« ការស្វែងរកសេចក្ដីពិតនៃដំណឹងល្អនៅក្នុងព្រះគម្ពីរ ៖ ការរៀនកំណត់រកគោលលទ្ធិ និងគោលការណ៍ទាំងឡាយ » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា ( ឆ្នាំ២០២៦ )
« ការស្វែងរកសេចក្ដីពិតនៃដំណឹងល្អនៅក្នុងព្រះគម្ពីរ ៖ ការរៀនកំណត់រកគោលលទ្ធិ និងគោលការណ៍ទាំងឡាយ » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា
ជំនាញសិក្សាព្រះគម្ពីរ ៖ មេរៀនទី ១៦៧
ការស្វែងរកសេចក្ដីពិតនៃដំណឹងល្អនៅក្នុងព្រះគម្ពីរ
ការរៀនកំណត់រកគោលលទ្ធិ និងគោលការណ៍ទាំងឡាយ
ការសិក្សាព្រះគម្ពីរអាចកាន់តែមានអានុភាព ប្រសិនបើយើងរកមើលសេចក្តីពិតនៃដំណឹងល្អដោយសកម្ម ដែលនាំយើងកាន់តែខិតជិតនឹងព្រះវរបិតាសួគ៌ និងព្រះយេស៊ូវគ្រីស្ទ ។ មេរៀននេះអាចជួយសិស្សបង្កើនសមត្ថភាពរបស់ពួកគេក្នុងការស្វែងរកសេចក្តីពិតនៃដំណឹងល្អនៅក្នុងព្រះគម្ពីរដែលជួយពួកគេខិតកាន់តែជិតព្រះអម្ចាស់ ។
ការរៀបចំសិស្ស ៖ អញ្ជើញសិស្សឲ្យគូសចំណាំ ឬកត់ត្រានៅក្នុងព្រះគម្ពីររបស់ពួកគេនូវអ្វីមួយដែលពួកគេរៀនពីកាសិក្សាព្រះគម្ពីរផ្ទាល់ខ្លួនរបស់ពួកគេ ។ បន្ទាប់មក ពួកគេអាចសូមមិត្តភក្តិ ឬសមាជិកគ្រួសារឲ្យអានវគ្គបទគម្ពីរដូចគ្នា ចែកចាយអ្វីដែលពួកគេរៀនពីវា ហើយប្រៀបធៀបការយល់ដឹង ។
សកម្មភាពរៀនសូត្រដែលអាចមាន
ព្រះគម្ពីររក្សាសេចក្តីពិតនៃដំណឹងល្អ
ដើម្បីជួយសិស្សយល់ពីតម្លៃនៃការស្វែងរកសេចក្តីពិតនៃដំណឹងល្អនៅក្នុងព្រះគម្ពីរ នោះការប្រៀបធៀបដូចខាងក្រោមនេះផ្ដល់នូវការយល់ដឹងដ៏មានប្រយោជន៍អំពីដំណើររឿងក្នុងព្រះគម្ពីរដែលរក្សាសេចក្តីពិតនៃដំណឹងល្អ ។ សូមពិចារណាយកផ្លែចេកមួយមកថ្នាក់ ( ឬផ្លែឈើផ្សេងមួយទៀតដែលមានសំបក ) ដែលប្រជាជនក្នុងវប្បធម៌របស់អ្នក ជាធម្មតាមិនបរិភោគ ។ សូមសុំឲ្យអ្នកស្ម័គ្រចិត្តបរិភោគផ្លែឈើនោះ ។ បន្ទាប់ពីសិស្សបានបកសំបកវាហើយ ហើយបរិភោគមួយមាត់ដំបូង អ្នកអាចធ្វើជាភ្ញាក់ផ្អើល ហើយសួរហេតុអ្វីគាត់ ឬនាងមិនបរិភោគសំបករបស់វា ។ បន្ទាប់មក សូមសួរសំណួរដូចខាងក្រោមនេះ ។
( ប្រសិនបើមិនមានផ្លែឈើទេ នោះអ្នកអាចកែសម្រួលផ្នែកនេះដើម្បីបង្កើតការពិភាក្សាមួយដែលស្រដៀងគ្នា ដោយការដាក់បង្ហាញរូបភាពផ្លែឈើ ឬគូររូបផ្លែឈើមួយនៅលើក្ដារខៀន ) ។
-
ហេតុអ្វីបានជាសំបកចេកនៅតែមានសារៈសំខាន់ទោះបីជាយើងមិនបរិភោគវាក៏ដោយ ?
