« ការអនុវត្តចំណេះចំណានខាងគោលលទ្ធិទី ៤ ៖ អនុវត្តគោលការណ៍នៃការទទួលបានចំណេះដឹងខាងវិញ្ញាណ » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា ( ឆ្នាំ២០២៦ )
« ការអនុវត្តចំណេះចំណានខាងគោលលទ្ធិទី ៤ ៖ អនុវត្តគោលការណ៍នៃការទទួលបានចំណេះដឹងខាងវិញ្ញាណ » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា
យ៉ូស្វេ ១–៨; ២៣–២៤ ៖ មេរៀនទី ៦៤
ការអនុវត្តចំណេះចំណានខាងគោលលទ្ធិទី ៤
អនុវត្តគោលការណ៍នៃការទទួលបានចំណេះដឹងខាងវិញ្ញាណ
ចំណេះចំណានខាងគោលលទ្ធិអាចជួយសិស្សឲ្យសង់គ្រឹះសម្រាប់ជីវិតពួកគេនៅលើព្រះយេស៊ូវគ្រីស្ទ និងដំណឹងល្អរបស់ទ្រង់ ។ មេរៀននេះនឹងជួយសិស្សឲ្យអនុវត្តសេចក្តីពិតដែលមាននៅក្នុងវគ្គចំណេះចំណានខាងគោលលទ្ធិ ហើយរៀន និងអនុវត្តតាមគោលការណ៍ដ៏ទេវភាពសម្រាប់ការទទួលបានចំណេះដឹងខាងវិញ្ញាណ ។
ការរៀបចំសិស្ស ៖ អញ្ជើញសិស្សឲ្យជ្រើសរើសវគ្គបទគម្ពីរចំណេះចំណានខាងគោលលទ្ធិមួយ ដែលពួកគេបានសិក្សានៅឆ្នាំនេះ ។ សូមលើកទឹកចិត្តពួកគេឲ្យគិតអំពីស្ថានភាពជាក់ស្តែង មួយដែលក្មេងវ័យជំទង់ អាចទទួលបានអត្ថប្រយោជន៍ពីការអនុវត្តការបង្រៀននៅក្នុងវគ្គបទគម្ពីរនោះ ។ បញ្ជីនៃវគ្គបទគម្ពីរអាចរកបាននៅក្នុង ឯកសារគោលនៃចំណេះចំណានខាងគោលលទ្ធិ ( ឆ្នាំ២០២៣ ) ។
សកម្មភាពរៀនសូត្រដែលអាចមាន
ការរំឭកចំណេះចំណានខាងគោលលទ្ធិ ៖ អនុវត្ត
ដើម្បីចាប់ផ្ដើមពិភាក្សាអំពីសារៈសំខាន់នៃការអនុវត្តវគ្គចំណេះចំណានខាងគោលលទ្ធិ សូមពិចារណាយក ឬបង្ហាញរូបភាពវត្ថុដែលក្មេងវ័យជំទង់ជាច្រើនអាចស្គាល់ ប៉ុន្តែមិនដឹងពីរបៀបប្រើប្រាស់ ។ ខាងក្រោមនេះជាឧទាហរណ៍ដែលអាចមាន ។ សូមសួរសិស្សថាវត្ថុនីមួយៗគឺជាអ្វី ហើយប្រសិនបើពួកគេដឹងពីរបៀបប្រើប្រាស់វា ។
-
ហេតុអ្វីបានជាវាសំខាន់ក្នុងការមិនគ្រាន់តែដឹងអំពីអ្វីមួយនោះទេ ប៉ុន្តែក៏ត្រូវដឹងពីរបៀបប្រើវាដែរ ?
-
តើគោលការណ៍នេះអាចអនុវត្តចំពោះការសិក្សាវគ្គចំណេះចំណានខាងគោលលទ្ធិរបស់យើងយ៉ាងដូចម្ដេច ?
