« យ៉ូស្វេ ២៣–២៤ ៖ ‹ ចូររើសយក … នៅថ្ងៃនេះចុះ › » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា ( ឆ្នាំ២០២៦ )
« យ៉ូស្វេ ២៣–២៤ ៖ ‹ ចូររើសយក … នៅថ្ងៃនេះចុះ › » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា
យ៉ូស្វេ ១–៨; ២៣–២៤ ៖ មេរៀនទី ៦៣
យ៉ូស្វេ ២៣–២៤
« ចូររើសយក … នៅថ្ងៃនេះចុះ »
នៅចុងបញ្ចប់នៃជីវិតរបស់គាត់ យ៉ូស្វេបានរំឭកពួកសាសន៏អ៊ីស្រាអែលថាតើព្រះអម្ចាស់ជានរណា និងអ្វីដែលទ្រង់បានធ្វើសម្រាប់ពួកគេ ។ យ៉ូស្វេបានអញ្ជើញពួកគេឲ្យជ្រើសរើសបម្រើព្រះអម្ចាស់ជំនួសឲ្យព្រះក្លែងក្លាយ ។ មេរៀននេះអាចជួយសិស្សជ្រើសរើសបម្រើព្រះអម្ចាស់លើឥទ្ធិពលផ្សេងទៀត ។
ការរៀបចំសិស្ស ៖ អញ្ជើញសិស្សឲ្យយកដុំថ្មតូចមួយមកថ្នាក់រៀន ។ ពួកគេនឹងប្រើវាជាការរំឭកអំពីផែនការដែលពួកគេនឹងធ្វើនៅក្នុងមេរៀននេះ ។
សកម្មភាពរៀនសូត្រដែលអាចមាន
ឥទ្ធិពលនៃការរំខាន
សូមពិចារណាអញ្ជើញសិស្សឲ្យបង្កើតបញ្ជីនៃរឿងធំៗទាំងប្រាំដែលអាចរំខានយុវវ័យពីការជ្រើសរើសបម្រើព្រះអម្ចាស់ ។ សិស្សអាចធ្វើការរៀងៗខ្លួន ឬជាក្រុម ។ ស្នើសុំសិស្សឲ្យចែកចាយបញ្ជីរបស់ពួកគេ ។
-
ចុះការរំខានទាំងនេះដែលហាក់ដូចជាអាចទាក់ទាញពួកគេ ឬសំខាន់ជាងការបម្រើព្រះអម្ចាស់ ?
អ្នកអាចពន្យល់ថា ប្រសិនបើយើងមិនប្រុងប្រយ័ត្ននោះ ការរំខានទាំងនេះអាចក្លាយជាជំនាន់ដ៏ទំនើបមួយនៃការថ្វាយបង្គំ និងបម្រើព្រះក្លែងក្លាយក្រៅពីព្រះអម្ចាស់ ។
-
តើអ្វីទៅជាឥទ្ធិពលដ៏យូរអង្វែងនៃការបន្តជ្រើសរើសឥទ្ធិពលទាំងនេះជាជាងជ្រើសរើសព្រះអម្ចាស់ ?
សុំឲ្យសិស្សជញ្ជឹងគិតអំពីសំណួរខាងក្រោមនេះ ឬកត់ត្រាចម្លើយរបស់ពួកគេនៅក្នុងសៀវភៅកំណត់ហេតុការសិក្សារបស់ពួកគេ ។
-
តើអ្នកអាចបម្រើព្រះអម្ចាស់ ឬបម្រើអ្វីមួយ ឬនរណាម្នាក់ទៀតតាមរយៈជម្រើសប្រចាំថ្ងៃរបស់អ្នកយ៉ាងដូចម្ដេច ?
-
តើអ្វីទៅជាឥទ្ធិពលដ៏យូរអង្វែង ប្រសិនបើអ្នកបន្តធ្វើការជ្រើសរើសទាំងនេះ ?