អ្នកអាចជួយសិស្សឲ្យយល់ថាសំបកការពារ ថែរក្សា និងរក្សាសាច់ផ្លែឈើដែលយើងបរិភោគឲ្យនៅស្អាត ។
បន្ទាប់មក អញ្ជើញសិស្សឲ្យចែកចាយការយល់ដឹងរបស់ពួកគេអំពីអ្វីមួយដូចខាងក្រោមជាមួយថ្នាក់ ឬដៃគូ ។
-
ប្រសិនបើយើងប្រៀបធៀបដំណើររឿងនៅក្នុងព្រះគម្ពីរទៅនឹងសំបកចេក តើផ្នែកដែលយើងបរិភោគអាចតំណាងឲ្យអ្វីខ្លះ ? ( ម្យ៉ាងវិញទៀត តើដំណើររឿងអ្វីខ្លះដែលការពារ ថែរក្សា និងរក្សាទុកភាពបរិសុទ្ធសម្រាប់យើង ? )
ប្រសិនបើចាំបាច់ សូមពន្យល់ថាដើម្បីរៀនបន្ថែមទៀតចេញពីព្រះគម្ពីរ នោះយើងត្រូវរកមើលលើសពីដំណើររឿងដើម្បីស្វែងរកសេចក្តីពិតដែលព្រះចង់ឲ្យយើងរៀន ។ ដំណើររឿងនេះផ្ទាល់អាចដូចជាសំបកដែលទ្រទ្រង់ និងថែរក្សាសេចក្តីពិតនៃដំណឹងល្អ ដែលបន្ទាប់មកជួយយើងឲ្យស្គាល់ និងដើរតាមព្រះគ្រីស្ទ ។
សូមចែកចាយសេចក្តីថ្លែងការណ៍ដូចខាងក្រោម ហើយអញ្ជើញសិស្សឲ្យរកមើលពីមូលហេតុដែលវាមានសារៈសំខាន់ដើម្បីស្វែងរកសេចក្តីពិតនៃដំណឹងល្អ នៅពេលយើងសិក្សា ។
អែលឌើរ ដេវីឌ អេ បែដណា ក្នុងកូរ៉ុមនៃពួកសាវកដប់ពីរនាក់បានបង្រៀន ៖
ខ្ញុំដឹងថា គោលលទ្ធិ និងគោលការណ៍ទាំងឡាយនៃដំណឹងល្អរបស់ព្រះយេស៊ូវគ្រីស្ទ គឺជាប្រភពមូលដ្ឋានគ្រឹះតែមួយគត់ដើម្បីដឹកនាំជីវិតរបស់យើង និងមានអំណរដ៏យូរអង្វែងក្នុងជីវិតរមែងស្លាប់ និងភាពអស់កល្ប ។ … ខ្ញុំសូមថ្លែងជាសាក្សីដោយអំណរថា ព្រះអង្គសង្គ្រោះដ៏មានព្រះជន្មរស់របស់យើង គឺជាប្រភពដែលសេចក្ដីពិតទាំងនេះកើតឡើងមក ។ ( « គោលការណ៍ទាំងឡាយនៃដំណឹងល្អរបស់យើង » លីអាហូណា ខែឧសភា ឆ្នាំ២០២១ ទំព័រ ១២៦ )
-
តើអ្នកនឹងសង្ខេបអ្វីដែលអ្នករៀនចេញពីអែលឌើរ បែដណា ដោយរបៀបណា ?
