Daniel 1–7: Mësimi 145

Daniel 6

Gjetja e të Vërtetave të Ungjillit në Shkrimet e Shenjta

Cila histori nga Dhiata e Vjetër të ka mësuar një parim kuptimplotë të ungjillit? Jezu Krishti Vetë e përdori Dhiatën e Vjetër për t’i ndihmuar dishepujt e Tij të kuptonin mësimet e Tij (për shembull, shih te Lluka 4:24–27). Një histori e fuqishme që ilustron shumë të vërteta të ungjillit është rrëfimi i besimit dhe i mirëbesimit të Danielit te Zoti, edhe kur u përball me gropën e luanëve. Ky mësim mund t’i ndihmojë nxënësit t’i përcaktojnë dhe t’i shpërndajnë të vërtetat e ungjillit nga kapitulli te Daniel 6.

Përgatitja e nxënësve: Ftojini nxënësit të reflektojnë mbi historitë nga shkrimet e shenjta që i kanë mësuar nga Dhiata e Vjetër në studimin e tyre këtë vit. Ata mund të përzgjedhin një histori që ka qenë kuptimplotë për ta dhe të përgatiten për të treguar një të vërtetë të ungjillit që historia i ndihmoi ta kuptojnë.

Veprimtari të Mundshme të të Mësuarit

Morali i historisë

Për t’i ndihmuar nxënësit të ushtrojnë përcaktimin e moralit të një historie, përzgjidhni një përrallë të zonës ose tregim popullor. Për shembull, mund të përdorni një tregim si “Rosaku i Shëmtuar”. Si një alternativë, mund të shfaqni materialin filmik “Things That Matter Most” [“Gjërat që Kanë më Shumë Rëndësi”] nga kodi kohor 0:00 deri në 0:22, në dispozicion në ChurchofJesusChrist.org. Pastaj bëni pyetjet vijuese:

• Çfarë mesazhi mund të japë mësim ky tregim?

• Si mund ta ilustrojë ai mesazh një të vërtetë rreth Jezu Krishtit ose ungjillit të Tij?

Ashtu siç mund të gjejmë të vërteta në përrallat dhe tregimet e zakonshme, ne mund të mësojmë të gjejmë të vërteta të rëndësishme të ungjillit në rrëfimet e frymëzuara të shkrimit të shenjtë që Ati Qiellor dhe Jezu Krishti i kanë ruajtur për ne.

Për të na ndihmuar të kuptojmë mënyrën se si historitë e shkrimit të shenjtë japin mësim të vërteta të ungjillit, Plaku Xhej E. Xhensen, i Të Shtatëdhjetëve, dha mësim:

“Ndërsa lexoni dhe studioni historitë [e shkrimit të shenjtë], ju do të shihni një fjalë, një frazë, ose një parim që duket aq i zbatueshëm sot, sa ç’ishte në të kaluarën. Ndërsa e vazhdoni studimin tuaj me lutje, do të bëhen të dukshme parime të tjera. Ndërsa i bashkoni parimet, ju do të filloni të mbyllni hendekun ndërmjet profetëve dhe njerëzve që jetuan në të kaluarën – ata-atje-atëherë – dhe neve në kohën tonë – unë-këtu-tani.” (“Scripture Stories as Patterns for Our Lives”, Ensign, korrik 2009, f. 21)

• Çfarë të bën përshtypje nga mesazhi i Plakut Xhensen?

• Cili tregim i Dhiatës së Vjetër të ndihmoi ta kuptosh Jezu Krishtin ose ungjillin e Tij më mirë?

Vetëvlerësimi vijues mund t’i ndihmojë nxënësit të përzgjedhin pjesën e zotësisë së përcaktimit të të vërtetave në historitë e shkrimit të shenjtë që mund ta ushtrojnë sot.

Në një renditje nga 1 deri në 5, vlerëso sigurinë tënde në përdorimin e zotësive vijuese të studimit të shkrimit të shenjtë:

• Unë mund të përcaktoj të vërteta të ungjillit në një histori të shkrimit të shenjtë.

• Unë mund të shoh me lehtësi mënyrën se si një histori e shkrimit të shenjtë jep mësim rreth Jezu Krishtit.

• Unë mund t’i zbatoj historitë e shkrimit të shenjtë në jetën time.

• Unë mund t’ua shpërndaj me efektshmëri të tjerëve atë që mësoj nga historitë e shkrimit të shenjtë.

