦ )
« ការកត់ចំណាំបទគម្ពីរ ៖ ការកែលម្អការសិក្សារបស់យើងតាមរយៈការគូសចំណាំ ការបន្ថែមកំណត់ចំណាំ និងការភ្ជាប់នៃបទគម្ពីររបស់យើង » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា
ជំនាញសិក្សាព្រះគម្ពីរ ៖ មេរៀនទី ១៦៨
ការកត់ចំណាំបទគម្ពីរ
ការកែលម្អការសិក្សារបស់យើងតាមរយៈការគូសចំណាំ ការបន្ថែមកំណត់ចំណាំ និងការភ្ជាប់នៃបទគម្ពីររបស់យើង
ការសិក្សាព្រះគម្ពីរផ្ទាល់ខ្លួនអាចជួយយើងអភិវឌ្ឍទំនាក់ទំនងកាន់តែរឹងមាំជាមួយព្រះវរបិតាសួគ៌ និងព្រះយេស៊ូវគ្រីស្ទ ។ ការកត់ចំណាំបទគម្ពីររបស់យើង ( ការគូសចំណាំ បន្ថែមកំណត់ចំណាំ និងការភ្ជាប់ ) អាចជួយយើងឲ្យយកចិត្តទុកដាក់បន្ថែមទៀតចំពោះពាក្យដែលយើងសិក្សា ហើយជាលទ្ធផល មានអារម្មណ៍កាន់តែជិតស្និទ្ធជាមួយព្រះវរបិតាសួគ៌ និងព្រះយេស៊ូវគ្រីស្ទ ។ នៅក្នុងមេរៀននេះ សិស្សនឹងរៀនកត់ចំណាំបទគម្ពីររបស់ពួកគេតាមវិធីដែលអាចជួយពួកគេឲ្យមានអារម្មណ៍កាន់តែជិតស្និទ្ធនឹងព្រះវរបិតាសួគ៌ និងព្រះយេស៊ូវគ្រីស្ទ ។
ការរៀបចំសិស្ស ៖ អញ្ជើញសិស្សឲ្យសួរមនុស្សពីរបីនាក់នៅក្នុងគ្រួសារ វួដ ឬសាខារបស់ពួកគេអំពីអ្វីដែលពួកគេបានរកឃើញថាមានប្រយោជន៍នៅពេលគូសចំណាំបទគម្ពីរ ។ សិស្សគួរតែមករៀនដោយរៀបចំខ្លួនដើម្បីចែកចាយអ្វីដែលពួកគេបានរៀន ។
សកម្មភាពរៀនសូត្រដែលអាចមាន
ការចូលទៅកាន់ព្រះគម្ពីរ
ដើម្បីចាប់ផ្តើមថ្នាក់ សូមពិចារណាដាក់បង្ហាញ ឬគូររូបភាពយុវជនម្នាក់ពីសម័យព្រះគម្ពីរសញ្ញាចាស់ ដូចតទៅនេះ ។ សូមប្រាប់សិស្សថា នេះគឺជាក្មេងវ័យជំទង់របស់ពួកសាសន៍អ៊ីស្រាអែលពីឆ្នាំ ៦០០ ម.គ.ស. ឈ្មោះយ៉ាកុប ។ សូមអញ្ជើញសិស្សឲ្យស្រមៃថា ពួកគេកំពុងសម្ភាសជាមួយយ៉ាកុប ។ សូមអញ្ជើញសិស្សឲ្យពិភាក្សាជាមួយដៃគូ ឬក្រុមតូចពីរបៀបដែលពួកគេគិតថាយ៉ាកុបអាចឆ្លើយទៅនឹងសំណួរបីដូចខាងក្រោម ។
-
តើព្រះគម្ពីរត្រូវបានបង្កើតឡើងនៅសម័យរបស់អ្នកយ៉ាងដូចម្ដេច ?
-
តើអ្នកត្រូវធ្វើអ្វីខ្លះដើម្បីរៀនចេញពីព្រះគម្ពីរ ?