អ្នកអាចជួយសិស្សស្វែងរកសេចក្តីពិតចេញពីសេចក្តីថ្លែងការណ៍របស់អែលឌើរ បែដណា ដូចជាមួយនេះ ៖ គោលលទ្ធិ និងគោលការណ៍នៃដំណឹងល្អមកពីព្រះយេស៊ូវគ្រីស្ទគឺជាធនធាននៃការណែនាំ និងអំណរដ៏យូរអង្វែង ។
( កំណត់ចំណាំ ៖ ភាពខុសគ្នារវាងគោលលទ្ធិ និងគោលការណ៍ទាំងឡាយនឹងមិនត្រូវបានថ្លែងនៅក្នុងមេរៀននេះទេ ។ សម្រាប់គោលបំណងនៃមេរៀននេះ ទាំងគោលលទ្ធិ និងគោលការណ៍ទាំងឡាយនឹងត្រូវបានថ្លែងកាន់តែតាមពាក្យទូទៅបន្ថែមទៀត « សេចក្តីពិតនៃដំណឹងល្អ » ។ មានសេចក្តីថ្លែងការណ៍នៅក្នុងធនធានបន្ថែមទាំងឡាយនៃមេរៀននេះ ដែលអ្នកអាចប្រើបាន ប្រសិនបើអ្នកមានអារម្មណ៍ថាវានឹងមានប្រយោជន៍សម្រាប់សិស្សអ្នកក្នុងការបែងចែករវាងគោលលទ្ធិ និងគោលការណ៍ទាំងឡាយ ) ។
ដើម្បីជួយសិស្សឲ្យវាយតម្លៃសមត្ថភាពរបស់ពួកគេក្នុងការស្វែងរកសេចក្ដីពិតនៃដំណឹងល្អនៅក្នុងព្រះគម្ពីរ អ្នកអាចអញ្ជើញពួកគេឲ្យពិចារណាដោយស្ងៀមស្ងាត់នូវសេចក្ដីថ្លែងការណ៍ខាងក្រោម ។
វាយតម្លៃលើរង្វាស់ ១-៥ ថាតើសេចក្តីថ្លែងការណ៍ខាងក្រោមពិតប៉ុនណាចំពោះអ្នក ( ១ = កម្រពិត ៥ = ស្ទើរតែពិតជានិច្ច )
-
ខ្ញុំមានទំនុកចិត្តលើសមត្ថភាពរបស់ខ្ញុំក្នុងការស្វែងរកសេចក្ដីពិតនៃដំណឹងល្អនៅក្នុងព្រះគម្ពីរ ។
-
ខ្ញុំស្វែងរកសេចក្ដីពិតក្នុងព្រះគម្ពីរជាប្រចាំ ដែលនាំខ្ញុំឲ្យខិតកាន់តែជិតព្រះវរបិតាសួគ៌ និងព្រះយេស៊ូវគ្រីស្ទ ។
លើកទឹកចិត្តសិស្សឲ្យស្វែងរកព្រះវិញ្ញាណបរិសុទ្ធ ដើម្បីជួយពួកគេឲ្យកាន់តែស្គាល់សេចក្តីពិតកាន់តែច្បាស់នៅក្នុងព្រះគម្ពីរ ដែលព្រះវរបិតាសួគ៌បានរក្សាទុកសម្រាប់យើង ។
សម្រាប់សកម្មភាពខាងក្រោម អ្នកប្រហែលជាចង់ធ្វើការតាមរយៈផ្នែក « កំណត់និយមន័យ » និង « គំរូ » នៃជំនាញនីមួយៗជាមុនសិន ហើយបន្ទាប់មកអញ្ជើញសិស្សឲ្យអនុវត្តជំនាញទាំងពីរក្នុងពេលតែមួយ ។ អ្នកអាចប្រើគំនិតចេញពីគម្ពីរទាំងពីរដែលបានរៀបរាប់នៅក្នុងផ្នែក « អនុវត្ត » ជំនាញ ។
ជំនាញ ៖ ស្វែងរកស្ថានភាពសេចក្តីពិតឲ្យបានច្បាស់លាស់
កំណត់និយមន័យ
សេចក្តីពិតប្រភេទមួយដែលអ្នកអាចរកឃើញនៅក្នុងការសិក្សារបស់អ្នកសេចក្តីពិតដែលបានថ្លែងយ៉ាងច្បាស់ ។ សេចក្តីពិតបែបនេះគឺបានថ្លែងនៅក្នុងប្រយោគ ឬឃ្លាដ៏សាមញ្ញមួយនៅក្នុងព្រះគម្ពីរ ។
គំរូ
បង្ហាញសិស្សពីឧទាហរណ៍មួយនៃសេចក្តីពិតដែលបានថ្លែងយ៉ាងច្បាស់ដោយការអានបទគម្ពីរខាងក្រោម ឬខគម្ពីរមួយក្នុងចំណោមខគម្ពីរដែលអ្នកចូលចិត្ត ដែលមានសេចក្តីពិតបានបញ្ជាក់យ៉ាងច្បាស់ ។
សូមអាន សុភាសិត ៣:៥–៦ ដោយរកមើល និងគូសចំណាំសេចក្តីពិតដែលបានថ្លែងយ៉ាងច្បាស់ ។
-
តើអ្នកបានគូសចំណាំអ្វីខ្លះ ?