ថ្ងៃនេះ អ្នកនឹងអនុវត្តដោយប្រើវគ្គចំណេះចំណានខាងគោលលទ្ធិ និងគោលការណ៍នៃការទទួលបានចំណេះដឹងខាងវិញ្ញាណនៅក្នុងស្ថានភាពជីវិតពិត ។ ស្វែងរកការបំផុសគំនិតពីព្រះវិញ្ញាណបរិសុទ្ធ ដើម្បីជួយអ្នករៀនវគ្គបទគម្ពីរ និងគោលការណ៍ទាំងនេះ ហើយអនុវត្តវានៅក្នុងជីវិតរបស់អ្នក ។
សូមពិចារណាអញ្ជើញសិស្សឲ្យរាយបញ្ជីវគ្គចំណេះចំណានខាងគោលលទ្ធិ និងឃ្លាបទគម្ពីរគន្លឹះដែលពួកគេបានសិក្សានៅឆ្នាំនេះ ។ ប្រសិនបើចាំបាច់ សូមមើល ឯកសារគោលនៃចំណេះចំណានខាងគោលលទ្ធិ ( ឆ្នាំ២០២២ ) ។
រៀបចំសិស្សជាក្រុមតូចៗ ហើយផ្តល់ឲ្យក្រុមនីមួយៗនូវក្រដាសមួយសន្លឹក ។ ចាត់តាំង ឬអញ្ជើញក្រុមទាំងឡាយឲ្យជ្រើសរើសវគ្គចំណេះចំណានខាងគោលលទ្ធិមួយ ។ ស្នើឲ្យពួកគេបង្កើតសាច់រឿង ( ឬស្ថានភាព ) ដែលនរណាម្នាក់អាចទទួលបានអត្ថប្រយោជន៍ពីការអនុវត្តគោលលទ្ធិនៅក្នុងវគ្គបទគម្ពីរនោះ ។ ឧទាហរណ៍ សិស្សដែលជ្រើសរើស យ៉ូស្វេ ២៤:១៥ អាចសរសេរសាច់រឿងខាងក្រោមនេះ ៖ « ក្មេងស្រីម្នាក់ត្រូវបានល្បួងក្នុងពិធីជប់លៀងមួយឲ្យធ្វើអ្វីដែលអ្នកដទៃកំពុងធ្វើ ប៉ុន្តែនាងដឹងថាព្រះអម្ចាស់នឹងមិនពេញព្រះទ័យឡើយ » ។ សូមលើកទឹកចិត្តសិស្សកុំឲ្យសរសេរសេចក្ដីយោងបទគម្ពីរនៅលើក្រដាស ប៉ុន្តែត្រូវរៀបចំដើម្បីចែកចាយសេចក្ដីយោងនៅពេលក្រោយ ។
ប្រមូលក្រដាស ។ អ្នកអាចអានសាច់រឿងឲ្យសិស្សក្នុងថ្នាក់ស្ដាប់ ឬចែកចាយវាទៅក្រុមផ្សេងៗ ។
សូមអញ្ជើញសិស្សឲ្យចែកចាយវគ្គចំណេះចំណានខាងគោលលទ្ធិដែលអាចជួយបុគ្គលនោះនៅក្នុងសាច់រឿងនោះ ។ សូមជួយពួកគេឲ្យយល់ថាវគ្គបទគម្ពីរលើសពីមួយអាចទាក់ទងនឹងសាច់រឿងនីមួយៗ ។ សិស្សក៏អាចពិភាក្សាអំពីរបៀបដែលការអនុវត្តគោលលទ្ធិដែលបានបង្រៀនក្នុងវគ្គបទគម្ពីរអាចជួយបុគ្គលនោះពង្រឹងទំនាក់ទំនងរបស់ពួកគេជាមួយព្រះវរបិតាសួគ៌ និងព្រះយេស៊ូវគ្រីស្ទ ។ ប្រសិនបើចាំបាច់ ក្រុមដែលបានសរសេរសាច់រឿងនោះ អាចចែកចាយសេចក្តីយោងបទគម្ពីរដើមដែលពួកគេបានជ្រើសរើស ហើយពន្យល់ពីរបៀបដែលវាអាចជួយក្នុងសាច់រឿងដែលពួកគេបានជ្រើសរើស ។
សូមទុកពេល ២០–៣០ នាទី សម្រាប់សកម្មភាព « រៀន និងអនុវត្តតាមគោលការណ៍នៃការទទួលបានចំណេះដឹងខាងវិញ្ញាណ » នៅខាងក្រោម ។
គំនិតបន្ថែមសម្រាប់ជួយសិស្សអនុវត្តវគ្គបទគម្ពីរចំណេះចំណានខាងគោលលទ្ធិ មាននៅក្នុងឯកសារឧបសម្ព័ន្ធដែលនៅក្រោម « សកម្មភាពរំឭកចំណេះចំណានខាងគោលលទ្ធិឡើងវិញ » ។
រៀន និងអនុវត្តតាមគោលការណ៍នៃការទទួលបានចំណេះដឹងខាងវិញ្ញាណ