Sot ti do të studiosh një tregim në librin e Danielit dhe do të shpjegosh atë që mund të mësosh prej tij. Ti mund t’i përqendrosh përpjekjet e tua te zotësia ku ndihesh më pak i/e sigurt. Ftoje Frymën e Shenjtë të të ndihmojë ta rritësh aftësinë për të përcaktuar të vërteta në historitë e shkrimit të shenjtë dhe për t’ua mësuar të tjerëve atë që mëson rreth Jezu Krishtit, jetës së Tij dhe ungjillit të Tij.

Danielin e hedhin në gropën e luanëve

Shumë vjet pasi Danieli dhe shokët e tij u çuan robër në Babiloni, kombi u pushtua nga medët dhe persianët. Dari, një medas, u bë mbret i Babilonisë (shih te Daniel 5:30–31).

Veprimtaria vijuese mund t’i ndihmojë nxënësit të ushtrojnë përcaktimin e të vërtetave të ungjillit në historitë e shkrimit të shenjtë duke studiuar rrëfimin e Danielit që hidhet në gropën e luanëve (shih te Daniel 6). Mund të jetë e dobishme për nxënësit që të kenë një vështrim të përgjithshëm të shkurtër të tregimit para se të kërkojnë të vërtetat e ungjillit në të. Sa vijon janë disa mënyra se si mund ta përmblidhni tregimin:

1. Ju mund t’i vini nxënësit ta tregojnë tregimin, duke i organizuar ata në grupe për të lexuar një pjesë. Secili grup mund ta përmbledhë më pas pjesën e vet të tregimit për klasën. Një mënyrë për ta ndarë leximin do të ishte:

   Daniel 6:1–5

   Daniel 6:6–11

   Daniel 6:12–17

   Daniel 6:18–23

   Daniel 6:24–28

2. Ju mund ta përmblidhni të tërë tregimin për klasën. Nëse janë në dispozicion, mund të përdorni figurat që gjenden në artikullin “Daniel and the Lions” [“Danieli dhe Luanët”] (Friend, nëntor 2018, FJ4–FJ6) ose materialin filmik “Daniel and the Lions’ Den” [“Danieli dhe Gropa e Luanëve”] (1:46), në dispozicion në ChurchofJesusChrist.org, për t’ju ndihmuar ta përmblidhni tregimin.

Për t’i ndihmuar nxënësit të ushtrojnë përcaktimin e parimeve të ungjillit nga historitë e shkrimit të shenjtë, përdorni fletushkën “Historitë nga Shkrimet e Shenjta Japin Mësim të Vërtetat e Ungjillit”. Për shkak se nxënësit do t’ia paraqesin klasës atë që mësojnë, më e mira do të ishte t’i vini ata të punojnë me një partner ose në grupe të vogla. Merreni parasysh të vendosni bashkë nxënës që mund të ndihen në ankth lidhur me paraqitjen, me nxënës që janë më të lirshëm.

Ndërsa nxënësit e përdorin fletushkën për të përgatitur mësimet e tyre, ju mund të lëvizni nëpër klasë për të parë çfarë të vërtetash të ungjillit po gjejnë. Nëse ata kanë vështirësi, merreni parasysh se si mund t’i ndihmoni të mësojnë t’i përcaktojnë të vërtetat në tregim. Shembuj të të vërtetave që ata mund të përcaktojnë janë:

• Si dishepuj të Krishtit, ne do të përballemi me kundërshti për shkak të bindjeve tona (Daniel 6:1–5).

• Zoti do t’i bekojë përpjekjet tona kur i bëjmë ballë presionit të kësaj bote. (Daniel 6:6–16).

• Ndërsa bëjmë atë që është e drejtë dhe i mirëbesojmë Zotit, shembulli ynë i drejtë mund të ndikojë tek të tjerët (Daniel 6:16–28).

Tregoje atë që ke mësuar

Pasi nxënësit ta kenë plotësuar fletushkën, ftojini ata t’ia japin mësimin që përgatitën një grupi tjetër ose klasës. Nëse nxënësit nuk tregojnë pjesë të tregimit që u kujtojnë Jezu Krishtin, ju mund të vini në dukje disa krahasime të tilla si vijueset:

• Danieli dhe Jezusi të dy e bënë vullnetin e Atit Qiellor, edhe kur u përballën me vdekjen (shihni te Daniel 6:7, 10; Gjoni 6:38).