សូមអញ្ជើញសិស្សឲ្យស្វែងរកជំនួយពីព្រះវិញ្ញាណ ដើម្បីស្គាល់នូវជម្រើសអ្វីខ្លះដែលពួកគេអាចធ្វើដើម្បីបម្រើព្រះអម្ចាស់ ។
ព្រះអម្ចាស់ជាព្រះនៃយើងខ្ញុំ
សិស្សម្នាក់អាចអានកថាខណ្ឌខាងក្រោមនេះ ដើម្បីសង្ខេប យ៉ូស្វេ ៥–២៤ ។
បន្ទាប់ពីបានដឹកនាំប្រជាជនអ៊ីស្រាអែលឆ្លងកាត់ទន្លេយ័រដាន់នៅលើដីគោក ( សូមមើល យ៉ូស្វេ ៣–៤ ) ព្រះជាម្ចាស់បានប្រទានពរដល់ពួកសាសន៏អ៊ីស្រាអែលក្នុងចម្បាំងជាច្រើនរបស់ពួកគេជាមួយនឹងពួកកាណាន ។ ពួកសាសន៏អ៊ីស្រាអែលបានកាន់កាប់ដែនដីដែលព្រះបានសន្យាជាមួយពួកគេ ( សូមមើល យ៉ូស្វេ ៥–១២ ) ។ ដែនដីត្រូវបានបែងចែកក្នុងចំណោមអំបូរសាសន៍ទាំងដប់ពីរ ( សូមមើល យ៉ូស្វេ ១៣–២២ ) ។ នៅចុងបញ្ចប់នៃជីវិតរបស់គាត់ យ៉ូស្វេបានផ្តល់សារចុងក្រោយមួយដល់ពួកសាសន៏អ៊ីស្រាអែល ( សូមមើល យ៉ូស្វេ ២៣–២៤ ) ។
សម្រាប់សកម្មភាពខាងក្រោមនេះ អ្នកអាចអញ្ជើញសិស្សពាក់កណ្ដាលថ្នាក់ឲ្យអាន យ៉ូស្វេ ២៣:៣–១១ និងពាក់កណ្ដាលថ្នាក់ទៀតអាន យ៉ូស្វេ ២៤:៣–១១ ។ សិស្សអាចគូសចំណាំនូវអ្វីដែលពួកគេរកឃើញនៅក្នុងព្រះគម្ពីររបស់ពួកគេ ។
សូមអាន យ៉ូស្វេ ២៣:៣–១១; ២៤:៣–១១ ដោយរកមើលអ្វីដែលព្រះអម្ចាស់បានធ្វើ ហើយនឹងធ្វើសម្រាប់អ៊ីស្រាអែល ។
សូមអញ្ជើញសិស្សមួយចំនួនឲ្យចែកចាយ ។ អ្នកអាចធ្វើបែបនេះដោយសរសេរចម្លើយរបស់ពួកគេនៅលើក្ដារខៀន នៅពេលពួកគេចែកចាយ ឬស្នើឲ្យសិស្សមកសរសេរអ្វីដែលពួកគេបានរកឃើញនៅលើក្ដារខៀន ។
បន្ទាប់មក ដើម្បីជួយសិស្សឲ្យគិតពិចារណាពីរបៀបដែលពួកគេបានឃើញព្រះអម្ចាស់ធ្វើការក្នុងជីវិតរបស់ពួកគេ សូមសួរសំណួរខាងក្រោមនេះ ។ អ្នកអាចអញ្ជើញពួកគេឲ្យគិតអំពីគំរូពីប្រវត្តិសាសនាចក្រ សន្និសីទទូទៅ ជីវិតរបស់ពួកគេផ្ទាល់ ឬជីវិតរបស់នរណាម្នាក់នៅក្នុងវួដ ឬគ្រួសាររបស់ពួកគេ ។
-
តើមានគំរូមួយចំនួនអ្វីខ្លះអំពីរបៀបដែលព្រះអម្ចាស់បានប្រទានពរដល់យើងនៅថ្ងៃនេះ ?