-
តើអន្តរកម្មរបស់អ្នកជាមួយព្រះគម្ពីរមានលក្ខណៈបែបណាដែរ ?
ប្រសិនបើសិស្សត្រូវការជំនួយ អ្នកអាចចែកចាយថា ព្រះគម្ពីរនៅក្នុងឆ្នាំ ៦០០ ម.គ.ស. ត្រូវបានឆ្លាក់នៅលើបន្ទះដែក និងសរសេរលើបន្ទះឈើ ឬអាចនៅលើក្រដាស ។ យ៉ាកុបទំនងជាបានធ្វើដំណើរទៅកន្លែងដែលមានព្រះគម្ពីរ ហើយស្តាប់នរណាម្នាក់អានព្រះគម្ពីរទាំងនោះ ។ លោកក៏ប្រហែលជាបានស្តាប់មនុស្សចែកចាយនូវអ្វីដែលពួកគេបានដឹងពីការចងចាំផងដែរ ។
-
ប្រសិនបើយ៉ាកុបធ្វើការសម្ភាសអ្នក តើអ្នកនឹងឆ្លើយសំណួរទាំងនេះដោយរបៀបណា ?
-
តើលោកអាចគិតយ៉ាងណាចំពោះការឆ្លើយតបរបស់អ្នក ?
ដើម្បីជួយសិស្សគិតអំពីឱកាសពិសេសរបស់ពួកគេដើម្បីចូលទៅកាន់ព្រះគម្ពីរ សូមចែកចាយសេចក្ដីថ្លែងការណ៍ខាងក្រោម ។
អែលឌើរ ឌី ថត គ្រីស្តូហ្វឺសិន ក្នុងកូរ៉ុមនៃពួកសាវកដប់ពីរនាក់បានបង្រៀន ៖
សូមពិចារណាអំពីទំហំនៃពរជ័យរបស់យើងក្នុងការមានព្រះគម្ពីរប៊ីប និងព្រះគម្ពីរ ៩០០ ទំព័របន្ថែមទៀតរួមមាន ព្រះគម្ពីរមរមន គោលលទ្ធិ និងសេចក្តីសញ្ញា និង មុក្តាដ៏មានតម្លៃមហិមា ។ បន្ទាប់មក សូមពិចារណាថាលើសពីនេះទៅទៀត ប្រសាសន៍របស់ព្យាការីដែលបានមានប្រសាសន៍ ដូចដែលបានបណ្ដាលដោយព្រះវិញ្ញាណបរិសុទ្ធ នៅក្នុងស្ថានភាពបែបនេះ ដែលព្រះអម្ចាស់ហៅថាព្រះគម្ពីរ ( សូមមើល គ&ស ៦៨:២–៤ ) ហូរចូលមកកាន់យើងស្ទើរតែឥតឈប់ឈរ ។ … ខ្ញុំគិតថា ក្នុងប្រវត្តិសាស្ត្រមិនដែលមានមនុស្សណាម្នាក់ទទួលពរដោយព្រះគម្ពីរច្រើនបែបនេះទេ ។ ហើយមិនត្រឹមតែប៉ុណ្ណោះទេ ប៉ុន្តែថែមទាំងបុរស ស្ត្រី និងកុមារគ្រប់រូបអាចមាន និងសិក្សាច្បាប់ចម្លងផ្ទាល់ខ្លួននៃអត្ថបទដ៏ពិសិដ្ឋទាំងនេះ ដែលភាគច្រើនជាភាសារបស់ពួកគាត់ ឬនាងផ្ទាល់ ។ តើកិច្ចការបែបនេះហាក់មិនគួរឲ្យជឿដល់កម្រិតណាចំពោះ … ពួកបរិសុទ្ធនៃគ្រាកាន់កាប់ត្រួតត្រាមុនៗ ! ប្រាកដណាស់ ជាមួយពរជ័យនេះ ព្រះអម្ចាស់កំពុងមានព្រះបន្ទូលប្រាប់យើងថា សេចក្ដីត្រូវការរបស់យើងដើម្បីប្រើព្រះគម្ពីរឲ្យបានញឹកញាប់គឺខ្លាំងជាងជំនាន់ណាៗទាំងអស់ ។ ( « The Blessing of Scripture » Liahona ខែឧសភា ឆ្នាំ២០១០ ទំព័រ ៣៥ )
-
តើអ្នកមានចំណាប់អារម្មណ៍អ្វីខ្លះពីសេចក្ដីថ្លែងការណ៍របស់អែលឌើរ គ្រីស្តូហ្វឺសិន ?
