« ការពង្រឹងមូលដ្ឋានគ្រឹះខាងវិញ្ញាណរបស់អ្នក ៖ សេចក្ដីណែនាំស្ដីពីចំណេះចំណានខាងគោលលទ្ធិ » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា ( ឆ្នាំ២០២៦ )
« ការពង្រឹងមូលដ្ឋានគ្រឹះខាងវិញ្ញាណរបស់អ្នក ៖ សេចក្ដីណែនាំស្ដីពីចំណេះចំណានខាងគោលលទ្ធិ » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា
ចំណេះចំណានខាងគោលលទ្ធិ ៖ ការស្វែងរកចម្លើយចំពោះសំណួររបស់ខ្ញុំ ៖ មេរៀនទី ១៦១
ការពង្រឹងមូលដ្ឋានគ្រឹះខាងវិញ្ញាណរបស់អ្នក
សេចក្តីណែនាំស្តីពីចំណេះចំណានខាងគោលលទ្ធិ
របៀបដែលយើងដោះស្រាយបញ្ហាប្រឈម សំណួរ និងកង្វល់នៅក្នុងជីវិតរបស់យើង អាចនាំយើងទៅជិតព្រះវរបិតាសួគ៌ និងព្រះយេស៊ូវគ្រីស្ទ ឬឆ្ងាយពីទ្រង់ ។ ចំណេះចំណានខាងគោលលទ្ធិផ្តល់នូវការណែនាំដែលអាចជួយយើងឆ្លើយតបទៅនឹងកាលៈទេសៈបែបនេះជាមួយនឹងសេចក្តីជំនឿទៅលើព្រះយេស៊ូវគ្រីស្ទ និងការបំផុសគំនិតពីព្រះវិញ្ញាណបរិសុទ្ធ ។ មេរៀននេះអាចជួយសិស្សឲ្យយល់អំពីរបៀបដែលចំណេះចំណានខាងគោលលិទ្ធផ្ដល់ពរដល់ជីវិតរបស់ពួកគេ ហើយជួយពួកគេស្ថាបនាគ្រឹះខាងវិញ្ញាណរបស់ពួកគេនៅលើព្រះយេស៊ូវគ្រីស្ទ ។
ការរៀបចំសិស្ស ៖ អញ្ជើញសិស្សឲ្យអាន ហេលេមិន ៥:១២ មុនពេលមករៀន ។ សិស្សអាចរកមើលពរជ័យដែលបានសន្យាសម្រាប់ការស្ថាបនាគ្រឹះរបស់ពួកគេនៅលើព្រះយេស៊ូវគ្រីស្ទ ។
សកម្មភាពរៀនសូត្រដែលអាចមាន
ការឆ្លើយតបទៅនឹងព័ត៌មានពិបាកៗ
ដើម្បីចាប់ផ្តើមថ្នាក់ សូមពិចារណាគូររូបមនុស្សចង្កឹះនៅលើក្តារខៀន ហើយដាក់ស្លាកថា អាណា និង វីរ៉ូនីកា ។ ប្រសិនបើពួកគេចង់ សិស្សអាចផ្តល់ព័ត៌មានលម្អិតអំពីក្មេងស្រីម្នាក់ៗ ដូចជាអ្វីដែលពួកគេចូលចិត្តធ្វើ កន្លែងដែលពួកគេធ្វើការជាដើម ។ សូមប្រុងប្រយ័ត្នកុំឲ្យមេរៀនផ្នែកនេះចំណាយពេល ឬគ្របដណ្ដប់លើសាច់រឿងនោះច្រើនពេក ។
សូមដាក់បង្ហាញសាច់រឿងខាងក្រោមនេះ ។ ( ចំណាំ ៖ សាច់រឿងនេះបន្តដល់ផ្នែកផ្សេងទៀតនៃមេរៀន ) ។
អាណា និងវីរ៉ូនីកា គឺជាមិត្តល្អនឹងគ្នា ហើយអ្នកទាំងពីរគឺជាសមាជិកនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។ តាំងពីចាប់ផ្ដើមរៀននៅថ្នាក់វិទ្យាល័យ ពួកគេបានឮព័ត៌មាន និងយោបល់ជាច្រើនអំពីសាសនាចក្រពីប្រភពផ្សេងៗ ។ ខណៈពេលដើរលេងនៅយប់មួយ អាណាបានចែកចាយជាមួយវីរ៉ូនីកា នូវព័ត៌មានមួយចំនួនដែលនាងបានអានតាមអនឡាញអំពីសាសនាចក្រ ។ អាណាបាននិយាយថាអ្វីដែលនាងបានរកឃើញបានទាញយកសេចក្តីជំនឿរបស់នាង ។ នាងបានភ្ញាក់ផ្អើលពេលឮវីរ៉ូនីកា និយាយថានាងដឹងរឿងទាំងនោះ ហើយពួកគេក៏បានស្ងប់ចិត្ត ។ អាណាចាប់អារម្មណ៍លើរបៀបដែល វីរ៉ូនីកា មានអារម្មណ៍បែបនេះ ។
-
តើមានរឿងវិជ្ជមានអ្វីខ្លះកើតឡើងក្នុងសាច់រឿងនេះ បើទោះជាអាណាមានការព្រួយបារម្ភក៏ដោយ ?
