« ការអនុវត្តតាមចំណេះចំណានខាងគោលលទ្ធិទី ៣ ៖ ការទន្ទេញឃ្លាគន្លឹះ និងការអនុវត្តគោលការណ៍នៃការទទួលបានចំណេះដឹងខាងវិញ្ញាណ » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា ( ឆ្នាំ ២០២៦ )
« ការអនុវត្តតាមចំណេះចំណានខាងគោលលទ្ធិទី ៣ ៖ ការទន្ទេញឃ្លាគន្លឹះ និងការអនុវត្តគោលការណ៍នៃការទទួលបានចំណេះដឹងខាងវិញ្ញាណ » សៀវភៅសិក្សាព្រះគម្ពីរសញ្ញាចាស់ សម្រាប់គ្រូបង្រៀនថ្នាក់សិក្ខាសាលា
និក្ខមនំ ៧–១៣ ៖ មេរៀនទី ៤៤
ការអនុវត្តតាមចំណេះចំណានខាងគោលលទ្ធិទី ៣
ការទន្ទេញឃ្លាគន្លឹះ និងការអនុវត្តតាមគោលការណ៍នៃការទទួលបានចំណេះដឹងខាងវិញ្ញាណ
ចំណេះចំណានខាងគោលលទ្ធិអាចជួយសិស្សឲ្យស្ថាបនាគ្រឹះសម្រាប់ជីវិតរបស់ពួកគេនៅលើព្រះយេស៊ូវគ្រីស្ទ និងដំណឹងល្អរបស់ទ្រង់ ។ មេរៀននេះអាចជួយសិស្សទន្ទេញឃ្លាបទគម្ពីរគន្លឹះនៅក្នុងវគ្គបទគម្ពីរចំណេះចំណានខាងគោលលទ្ធិ ហើយអនុវត្តគោលការណ៍ដ៏ទេវភាពនៃការទទួលបានចំណេះដឹងខាងវិញ្ញាណ ។
ការរៀបចំសិស្ស ៖ សូមអញ្ជើញសិស្សឲ្យជ្រើសរើសវគ្គបទគម្ពីរចំណេះចំណានខាងគោលលទ្ធិមួយ ឬពីរចេញពីព្រះគម្ពីរសញ្ញាចាស់ ហើយទន្ទេញសេចក្តីយោង និងឃ្លាបទគម្ពីរគន្លឹះ ។ ប្រសិនបើពួកគេចង់ ពួកគេក៏អាចទន្ទេញមេរៀនទាំងមូលបានដែរ ។ សូមអញ្ជើញពួកគេឲ្យជញ្ជឹងគិតអំពីរបៀបដែលការទន្ទេញឃ្លា ឬបទគម្ពីរគន្លឹះអាចជួយពួកគេក្នុងជីវិតរបស់ពួកគេ ។
សកម្មភាពរៀនសូត្រដែលអាចមាន
ការរំឭកចំណេះចំណានខាងគោលលទ្ធិ ៖ ទន្ទេញ
ផ្នែកដំបូងនៃមេរៀននេះនឹងប្រៀបធៀបការទន្ទេញចាំបទគម្ពីរមួយទៅនឹងការទទួលបានមិត្តថ្មីម្នាក់ ។ សូមគិតអំពីសកម្មភាពមួយ ដើម្បីរៀបចំសិស្សធ្វើការប្រៀបធៀបនេះ ។ ឧទាហរណ៍ ប្រសិនបើសិស្សក្នុងថ្នាក់របស់អ្នកមានច្រើន ដែលសិស្សអាចនឹងមិនស្គាល់គ្នាច្បាស់ អ្នកអាចអញ្ជើញសិស្សឲ្យប្រាប់ឈ្មោះសិស្សនៅក្នុងថ្នាក់ឲ្យបានច្រើនតាមដែលអាចធ្វើទៅបាន ។ ពួកគេអាចធ្វើដូច្នេះដោយខ្លួនឯង ឬនៅក្នុងក្រុមតូចៗ ។ សូមអញ្ជើញសិស្សឲ្យជញ្ជឹងគិតអំពីនរណាដែលពួកគេបានស្គាល់ច្បាស់ ។
-
តើហេតុអ្វីបានជាការស្គាល់មនុស្សក្នុងថ្នាក់នេះគឺជារឿងល្អ ?
