Daniel 1–7: Mësimi 143

Daniel 2

“Një Mbretëri që Nuk do të Shkatërrohet Kurrë”

Zoti i tregoi Danielit një vegim të ditëve të mëvonshme kur Zoti do të ngrinte mbretërinë e Tij mbi tokë. Mbretëria e Zotit, Kisha e Jezu Krishtit e Shenjtorëve të Ditëve të Mëvonshme, do ta mbushë tokën dhe do të qëndrojë përgjithmonë. Ky mësim mund t’i ndihmojë nxënësit ta forcojnë dëshminë e tyre për Rivendosjen hyjnore të Kishës së Jezu Krishtit të Shenjtorëve të Ditëve të Mëvonshme.

Përgatitja e nxënësve: Ftojini nxënësit të zgjedhin njërën nga idetë vijuese për ta përgatitur për këtë mësim:

Veprimtari të Mundshme të të Mësuarit

Dëshmia e Rivendosjes

Merreni parasysh t’i ftoni nxënësit të thonë çdo pyetje që mbajnë mend që bëhet gjatë një interviste për rekomandimin e tempullit. Nëse është e dobishme, mund t’i drejtoni te pyetjet për rekomandimin e tempullit në shtojcën e broshurës Për Forcën e Rinisë: Një Udhëzues për Bërjen e Zgjedhjeve. Pasi nxënësit të kenë thënë disa pyetje që i mbajnë mend, mund të shkruani pyetjen vijuese në tabelë.

Mendo rreth mënyrës se si do t’i përgjigjeshe pyetjes vijuese për rekomandimin e tempullit:

• A ke një dëshmi për Rivendosjen e ungjillit të Jezu Krishtit?

Sipas nevojës, shpjegoni se Rivendosja është “Rivendosja nga Perëndia e të vërtetave dhe ordinancave të ungjillit të tij mes njerëzve në tokë” (Udhëzuesi për Shkrimet e Shenjta, “Rivendosje e Ungjillit”, Gospel Library [Biblioteka e Ungjillit]).

Merreni parasysh të shkruani Pse ose pse jo? pas pyetjes në tabelë. Ftojini nxënësit të përsiatin përgjigjet e tyre për të dyja pyetjet.

Ndërsa studion te Daniel 2 sot, ftoje Frymën e Shenjtë të të ndihmojë të dallosh të vërtetat që mund të ta forcojnë dëshminë që Ati Qiellor dhe Jezu Krishti e rivendosën Kishën e Jezu Krishtit të Shenjtorëve të Ditëve të Mëvonshme mbi tokë.

Ëndrra e mbretit Nebukadnetsar

Për t’i ndihmuar nxënësit të kuptojnë kontekstin e kapitullit te Daniel 2, një nxënës mund të lexojë ose të përmbledhë informacionin vijues. Përndryshe, mund të shihni “God Gave Them Knowledge” [“Perëndia u Dha Atyre Njohuri”], në dispozicion në ChurchofJesusChrist.org, nga kodi kohor 6:17 deri në 13:00.

Mbreti Nebukadnetsar i Babilonisë pa një ëndërr që e shqetësoi. Asnjë nga dijetarët e tij nuk mund t’i thoshte se çfarë tregonte ëndrra ose si ta interpretonte atë. Për rrjedhojë, mbreti urdhëroi që të vriteshin të gjithë dijetarët e tij, përfshirë Danielin. Para se të mund të ndodhte kjo, Perëndia ia zbuloi ëndrrën dhe interpretimin e saj Danielit (shih te Daniel 2:1–26).

Para se ta tregonte atë që Perëndia i kishte zbuluar rreth ëndrrës, Danieli i mësoi mbretit se Perëndia ishte burimi i interpretimit. Danieli zbuloi gjithashtu se ëndrra kishte të bënte me “atë që do të ndodhë ditët e fundit” (Daniel 2:28).

