« ម៉ូសេ ១:២៧–៤២ ៖ ‹ នេះហើយជាកិច្ចការរបស់យើង និងសិរីល្អរបស់យើង › » សៀវភៅសិក្សាព្រះគម្ពីរសញ្ញាចាស់សម្រាប់គ្រូបង្រៀនថ្នាក់សិក្ខាសាលា ( ឆ្នាំ ២០២៦ )
« ម៉ូសេ ១:២៧–៤២ ៖ ‹ នេះហើយជាកិច្ចការរបស់យើង និងសិរីល្អរបស់យើង › » សៀវភៅសិក្សាព្រះគម្ពីរសញ្ញាចាស់សម្រាប់គ្រូបង្រៀនថ្នាក់សិក្ខាសាលា
ម៉ូសេ ១; អ័ប្រាហាំ ៣ ៖ មេរៀនទី ៦
ម៉ូសេ ១:២៧–៤២
« នេះហើយជាកិច្ចការរបស់យើង និងសិរីល្អរបស់យើង »
ក្រោមការដឹកនាំរបស់ព្រះវរបិតាសួគ៌ ព្រះយេស៊ូវគ្រីស្ទបានបង្កើតពិភពលោកដ៏ច្រើនឥតគណនា ។ ការបង្កើតដ៏ធំបំផុតរបស់ព្រះវរបិតាសួគ៌ គឺជាការបង្កើតបុត្រាបុត្រីខាងវិញ្ញាណរបស់ទ្រង់ ។ មេរៀននេះអាចជួយសិស្សឲ្យមានអារម្មណ៍ដឹងគុណចំពោះព្រះវរបិតាសួគ៌ និងកិច្ចការរបស់ទ្រង់ដើម្បីនាំមកនូវអមតភាព និងជីវិតដ៏នៅអស់កល្បជានិច្ចដល់បុត្រាបុត្រីទ្រង់ទាំងអស់ ។
ការរៀបចំរបស់សិស្ស ៖ សូមអញ្ជើញសិស្សឲ្យគិតពិចារណាអំពីភាពធំធេងនៃការបង្កបង្កើតរបស់ព្រះវរបិតាសួគ៌ និងក្ដីស្រឡាញ់ដែលព្រះវរបិតាសួគ៌មានចំពោះពួកគេម្នាក់ៗ ។ វិធីមួយដែលពួកគេអាចធ្វើបែបនេះបាន គឺការសម្លឹងមើលមេឃនារាត្រីដ៏ស្រឡះមួយ ហើយគិតអំពីអារម្មណ៍របស់ព្រះវរបិតាសួគ៌ចំពោះពួកគេ ក្នុងចំណោមផ្កាយ ភព និងកាឡាក់ស៊ីជាច្រើនដែលទ្រង់បានបង្កើត ។
សកម្មភាពរៀនសូត្រដែលអាចមាន
បុត្រាបុត្រីបង្កើតរបស់ព្រះ
សូមពិចារណាយកកូនធុងតូចមួយដាក់ខ្សាច់ និងធុងទឹកមួយមកកាន់ថ្នាក់រៀន ។ សូមឲ្យសិស្សម្នាក់ឡើងមកខាងមុខថ្នាក់ ហើយដាក់ម្រាមដៃរបស់គាត់ ឬនាងទៅក្នុងធុងទឹក រួចហើយជ្រមុជម្រាមដៃដែលសើមនោះទៅក្នុងធុងខ្សាច់ ។ ជាជម្រើស អ្នកអាចបង្ហាញរូបភាពខាងក្រោមដល់សិស្ស ។ បន្ទាប់មក សុំសិស្សឲ្យប៉ាន់ស្មានមើលថា មានគ្រាប់ខ្សាច់ប៉ុន្មានគ្រាប់ក្នុងប្រអប់ដៃរបស់បុគ្គលនេះ ។
សូមអាន ម៉ូសេ ១:២៧–២៩ ដោយរកមើលអ្វីដែលម៉ូសេ បានប្រៀបធៀបនឹងគ្រាប់ខ្សាច់នៅលើឆ្នេរសមុទ្រ និងហេតុអ្វី ។
-
តើអ្នកចាប់អារម្មណ៍អ្វីខ្លះអំពីការនិមិត្តនេះ ?