មេរៀនដែលនៅសេសសល់ផ្តោតលើការជួយសិស្សឲ្យអនុវត្តគោលការណ៍នៃការទទួលបានចំណេះដឹងខាងវិញ្ញាណទៅក្នុងស្ថានភាពដែលទាក់ទង ។ ជាដំបូង អ្នកអាចនឹងរំឭកគោលការណ៍នៃការទទួលបានចំណេះដឹងខាងវិញ្ញាណឡើងវិញ ។ សកម្មភាពរំឭកដែលបានណែនាំមានដាក់បញ្ចូលនៅក្នុងឯកសារឧបសម្ព័ន្ធនៅពីក្រោម « សកម្មភាពរំឭកចំណេះចំណានខាងគោលលទ្ធិឡើងវិញ » ។ ការពិពណ៌នាអំពីគោលការណ៍ទាំងឡាយមាននៅក្នុង កថាខណ្ឌទី ៥–១២ នៃផ្នែក « ការទទួលបានចំណេះដឹងខាងវិញ្ញាណ » នៃ ឯកសារគោលនៃចំណេះចំណានខាងគោលលទ្ធិ ( ឆ្នាំ២០២៣ ) ។
សូមជញ្ជឹងគិតអំពីតម្រូវការសិស្សរបស់អ្នក ហើយស្វែងរកជំនួយរបស់ព្រះអម្ចាស់ ដើម្បីជ្រើសរើស ឬបត់បែនតាមសាច់រឿងមួយដូចខាងក្រោម ឬដើម្បីបង្កើតសាច់រឿងផ្ទាល់ខ្លួនរបស់អ្នកមួយ ។
សាច់រឿងទាំងពីរគឺមិនពេញលេញ ។ ជួយសិស្សបំពេញចន្លោះចុចៗនៃសាច់រឿងដែលបានជ្រើសរើសតាមរបៀបដ៏សមរម្យ និងមានអត្ថន័យ ។
-
យុវជនម្នាក់ដែលមានឈ្មោះថា [ ឈ្មោះក្មេងវ័យជំទង់ ] កំពុងមានអារម្មណ៍ថា មានសម្ពាធពី [ មនុស្ស ឬក្រុម ] ឲ្យធ្វើខុសនឹងបទបញ្ញត្តិរបស់ព្រះអម្ចាស់ [ បទបញ្ញត្តិមួយដែលក្មេងវ័យជំទង់អាចនឹងមានអារម្មណ៍ប្រាកដនិយមថាត្រូវបានល្បួងឲ្យធ្វើខុស ] ។ គេតែងតែប្រាប់គាត់ជាញឹកញាប់ថា វាមិនមែនជារឿងធំដុំទេ ក្នុងការធ្វើខុសនឹងបទបញ្ញត្តិនេះ ដោយសារ [ ហេតុផលមួយដែលនរណាម្នាក់អាចគិតថា វាមិនល្អក្នុងការធ្វើខុសនឹងបទបញ្ញត្តិនេះ ] ។ [ ឈ្មោះក្មេងវ័យជំទង់ ] មានអារម្មណ៍ច្របូកច្របល់ ហើយមិនដឹងថាត្រូវធ្វើអ្វីនោះទេ ។
-
យុវនារីម្នាក់ដែលមានឈ្មោះ [ ឈ្មោះក្មេងវ័យជំទង់ ] មានចិត្តរីករាយនៅពេលនាងមានអាយុល្មមគ្រប់គ្រាន់ ដើម្បីចាកចេញពីផ្ទះឪពុកម្តាយរបស់នាង ហើយចេញទៅរស់នៅដោយខ្លួនឯង ។ នៅក្នុងផ្ទះឪពុកម្តាយរបស់នាង នាងត្រូវតែគោរពតាមបទបញ្ញត្តិជា [ បទបញ្ញត្តិមួយដែលក្មេងវ័យជំទង់អាចពិតជាមិនចង់គោរពតាមឡើយ ] ។ នាងចង់ធ្វើជាមនុស្សល្អ ប៉ុន្តែនាងមិនដឹងថាតើនាងនឹងបន្តគោរពតាមបទបញ្ញត្តិនោះឬអត់ បន្ទាប់ពីនាងចាកចេញពីផ្ទះនោះ ។ នេះគឺដោយសារតែ [ ហេតុផលមួយដែលមនុស្សម្នាក់ប្រហែលជាមិនចង់គោរពតាមបទបញ្ញត្តិនេះ ] ។
ឥឡូវនេះ សិស្សនឹងអនុវត្តគោលការណ៍នៃការទទួលបានចំណេះដឹងខាងវិញ្ញាណ ដើម្បីជួយបុគ្គលក្នុងសាច់រឿងដែលបានជ្រើសរើស ។ សិស្សក៏អាចធ្វើការជាគូៗ ឬក្រុមតូចៗផងដែរ ។
បង្ហាញគោលការណ៍បីនៃការទទួលបានចំណេះដឹងខាងវិញ្ញាណ ៖
-
ធ្វើសកម្មភាពដោយសេចក្ដីជំនឿ ។
-
ពិនិត្យមើលគោលគំនិត និងសំណួរទាំងឡាយដោយទស្សនវិស័យដ៏អស់កល្បមួយ ។
-
ស្វែងរកការយល់ដឹងបន្ថែមតាមរយៈប្រភពដែលបានតែងតាំងដ៏ទេវភាព ។
សូមអញ្ជើញសិស្សឲ្យពិភាក្សាអំពីសំណួរខាងក្រោម ។
-
-
តើគោលការណ៍នៃការទទួលបានចំណេះដឹងខាងវិញ្ញាណណាខ្លះដែលអ្នកគិតថានឹងមានប្រយោជន៍បំផុតសម្រាប់បុគ្គលនៅក្នុងសាច់រឿងនោះ ? ហេតុអ្វី ?
