Daniel 1–7: Mësimi 144

Daniel 3

“Perëndia Ynë … Është në Gjendje të na Çlirojë. … Por Edhe Sikur të Mos e Bënte”

Ndonjëherë Zoti mund të na çlirojë në mënyrë të mrekullueshme nga sprovat tona. Në raste të tjera, Ai mund të mos na çlirojë në mënyrën ose në kohën që shpresojmë. Sidoqoftë, ne mund të përpiqemi të jemi si Shadraku, Meshaku dhe Abed-negoja dhe të mirëbesojmë te Zoti, pavarësisht se si dhe kur Ai zgjedh të na bekojë. Ky mësim mund t’i ndihmojë nxënësit të ndiejnë një dëshirë për të mirëbesuar te Jezu Krishti pavarësisht nga rezultati.

Përgatitja e nxënësve: Ftojini nxënësit të mendojnë për dishepujt besnikë të Krishtit që u çliruan mrekullisht nga sprovat e tyre. Më pas, vërini ata të mendojnë për dishepuj të tjerë besnikë që nuk u çliruan. Ata mund të përsiatin atë që u mësojnë këto rrëfime rreth mirëbesimit te Zoti.

Veprimtari të Mundshme të të Mësuarit

Ushtrimi i besimit te Jezu Krishti

Merreni parasysh ta filloni orën mësimore duke treguar historinë vijuese rreth djalit të Plakut Bouen, Tajsonit.

Shënim: Varianti në materialin filmik i thënies përfshin informacion shtesë që nuk përfshihet në thënien e shkruar.

Plaku Shein M. Bouen, i Të Shtatëdhjetëve, tregoi përvojën vetjake vijuese:

“Kur qe tetë muajsh, [djali im] Tajsoni kapërdiu një copë shkumës që e kishte gjetur mbi tapet. Shkumësi ngeci në fytin e Tajsonit dhe ai ndaloi së marri frymë. Vëllai i tij më i madh e solli Tajsonin sipër, duke thirrur me furi: ‘Bebja nuk merr frymë. Bebja nuk merr frymë’. Ne filluam t’i aplikonim ringjalljen zemër-mushkëri dhe telefonuam 911 [urgjencën].

Personeli i ndihmës së parë erdhi dhe e çuan Tajsonin me ngut në spital. Në dhomën e pritjes ne vijuam me lutje të zjarrta teksa i përgjëroheshim Perëndisë për një mrekulli.” (“Sepse Unë Jetoj, Edhe Ju do të Jetoni”, Liahona, nëntor 2012, f. 16)

• Si mund të ndikojnë rezultate të mundshme të ndryshme të kësaj situate në besimin e familjes te Perëndia?

Plaku Bouen vazhdoi:

“Pas një periudhe që u duk e gjatë sa një jetë, doktoresha hyri në dhomë dhe tha: ‘Më vjen shumë keq. Nuk ka asgjë më shumë që mund të bëjmë. Mund të qëndroni këtu aq kohë sa t’ju duket e nevojshme.’ Pastaj ajo u largua.

Kur hymë në dhomën ku gjendej i shtrirë Tajsoni, ne pamë topthin tonë të vogël të gëzimit të pajetë. …

Në atë çast dukej sikur kuptimi i jetës sonë kishte marrë fund.” (“Sepse Unë Jetoj, Edhe Ju do të Jetoni”, Liahona, nëntor 2012, f. 16)

Ashtu si familja Bouen, ti mund të kesh përvoja ku Perëndia nuk të bekon ashtu siç kishe shpresuar. Përsiat përvojat që ke pasur ti ose familja jote ku ndjeve se Zoti ose të bekoi, ose nuk të bekoi me rezultatin që doje.

Paraqitja e pyetjeve vijuese mund të ndihmojë.

Bëji vetes pyetjet vijuese:

• Si kanë ndikuar përvojat e tua në besimin tënd tek Ati Qiellor dhe Jezu Krishti?

• A mendon se mund t’u mirëbesosh Atyre, pavarësisht bekimeve që merr ose nuk merr? Përse po ose përse jo?

Ndërsa studion kapitullin te Daniel 3 sot, kushtoji vëmendje çdo mbrese nga Fryma e Shenjtë që mund të ndihmojë të forcohet besimi yt tek Ati Qiellor dhe Jezu Krishti pavarësisht rezultatit.

Një vendim i vështirë

Merreni parasysh t’i shkruani në tabelë emrat: Shadraku, Meshaku dhe Abed-nego. Paraqitni figurën e një idhulli prej ari dhe ftojini nxënësit të tregojnë atë që dinë rreth këtij rrëfimi. Nëse dëshironi, mund ta përmblidhni kontekstin më poshtë me fjalët tuaja.