ដើម្បីជួយសិស្សឲ្យទទួលស្គាល់នូវភាពធំល្វឹងល្វើយនៃការបង្កើតរបស់ព្រះ សូមពិចារណាបង្ហាញ « This Is My Work and Glory » ដែលមានលើគេហទំព័រ ChurchofJesusChrist.org ចាប់ពីនាទីទី ០:៥៣ ដល់ ១:៣១ ។
ដើម្បីជួយសិស្សជញ្ជឹងគិតដោយខ្លួនឯងនៅក្នុងការបង្កបង្កើតរបស់ព្រះ និងដើម្បីត្រៀមរៀបចំចិត្តរបស់ពួកគេទទួលការបង្រៀនពីព្រះវិញ្ញាណបរិសុទ្ធ សូមអញ្ជើញពួកគេឲ្យបំពេញស្វ័យវាយតម្លៃខាងក្រោមនេះ ។
សូមឆ្លើយសំណួរខាងក្រោមនេះនៅក្នុងសៀវភៅកំណត់ហេតុការសិក្សារបស់អ្នក ៖
-
ហេតុអ្វីបានជាព្រះបង្កើតសកលលោកនេះ ?
-
ហេតុអ្វីបានជាព្រះបង្កើតយើង ?
-
តើខ្ញុំមានអារម្មណ៍ដូចម្ដេចចំពោះព្រះ និងចំពោះអ្វីដែលទ្រង់ធ្វើសម្រាប់ខ្ញុំ ?
សូមអញ្ជើញសិស្សឲ្យដាក់បន្ថែមសំណួររបស់ពួកគេពេញមួយមេរៀន ។ សូមរំឭកពួកគេថា ការកត់ត្រាគំនិតរបស់ពួកគេទៅក្នុងសៀវភៅកំណត់ហេតុការសិក្សា អាចជួយយាងអញ្ជើញឥទ្ធិពលនៃព្រះវិញ្ញាណបរិសុទ្ធមកក្នុងការសិក្សារបស់ពួកគេ ។
កិច្ចការ និងសិរីល្អរបស់ព្រះវរបិតាសួគ៌
សូមអាន ម៉ូសេ ១:៣០ ដោយរកមើល និងគូសចំណាំសំណួរពីរដែលម៉ូសេមាន នៅពេលលោកសង្កេតមើលផែនដី និងបុត្រាបុត្រីបង្កើតរបស់ព្រះ ។
ម៉ូសេ ១:៣៩ គឺជាវគ្គចំណេះចំណានខាងគោលលទ្ធិមួយ ។ សូមពិចារណាអញ្ជើញសិស្សឲ្យគូសចំណាំវគ្គបទគម្ពីរចំណេះចំណានខាងគោលលទ្ធិតាមរបៀបដែលងាយចំណាំ ដើម្បីឲ្យពួកគេអាចងាយរកវាឃើញ ។
សូមអាន ម៉ូសេ ១:៣១–៣៣, ៣៩ ដោយរកមើលពីរបៀបដែលព្រះអម្ចាស់បានឆ្លើយសំណួរទាំងឡាយរបស់ម៉ូសេ ។
-
តើសេចក្ដីពិតអ្វីខ្លះដែលយើងអាចរៀនសូត្រពីការឆ្លើយតបរបស់ព្រះនៅក្នុងខគម្ពីរទាំងនេះ ?