-
តើអត្ថប្រយោជន៍អ្វីខ្លះអាចមកពីការមានបណ្ដុំព្រះគម្ពីរផ្ទាល់ខ្លួនរបស់អ្នក ?
សូមពិចារណាបង្ហាញបណ្ដុំព្រះគម្ពីរផ្ទាល់ខ្លួនរបស់អ្នក ។ ( ប្រសិនបើអ្នកមានព្រះគម្ពីរ នោះអ្នកអាចយកបណ្ដុំព្រះគម្ពីរដែលជាកម្មសិទ្ធិរបស់អ្នកដំបូង ) ។ អ្នកអាចចែកចាយជាមួយសិស្សថាតើការមានព្រះគម្ពីរផ្ទាល់ខ្លួននៅក្នុងជីវិតរបស់អ្នក មានអត្ថន័យយ៉ាងណាចំពោះអ្នក ។
សូមចែកចាយជាមួយសិស្សថា ពរជ័យមួយនៃការមានព្រះគម្ពីរផ្ទាល់ខ្លួនគឺសមត្ថភាពក្នុងការកត់ចំណាំវា ( គូសចំណាំ កត់ត្រា និងការភ្ជាប់ខគម្ពីរ ) ។
-
តើអត្ថប្រយោជន៍អ្វីខ្លះអាចមកពីការកត់ចំណាំបទគម្ពីរផ្ទាល់ខ្លួនរបស់អ្នក ?
សូមអញ្ជើញសិស្សឲ្យរកមើលវិធីដែលពួកគេអាចប្រើព្រះគម្ពីរផ្ទាល់ខ្លួនរបស់ពួកគេបានកាន់តែប្រសើរនៅថ្ងៃនេះ តាមរយៈជំនាញនៃការកត់ចំណាំ ។
អ្នកប្រហែលជាមិនមានពេលដើម្បីបង្រៀនជំនាញកត់ចំណាំទាំងបីនីមួយៗនោះទេ ។ ជ្រើសរើសមួយ( ទាំងឡាយ ) ដែលអ្នកមានអារម្មណ៍ថានឹងផ្ដល់ពរដល់សិស្សរបស់អ្នកច្រើនបំផុត ។ ប្រសិនបើអ្នកបង្រៀនជំនាញច្រើន អ្នកប្រហែលជាចង់បង្រៀនផ្នែក « កំណត់និយមន័យ » និង « គំរូ » នៃជំនាញនីមួយៗជាមុនសិន បន្ទាប់មកឲ្យសិស្ស « អនុវត្ត » ជំនាញក្នុងពេលតែមួយ ។
ពីមុនណែនាំជំនាញទាំងឡាយ សូមពិចារណាដាក់បង្ហាញ ឬសរសេរខពេញលេញនៃ ម៉ូសេ ៧:១៨ ( ឬខគម្ពីរផ្សេងទៀតដែលអ្នកជ្រើសរើស ) នៅលើក្ដារខៀន ដើម្បីខគម្ពីរនោះអាចគូសចំណាំតាមវិធីផ្សេងៗគ្នានៅទូទាំងមេរៀន ។
ជំនាញ ៖ ការគូសចំណាំបទគម្ពីរ
កំណត់និយមន័យ