សិស្សអាចកត់សម្គាល់ថាវាជារឿងវិជ្ជមានដែលអាណាមានអារម្មណ៍មិនទើសទាល់ក្នុងការសួរសំណួរដោយស្មោះស ។ វាក៏ជារឿងវិជ្ជមានផងដែរដែលវីរ៉ូនីកា មានតួនាទីជួយអាណា ។
សូមអញ្ជើញសិស្សឲ្យគិតអំពីថាតើពួកគេធ្លាប់មានអារម្មណ៍ដូចអាណាដែរឬទេ ។ អ្នកក៏អាចសូមពួកគេឲ្យគិត ថាតើពួកគេធ្លាប់មានអារម្មណ៍ដូចវីរ៉ូនីកា ហើយមានមិត្តម្នាក់មករកពួកគេដោយមានសំណួរដែរឬទេ ។
នៅពេលអ្នករៀនអំពីចំណេះចំណានខាងគោលលទ្ធិនៅថ្ងៃនេះ សូមបើកចិត្តចំពោះអ្វីដែលព្រះវិញ្ញាណបរិសុទ្ធអាចនឹងបង្រៀនអ្នក ។ ស្វែងរកដើម្បីដឹងពីរបៀបដែលចំណេះចំណានខាងគោលលទ្ធិអាចជួយអ្នកឆ្លើយតបនឹងព័ត៌មានដែលមិនបានរំពឹងទុកដោយសេចក្តីជំនឿទៅលើព្រះយេស៊ូវគ្រីស្ទ ហើយជួយអ្នកដទៃឲ្យធ្វើដូចគ្នា ។
ការស្ថាបនាគ្រឹះរបស់យើងនៅលើព្រះយេស៊ូវគ្រីស្ទ
សូមអានកថាខណ្ឌពីរដំបូងនៅក្រោម « សេចក្តីណែនាំស្ដីពីចំណេះចំណានខាងគោលលទ្ធិ » នៅក្នុង ឯកសារគោលនៃចំណេះចំណានខាងគោលលទ្ធិ ( ឆ្នាំ២០២២ ) ។ រកមើលថាតើចំណេះចំណានខាងគោលលទ្ធិមានគោលបំណងជួយយើងធ្វើអ្វីខ្លះ ។
-
តើអ្នកនឹងសង្ខេបគោលបំណងនៃចំណេះចំណានខាងគោលលទ្ធិនេះដោយរបៀបណា ?
ក្នុងចំណោមចម្លើយផ្សេងទៀត សូមជួយសិស្សឲ្យស្គាល់សេចក្ដីពិតដូចខាងក្រោម ៖ ចំណេះចំណានខាងគោលលទ្ធិជួយយើងស្ថាបនាគ្រឹះខាងវិញ្ញាណរបស់យើងទៅលើព្រះយេស៊ូវគ្រីស្ទ ។
ប្រសិនបើមានប្រយោជន៍ អ្នកអាចសួរសំណួរដូចខាងក្រោម ។
-
តើការស្ថាបនាគ្រឹះរបស់អ្នកនៅលើព្រះយេស៊ូវគ្រីស្ទមានន័យដូចម្ដេចសម្រាប់អ្នក ?
មុនពេលសិស្សអានខគម្ពីរខាងក្រោម សូមពិចារណាលើការសរសេរនៅលើក្ដារខៀន ថ្ម = ព្រះយេស៊ូវគ្រីស្ទ ។
សូមអាន អេសាយ ២៨:១៦ ដោយរកមើលរបៀបដែលការស្ថាបនាគ្រឹះរបស់យើងនៅលើព្រះយេស៊ូវគ្រីស្ទអាចផ្ដល់ពរដល់យើង ។
សូមពិចារណាអំពីការអញ្ជើញសិស្សឲ្យគូសចំណាំឃ្លា « ត្រូវរួសរាន់ឡើយ » ហើយពន្យល់ថាឃ្លានេះអាចមានន័យថា « ត្រូវរង្គោះរង្គើ » ឬ « ភ័យស្លន់ស្លោ » ។
-
ហេតុអ្វីបានជាអ្នកគិតថាការដាក់សេចក្តីជំនឿរបស់យើងទៅលើព្រះយេស៊ូវគ្រីស្ទនឹងទប់យើងពីការរង្គោះរង្គើ ?