ក្នុងចំណោមសេចក្ដីពិតទាំងឡាយដែលសិស្សអាចរកឃើញ សូមជួយពួកគេកត់សម្គាល់ថា កិច្ចការ និងសិរីល្អរបស់ព្រះ គឺដើម្បីនាំមកនូវអមតភាព និងជីវិតដ៏នៅអស់កល្បជានិច្ចដល់បុត្រាបុត្រីរបស់ទ្រង់ ។
ដើម្បីស្វែងយល់ពីអ្វីដែលសិស្សយល់អំពីអមតភាព និងជីវិតដ៏នៅអស់កល្បជានិច្ច អ្នកអាចស្នើពួកគេឲ្យចែកចាយពីរបៀបដែលពួកគេនឹងឲ្យនិយមន័យវា ។ ប្រសិនបើមានប្រយោជន៍ សិស្សអាចស្វែងរកពាក្យ « អមតភាព » និង « ជីវិតដ៏នៅអស់កល្បជានិច្ច » នៅក្នុង សេចក្ដីណែនាំដល់បទគម្ពីរទាំងឡាយ ឬប្រធានបទ និងសំណួរ នៅលើគេហទំព័រ ChurchofJesusChrist.org ។ ជាជម្រើស អ្នកអាចចែកចាយនិយមន័យខាងក្រោម ។
អមតភាពសំដៅដល់ការរស់នៅជារៀងរហូតក្នុងស្ថានភាពជាតួអង្គដែលបានរស់ឡើងវិញ ។ « ជីវិតដ៏នៅអស់កល្បជានិច្ច ឬភាពតម្កើងឡើងគឺជាការប្រែក្លាយដូចជាព្រះ ហើយរស់នៅក្នុងវត្តមានរបស់ទ្រង់ជាក្រុមគ្រួសារដ៏នៅអស់កល្បជានិច្ច » ( ក្បួនខ្នាតទូទៅ ៖ ការបម្រើនៅក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ១.១ នៅលើបណ្ណាល័យដំណឹងល្អ ) ។
-
តើសេចក្ដីពិតដែលមាននៅក្នុង ម៉ូសេ ១:៣៩ អាចជួយអ្នកយល់ពីមូលហេតុដែលព្រះបង្កើតផែនដីយ៉ាងដូចម្ដេច ?
ប្រធាន ឌៀថើរ អេហ្វ អុជដូហ្វ ដែលពេលនោះជាសមាជិកគណៈប្រធានទីមួយ បានពន្យល់ពីគោលបំណងនៃការបង្កើតរបស់ព្រះ ។
នៅពេលយើងមើលទៅភាពធំធេងនៃសកលលោកនេះ ហើយនិយាយថា « តើមនុស្សជាអ្វីបើប្រៀបធៀបទៅនឹងសិរីល្អនៃការបង្កបង្កើត ? » ព្រះបានមានបន្ទូលដោយផ្ទាល់ថា យើងគឺជាមូលហេតុដែលទ្រង់បានបង្កើតសាកលលោកនេះ ! កិច្ចការ និងសិរីល្អរបស់ទ្រង់—គោលបំណងនៃសកលលោកដ៏រុងរឿងនេះ—គឺដើម្បីសង្គ្រោះ និងតម្កើងមនុស្សលោក ។ និយាយម្យ៉ាងទៀត ភាពធំធេងនៃភាពដ៏នៅអស់កល្បជានិច្ច សិរីល្អ និងអាថ៌កំបាំងនៃអវកាសដ៏គ្មានព្រំដែននេះ និងពេលវេលាទាំងអស់នេះ ត្រូវបានបង្កើតឡើងសម្រាប់ជាប្រយោជន៍នៃរូបកាយរមែងស្លាប់ដូចជាអ្នក និងខ្ញុំ ។ ព្រះវរបិតាសួគ៌របស់យើងបានបង្កើតសកលលោក ដើម្បីឲ្យយើងអាចឈោងទៅដល់សក្ដានុពលរបស់យើងក្នុងនាមជាបុត្រា និងបុត្រីរបស់ទ្រង់ ។ ( « You Matter to Him » Liahona ខែ វិច្ឆិកា ឆ្នាំ ២០១១ ទំព័រ ២០ )
-
តើសេចក្តីថ្លែងការណ៍នេះជួយអ្នកយល់យ៉ាងដូចម្ដេចអំពីព្រះវរបិតាសួគ៌ ?
-
តើសេចក្តីថ្លែងការណ៍នេះជួយអ្នកយល់យ៉ាងដូចម្ដេចអំពីខ្លួនអ្នក ?