សិស្សអាចស្វែងរកសេចក្តីពិត ដូចជា « ចូរទីពឹងដល់ព្រះយេហូវ៉ាឲ្យអស់អំពីចិត្ត … នោះទ្រង់នឹងតម្រង់អស់ទាំងផ្លូវច្រករបស់ឯង » ។
-
ហេតុអ្វីបានសេចក្តីពិតដែលអ្នកបានគូសចំណាំមានសារៈសំខាន់ចំពោះអ្នក ?
អនុវត្ត
របៀបមួយសម្រាប់សិស្សរបស់អ្នកដើម្បីអនុវត្ត គឺត្រូវអញ្ជើញពួកគេឲ្យបើកទៅវគ្គបទគម្ពីរចំណេះចំណានខាងគោលលទ្ធិ និងឃ្លាបទគម្ពីរគន្លឹះ នៅក្នុង ឯកសារគោលនៃចំណេះចំណានខាងគោលលទ្ធិ ( ឆ្នាំ២០២៣ ) ។ ក្រោយមកសិស្សអាចបើកខគម្ពីរជាច្រើនស្វែងរកសេចក្តីពិតដែលបានថ្លែងយ៉ាងច្បាស់ ។
បន្ទាប់ពីសិស្សមានពេលដើម្បីបំពេញសកម្មភាពនេះហើយ ពួកគេអាចងាកទៅរកដៃគូ ឬក្រុមតូចមួយ និងចែកចាយសេចក្តីពិត(ទាំងឡាយ ) ដែលពួកគេបានរកឃើញ ។
ជំនាញ ៖ ស្វែងរកសេចក្តីពិតដែលមិនបរិយាយច្បាស់លាស់
កំណត់និយមន័យ
សេចក្តីពិតប្រភេទផ្សេងទៀត ដែលអ្នកអាចរកឃើញនៅក្នុងការសិក្សារបស់អ្នកគឺជាសេចក្តីពិតដែលបង្កប់ន័យ ។ សេចក្តីពិតទាំងនេះគឺមានបរិយាយនៅក្នុងវគ្គបទគម្ពីរដ៏ធំៗ ឬដំណើររឿងដែលតម្រូវឲ្យយើងជញ្ជឹងគិតនូវអ្វីដែលព្រះវរបិតាសួគ៌ចង់ឲ្យយើងធ្វើ ។ អ្នកអាចស្វែងរកសេចក្ដីពិតទាំងនេះតាមរយៈការសួរសំណួរដូចខាងក្រោម ។
អ្នកអាចចង់ដាក់បង្ហាញ ឬរៀបរាប់សំណួរទាំងនេះនៅលើក្ដារខៀន ។
-
តើមានគំនិត ឃ្លា ឬនិមិត្តសញ្ញាសំខាន់ៗណាមួយដែលបង្រៀនអ្នកអ្វីមួយអំពីព្រះបិតាសួគ៌ ឬព្រះយេស៊ូវគ្រីស្ទដែរឬទេ ?
-
តើមានទំនាក់ទំនងហេតុ និងផល ( ប្រសិនបើ/បន្ទាប់មក ) នៅក្នុងរឿងនេះដែរឬទេ ?
-
តើអ្នកគិតថា ហេតុអ្វីបានជាអ្នកនិពន្ធត្រូវបានបំផុសគំនិតពីព្រះដើម្បីបញ្ចូលព្រឹត្តិការណ៍ ឬប្រសាសន៍ទាំងនេះ ?