Mbreti i Babilonisë, Nebukadnetsari, bëri një figurë të madhe, ose statujë, prej ari. Ajo ishte rreth (27,4 metra) e lartë dhe (2,74 metra) e gjerë (shih te Daniel 3:1). Mbreti i urdhëroi të gjithë që të binin përmbys dhe të adhuronin figurën kur luhej një muzikë e caktuar (shih te Daniel 3:4–5). Njerëzit që nuk e adhuronin figurën e artë do të hidheshin në “një furrë zjarri përvëlues” (Daniel 3:6).

Duke marrë parasysh pasojat për mosadhurimin e kësaj figure, përsiat atë që mendon se do të kishe bërë po të ishe atje.

Shadraku, Meshaku dhe Abed-negoja zgjodhën ta nderonin Perëndinë duke mos e adhuruar figurën (shih te Daniel 3:12).

Për t’i ndihmuar nxënësit t’i studiojnë vargjet vijuese, mund të ftoni pesë nxënës të gatshëm të lexojnë rolet e Nebukadnetsarit, Shadrakut, Meshakut, Abed-negos dhe një tregimtar. Nxënësit që lexojnë për Shadrakun, Meshakun dhe Abed-negon mund të lexojnë secili nga një varg te Daniel 3:16–18.

Lexo te Daniel 3:13–18, duke kërkuar atë që mëson nga këta burra rreth besimit te Jezu Krishti.

• Çfarë mësimesh merr rreth besimit te Jezu Krishti?

  Ndihmojini nxënësit të kuptojnë se ne mund ta tregojmë besimin tonë te Jezu Krishti duke mirëbesuar tek Ai pavarësisht rezultatit.

  Merreni parasysh t’i ftoni nxënësit ta shenjojnë frazën “është në gjendje të na çlirojë” (vargu 17). Vini në dukje se njohja e Perëndisë mund të na bekojë me atë që shpresojmë të tregojë besimin tek Ai.

  Më pas, ftojini nxënësit ta shenjojnë frazën “por edhe sikur të mos e bënte” (vargu 18). Pyetini nxënësit se çfarë mësojnë rreth besimit te Perëndia nga gatishmëria e këtyre burrave për të pranuar se Perëndia mund të mos zgjidhte t’i bekonte ata me atë që shpresonin.

• Cili është ndryshimi ndërmjet pasjes së besimit te Jezu Krishti kundrejt besimit te një rezultat?

• Cilat janë situatat e sotme ku dikush do ta kishte të nevojshme të tregonte besimin te Jezu Krishti dhe jo besimin te një rezultat?

Rezultati i besimit tonë

Merreni parasysh të paraqitni figurën e furrës së zjarrit nga fillimi i mësimit. Nxënësit mund t’i studiojnë vargjet vijuese dhe t’i diskutojnë pyetjet më poshtë në dyshe ose në grupe të vogla.

Lexo te Daniel 3:19–28, duke shenjuar fjalët ose frazat që të bëjnë përshtypje nga ajo që përjetuan Shadraku, Meshaku dhe Abed-negoja.

Për t’i ndihmuar nxënësit t’i përfytyrojnë këto vargje, mund të shfaqni materialin filmik “Shadrach, Meshach, and Abed-nego” [“Shadraku, Meshaku dhe Abed-nego”] (1:39), në dispozicion në ChurchofJesusChrist.org.

• Çfarë të bëri përshtypje nga kjo histori?

• Çfarë mëson rreth Perëndisë nga ky rrëfim?

Mund të ndihmojë të shpjegoni se edhe pse Perëndia i çliroi Shadrakun, Meshakun dhe Abed-negon, Ai mund të mos na çlirojë gjithmonë nga rezultatet negative. Për ta demonstruar këtë, nxënësit mund të plotësojnë veprimtarinë vijuese.

Mendo për rrëfimet e shkrimit të shenjtë ku njerëzit ushtruan besim te Jezu Krishti dhe prapë përjetuan rezultate negative.

Merreni parasysh të shkruani Por edhe sikur të mos e bënte … në tabelë. Më pas, nxënësit mund të renditin poshtë kësaj fraze njerëzit që u erdhën në mendje. Nëse e lejon koha, ata mund të kërkojnë rrëfimet për këta njerëz në shkrimet e shenjta, duke kërkuar prova që këta njerëz mirëbesuan te Perëndia. Në vijim janë shembuj tek të cilët mund t’i drejtoni nxënësit sipas nevojës: Nefi (shihni te 1 Nefi 18:10–16), Abinadi (shihni te Mosia 17:9–20), Jozef dhe Hajrëm Smithi (shihni te Doktrina e Besëlidhje 135:1), ose individë të ndryshëm të drejtë (shihni te Hebrenjve 11:36–40).