-
តើការមានមិត្តផ្ដល់អត្ថប្រយោជន៍អ្វីខ្លះ ?
សូមអានសេចក្ដីថ្លែងការណ៍ខាងក្រោមដោយអែលឌើរ រីឆាត ជី ស្កត ( ឆ្នាំ ១៩២៨–២០១៥ ) ក្នុងកូរ៉ុមនៃពួកសាវកដប់ពីរនាក់ ៖
« អំណាចដ៏អស្ចារ្យអាចកើតឡើងមកពីការទន្ទេញចាំបទគម្ពីរ ។ ការទន្ទេញចាំបទគម្ពីរមួយគឺជាការបង្កើតមិត្តភាពមួយថ្មី ។ » ( « The Power of Scripture » Liahona ខែវិច្ឆិកា ឆ្នាំ២០១១ ទំព័រ ៦ )
-
តើអ្នកគិតថាបានទន្ទេញចាំនូវឃ្លា ឬវគ្គបទគម្ពីរមួយ អាចដូចជាមិត្តភក្តិម្នាក់យ៉ាងដូចម្តេច ?
ពេលសិស្សកំពុងចែកចាយ អ្នកអាចសរសេរចម្លើយរបស់ពួកគេនៅលើក្ដារខៀន ។ សូមអញ្ជើញសិស្សឲ្យអានបន្ថែមមកពីអែលឌើរ ស្កត នៅក្នុងសេចក្ដីថ្លែងការណ៍ខាងក្រោមនេះ ដោយរកមើលចម្លើយបន្ថែម ។ អ្នកក៏អាចចង្អុលបង្ហាញថា ពាក្យទាំងឡាយនៃបទគម្ពីរគឺមកពី ឬត្រូវបំផុសគំនិតដោយព្រះអម្ចាស់ ។ តាមវិធីជាច្រើន បទគម្ពីរគឺដូចជាការមានព្រះវរបិតាសួគ៌ និងព្រះយេស៊ូវគ្រីស្ទ ធ្វើជាមិត្តដែលដឹកនាំផ្លូវដូច្នោះដែរ ។
អែលឌើរ ស្កត បានបន្ត ៖
វាដូចជាការរកឃើញបុគ្គលម្នាក់ថ្មីដែលអាចជួយនៅក្នុងពេលត្រូវការ ផ្ដល់ការបំផុសគំនិត និងការលួងលោមចិត្ត ហើយជាប្រភពនៃការលើកទឹកចិត្តសម្រាប់ការផ្លាស់ប្ដូរដែលចាំបាច់ ។ ( រីឆាដ ជី ស្កត « The Power of Scripture » Liahona ខែវិច្ឆិកា ឆ្នាំ២០១១ ទំព័រ ៦ )
-
តើបទគម្ពីរ ឬឃ្លាដែលបានទន្ទេញចាំមួយប្រៀបបានដូចជាមិត្តចំពោះអ្នកតាមរបៀបណាមួយនៃរបៀបទាំងនេះ ?
-
តើមានកិច្ចការអ្វីខ្លះដែលអ្នកធ្វើ ឬអាចបានធ្វើដែលអាចជួយអ្នកទន្ទេញឃ្លា ឬវគ្គបទគម្ពីរគន្លឹះ ?