Merreni parasysh t’i vendosni nxënësit në grupe të vogla. Jepini çdo grupi një kopje të fletushkës së titulluar “Ëndrra e Mbretit Nebukadnetsar”. Më pas, paraqitini udhëzimet më poshtë, duke u dhënë nxënësve kohë për ta përfunduar secilin hap para se të paraqitni hapin dy.

1. Lexo te Daniel 2:31–43 dhe emërtoji elementet e ëndrrës së mbretit Nebukadnetsar në fletushkë me interpretimet që zbulon. Përfshiji vargjet ku i gjete interpretimet.

Ndihmojini nxënësit të përcaktojnë se mbretëria babilonase e mbretit Nebukadnetsar ishte koka e artë (vargu 38). Pjesët e tjera të figurës (ose statujës) përfaqësojnë mbretëritë e tjera që do të vinin pas Babilonisë.

Daniel 2:44–45 është një fragment i zotërimit doktrinor. Merreni parasysh t’i ftoni nxënësit t’i shenjojnë fragmentet e zotërimit doktrinor në një mënyrë të dallueshme, që të mund t’i gjejnë me lehtësi.

2. Lexo te Daniel 2:44–45, duke kërkuar fjalët dhe frazat që përshkruajnë gurin. Shkruaji këto fjalë përreth gurit në fletushkën tënde.

Ndërsa nxënësit e lexojnë thënien vijuese, ftojini ata ta shkruajnë atë që përfaqëson guri brenda gurit në fletushkën e tyre.

Plaku D. Tod Kristoferson, i Kuorumit të Dymbëdhjetë Apostujve, shpjegoi se çfarë përfaqëson guri:

“Kisha [e Jezu Krishtit e Shenjtorëve të Ditëve të Mëvonshme] është ajo mbretëri e profetizuar e ditëve të mëvonshme, jo e krijuar nga njeriu, por e ngritur nga Perëndia i qiellit dhe që rrokulliset si guri që ‘shkëputet nga mali, jo nga dora e njeriut’ për të mbushur tokën [Daniel 2:45; shih edhe vargun 35].” (“Përse Kisha”, Liahona, nëntor 2015, f. 111)

• Çfarë mund të mësojmë rreth Kishës së rivendosur të Perëndisë nga ky pohim dhe nga zbulesa e Zotit për Danielin?

  Duke përdorur fjalët e nxënësve, ndihmojini ata të përcaktojnë që Perëndia themeloi Kishën e Jezu Krishtit të Shenjtorëve të Ditëve të Mëvonshme, që do të mbushë të gjithë tokën dhe të qëndrojë përgjithmonë.

  Merreni parasysh që Zoti Vetë shpalli se ungjilli i Tij do të mbushte të gjithë tokën (shih te Doktrina e Besëlidhje 65:2). Nxënësit mund të bëjnë referencë-kryq ose të lidhin vargun te Doktrina e Besëlidhje 65:2 me vargun te Daniel 2:35. Ju mund të shpjegoni se “mbushi tërë tokën” (Daniel 2:35) nuk do të thotë se kushdo do t’i bashkohet Kishës së Zotit, por që ajo do të përhapet anembanë tokës (shihni te 1 Nefi 14:12–14).

• Si na ndihmojnë frazat te Daniel 2:44–45 ta kuptojmë këtë të vërtetë?

Guri rrokulliset përpara

Pasi interpretoi ëndrrën e Mbretit Nebukadnetsar, Danieli dha dëshminë e tij se ishte “e vërtetë dhe interpretimi i saj është i sigurt” (Daniel 2:45). Ndërsa zhvillojmë dëshmitë vetjake, të vërtetat e Kishës së rivendosur të Shpëtimtarit mund të bëhen të sigurta për ne nëpërmjet fuqisë së Frymës së Shenjtë.