-
តើវគ្គចំណេះចំណានខាងគោលលទ្ធិមួយណា ឬវគ្គបទគម្ពីរផ្សេងទៀតដែលអ្នកមានអារម្មណ៍ថាអាចជួយបុគ្គលនៅក្នុងសាច់រឿងនោះ ? ហេតុអ្វី ?
បន្ទាប់ពីទុកពេលគ្រប់គ្រាន់ហើយ សូមឲ្យសិស្សចែកចាយអ្វីដែលពួកគេបានពិភាក្សា ។
សូមបង្ហាញរូបភាពដែលមាននៅខាងដើមមេរៀននេះដោយយកចិត្តទុកដាក់ ។ រៀបចំសិស្សជាគូដើម្បីបំពេញសកម្មភាពដូចខាងក្រោម ។
សូមស្រមៃថា បុគ្គលក្នុងសាច់រឿងនេះជ្រើសរើសមិនអើពើនឹងគោលលទ្ធិរបស់ព្រះអង្គសង្គ្រោះឡើយ ។ កំណត់នូវអ្វីដែលអាចកើតឡើងចំពោះពួកគេ ។ បន្ទាប់មក កំណត់នូវអ្វីដែលអាចកើតឡើង ប្រសិនបើពួកគេជ្រើសរើសធ្វើសកម្មភាពតាមគោលលទ្ធិនោះ និងគោលការណ៍នៃការទទួលបានចំណេះដឹងខាងវិញ្ញាណ ។
ក្រោយពីសិស្សមានពេលគ្រប់គ្រាន់ដើម្បីពិភាក្សានូវចម្លើយរបស់ពួកគេហើយ សូមអញ្ជើញសិស្សពីរបីនាក់ចែកចាយគំនិតរបស់ពួកគេជាមួយនឹងសិស្សក្នុងថ្នាក់ ។ នៅពេលសិស្សចែកចាយ សូមពិចារណាសួរសំណួរតាមដានដូចតទៅ ដើម្បីជួយណែនាំការពិភាក្សាក្នុងថ្នាក់ដ៏មានអត្ថន័យ ៖
-
តើអ្នកនឹងបន្ថែមអ្វីទៀតទៅលើអ្វីដែលមិត្តរួមថ្នាក់របស់អ្នកបានចែកចាយ ?
-
តើគោលការណ៍នៃការទទួលបានចំណេះដឹងខាងវិញ្ញាណអាចជួយបុគ្គលក្នុងសាច់រឿងនេះជ្រើសរើសដើរតាមព្រះយេស៊ូវគ្រីស្ទបានដោយរបៀបណាទៀត ?
-
តើអ្នកដឹងអ្វីខ្លះអំពីព្រះវរបិតាសួគ៌ ឬព្រះយេស៊ូវគ្រីស្ទ ដែលអាចមានសារៈសំខាន់សម្រាប់បុគ្គលនៅក្នុងសាច់រឿងដើម្បីចងចាំ ?
សូមអញ្ជើញសិស្សឲ្យជញ្ជឹងគិតពីរបៀបដែលវគ្គចំណេះចំណានខាងគោលលទ្ធិ ឬគោលការណ៍នៃការទទួលបានចំណេះដឹងខាងវិញ្ញាណបានជួយពួកគេក្នុងការសម្រេចចិត្តផ្ទាល់ខ្លួនរបស់ពួកគេ ។ អ្នកអាចអញ្ជើញសិស្សឲ្យសរសេរ ឬចែកចាយគំនិតរបស់ពួកគេ ។