ការគូសចំណាំបទគម្ពីរគឺជាវិធីមួយដើម្បីបញ្ជាក់ពាក្យ ឃ្លា ឬខគម្ពីរដែលអ្នកមានអារម្មណ៍ថាមានសារៈសំខាន់ ឬមានន័យ ។ ការណ៍នេះអាចជួយអ្នកឲ្យចងចាំនូវអ្វីដែលខគម្ពីរនោះបង្រៀន ។ ការគូសចំណាំបទគម្ពីរក៏អាចជួយអ្នកឲ្យយកចិត្តទុកដាក់កាន់តែខ្លាំងទៅនឹងអ្វីដែលអ្នកកំពុងអាន ដែលអាចបើកគំនិត និងដួងចិត្តរបស់អ្នកឲ្យយល់កាន់តែស៊ីជម្រៅអំពីព្រះយេស៊ូវគ្រីស្ទ ការបង្រៀនរបស់ទ្រង់ និងពាក្យសម្ដីរបស់ពួកអ្នកបម្រើទ្រង់ ។
គំរូ
សូមពិចារណាអញ្ជើញសិស្សពីរបីនាក់ឲ្យមកខាងមុខក្ដារខៀន ដើម្បីបង្ហាញពីវិធីផ្សេងៗដែលពួកគេអាចគូសចំណាំ ម៉ូសេ ៧:១៨ ដែលបានដាក់បង្ហាញនៅលើក្ដារខៀន ។
-
តើមានវិធីខុសៗគ្នាអ្វីខ្លះដែលមនុស្សបានគូសចំណាំបទគម្ពីររបស់ពួកគេ ?
ចម្លើយអាចរួមមានទាំងការគូសពណ៌ចំណាំខគម្ពីរ គូសបន្ទាត់ក្រោមឃ្លា ឬគូសរង្វង់ពាក្យ ។
សូមពិចារណាបង្ហាញវីដេអូ « A Marking System That Works for You » ( ១:៥៦ ) អែលឌើរ ដេវីឌ អេ បែដណា ក្នុងកូរ៉ុមនៃពួកសាវកដប់ពីរនាក់ពិភាក្សាពីការគូសចំណាំបទគម្ពីរ ។ បន្ទាប់ពីវីដេអូនេះ អ្នកអាចសុំឲ្យសិស្សបន្ថែមវិធីបន្ថែមទៀតដើម្បីគូសចំណាំបទគម្ពីរដែលមិនបានរៀបរាប់ពីមុន ។
1:58សម្រាប់ខគម្ពីរឌីជីថល សូមពិចារណាបង្ហាញសិស្សពីរបៀបគូសចំណាំបទគម្ពីររបស់ពួកគេជាពណ៌ផ្សេងៗគ្នាដោយប្រើលក្ខណៈពិសេសនៃការគូសពណ៌ចំណាំ និងការគូសបន្ទាត់ក្រោម ។ លក្ខណៈពិសេសទាំងនេះអាចផ្តល់នូវភាពចម្រុះកាន់តែច្រើន នូវរបៀបដែលសិស្សធ្វើឲ្យការកត់ចំណាំរបស់ពួកគេមានលក្ខណៈផ្ទាល់ខ្លួន ។ សម្រាប់ជំនួយជាមួយកិច្ចការនេះ សូមចុចលើចុចបីនៅជ្រុងខាងស្តាំផ្នែកខាងលើនៃកម្មវិធីបណ្ណាល័យដំណឹងល្អ បន្ទាប់មកចុច « Help » ។ នៅទីនោះ អ្នកនឹងឃើញវីដេអូមួយដែលមានចំណងជើងថា « Highlighting a passage » ។
-
តើមានហេតុផលអ្វីខ្លះដែលអ្នកសម្រេចចិត្តគូសចំណាំអ្វីមួយក្នុងព្រះគម្ពីររបស់អ្នក ?