• Si të ndihmojnë këto rrëfime të mirëbesosh te Zoti pavarësisht rezultatit?

• Çfarë di ti rreth Atit Qiellor dhe Jezu Krishtit që të ndihmon të duash të mirëbesosh tek Ata pavarësisht rezultatit?

Varësia te Krishti

Merreni parasysh t’u kujtoni nxënësve përvojën e Plakut Bouen. Thënia vijuese mund t’i ndihmojë ata të shohin se si ai mirëbesoi te Zoti pavarësisht rezultatit që përjetoi.

Plaku Bouen vazhdoi duke treguar përvojën e tij:

“Teksa ndjeva të më gërryenin faji, zemërimi dhe keqardhja për veten, u luta që zemra ime të mund të ndryshonte. Përmes shumë përvojash të shenjta vetjake, Zoti më dha një zemër të re dhe megjithëse ende ndihesha i vetmuar dhe plot dhembje, tërë perspektiva ime ndryshoi. M’u dha njohuria që nuk më kishin vjedhur, por përkundrazi një bekim i madh më priste nëse do të tregoja besnikëri.

Jeta ime filloi të ndryshonte dhe qeshë në gjendje të shihja përpara me shpresë, sesa të shihja prapa me dëshpërim. …

Unë dëshmoj se për shkak të Tij, madje Shpëtimtarit tonë, Jezu Krishtit, ato ndjenja pikëllimi, vetmie e dëshpërimi një ditë do të përpihen në një plotësi gëzimi. Dëshmoj se mund të mbështetemi tek Ai.” (“Sepse Unë Jetoj, Edhe Ju do të Jetoni”, Liahona, nëntor 2012, f. 17)

• Si mund të të ndihmojë përvoja e Plakut Bouen?

• Kur ke treguar ti ose dikush që ti njeh besim tek Ati Qiellor dhe Jezu Krishti duke mirëbesuar tek Ata pavarësisht rezultatit?

Në ditarin tënd të studimit, shkruaj atë që të ndihmon të mirëbesosh tek Ati Qiellor dhe Jezu Krishti pavarësisht rezultatit. Ti mund të përfshish mënyrën se si mësimet që mësove nga kapitulli te Daniel 3 mund të të ndihmojnë në sprovat me të cilat përballesh ose me atë që shpreson të mbash mend në të ardhmen.

Ju mund t’i ftoni nxënësit e gatshëm të flasin. Merreni parasysh ta përmbyllni me dëshminë ose ndjenjat tuaja rreth mirëbesimit te Zoti.

Burime Shtesë

Përse ndonjëherë përjetoj rezultate negative pasi ushtroj besim?

Presidenti Xhefri R. Holland, i Kuorumit të Dymbëdhjetë Apostujve, dha mësim:

“Besim do të thotë t’i mirëbesojmë Perëndisë në kohë të mira e të këqija, edhe nëse kjo përfshin disa vuajtje derisa ta shohim krahun e Tij të zbulohet në emrin tonë. Kjo mund të jetë e vështirë në botën tonë të sotme kur shumë njerëz kanë arritur në pikën që besojnë se gjëja më e mirë që mund të ndodhë në jetë është që ta shmangim tërë vuajtjen, se askush nuk duhet të ketë ankth ndonjëherë për asgjë. Por ajo bindje nuk do të na çojë kurrë te ‘mas[a] e shtatit të plotësisë së Krishtit’ [Efesianëve 4:13]. …

… Krishterimi sjell rehati, por shpesh nuk është i rehatshëm. Shtegu drejt shenjtërisë dhe lumturisë këtu dhe pas kësaj jete është i gjatë dhe nganjëherë shkëmbor. Kërkon kohë dhe këmbëngulje për të ecur në të. Por, sigurisht, shpërblimi për bërjen e kësaj është monumental.” (“Duke Pritur për Zotin”, Liahona, nëntor 2020, f. 116–117)

Çfarë do të thotë të ushtroj besim te Jezu Krishti kur përballem me sprova?

Plaku Dejvid A. Bednar, i Kuorumit të Dymbëdhjetë Apostujve, shpjegoi:

“Besimi i fortë te Shpëtimtari është pranimi me nënshtrim i vullnetit të Tij dhe kohës së caktuar prej tij në jetën tonë – edhe kur rezultati nuk është ai që shpresonim apo dëshironim.” (“Që të ‘Mos … Mpakem[i]’ (DeB 19:18)” [takimi shpirtëror i Sistemit Arsimor të Kishës për të rinjtë në moshë madhore, 3 mars 2013], Gospel Library [Biblioteka e Ungjillit])

Daniel 3:18. Çfarë mund të mësoj rreth besimit nga fraza “por edhe sikur të mos e bënte”?