• Danieli dhe Jezusi dolën të dy të gjallë në mënyrë të mrekullueshme nga një gropë që ishte e mbuluar me një gur (shihni te Daniel 6:17, 23; Marku 15:46; 16:4–6).

Ju mund t’i inkurajoni nxënësit t’i çojnë mësimet që përgatitën në shtëpi dhe t’ia tregojnë ato një pjesëtari të familjes ose një shoku.

Për ta përmbyllur orën mësimore, merreni parasysh të tregoni mënyrën se si jeni bekuar nga mesazhet e Jezu Krishtit ose ungjillit të Tij nga historitë e shkrimit të shenjtë. Ftojini nxënësit të vazhdojnë të kërkojnë mbresa nga Fryma e Shenjtë për t’i ndihmuar ata të shohin të vërteta të ungjillit në studimin e tyre vetjak të shkrimeve të shenjta.

Burime Shtesë

Si mund ta tregojmë guximin e Danielit sot?

Presidenti Tomas S. Monson (1927–2018), tregoi:

“Guximi vjen në shumë forma. Autori i krishterë Çarls Suindoll shkroi: ‘Guximi nuk kufizohet në fushën e betejës … ose në kapjen me trimëri të një vjedhësi në shtëpinë tuaj. Provat e vërteta të guximit janë shumë më të heshtura. Ato janë prova të brendshme, si të qëndruarit besnikë kur askush nuk po vështron, … si të qëndruarit i vetëm kur jeni keqkuptuar’ [Hal Urban, Choices That Change Lives (2006), f. 122]. Unë do të shtoja se ky guxim i brendshëm gjithashtu përfshin bërjen e asaj që duhet edhe pse mund të kemi frikë, mbrojtjen e bindjeve tona përballë rrezikut të përqeshjes dhe ruajtjen e atyre bindjeve edhe kur kërcënohemi me humbjen e miqve ose të gjendjes shoqërore. Ai, i cili mbron vendosmërisht atë që është e drejtë, duhet të rrezikojë që me raste të kundërshtohet dhe të bëhet i papëlqyeshëm.

Teksa shërbeja në Flotën Detare të Shteteve të Bashkuara në Luftën II Botërore, mësova për veprime të guximshme, raste trimërie dhe shembuj guximi. Një rast, të cilin nuk do ta harroj kurrë, ishte guximi i heshtur i një detari 18-vjeçar – jo i fesë sonë – i cili nuk ishte tepër krenar për t’u lutur. Nga 250 burra në kompani, ai ishte i vetmi që çdo natë binte në gjunjë pranë shtratit të tij, nganjëherë në mes të talljeve të kërcënuesve dhe përqeshjeve të mosbesuesve. Me kokë të ulur, ai i lutej Perëndisë. Kurrë nuk u lëkund. Kurrë nuk u ligështua. Ai kishte guxim.” (“Ji i Fortë dhe Guximtar”, Liahona, maj 2014, f. 67)

Presidenti Xhefri R. Holland, i Kuorumit të Dymbëdhjetë Apostujve, tha:

“[J]u një ditë do ta gjeni veten të thirrur për ta mbrojtur besimin tuaj apo ndoshta për të duruar njëfarë abuzimi vetjak, thjesht ngaqë jeni anëtar i Kishës së Jezu Krishtit të Shenjtorëve të Ditëve të Mëvonshme. Çaste të tilla do të kërkojnë si kurajë edhe mirësjellje nga ana juaj. …

… Ju mund të pyesni veten nëse ia vlen të mbani një qëndrim moral të guximshëm në shkollën e mesme apo të shkoni në një mision, vetëm që t’i shihni bindjet tuaja më të vyera të fyhen ose të ndeshen me shumë gjëra në një shoqëri e cila ndonjëherë e përqesh një jetë përkushtimi fetar. Po, ia vlen ajo. …

… Jini të fortë. Jetojeni ungjillin me besnikëri edhe pse të tjerët përreth jush nuk e jetojnë. Mbrojini bindjet tuaja me mirësjellje dhe me dashamirësi, por mbrojini ato.” (“Çmimi – dhe Bekimet – e të Qenit Dishepull”, Liahona, maj 2014, f. 6, 7, 9)