អនុវត្ត
របៀបមួយដើម្បីជួយសិស្សអនុវត្តគឺផ្ដល់ឲ្យសិស្សម្នាក់ៗនូវសំណៅមេរៀន « អនុវត្តការកត់ចំណាំបទគម្ពីរ » ។ ប្រសិនបើសិស្សរបស់អ្នកប្រើព្រះគម្ពីរជាក្រដាស នោះជំនួសឲ្យការប្រើសំណៅមេរៀន អ្នកអាចចម្លងទំព័រនៃព្រះគម្ពីរដែលរួមបញ្ចូល ទំនុកដំកើង ១១៦:១–៩ សម្រាប់សិស្សអនុវត្ត ។ ការផ្តល់ជម្រើសមួយក្នុងចំណោមជម្រើសទាំងនេះអនុញ្ញាតឲ្យសិស្សសាកល្បងវិធីសាស្រ្តផ្សេងគ្នានៃការគូសចំណាំ ដើម្បីមើលពីរបៀបដែលពួកគេប្រហែលជាចង់ ឬមិនចង់គូសចំណាំលើព្រះគម្ពីរផ្ទាល់ខ្លួនរបស់ពួកគេ ។ សិស្សអាចអានខគម្ពីរបួនដំបូងពីសំណៅមេរៀន ( ទំនុកដំកើង ១១៦:១–៤ ) ដោយប្រើវិធីសាស្រ្តគូសចំណាំ និងខគម្ពីរប្រាំចុងក្រោយ ( ទំនុកដំកើង ១១៦:៥–៩ ) ដោយប្រើវិធីសាស្រ្តគូសចំណាំផ្សេង ។ ប្រសិនបើសិស្សកំពុងប្រើព្រះគម្ពីរអេឡិចត្រូនិក នោះពួកគេអាចអាន និងគូសចំណាំខគម្ពីរដូចគ្នានៅក្នុងបណ្ណាល័យដំណឹងល្អដោយប្រើវិធីសាស្រ្តផ្សេងគ្នា ។ អ្នកអាចបង្ហាញពួកគេពីរបៀបដែលពួកគេអាចលុបការគូសចំណាំជាឌីជីថលរបស់ពួកគេ ប្រសិនបើពួកគេចង់ធ្វើដូច្នេះបន្ទាប់ពីការអនុវត្ត ។
ជំនាញ ៖ ការកត់ត្រា
កំណត់និយមន័យ
ប្រភេទមួយទៀតនៃការកត់ចំណាំគឺជាការកត់ត្រា ។
អែលឌើរ ដេវីឌ អេ បែដណា ក្នុងកូរ៉ុមនៃពួកសាវកដប់ពីរនាក់ បានបង្រៀនដូចខាងក្រោមអំពីរបៀប និងមូលហេតុយើងកត់ត្រា ៖
ការសរសេរនូវអ្វីដែលយើងរៀន គិត និងមានអារម្មណ៍ពេលដែលយើងសិក្សាបទគម្ពីរ គឺជាទម្រង់មួយទៀតនៃការជញ្ជឹងគិត ហើយជាការអញ្ជើញដ៏មានឥទ្ធិពលមួយឲ្យព្រះវិញ្ញាណបរិសុទ្ធបន្ដប្រទានការណែនាំ ។ ( « Because We Have Them before Our Eyes » New Era ខែមេសា ឆ្នាំ២០០៦ ទំព័រ ៦–៧ )
គំរូ
-
តើមានរបៀបផ្សេងគ្នាអ្វីខ្លះដែលយើងអាចសរសេរអ្វីដែលយើងរៀន គិត ឬមានអារម្មណ៍ជាផ្នែកនៃការសិក្សាព្រះគម្ពីររបស់យើង ?