ចម្លើយទាំងឡាយអាចនឹងរួមបញ្ចូលការនិយាយឡើងវិញនូវឃ្លា ឬវគ្គបទគម្ពីរ ការសរសេរវា ឬការប្រើប័ណ្ណពាក្យ ឬឯកសារដែលសិស្សបានបង្កើតក្នុងមេរៀនទី ១៥ ៖ « ការអនុវត្តចំណេះចំណានខាងគោលលទ្ធិ ទី ១ » ។
សូមពិចារណាបង្ហាញ ឬផ្តល់ដល់សិស្សម្នាក់ៗនូវវគ្គបទគម្ពីរចំណេះចំណានខាងគោលលទ្ធិ ដែលពួកគេបានសិក្សាកន្លងមក ។ រាយបញ្ជីមួយអំពីសេចក្តីយោងនៃចំណេះចំណានខាងគោលលទ្ធិ និងឃ្លាបទគម្ពីរគន្លឹះក្នុងព្រះគម្ពីរសញ្ញាចាស់ ដែលមាននៅក្នុង ឯកសារគោលនៃចំណេះចំណានខាងគោលលទ្ធិ ( ឆ្នាំ ២០២៣ ) ។
សូមអញ្ជើញសិស្សឲ្យចំណាយពេលប៉ុន្មាននាទីធ្វើសកម្មភាពខាងក្រោម ៖
សូមធ្វើតាមពាក្យទូន្មានរបស់អែលឌើរ ស្កត ដើម្បី « បង្កើត … មិត្តភាពថ្មី [ ទាំងឡាយ ] » ដោយទន្ទេញនូវសេចក្ដីយោង និងឃ្លាគន្លឹះសម្រាប់វគ្គបទគម្ពីរចំណេះចំណានខាងគោលលទ្ធិមួយចំនួន ។ អ្នកក៏អាចទន្ទេញវគ្គបទគម្ពីរទាំងមូលផងដែរ ។
សូមជ្រើសរើសឃ្លា ឬវគ្គណាមួយដែលអ្នកបានទន្ទេញ ហើយឆ្លើយសំណួរខាងក្រោម ៖
-
តើឃ្លា ឬវគ្គបទគម្ពីរនេះអាចប្រៀបដូចជាមិត្តចំពោះអ្នកយ៉ាងដូចម្ដេច ? ( តើវាអាចជួយក្នុងគ្រាចាំបាច់ ផ្តល់ការបំផុសគំនិត ឬការលួងលោម ឬជាប្រភពសម្រាប់ការផ្លាស់ប្តូរចាំបាច់យ៉ាងដូចម្ដេច ? )
សូមលើកទឹកចិត្តសិស្សឲ្យចែកចាយ ។ សូមពិចារណាចែកចាយគំនិតរបស់អ្នកផ្ទាល់ផងដែរ ។ សូមរកមើលវិធីដើម្បីលើកទឹកចិត្តសិស្សឲ្យបន្តទន្ទេញបទគម្ពីរ ។
រៀន និងអនុវត្តតាមគោលការណ៍នៃការទទួលបានចំណេះដឹងខាងវិញ្ញាណ
មេរៀនដែលនៅសល់ផ្តោតលើការជួយសិស្សឲ្យអនុវត្តតាមគោលការណ៍នៃការទទួលបានចំណេះដឹងខាងវិញ្ញាណទៅក្នុងស្ថានភាពដែលពាក់ព័ន្ធ ។ មុននឹងបន្ត វាអាចមានអត្ថប្រយោជន៍ក្នុងការអញ្ជើញសិស្សឲ្យរំឭកគោលការណ៍ទាំងនេះ ។ សមត្ថភាពរបស់សិស្សក្នុងការរំឭកឡើងវិញ និងអនុវត្តគោលការណ៍នៃការទទួលបានចំណេះដឹងខាងវិញ្ញាណទាំងនេះនឹងកើនឡើងតាមរយៈការរំឭក និងការអនុវត្តម្តងហើយម្តងទៀត ។ សកម្មភាពរំឭកឡើងវិញដែលបានផ្ដល់យោបល់ មាននៅក្នុងផ្នែកនៃឧបសម្ព័ន្ធដែលមានចំណងជើងថា « សកម្មភាពរំឭកចំណេះដឹងខាងគោលលទ្ធិ » ។ ការពិពណ៌នាអំពីគោលការណ៍ទាំងនេះមាននៅក្នុងកថាខណ្ឌទី ៥–១២ នៃ ឯកសារគោលនៃចំណេះចំណានខាងគោលលទ្ធិ ( ឆ្នាំ ២០២៣ ) ។