គំរូ
សូមពិចារណាអញ្ជើញអ្នកស្ម័គ្រចិត្តឲ្យអាន ជនគណនា ២១:៥–៩ ឲ្យឮៗនៅក្នុងថ្នាក់ ។ វាគឺជាដំណើររឿងនៃការបង្រៀនរបស់ព្រះ ហើយការប្រោសឲ្យជាដល់ពួកសាសន៍អ៊ីស្រាអែលដែលត្រូវបានពស់អសិរពិសចឹក ។ នៅពេលពួកគេស្តាប់ សូមលើកទឹកចិត្តសិស្សឲ្យស្វែងរកសេចក្តីពិតដែលមិនបរិយាយនៅក្នុងដំណើររឿងនេះ ដោយការសួរខ្លួនឯងនូវសំណួរដែលបានរៀបរាប់ខាងលើ ។
បន្ទាប់ពីការអាន សូមសុំឲ្យពួកអ្នកស្ម័គ្រចិត្តចែកចាយរាល់សេចក្តីពិតដែលមិនបរិយាយច្បាស់លាស់ ដែលពួកគេបានរកឃើញ ។ អ្នកអាចលើកទឹកចិត្តសិស្សឲ្យសរសេរសេចក្តីពិតនៅជាប់នឹងខគម្ពីរទាំងនេះនៅក្នុងព្រះគម្ពីររបស់ពួកគេ ។
សេចក្តីពិតដែលមិនបរិយាយច្បាស់លាស់ដែលអាចមាននៅក្នុងដំណើររឿងនេះ រួមមាន ៖
-
ការនិយាយទាស់នឹងព្រះ និងពួកព្យាការីរបស់ទ្រង់ដឹកនាំទៅរកសេចក្តីទុក្ខព្រួយនៅទីបំផុត ។
-
ព្យាការីចង្អុលបង្ហាញយើងទៅរកព្រះយេស៊ូវគ្រីស្ទ ។
-
ព្រះមានសេចក្តីមេត្តាករុណា និងធ្វើឲ្យយើងអាចបានប្រោសឲ្យជា ។
អ្នកអាចចង្អុលបង្ហាញថា ព្រះយេស៊ូវគ្រីស្ទបានប្រើដំណើររឿងនេះដើម្បីបង្រៀនថា អស់អ្នកដែលជឿ និងធ្វើតាមទ្រង់នឹងមានជីវិតដ៏នៅអស់កល្បជានិច្ច ( យ៉ូហាន ៣:១៤–១៦ ) ។
អនុវត្ត
ដើម្បីចាប់ផ្តើមសកម្មភាពនេះ សូមពិចារណាគូររូបផ្លែចេកមួយមួយផ្លែដែលបានបកសំបកខ្លះនៅលើក្តារខៀន ។
សូមពិចារណាបង្ហាញសេចក្តីណែនាំខាងក្រោម និងសេចក្តីយោងបទគម្ពីរ ហើយអញ្ជើញសិស្សឲ្យបំពេញសកម្មភាពរៀងៗខ្លួន ឬជាមួយដៃគូ ។ នៅពេលពួកគេសិក្សា សូមអញ្ជើញសិស្សឲ្យមកខាងមុខក្ដារខៀន រាល់ពេលពួកគេរកឃើញសេចក្តីពិតមួយ និងសរសេរវានៅលើក្ដារខៀន នៅជិតនឹងផ្លែចេក ។
ជ្រើសរើសដំណើររឿងក្នុងព្រះគម្ពីរមួយខាងក្រោមដើម្បីសិក្សា ឬដំណើររឿងផ្សេងទៀតដែលអ្នកជ្រើសរើស ។
-
នៅពេលអ្នកអាន សូមគូសចំណាំពាក្យ ឬឃ្លាដែលបានថ្លែងយ៉ាងច្បាស់នៅក្នុងព្រះគម្ពីររួចទៅហើយ ។
-
នៅពេលដែលអ្នកបានអានរួចរាល់ហើយ សូមកត់ត្រាជាពាក្យពេចន៍របស់អ្នកផ្ទាល់ យ៉ាងហោចណាស់នូវសេចក្តីពិតដែលបង្កប់ន័យ ដែលអ្នកបានរៀនចេញពីដំណើររឿងនេះ ។
-