យ៉ូស្វេ ២៤:១៥ គឺជាវគ្គចំណេះចំណានខាងគោលលទ្ធិ ។ សូមពិចារណាអញ្ជើញសិស្សឲ្យគូសចំណាំវគ្គបទគម្ពីរចំណេះចំណានខាងគោលលទ្ធិតាមរបៀបដែលងាយចំណាំ ដើម្បីឲ្យពួកគេអាចងាយរកវាឃើញ ។
ដើម្បីជួយសិស្សឲ្យយល់ពី យ៉ូស្វេ ២៤:១៤–១៥ អ្នកអាចអញ្ជើញពួកគេឲ្យសរសេរឡើងវិញនូវអ្វីដែលយ៉ូស្វេបានបង្រៀន ដោយប្រើពាក្យពេចន៍ផ្ទាល់ខ្លួនរបស់ពួកគេ ។ ពួកគេអាចសរសេរខគម្ពីរឡើងវិញជាដៃគូ ឬជាក្រុមតូចៗ ។
សូមអាន យ៉ូស្វេ ២៤:១៤–១៥ ។ សូមសរសេរនូវអ្វីដែលយ៉ូស្វេបានបង្រៀនឡើងវិញ ដូចជាគាត់កំពុងបង្រៀនរឿងដដែលនេះនៅថ្ងៃនេះ ។
សូមអញ្ជើញសិស្សឲ្យចែកចាយពីរបៀបដែលពួកគេបានសរសេរដំបូន្មានរបស់យ៉ូស្វេឡើងវិញ ។ សិស្សអាចចែកចាយអ្វីមួយដូចជា « ឈប់ធ្វើតាមឥទ្ធិពលផ្សេងៗទាំងអស់នេះដែលនៅជុំវិញអ្នក ហើយជ្រើសរើសធ្វើតាមព្រះអម្ចាស់ ! អ្នកអាចជ្រើសរើសអ្វីដែលអ្នកចង់បាន ប៉ុន្តែខ្ញុំនឹងបម្រើព្រះអម្ចាស់ » ។
ដើម្បីជួយសិស្សឲ្យកត់សម្គាល់សេចក្តីថ្លែងការណ៍នៃសច្ចភាពច្បាស់លាស់ អ្នកអាចសួរសំណួរដូចខាងក្រោម ។
-
តើអ្នកនឹងសង្ខេបការបង្រៀនរបស់យ៉ូស្វេនៅក្នុង ខទី ១៥ យ៉ាងដូចម្ដេច ?
សិស្សអាចសង្ខេប ខទី ១៥ ដោយប្រើពាក្យដូចជា យើងអាចប្រើសិទ្ធិជ្រើសរើសរបស់យើង ដើម្បីជ្រើសរើសបម្រើព្រះអម្ចាស់ ។
នៅពេលអ្នកសួរសំណួរខាងក្រោម សូមពិចារណានាំសិស្សទៅកាន់ចម្លើយដែលពួកគេបានរាយនៅក្នុងតារាង ។
-
តើយើងអាចបម្រើព្រះអម្ចាស់បានតាមរបៀបណាខ្លះក្នុងថ្ងៃនេះ ?
-
តើអ្វីដែលអ្នកដឹងអំពីព្រះអម្ចាស់អាចជួយអ្នកជ្រើសរើសបម្រើទ្រង់យ៉ាងដូចម្ដេច ?
ការជ្រើសរើសបម្រើព្រះអម្ចាស់
សូមអាន យ៉ូស្វេ ២៤:២៤–២៥ ដោយស្វែងរកអ្វីដែលពួកសាសន៏អ៊ីស្រាអែលបានជ្រើសរើសធ្វើ ។
ដើម្បីជួយសិស្សឲ្យភ្ជាប់នូវអ្វីដែលពួកគេបានរៀនទៅនឹងជម្រើសផ្ទាល់ខ្លួនរបស់ពួកគេ សូមពិចារណាសុំឲ្យពួកគេសរសេរចម្លើយទៅនឹងសំណួរខាងក្រោមនេះ ។
នៅក្នុងសៀវភៅកំណត់ហេតុការសិក្សារបស់អ្នក សូមឆ្លើយសំណួរមួយក្នុងចំណោមសំណុំសំណួរដូចខាងក្រោម ៖
-
តើអ្នកចង់ចងចាំអ្វីខ្លះអំពីព្រះអម្ចាស់ដែលអាចជួយអ្នកបម្រើទ្រង់ នៅពេលដែលវាអាចនឹងមានការលំបាក ? តើអ្នកគិតថាការចងចាំព្រះអម្ចាស់ក្នុងគ្រាទាំងនោះអាចជួយអ្នកយ៉ាងដូចម្ដេច ?
-
តើអ្នកនឹងចាប់ផ្ដើមធ្វើ ឬឈប់ធ្វើអ្វីខ្លះ ដើម្បីជ្រើសរើសបម្រើព្រះអម្ចាស់ ? តើពរជ័យអ្វីខ្លះដែលអ្នកអាចទទួលបានពីការធ្វើដូច្នេះ ?