សូមជញ្ជឹងគិតអំពីតម្រូវការសិស្សរបស់អ្នក ហើយស្វែងរកជំនួយពីព្រះអម្ចាស់ ដើម្បីជ្រើសរើសសាច់រឿងមួយក្នុងចំណោមសាច់រឿងខាងក្រោម ឬដើម្បីសម្រប ឬបង្កើតសាច់រឿងមួយ ដើម្បីបំពេញតម្រូវការសិស្សរបស់អ្នកកាន់តែប្រសើរឡើង ។ ឬអានសាច់រឿងពីរ ឬបីឲ្យឮៗ ហើយអញ្ជើញសិស្សក្នុងថ្នាក់ឲ្យជ្រើសរើសសាច់រឿងមួយដែលពួកគេមានអារម្មណ៍ថាមានអត្ថប្រយោជន៍បំផុតក្នុងការផ្តោតលើ ។
-
« ខ្ញុំឮយុវជនដទៃទៀតនិយាយអំពីការចែកចាយរូបភាពខ្វះសុជីវធម៌ មិនសមរម្យ ឬថែមទាំងរូបអាក្រាតខ្លួនពួកគេ ឬអ្នកដទៃ នៅលើទូរសព្ទរបស់ពួកគេ ។ ខ្ញុំអាចដឹងថា ពួកគេមិនបានគិតថាវាជារឿងធំដុំនោះទេ ។ វាប្រហែលជាផ្នែកធម្មតានៃទំនាក់ទំនង ឬក៏ពួកគេគ្រាន់តែលេងសើចប៉ុណ្ណោះ » ។
-
« វាហាក់ដូចជាវាជារឿងធម្មតាក្នុងការមើល និងស្ដាប់រឿងផ្លូវភេទ ។ មានសេចក្តីយោងផ្លូវភេទក្នុងបែបរឿងកំប្លែង ឈុតឆាកភាពយន្ត វីដេអូអនឡាញ ជាដើម ។ អ្វីដែលថ្នាក់ដឹកនាំសាសនាចក្រគិតថាសមរម្យ គឺខុសពីអ្វីដែលមនុស្សជាច្រើននិយាយថាជារឿងធម្មតា ។ ខ្ញុំគិតថា សម័យកាលប្រែប្រួលហើយ ហើយវាមិនមែនជារឿងធំដុំដូចកាលពីមុនឡើយ » ។
-
« ខ្ញុំធ្លាប់បានរៀនអំពីច្បាប់ព្រហ្មចារីភាពពីមុន ប៉ុន្តែវាហាក់ដូចជាយុវវ័យជាច្រើននៅកន្លែងដែលខ្ញុំរស់នៅតែងធ្វើទង្វើលក្ខណៈផ្លូវភេទ ឬយ៉ាងហោចណាស់មិនមានគម្រោងរង់ចាំរហូតដល់រៀបការឡើយ ។ ខ្ញុំគិតថា ខ្ញុំយល់ពីមូលហេតុដែលថ្នាក់ដឹកនាំសាសនាចក្រប្រាប់យើងឲ្យមានភាពបរិសុទ្ធខាងផ្លូវភេទ ហើយមានរឿងល្អជាច្រើនអំពីវា ប៉ុន្តែពេលខ្លះខ្ញុំឆ្ងល់ថាតើវាមានតម្លៃឬអត់ » ។
សូមអញ្ជើញសិស្សឲ្យស្រមៃថា មនុស្សដែលកំពុងនិយាយនៅក្នុងសាច់រឿងគឺនៅទីនេះជាមួយពួកគេ ។ សូមពន្យល់ថា នេះគឺជាមនុស្សម្នាក់ដែលមានចិត្តស្មោះ ។ សូមរំឭកសិស្សថា យើងគួរតែខិតខំប្រព្រឹត្តចំពោះមនុស្សទាំងអស់ដោយសេចក្តីស្រឡាញ់ និងសេចក្ដីគោរព ដូចគ្នានឹងការប្រព្រឹត្តរបស់ព្រះវរបិតាសួគ៌ និងព្រះយេស៊ូវគ្រីស្ទដែរ ។
-
តើការសន្មតអ្វីខ្លះអំពីច្បាប់ព្រហ្មចារីភាពដែលអ្នកបានកត់សម្គាល់នៅក្នុងសាច់រឿងនេះ ?