សូមអញ្ជើញសិស្សឲ្យបង្វែរគំនិតរបស់ពួកគេត្រឡប់ទៅសាច់រឿងនោះវិញ ។
-
តើមានរឿងអ្វីខ្លះដែល វីរ៉ូនីកា អាចនឹងធ្វើដើម្បីស្ថាបនាសេចក្តីជំនឿរបស់នាងទៅលើព្រះយេស៊ូវគ្រីស្ទ ហើយមិន « ត្រូវរង្គោះរង្គើ » ដោយបញ្ហាប្រឈម ?
ប្រសិនបើអ្នកមានអារម្មណ៍ថាវានឹងមានប្រយោជន៍ នោះអ្នកអាចឲ្យសិស្សសិក្សា យ៉ាកុប ៤:៦–១០ ដោយរកមើលអ្វីដែលយ៉ាកុបបានធ្វើ ដើម្បីកុំឲ្យជំនឿរបស់លោកទៅលើព្រះយេស៊ូវគ្រីស្ទត្រូវរង្គោះរង្គើ ។ អ្នកអាចរៀបរាប់អ្វីដែលសិស្សរកឃើញនៅលើក្ដារខៀននៅជិតរូបភាពរបស់ វីរ៉ូនីកា ។ សូមអញ្ជើញសិស្សឲ្យពិពណ៌នាអំពីអ្វីដែលសកម្មភាពនីមួយៗអាចនឹងមានលក្ខណៈយ៉ាងណានៅក្នុងជីវិតរបស់ វីរ៉ូនីកា ។
លទ្ធផលនៃចំណេះចំណានខាងគោលលទ្ធិ
ដើម្បីរៀបចំសិស្សឲ្យយល់ពីលទ្ធផលនៃចំណេះចំណានខាងគោលលទ្ធិ សូមចែកចាយផ្នែកបន្ទាប់នៃសាច់រឿងនេះជាពាក្យសម្ដីរបស់អ្នកផ្ទាល់ ។
វីរ៉ូនីកា បានផ្អាកមួយភ្លែត ដោយស្វែងរកវិធីចែកចាយជាមួយអាណានូវអ្វីដែលបានជួយនាងឲ្យរក្សាភាពស្មោះត្រង់ ។ នាងចង់បង្ហាញពីសារៈសំខាន់នៃកិច្ចខិតខំប្រឹងប្រែងជាប្រចាំរបស់នាង ដើម្បីពង្រឹងទំនាក់ទំនងរបស់នាងជាមួយព្រះយេស៊ូវគ្រីស្ទ ។ ដោយបានគិតពិចារណាពីទម្លាប់នៃការអធិស្ឋានប្រចាំថ្ងៃរបស់នាង ការអានព្រះគម្ពីរ និងការចូលរួមក្នុងព្រះវិហារ និងថ្នាក់សិក្ខាសាលា នោះនាងបានដឹងពីទិដ្ឋភាពមួយដែលលេចធ្លោ ។
វីរ៉ូនីកាបាននិយាយដោយជឿជាក់ថា ៖ « វាជាវគ្គបទគម្ពីរចំណេះចំណានខាងគោលលទ្ធិ » ។
អាណាមើលទៅស្រឡាំងកាំង ។ « គោលលទ្ធិអ្វីទៅ ? »
« ចំណេះចំណានខាងគោលលទ្ធិ ។ វាជាអ្វីមួយដែលយើងធ្វើនៅក្នុងថ្នាក់សិក្ខាសាលា ។ វាបានជួយខ្ញុំជាច្រើនក្នុងការដោះស្រាយសំណួរ និងស្ថានការណ៍លំបាកៗ ខណៈដែលការរក្សាសេចក្តីជំនឿរបស់ខ្ញុំទៅលើព្រះយេស៊ូវគ្រីស្ទជាចំណុចសំខាន់នៃជីវិតរបស់ខ្ញុំ » ។ វីរ៉ូនីកាបានរៀបរាប់លម្អិត ។
ចំណាប់អារម្មណ៍របស់អាណាបានបង្ហាញឲ្យឃើញ ។ « អ៊ីចឹង តើអ្វីទៅជាចំណេះចំណានខាងគោលលទ្ធិ ? »
-
តើអ្នកដឹងអ្វីខ្លះរួចទៅហើយអំពីចំណេះចំណានខាងគោលលទ្ធិ ?