អ្នកអាចសួរសិស្សដែលស្ម័គ្រចិត្តចែកចាយនូវអ្វីដែលពួកគេបានសរសេរ ។ សូមរំឭកសិស្សថា ពួកគេមិនចាំបាច់ចែកចាយអ្វីដែលផ្ទាល់ខ្លួនពេកនោះទេ ។ អ្នកក៏អាចចែកចាយទីបន្ទាល់របស់អ្នកអំពីព្រះអម្ចាស់ ហើយពន្យល់ពីមូលហេតុដែលអ្នកជ្រើសរើសស្រឡាញ់ និងបម្រើទ្រង់ជំនួសឲ្យរឿងផ្សេងទៀតដែរ ។
សូមអាន យ៉ូស្វេ ២៤:២៦–២៧ ដោយរកមើលអ្វីដែលយ៉ូស្វេបានធ្វើដើម្បីរំឭកពួកសាសន៏អ៊ីស្រាអែលអំពីជម្រើសរបស់ពួកគេដើម្បីបម្រើព្រះអម្ចាស់ ។
ប្រសិនបើសិស្សយកថ្មមកថ្នាក់រៀន ពួកគេអាចយកវាចេញឥឡូវនេះ ឬពួកគេអាចគូររូបថ្មមួយ ។ សូមពិភាក្សាអំពីកន្លែងដែលយ៉ូស្វេបានដាក់ថ្ម ( នៅក្រោមដើមម៉ៃសាក់ ) និងមូលហេតុដែលគាត់ដាក់វានៅទីនោះ ( ដើម្បីរំឭកដល់កូនចៅអ៊ីស្រាអែលអំពីសេចក្ដីសញ្ញាដែលពួកគេបានធ្វើដើម្បីបម្រើព្រះអម្ចាស់ ) ។ សូមសួរសិស្សពីកន្លែងដែលពួកគេអាចដាក់ថ្មរបស់ពួកគេ ដើម្បីរំឭកខ្លួនពួកគេពីផែនការរបស់ពួកគេ ដើម្បីបម្រើព្រះអម្ចាស់ ។ អញ្ជើញពួកគេឲ្យដាក់ថ្មរបស់ពួកគេនៅកន្លែងដ៏លេចធ្លោមួយដែលពួកគេនឹងឃើញជាប្រចាំ ។ ពួកគេក៏អាចសរសេរអ្វីមួយនៅលើថ្មដែលរំឭកពួកគេពីព្រះអម្ចាស់ ឬផែនការរបស់ពួកគេក្នុងការបម្រើទ្រង់ដូចជា « ខ្ញុំនឹងបម្រើព្រះអម្ចាស់ » ។
អ្នកអាចចែកចាយសេចក្តីថ្លែងការណ៍ខាងក្រោមជាមួយសិស្ស ។ ថ្លែងទីបន្ទាល់អំពីឥទ្ធិពលរយៈពេលវែងនៃការជ្រើសរើសបម្រើព្រះអម្ចាស់ ។
អែលឌើរ ឌែល ជី រិនឡាន់ ក្នុងកូរ៉ុមនៃពួកសាវកដប់ពីរនាក់បានបង្រៀនអំពីឥទ្ធិពលរយៈពេលវែងនៃការជ្រើសរើសបម្រើព្រះអម្ចាស់ ៖
យើងត្រូវជ្រើសរើសព្រះដែលយើងនឹងបម្រើ ។ សុភមង្គលអស់កល្បជានិច្ចដ៏ធំធេងរបស់យើង អាស្រ័យទៅលើការរើសយកព្រះដែលមានព្រះជន្មរស់ ហើយចូលរួមនឹងទ្រង់ក្នុងកិច្ចការរបស់ទ្រង់ ។ …
ការជ្រើសរើសដើម្បីធ្វើតាមផែនការព្រះវរបិតាគឺជាផ្លូវតែមួយគត់ ដែលយើងអាចក្លាយជាអ្នកទទួលមរតកនៅក្នុងនគរទ្រង់ ។ ( « Choose You This Day » Liahona ខែវិច្ឆិកា ឆ្នាំ២០១៨ ទំព័រ ១០៦ )
ទន្ទេញ
អ្នកអាចជួយសិស្សឲ្យទន្ទេញសេចក្ដីយោងចំណេះចំណានខាងគោលលទ្ធិ និងឃ្លាបទគម្ពីរគន្លឹះក្នុងអំឡុងមេរៀននេះ ហើយរំឭកវាក្នុងមេរៀនក្រោយៗទៀត ។ ឃ្លាបទគម្ពីរគន្លឹះនៅក្នុង យ៉ូស្វេ ២៤:១៥ គឺ « ចូររើសយកព្រះណាដែលឯងចង់គោរពប្រតិបត្តិតាមនៅថ្ងៃនេះចុះ » ។ គំនិតសម្រាប់សកម្មភាពទន្ទេញ មាននៅក្នុងឯកសារឧបសម្ព័ន្ធដែលនៅក្រោម « សកម្មភាពរំឭកចំណេះចំណានខាងគោលលទ្ធិឡើងវិញ » ។