សូមពន្យល់ថា សិស្សនៅក្នុងថ្នាក់នឹងរៀបចំខ្លួនចាំជួយមនុស្សម្នាក់នេះ ។ នៅពេលសិស្សពិភាក្សាសំណួរខាងក្រោម សូមធានាដល់ពួកគេថា នឹងមិនមានចម្លើយខុសនោះទេ ។
-
ប្រសិនបើអ្នកកំពុងព្យាយាមជួយបុគ្គលនេះ តើគោលការណ៍នៃការទទួលបានចំណេះដឹងខាងវិញ្ញាណអ្វីដែលអ្នកនឹងផ្តោតលើមុនគេ ? ហេតុអ្វី ?
សូមរៀបចំវិធីមួយដើម្បីប្រើគោលការណ៍នៃការទទួលបានចំណេះដឹងខាងវិញ្ញាណដើម្បីជួយបុគ្គលនេះ ។ នេះអាចរួមមាន ៖
-
សំណួរមួយដែលអ្នកអាចសួរបុគ្គលនេះ ។
-
បទគម្ពីរ ដែលរួមមានវគ្គបទគម្ពីរចំណេះចំណានខាងគោលលទ្ធិ ឬសេចក្ដីថ្លែងការណ៍មកពីថ្នាក់ដឹកនាំសាសនាចក្រដែលអាចមានអត្ថប្រយោជន៍ ។
-
គំនិត អារម្មណ៍ ឬទីបន្ទាល់របស់អ្នកផ្ទាល់ ។
ប្រសិនបើមានអត្ថប្រយោជន៍ សូមបង្ហាញសំណួរខាងក្រោម ដើម្បីជួយសិស្ស ។ ម៉្យាងទៀត សិស្សអាចរៀបចំដោយខ្លួនឯងនូវវិធីមួយដើម្បីប្រើគោលការណ៍នៃការទទួលបានចំណេះដឹងខាងវិញ្ញាណមួយ ។ បន្ទាប់មក ពួកគេអាចប្រើសំណួរខាងក្រោមនេះដើម្បីរៀបចំវិធីប្រើគោលការណ៍បន្ថែមមួយ ។
សូមពិនិត្យមើលគោលគំនិត និងសំណួរទាំងឡាយដោយទស្សនវិស័យដ៏អស់កល្បមួយ
-
តើការយល់ពីអារម្មណ៍របស់ព្រះអំពីភាពបរិសុទ្ធខាងផ្លូវភេទ អាចជួយមនុស្សក្នុងសាច់រឿងនេះយ៉ាងដូចម្ដេច ? ( សូមមើល លោកុប្បត្តិ ៣៩:៩; កូរិនថូស ទី១ ៦:១៨–១៩; យ៉ាកុប ២:២៨ ) ។
-
តើអ្នកគិតថាអាកប្បកិរិយារបស់បុគ្គលនេះអាចនាំគេទៅរកជម្រើសអ្វីខ្លះ ?
សូមស្វែងរកការយល់ដឹងបន្ថែមតាមរយៈប្រភពដែលបានតែងតាំងដ៏ទេវភាព
-
តើ លោកុប្បត្តិ ៣៩:៩ និងគំរូរបស់យ៉ូសែបនៃស្រុកអេស៊ីព្ទ អាចជួយក្នុងស្ថានភាពនេះដោយរបៀបណា ?