Presidenti Rasëll M. Nelson, tregoi se çfarë duhet të bëjmë për të zhvilluar dëshmi të sigurta për vete:

“Tani, si Presidenti i Kishës së Tij, unë ju lutem juve. … Kryejeni punën shpirtërore për t’i zbuluar … vetë [që Kisha e Shpëtimtarit është rivendosur] dhe ju lutem, bëjeni tani. Koha po mbaron.” (“Eja, Më Ndiq”, Liahona, maj 2019, f. 91)

Veprimtaria vijuese mund t’i ndihmojë nxënësit të marrin parasysh se çfarë pune shpirtërore nevojitet të bëjnë për të forcuar dëshminë e tyre për Rivendosjen hyjnore të Kishës së Jezu Krishtit të Shenjtorëve të Ditëve të Mëvonshme. Merreni parasysh t’i vendosni nxënësit në grupe të vogla për të bërë veprimtarinë.

Ndihmojini nxënësit të gjejnë materialin Proklamata mbi Rivendosjen. Ai mund të gjendet te Gospel Library [Biblioteka e Ungjillit] dhe në disa ditarë të studimit. Mund të siguroni kopje në letër për nxënësit që nuk kanë qasje në të. Si një alternativë ndaj proklamatës, mund të shfaqni materialin filmik “Dëgjojeni Atë”, në dispozicion në ChurchofJesusChrist.org, nga kodi kohor 17:05 deri te 22:55.

1. Lexoje materialin “Rivendosja e Plotësisë së Ungjillit të Jezu Krishtit: Një Proklamatë në Dyqindvjetor drejtuar Botës”. Kërko të vërtetat që ka zbuluar Shpëtimtari dhe ngjarjet që sollën rivendosjen e Kishës së Tij.

2. Diskuto përse këto të vërteta dhe ngjarje janë të rëndësishme për Rivendosjen e Kishës së Shpëtimtarit.

3. Diskutoje punën shpirtërore që mund të bëjë dikush për të forcuar dëshminë e tij që Jezu Krishti e rivendosi Kishën e Tij.

Pas një kohe të mjaftueshme, vëreni secilin grup të tregojë një të vërtetë ose ngjarje që i bëri përshtypje. Ftojini ata të tregojnë përse është e rëndësishme të kenë një dëshmi për këtë të vërtetë ose ngjarje dhe punën shpirtërore që mund të bëjë dikush për ta fituar ose forcuar dëshminë e tij për të.

Pasi secili grup të ketë pasur mundësi për të folur, ftojini nxënësit t’u përgjigjen pyetjeve vijuese në ditarët e tyre të studimit.

• Për cilën të vërtetë ose ngjarje të Kishës së rivendosur të Shpëtimtarit do të doje ta forcoje dëshminë tënde?

• Çfarë pune shpirtërore mund të bësh për ta forcuar dëshminë tënde për Rivendosjen hyjnore të Kishës nga Shpëtimtari?

Mësoni Përmendsh

Nëse doni, mund t’i ndihmoni nxënësit t’i mësojnë përmendsh referencën e zotërimit doktrinor dhe frazën kyç të shkrimit të shenjtë gjatë këtij mësimi dhe t’i përsëritin ato në mësimet e ardhshme. Fraza kyç e shkrimit të shenjtë për vargjet te Daniel 2:44–45 është “Perëndia do të ‘nxjerrë një mbretëri, që nuk do të shkatërrohet kurrë’”. Idetë për veprimtaritë e mësimit përmendsh janë në materialet e shtojcës nën titullin “Veprimtari për Përsëritjen e Zotërimit Doktrinor”.

Burime Shtesë

Danieli 2:45. Çfarë do të thotë që “guri [u] shkëput nga mali, jo nga dora e njeriut”?