ប្រសិនបើសិស្សរបស់អ្នកមួយចំនួនមានបទពិសោធន៍ក្នុងថ្នាក់សិក្ខាសាលាអំពីចំណេះចំណានខាងគោលលទ្ធិរួចហើយ សូមអញ្ជើញសិស្សពីរបីនាក់ឲ្យចែកចាយអ្វីដែលពួកគេដឹងរួចហើយ ។
ប្រសិនបើសិស្សត្រូវការជំនួយបន្ថែមទៀតក្នុងការយល់ដឹងពីចំណេះចំណានខាងគោលលទ្ធិ សូមពិចារណាបង្ហាញវីដេអូ « What Is Doctrinal Mastery? » ( ៣:៥៦ ) ។
3:56ជាជម្រើសមួយផ្សេងទៀត អ្នកអាចរៀបចំសិស្សជាគូៗ ហើយចាត់ឲ្យពួកគេអានអំពីលទ្ធផលទាំងពីរនៃចំណេះចំណានខាងគោលលទ្ធិនៅក្នុងផ្នែក « សេចក្តីណែនាំស្ដីពីចំណេះចំណានខាងគោលលទ្ធិ » នៃ ឯកសារគោលនៃចំណេះចំណានខាងគោលលទ្ធិ ។
-
តើអ្នកគិតថាលទ្ធផលនៃចំណេះចំណានខាងគោលលទ្ធិអាចជួយអាណាស្ថាបនាគ្រឹះរបស់នាងទៅលើព្រះយេស៊ូវគ្រីស្ទយ៉ាងដូចម្ដេច ?
អ្នកអាចរាយចម្លើយរបស់សិស្សនៅលើក្ដារខៀននៅជិតអាណា ។
ដើម្បីផ្តល់ឱកាសដល់សិស្សឲ្យស្គាល់វគ្គបទគម្ពីរចំណេះចំណានខាងគោលលទ្ធិ សូមអញ្ជើញពួកគេឲ្យបើកទៅវគ្គបទគម្ពីរចំណេះចំណានខាងគោលលទ្ធិនៅក្នុងព្រះគម្ពីរសញ្ញាចាស់ក្រោម « វគ្គបទគម្ពីរចំណេះចំណានខាងគោលលទ្ធិ និងឃ្លាបទគម្ពីរគន្លឹះតាមវគ្គសិក្សា » នៅក្នុង ឯកសារគោលនៃចំណេះចំណានខាងគោលលទ្ធិ ។
សូមអាននៅឃ្លាបទគម្ពីរគន្លឹះមួយចំនួន ដោយស្វែងរកវគ្គបទគម្ពីរដែលអាចជួយ អាណា មិនឲ្យរង្គោះរង្គើជំនឿរបស់នាងទៅលើព្រះយេស៊ូវគ្រីស្ទ ។
សិស្សអាចសរសេរសេចក្ដីយោងបទគម្ពីរដែលពួកគេបានជ្រើសរើសនៅលើក្ដារខៀនជុំវិញរូបមនុស្សចង្កឹះរបស់អាណា ។ អ្នកអាចចង្អុលទៅសេចក្តីយោងមួយចំនួន ហើយសូមឲ្យសិស្សដែលបានសរសេរវាឲ្យចែកចាយពីរបៀបដែលពួកគេគិតថាវានឹងជួយអាណា ។
សេចក្ដីបញ្ចប់
សូមផ្ដល់ឱកាសឲ្យសិស្សអនុវត្តការពិពណ៌នាអំពីចំណេះចំណានខាងគោលលទ្ធិដោយឆ្លើយតបទៅនឹងការបំផុសគំនិតដូចខាងក្រោម ។
សូមស្រមៃគិតថាអ្នកបានឆ្លើយតបនឹងសំណួររបស់ អាណា ៖ « តើអ្វីទៅជាចំណេះចំណានខាងគោលលទ្ធិ ? » កត់ត្រានៅក្នុងសៀវភៅកំណត់ហេតុរបស់អ្នកអំពីរបៀបដែលអ្នកនឹងពន្យល់ពីអ្វីដែលចំណេះចំណានខាងគោលលទ្ធិ និងរបៀបដែលវាអាចផ្តល់ពរជ័យដល់ជីវិតរបស់អ្នក ។
សូមផ្ដល់ឱកាសឲ្យសិស្សចែកចាយអ្វីដែលពួកគេបានសរសេរជាមួយនរណាម្នាក់ដែលអង្គុយក្បែរពួកគេ ឬជាមួយថ្នាក់ ។
សូមពិចារណាចែកចាយទីបន្ទាល់របស់អ្នកអំពីរបៀបដែលចំណេះចំណានខាងគោលលទ្ធិអាចផ្ដល់ពរដល់ជីវិតរបស់សិស្ស ដោយជួយពួកគេឲ្យស្ថាបនាគ្រឹះខាងវិញ្ញាណរបស់ពួកគេលើព្រះយេស៊ូវគ្រីស្ទ ។