-
តើបទគម្ពីរ ឬសេចក្ដីថ្លែងការណ៍ផ្សេងទៀតមកពីថ្នាក់ដឹកនាំសាសនាចក្រអាចជួយអ្វីបានខ្លះ ? ( ឧទាហរណ៍ អាលម៉ា ៣៨:១២; អាលម៉ា ៣៩:៩; គោលលទ្ធិ និងសេចក្តីសញ្ញា ៤២:២៣ ផ្នែកដែលមានចំណងជើងថា « រូបកាយរបស់អ្នកគឺពិសិដ្ឋ » នៅក្នុង ដើម្បីកម្លាំងនៃយុវវ័យ; ផ្នែកដែលមានចំណងជើងថា « ពរជ័យនៃការប្រព្រឹត្តបរិសុទ្ធ » នៅក្នុងសុន្ទរកថាសន្និសីទទូទៅរបស់អែលឌើរ ដេវីឌ អេ បែដណា « We Believe in Being Chaste » [ Liahona ខែឧសភា ឆ្នាំ២០១៣ ទំព័រ ៤៣–៤៤ ] )
ធ្វើសកម្មភាពដោយសេចក្ដីជំនឿ
-
ក្នុងស្ថានភាពនេះ តើអ្នកគិតថា ការប្រព្រឹត្តដោយសេចក្តីជំនឿលើព្រះអង្គសង្គ្រោះ ព្រះយេស៊ូវគ្រីស្ទនឹងមានលក្ខណៈដូចម្ដេច ?
-
បើអ្នកស្ថិតនៅក្នុងស្ថានភាពស្រដៀងគ្នានេះ តើអ្នកអាចធ្វើអ្វីខ្លះដើម្បីអញ្ជើញយាងជំនួយ និងព្រះចេស្ដារបស់ព្រះអង្គសង្គ្រោះចូលមកក្នុងជីវិតរបស់អ្នក ?
បន្ទាប់ពីសិស្សមានពេលគ្រប់គ្រាន់ក្នុងការរៀបចំហើយ សូមឲ្យពួកគេចែកចាយ ។ សូមពិចារណាសួរសំណួរតាមដានដូចជា « តើមាននរណាទៀតចង់បន្ថែមពីលើអ្វីដែលបានចែកចាយឬទេ ? » « តើអ្នកគិតថាអ្នកដែលយើងកំពុងព្យាយាមជួយអាចនឹងមានប្រតិកម្មយ៉ាងណាចំពោះអ្វីដែលត្រូវបានចែកចាយ ? » « តើយើងអាចជួយមនុស្សម្នាក់នេះឲ្យទទួលបានកាន់តែច្រើននូវអារម្មណ៍នៃសេចក្ដីស្រឡាញ់របស់ព្រះអម្ចាស់ និងកាន់តែមានអារម្មណ៍ចង់ស្វែងរកជំនួយរបស់ទ្រង់យ៉ាងដូចម្ដេច ? និង « តើគោលការណ៍នៃការទទួលបានចំណេះដឹងខាងវិញ្ញាណផ្សេងអាចជួយយ៉ាងដូចម្ដេច ? »
នៅក្នុងសៀវភៅកំណត់ហេតុការសិក្សារបស់អ្នក សូមសរសេរពីអ្វីដែលអ្នកបានរៀនសូត្រចេញពីបទពិសោធន៍នេះដែលអ្នកចង់ចងចាំ ។ នេះអាចរួមបញ្ចូលរបៀបដែលដំណើរការនៃការប្រើគោលការណ៍នៃការទទួលបានចំណេះដឹងខាងវិញ្ញាណអាចជួយអ្នកជាមួយនឹងសំណួរ ឬកង្វល់ទាំងឡាយដែលអ្នកមាន ។