Plaku Denis E. Simons, i Të Shtatëdhjetëve, tregoi:

“Ne duhet të kemi të njëjtin besim si Shadraku, Meshaku dhe Abed‑negoja.

Perëndia ynë do të na çlirojë nga përqeshja dhe përndjekja, por edhe sikur të mos e bënte. … Perëndia ynë do të na çlirojë nga sëmundja dhe lëngata, por edhe sikur të mos e bënte. … Ai do të na çlirojë nga vetmia, depresioni ose frika, por edhe sikur të mos e bënte. … Perëndia ynë do të na çlirojë nga kërcënimet, akuzat dhe pasiguria, por edhe sikur të mos e bënte. … Ai do të na çlirojë nga vdekja ose dëmtimi i njerëzve tanë të dashur, por edhe sikur të mos e bënte, … ne do të mirëbesojmë te Zoti.

Perëndia ynë do të kujdeset që ne të marrim drejtësi dhe paanësi, por edhe sikur të mos e bënte. … Ai do të sigurohet që ne të marrim dashuri dhe pranim, por edhe sikur të mos e bënte. … Do të na japë një bashkëshort/e të përsosur dhe fëmijë të drejtë e të bindur, por edhe sikur të mos e bënte, … ne do të kemi besim te Zoti Jezu Krisht, duke e ditur që, në qoftë se bëjmë gjithçka mundemi, ne, në kohën e Tij dhe në mënyrën e Tij, do të çlirohemi dhe do të marrim gjithçka që Ai ka.” (“Por Edhe Sikur të Mos e Bënte …”, Liahona, maj 2004, f. 75)

Veprimtari Plotësuese të të Mësuarit

Fillim ndryshe

Për një mënyrë tjetër për ta filluar mësimin, merreni parasysh t’i shkruani frazat vijuese në tabelë:

Unë do të mirëbesoj te Perëndia për sa kohë që nuk duhet të vuaj.

Unë do të mirëbesoj te Perëndia për sa kohë që Ai u përgjigjet lutjeve të mia në mënyrën që shpresoj.

• Përse mund të tundohen njerëzit që të mendojnë në këtë mënyrë?

• Si mund të ndikojë kjo mendësi në marrëdhëniet e dikujt me Atin Qiellor dhe Jezu Krishtin?

Për t’i ndihmuar nxënësit të vlerësojnë mirëbesimin e tyre te Perëndia, merreni parasysh t’i ftoni ata të përsiatin pyetjet vijuese të vetëvlerësimit:

• Si do ta përshkruaje mirëbesimin tënd te Perëndia? Përse?

• Sa mirëbeson tek Ai kur gjërat nuk shkojnë siç shpreson?

Një shembull i ditëve të sotme

Për t’i ndihmuar nxënësit të shohin një shembull të ditëve të sotme të të vërtetave që jepen mësim te Daniel 3, merreni parasysh të shfaqni materialin filmik “I Was Waiting for God to Answer Me | His Grace” [“Po Prisja që Perëndia të më Përgjigjej | Hiri i Tij”] nga kodi kohor 0:00 deri në 3:26. Nxënësit mund të kërkojnë mënyrën se si e ushtroi gruaja në materialin filmik besimin te Zoti, edhe pse nuk u çlirua nga vuajtja e saj. Mund ta shfaqni këtë material filmik para se të përfundoni historinë e Plakut Bouen në fund të mësimit.

“Bëj Ç’Ësht’ e Drejt’”

Për t’i ndihmuar nxënësit të duan të mirëbesojnë te Zoti pavarësisht pasojave, mund t’i ftoni ata të këndojnë ose të dëgjojnë himnin “Bëj Ç’Ësht’ e Drejt’” (4:12). Ata mund të zgjedhin fjalët ose frazat që i ndihmojnë të duan të mirëbesojnë te Shpëtimtari pavarësisht pasojave.

Qëndrimi i patundur në besimin tonë te Jezu Krishti

Për të theksuar rëndësinë e qëndrimit të patundur në besimin tonë te Krishti, ftojini nxënësit të shpjegojnë se si ngjason bota jonë sot me Babiloninë në kohën e Danielit. Për shembull, ata mund të tregojnë tundimet që shohin rreth tyre ose mënyrën se si mund të ndiejnë presion për të bërë lëshime ndaj standardeve të tyre. Ju mund t’i ftoni ata të përsiatin nëse kanë ndier ndonjëherë presion për të bërë lëshime ndaj standardeve ose bindjeve të tyre.

Pas studimit të kapitullit te Daniel 3, mund të bëni pyetjen vijuese:

• Çfarë mësoni nga këta burra që mund t’ju ndihmojë të mirëbesoni te Zoti kur përballeni me kundërshti, tundim ose presion për të bërë lëshime ndaj standardeve tuaja?