Plaku Ronald A. Rasband, i Kuorumit të Dymbëdhjetë Apostujve, dha mësim:

“Duke interpretuar një ëndërr për mbretin babilonas, Nebukadnetsarin, Danieli profetizoi se Kisha e Zotit do të ngrihej në ditët e fundit si një gur i vogël i ‘shkëput[ur] nga mali, jo nga dora e njeriut’ [Daniel 2:45]. ‘Jo nga dora e njeriut’, do të thotë që me anë të ndërhyrjes hyjnore, Kisha e Zotit do të rritet në madhësi derisa të mbushë gjithë tokën dhe ‘nuk do të shkatërrohet kurrë … [por] do të ekzistojë përjetë’ [Daniel 2:44].” (“Përmbushja e Profecisë”, Liahona, maj 2020, f. 75)

Çfarë do të thotë që guri do ta mbushë të tërë tokën?

Profeti Jozef Smith (1805–1844) tregoi:

“Standardi i së Vërtetës është vendosur; asnjë dorë mëkatare nuk mund ta ndalojë punën të përparojë; përndjekjet mund të egërsohen, turmat mund të bashkohen, armiqtë mund të mblidhen, shpifja mund të përgojojë, por e vërteta e Perëndisë do të shkojë përpara me guxim, me fisnikëri dhe e pavarur derisa ajo të ketë përshkuar çdo kontinent, të ketë vizituar çdo rajon, të futet në çdo vend dhe të jetë dëgjuar nga çdo vesh, derisa qëllimet e Perëndisë të përmbushen dhe Jehova i Madh të thotë se puna u krye.” (Mësimet e Presidentëve të Kishës: Jozef Smith [2009], f. 147)

Përse është e rëndësishme Rivendosja e Kishës së Jezu Krishtit të Shenjtorëve të Ditëve të Mëvonshme?

Presidenti Xhefri R. Holland, i Kuorumit të Dymbëdhjetë Apostujve, dha mësim:

“Po, mesazhi ynë është me siguri Shlyerja e Jezu Krishtit dhe gjithçkaje që ajo përfaqëson, por nuk kemi asnjë mënyrë për ta bërë atë dhuratë të papërshkrueshme të arritshme ose shlyese, ose të efektshme në jetën e njerëzve nëse nuk shpallim Rivendosjen në ditët e mëvonshme të së vërtetës hyjnore dhe të priftërisë qiellore. Hiqni Jozef Smithin dhe Vegimin e Parë, hiqni ngjarjet që pasuan, hiqni një rivendosje të drejtpërdrejtë nga qielli dhe çfarë mbetet? Nuk mbetet shumë – të paktën jo mjaftueshëm për të na dalluar nga mijëra grupet e tjera të mira të njerëzve.” (“Testify of the Restoration”, New Era, prill 2017, f. 3–4)

Çfarë mbretërish të tjera mund të përfaqësohen nga figura që pa mbreti Nebukadnetsar?

Nëse nxënësit dëshirojnë të mësojnë më shumë rreth asaj që përfaqësojnë mbretëritë e tjera të përmendura te Daniel 2:39–43, ata mund të lexojnë atë që dha mësim Presidenti Spenser W. Kimball (1895–1985) në bisedën e tij “The Stone Cut Without Hands” (Ensign, prill 1976, f. 8).

Veprimtari Plotësuese të të Mësuarit

Fillim ndryshe

Disa të rinj mund shqetësohen për ligësinë dhe përhapjen e të keqes anembanë botës. Për t’i ndihmuar ata t’i drejtojnë sytë te Zoti dhe jo te shqetësimet e tyre, merreni parasysh ta nisni orën mësimore me thënien vijuese nga Presidenti Gordon B. Hinkli (1910–2008):

“Nëse ndonjëherë besimi juaj priret të dobësohet ndërsa shihni marshimin përpara të ligësisë dhe shtypjes, lexojeni përsëri historinë e Danielit që, duke vendosur mirëbesimin e tij te ‘Perëndi[a] në qiell që zbulon sekretet’ [Daniel 2:28], interpretoi ëndrrën e Nebukadnetsarit.” (“Be Not Afraid, Only Believe”, Ensign, shkurt 1996, f. 4)

Mund t’i ftoni më pas nxënësit të studiojnë te Daniel 2 duke e përdorur këtë këndvështrim të përjetshëm ndërsa kërkojnë të vërtetat që mund të mësojnë nga historia. Ftojini ata të marrin parasysh mënyrën se si ajo që mund të mësojnë mund t’ua forcojë besimin pavarësisht nga ligësia që shohin përreth tyre.