សូមជួយសិស្សឲ្យយល់ថា ពួកគេអាចសរសេរនៅរឹមទំព័រនៃបទគម្ពីររបស់ពួកគេ ក្នុងសៀវភៅកំណត់ហេតុការសិក្សា ឬក្នុងកំណត់ចំណាំអេឡិចត្រូនិក ។
ដោយប្រើខគម្ពីរនៅលើក្ដារខៀន សូមបង្ហាញពីរបៀបដែលសិស្សអាចសរសេរកំណត់ចំណាំនៅរឹមទំព័រនៃបទគម្ពីររបស់ពួកគេ ។ សូមពិចារណាបង្ហាញឧទាហរណ៍មួយអំពីរបៀបដែលអ្នកបានកត់ត្រានៅក្នុងបទគម្ពីរផ្ទាល់ខ្លួន ឬសៀវភៅកំណត់ហេតុការសិក្សារបស់អ្នក ។ អ្នកក៏អាចបង្ហាញពីរបៀបកត់ចំណាំជាអេឡិចត្រូនិកដោយប្រើមុខងារកំណត់ចំណាំក្នុងបណ្ណាល័យដំណឹងល្អ ( សូមមើល « កត់ត្រាគំនិតរបស់អ្នក » នៅក្នុងផ្នែក « Help » ) ។
អនុវត្ត
ប្រសិនបើអ្នកបានប្រើសំណៅមេរៀនពីមុន សូមអញ្ជើញសិស្សឲ្យជ្រើសរើសអ្វីដែលពួកគេបានគូសចំណាំ ទំនុកដំកើង ១១៦ ។ បន្ទាប់មក សូមអញ្ជើញសិស្សឲ្យសរសេរនៅក្នុងរឹមទំព័រនូវអ្វីដែលពួកគេបានរៀន គិត ឬមានអារម្មណ៍នៅពេលពួកគេសិក្សា ។ ប្រសិនបើសិស្សកំពុងប្រើព្រះគម្ពីរឌីជីថល ពួកគេអាចបន្ថែមកំណត់ចំណាំមួយក្នុងចំណោមការគូសចំណាំរបស់ពួកគេពីខគម្ពីរដូចគ្នា ។
ប្រសិនបើមានពេលវេលាគ្រប់គ្រាន់ អ្នកអាចអញ្ជើញសិស្សឲ្យចែកចាយអ្វីដែលពួកគេបានសរសេរជាមួយនឹងសិស្សក្នុងថ្នាក់ ឬជាក្រុមតូចៗ ។
ជំនាញ ៖ ការភ្ជាប់ខគម្ពីរ
កំណត់និយមន័យ
ដោយសារបទគម្ពីរអាចបន្ថែមការយល់ដឹង ឬការគាំទ្រដល់បទគម្ពីរផ្សេងទៀត នោះវាអាចមានប្រយោជន៍ក្នុងការធ្វើសេចក្ដីយោងបទគម្ពីរ ឬភ្ជាប់បទគម្ពីរទាំងនោះជាមួយគ្នា ។ វិធីមួយដែលការណ៍នេះអាចធ្វើទៅបានគឺដោយការសរសេរបទគម្ពីរមួយនៅរឹមទំព័រនៃបទគម្ពីរមួយទៀត ។ អ្នកក៏អាចប្រើមុខងារ « តំណភ្ជាប់ » នៅក្នុងបណ្ណាល័យដំណឹងល្អផងដែរ ។
គំរូ
សូមយោងទៅបទគម្ពីរនៅលើក្ដារខៀន ។ សូមអញ្ជើញសិស្សឲ្យអានបទគម្ពីរខាងក្រោមជាសេចក្តីយោងបទគម្ពីរ ។ ប្រសិនបើអ្នកជ្រើសរើសខគម្ពីរផ្សេងដើម្បីដាក់នៅលើក្ដារខៀន សូមស្វែងរកខគម្ពីរដែលសមរម្យដើម្បីភ្ជាប់ទៅនឹងវា ។
សូមអាន គោលលទ្ធិ និងសេចក្តីសញ្ញា ៩៧:២១ ហើយរកមើលពីរបៀបដែលខគម្ពីរនេះទាក់ទងទៅនឹង ម៉ូសេ ៧:១៨ ។
-
ហេតុអ្វីបានជាវាអាចមានប្រយោជន៍ដើម្បីភ្ជាប់ខគម្ពីរទាំងពីរនេះទៅគ្នាទៅវិញទៅមក ?