ពិចារណាពីមូលហេតុដែលសេចក្តីពិតដែលអ្នកបានរកឃើញគឺមានសារៈសំខាន់ចំពោះអ្នក និងរបៀបដែលអ្នកមានអារម្មណ៍ថា ព្រះវរបិតាសួគ៌ចង់ឲ្យអ្នកប្រើប្រាស់វា ។
សាំយូអែល ទី១ ១៧:៤៤–៤៩ ( ដាវីឌប្រឈមមុខនឹងបុរសមាឌធំដែលមានឈ្មោះថា កូលីយ៉ាត )
ពង្សាវតាក្សត្រ ទី២ ៦:១៤–១៨ ( កងទ័ពនៃស្រុកស៊ីរីហ៊ុមព័ទ្ធទីក្រុងដើម្បីចាប់អេលីសេ )
ពួកចៅហ្វាយ ៦:១១–១៦ ( ការហៅរបស់គេឌានឲ្យសង្រ្គោះដល់រាស្រ្តរបស់គាត់ពីកងទ័ពចូលឈ្លានពាន )
នៅពេលបានធ្វើរួចរាល់ហើយ សូមអញ្ជើញពួកគេឲ្យលើកឡើងសេចក្តីពិតដែលមានអត្ថន័យចំពោះពួកគេ ដែលសិស្សផ្សេងទៀតបានសរសេរនៅលើក្ដារខៀន ។ សិស្សអាចចែកចាយថា ហេតុអ្វីបានជាសេចក្តីពិតនេះមានសារៈសំខាន់ចំពោះពួកគេ និងរបៀបដែលពួកគេអាចអនុវត្តសេចក្តីពិតនោះនៅក្នុងជីវិតរបស់ពួកគេ ។ អ្នកក៏អាចសួរថាតើនរណាម្នាក់មានបទពិសោធន៍ដែលជួយពួកគេឲ្យដឹងថាអ្វីមួយនៅលើក្តារខៀនគឺជាការពិត ។
សេចក្ដីបញ្ចប់
សូមពិចារណារំឭកសិស្សពីគោលដៅការសិក្សាព្រះគម្ពីរផ្ទាល់ខ្លួន ដែលពួកគេបានដាក់សម្រាប់ឆមាសនេះ ។ ប្រសិនបើពួកគេមិនទាន់បានដាក់គោលដៅទេ សូមលើកទឹកចិត្តពួកគេឲ្យដាក់គោលដៅ ។
សូមអញ្ជើញសិស្សឲ្យមានគោលដៅរបស់ពួកគេនៅក្នុងគំនិត ខណៈពួកគេឆ្លើយសំណួរខាងក្រោមនៅក្នុងសៀវភៅកំណត់ហេតុការសិក្សារបស់ពួកគេ ។ អញ្ជើញពួកគេឲ្យបើកចិត្តកែសម្រួលគោលដៅរបស់ពួកគ ប្រសិនបើពួកគេមានចំណាប់អារម្មណ៍ដើម្បីធ្វើដូច្នោះ ។
-
តើជំនាញអ្វីខ្លះដែលលេចធ្លោចំពោះអ្នកដែលអាចជួយអ្នកក្នុងការសិក្សាបទគម្ពីរផ្ទាល់ខ្លួន ឬជាគ្រួសាររបស់អ្នក ?
-
តើការស្វែងរក និងការជញ្ជឹងគិតពីសេចក្តីពិតនៃដំណឹងល្អនៅក្នុងការសិក្សាព្រះគម្ពីររបស់អ្នកអាចជួយអ្នកចូលទៅជិតព្រះអង្គសង្គ្រោះដោយរបៀបណា ?
សូមពិចារណាអញ្ជើញសិស្សម្នាក់ ឬច្រើននាក់ជារៀងរាល់ថ្ងៃសម្រាប់មេរៀនជាច្រើនខាងមុខដើម្បីចែកចាយសេចក្ដីពិតមួយដែលពួកគេបានរកឃើញក្នុងការសិក្សាព្រះគម្ពីរផ្ទាល់ខ្លួន ឬជាគ្រួសាររបស់ពួកគេ ។ សូមរកមើលឱកាសផ្សេងទៀតនៅក្នុងមេរៀននាពេលអនាគតដើម្បីឲ្យសិស្សបន្តអនុវត្តជំនាញដ៏សំខាន់នេះ ។