Veprimtari Plotësuese të të Mësuarit

Jezusi dha mësim me histori të shkrimit të shenjtë nga Dhiata e Vjetër

Para se të përgatitin mësimet e tyre nga kapitulli te Daniel 6, nxënësit mund të kenë dobi nga të parit që Jezu Krishti shpesh përdori histori nga Dhiata e Vjetër, për t’ua dhënë mësim të vërtetat e ungjillit dëgjuesve të Tij. Ftojini nxënësit të studiojnë një nga fragmentet vijuese të shkrimit të shenjtë, duke kërkuar se si i përdori Jezusi tregimet e Dhiatës së Vjetër për të dhënë mësim të vërteta të rëndësishme:

• Mateu 12:38–40 (Jona; shihni te Jona 1:17)

• Mateu 24:36–39 (Noeu; shihni te Zanafilla 6:13–22)

• Lluka 4:24–27 (një grua në Sareptë; shihni te 1 Mbretërve 17:1, 8–16; dhe Naamani; shihni te 2 Mbretërve 5:1–14)

• Lluka 17:28–33 (gruaja e Lotit; shihni te Zanafilla 19:24–26)

• Doktrina e Besëlidhje 121:7–10 (Jobi; shihni vajtimin e Jobit për mënyrën se si e trajtuan miqtë e tij te Jobit 6:14–15)

Pasi nxënësit ta kenë shqyrtuar fragmentin që përzgjodhën, ju mund të ftoni një diskutim duke përdorur pyetje të tilla si vijueset:

• Çfarë mesazhi mund të ketë dhënë mësim Jezusi me këtë tregim?

• Si mund ta drejtojë ky tregim i Dhiatës së Vjetër dëgjuesin te Shpëtimtari dhe ungjilli i Tij?

Një “gropë luanësh” personale

Merreni parasysh t’i vendosni nxënësit në grupe të vogla dhe të vizatoni në tabelë një luan për secilin grup. Ftojeni secilin grup që të diskutojë “gropa luanësh” (sfida) të ndryshme me të cilat mund të përballet dikush pasi zgjedh të jetë besnik sot. Pas një kohe të mjaftueshme, ftojeni një nxënës nga secili grup të vijë në tabelë dhe të emërtojë një luan me sfidat që diskutoi grupi i tij. Kërkojuni nxënësve të tregojnë një veprim besnik që mund të bëjë dikush për t’iu përgjigjur sfidave. Nxënësit mund të diskutojnë pyetje si vijueset:

• Përse do të zgjidhnit të jeni besnikë ndaj Zotit po ta dinit se mund të përjetoni disa nga këto sfida si rrjedhojë?

• Kur ju ka ndihmuar Zoti ju ose dikë që ju njihni të duroni ose të kapërceni një sfidë që erdhi si rezultat i të qenit besnik ndaj Tij?

Ftojini nxënësit të përsiatin situatat në jetën e tyre ku mund të përjetojnë sfida ngaqë janë besnikë ndaj Zotit. Inkurajojini ata të jenë besnikë ndaj Zotit në ato situata dhe të dëshmojnë se, ndërsa janë besnikë, Zoti do t’i ndihmojë ata.

Shembuj të kurajës morale

Për t’i ndihmuar nxënësit ta kuptojnë mënyrën se si Zoti i mbron shërbëtorët e Tij në kohën tonë, mund të jepni një nga shembujt e renditur më poshtë. Nëse e bëni, sigurohuni të sqaroni se, megjithëse ka raste që Perëndia i mbron të drejtët, Alma 60:13 na kujton se ka raste të tjera që Zoti e lejon edhe të drejtin të vuajë.

Dy motra misionare u mbrojtën në mënyrë të mrekullueshme nga lëndimi. Plaku Kristoferson, i Kuorumit të Dymbëdhjetë Apostujve, e tregoi këtë histori në materialin filmik “When Thou Art Converted” [“Kur të Jesh Kthyer në Besim”] (kodi kohor 8:44 deri në 10:02).

Jozef F. Smithi 19-vjeçar u përball me një turmë të dhunshme që e pyeti nëse ishte një anëtar i Kishës së Jezu Krishtit të Shenjtorëve të Ditëve të Mëvonshme: “Preparation of Joseph F. Smith: True Blue, Through and Through” [“Përgatitja e Jozef F. Smithit: Besnikëri e Patundur, Nga Fillimi Deri në Fund”] (1:31).

Një instruktor ushtarak i ashpër e pyeti Plakun Leri Eko Houk, të Të Shtatëdhjetëve, nëse besonte në Librin e Mormonit: “Come unto Me, O Ye House of Israel” [“Eja Tek Unë, O Ti Shtëpi e Izraelit”], (kodi kohor 0:00 deri në 3:05).