សរសេរ គោលលទ្ធិ និងសេចក្តីសញ្ញា ៩៧:២១ នៅជាប់នឹងខគម្ពីរនៅលើក្តារខៀន ដូចជាវាត្រូវបានសរសេរនៅក្នុងរឹមទំព័រនៃខគម្ពីរនេះដែរ ។ សម្រាប់ព្រះគម្ពីរជាឌីជីថល សូមបង្ហាញសិស្សពីរបៀបភ្ជាប់ខគម្ពីរដោយប្រើមុខងារ « តំណភ្ជាប់ » នៅក្នុងបណ្ណាល័យដំណឹងល្អ ( សូមមើល « ភ្ជាប់ខ្លឹមសារដែលទាក់ទង » នៅក្នុងផ្នែក « Help » ) ។
អនុវត្ត
សូមអញ្ជើញសិស្សឲ្យយោងម្ដងទៀតទៅកាន់សំណៅមេរៀន ។ សម្រាប់ការអនុវត្តនេះ សូមពិចារណាដាក់សិស្សជាក្រុមតូចៗ ហើយអញ្ជើញពួកគេឲ្យគិតអំពីបទគម្ពីរផ្សេងទៀតដែលទាក់ទងនឹងអ្វីដែលពួកគេបានគូសចំណាំនៅលើក្រដាសរបស់ពួកគេ ។ នៅពេលពួកគេរកឃើញឧទាហរណ៍ សិស្សអាចចែកចាយវាជាមួយក្រុមរបស់ពួកគេ ហើយអានវាជាមួយគ្នា ។ បន្ទាប់មក សិស្សអាចបន្ថែមសេចក្តីយោងបទគម្ពីរនៅក្នុងរឹមទំព័រក្រដាស ឬបន្ថែមតំណភ្ជាប់ដោយប្រើមុខងារតំណភ្ជាប់ក្នុងព្រះគម្ពីរជាឌីជីថលរបស់ពួកគេ ។
សេចក្ដីបញ្ចប់
សូមពិចារណាអញ្ជើញអ្នកស្ម័គ្រចិត្តពីរបីនាក់ឲ្យចែកចាយនូវអ្វីដែលពួកគេបានរៀនពីការអនុវត្តជំនាញការកត់ចំណាំទាំងនេះ ។ អ្នកអាចនឹងសួរសំណូរពួកគេដូចជាសំណួរពីរខាងក្រោម ។ បង្ហាញការដឹងគុណចំពោះការឆ្លើយតបរបស់សិស្ស ។
-
តើការកត់ចំណាំបទគម្ពីររបស់អ្នកបានជួយអ្នកចូលកាន់តែជិតព្រះយេស៊ូវគ្រីស្ទនៅក្នុងការសិក្សាផ្ទាល់ខ្លួនរបស់អ្នកយ៉ាងដូចម្ដេច ?
-
តើការយល់ដឹង ឬជំនាញអ្វីដែលអ្នកទទួលបាននៅថ្ងៃនេះ ដែលអាចជួយអ្នកឲ្យគ្រប់គ្រងកាន់តែមានន័យជាមួយនឹងបទគម្ពីរ ?
អ្នកអាចនឹងចែកចាយទីបន្ទាល់របស់អ្នកអំពីរបៀបដែលការកត់ចំណាំបទគម្ពីរផ្ទាល់ខ្លួនរបស់អ្នកគឺជាពរជ័យដល់ជីវិតរបស់អ្នក ។ សូមអញ្ជើញសិស្សឲ្យខិតខំទទួលអារម្មណ៍កាន់តែជិតស្និទ្ធជាមួយព្រះវរបិតាសួគ៌ និងព្រះយេស៊ូវគ្រីស្ទ តាមរយៈការអនុវត្តការកត់ចំណាំព្រះគម្ពីររបស់ពួកគេ ។
សូមអញ្ជើញសិស្សឲ្យគិតអំពីរបៀបដែលពួកគេប្រើប្រាស់ជំនាញនៃការកត់ចំណាំ និងជ្រើសរើសជំនាញដែលពួកគេបានរៀន ហើយសាកល្បងវានៅក្នុងការសិក្សាព្រះគម្ពីរផ្ទាល់ខ្លួនរបស់ពួកគេ ។