Shkrime të shenjta të Dhiatës së Vjetër për Rivendosjen

Shkrimet e shenjta vijuese mund t’i ndihmojnë nxënësit të përcaktojnë profeci në Dhiatën e Vjetër rreth Rivendosjes. Ju mund t’i përdorni këto së bashku me proklamatën mbi Rivendosjen në pjesën e mësimit të titulluar “Guri rrokulliset”. Nxënësit mund të zgjedhin një referencë për ta studiuar dhe përcaktuar një të vërtetë ose ngjarje të Rivendosjes që gjejnë në të.

• Jeremia 16:14–16 (mbledhja e Izraelit nëpërmjet punës misionare)

• Ezekiel 37:15–19 (Bibla dhe Libri i Mormonit bëhen bashkë si dëshmitarë për Jezu Krishtin)

• Amosi 3:7 (profetët)

Gjithashtu, mund të shtoni Joseph Smith – Historia 1:16–17 (Vegimi i Parë) te mundësitë që nxënësit t’i studiojnë.

Ungjilli i Jezu Krishtit mbush tokën

Pasi nxënësit të kenë zbuluar se guri te Daniel 2 përfaqëson Kishën e Jezu Krishtit të Shenjtorëve të Ditëve të Mëvonshme, ju mund t’i ndihmoni ata të shohin rritjen e saj anembanë botës. Për ta bërë këtë, mund të paraqitni një grafik si vijuesi në tabelë:

	Anëtarët e Kishës	Kunjet	Tempujt e përkushtuar
6 prill 1830	Anëtarët e Kishës 6	Kunjet 0	Tempujt e përkushtuar 0
1880	Anëtarët e Kishës 133 628	Kunjet 23	Tempujt e përkushtuar 1
1930	Anëtarët e Kishës 670 017	Kunjet 104	Tempujt e përkushtuar 7
1980	Anëtarët e Kishës 4 639 822	Kunjet 1218	Tempujt e përkushtuar 19
Sot	Anëtarët e Kishës	Kunjet	Tempujt e përkushtuar

Çdo vit, botimi i majit i revistës Liahona përmban një raport statistikor të vitit të mëparshëm. Nxënësit mund ta përdorin këtë për të plotësuar kolonat “Anëtarët e Kishës” dhe “Kunjet” në rreshtin e fundit. Nxënësit mund të gjejnë numrin e tempujve të përkushtuar te lista e tempujve në ChurchofJesusChrist.org duke klikuar shigjetën poshtë te “Status” [“Gjendja”]. Më pas, mund t’i vini nxënësit të tregojnë informacionin që gjejnë për rreshtin “Sot”.

Përndryshe, mund t’u tregoni nxënësve rritjen e Kishës së Jezu Krishtit gjatë vitit 2017 duke vënë materialin filmik “The Gospel Shall Roll Forth” [“Ungjilli do të Ecë Përpara”] (2:47).

Marrja e ndihmës së Perëndisë

Para se nxënësit ta lexojnë interpretimin e ëndrrës së mbretit Nebukadnetsar, ata mund të lexojnë rreth mënyrës se si e mori Danieli urtësinë për ta interpretuar atë. Ftojini nxënësit të lexojnë te Daniel 2:17–23, duke kërkuar atë që bëri Danieli për të marrë zbulesë nga Ati Qiellor. Ju mund t’i ftoni nxënësit të mendojnë se çfarë mund të bëjnë për të ndjekur shembullin e Danielit. Ata mund të marrin parasysh edhe rrethanat me të cilat përballen, ku do të kishin nevojë për zbulesë nga Ati Qiellor.