ព្រះវរបិតាសួគ៌ជួយយើងឲ្យទទួលបានអមតភាព និងជីវិតដ៏នៅអស់កល្បជានិច្ច
សូមពិចារណាចាត់សិស្សជាក្រុមតូចៗ សម្រាប់ធ្វើសកម្មភាពខាងក្រោម ។ អ្នកអាចចែកក្រដាសមួយសន្លឹកឲ្យក្រុមនីមួយៗ ហើយអញ្ជើញសិស្សឲ្យសរសេរសំណួរខាងក្រោមនេះនៅផ្នែកខាងលើនៃក្រដាសរបស់ពួកគេ ។ បន្ទាប់មក សិស្សអាចសរសេរចម្លើយរបស់ពួកគេនៅក្រោមសំណួរទាំងនោះបាន ។ ប្រសិនបើអាច អ្នកអាចអញ្ជើញសិស្សឲ្យស្វែងរកបទគម្ពីរមួយ ដែលថ្លែងទីបន្ទាល់អំពីចម្លើយខ្លះ ឬទាំងអស់របស់ពួកគេ ។
-
តើព្រះវរបិតាសួគ៌ និងព្រះយេស៊ូវគ្រីស្ទបានធ្វើអ្វីខ្លះ ដើម្បីនាំឲ្យយើងទទួលបានអមតភាព ?
-
តើទ្រង់ទាំងទ្វេបានធ្វើ និងបន្តធ្វើអ្វីខ្លះ ដើម្បីជួយយើងឲ្យទទួលបានជីវិតដ៏នៅអស់កល្បជានិច្ច ?
ដើម្បីជួយសិស្សស្វែងយល់ដោយខ្លួនឯង សូមទុកពេលគ្រប់គ្រាន់ដើម្បីឆ្លើយតបនឹងសំណួរមុនៗ ។ បន្ទាប់មក សូមឲ្យពួកគេបន្ថែមទៅក្នុងបញ្ជីរបស់ពួកគេ ដោយអាន យ៉ូហាន ៣:១៦ និងសេចក្ដីថ្លែងការណ៍ខាងក្រោមដោយប្រធាន ឌៀថើរ អេហ្វ អុជដូហ្វ ។
ប្រធាន ឌៀថើរ អេហ្វ អុជដូហ្វ នៃគណៈប្រធានទីមួយ បានចែកចាយបន្ថែមនូវវិធីនានាដែលព្រះវរបិតាសួគ៌នាំមកនូវអមតភាព និងជីវិតដ៏នៅអស់កល្បជានិច្ចមកដល់យើង ។
[ ព្រះវរបិតាសួគ៌ ] បានប្រទានដល់យើងនូវដំណឹងល្អ និងសាសនាចក្រនៃព្រះយេស៊ូវគ្រីស្ទ ។ ទ្រង់បានប្រទានដល់យើងនូវផែនការនៃសេចក្តីប្រោសលោះ ផែនការនៃសេចក្តីសង្គ្រោះ ព្រមទាំងផែនការនៃសុភមង្គលផងដែរ ។ …
ទ្រង់បានប្រទានដល់យើងនូវព្រះវិញ្ញាណបរិសុទ្ធ ដែលជាអំណោយទានដ៏មានតម្លៃ ។ …
ទ្រង់បានប្រទានឱកាសឲ្យយើងនិយាយជាមួយទ្រង់ ២៤/៧ តាមរយៈការអធិស្ឋានដោយសេចក្តីជំនឿ និងការទូលអង្វរដោយស្មោះសរ ។
ទ្រង់បានប្រទានដល់យើងនូវសាវក និងព្យាការីសម័យទំនើប ដែលបើកសម្ដែងព្រះបន្ទូលនៃព្រះ នៅសម័យកាលរបស់យើង ។ …
ទ្រង់បានស្ដារឡើងវិញនូវសាសនាចក្ររបស់ទ្រង់ ។ …
ទ្រង់បានប្រទានព្រះគម្ពីរបរិសុទ្ធដល់យើង—ជាព្រះបន្ទូលរបស់ទ្រង់ដែលបានសរសេរទុកសម្រាប់យើង ។
ទ្រង់បានប្រទានឧបករណ៍បច្ចេកវិទ្យាទំនើបជាច្រើន ដើម្បីជួយយើងក្នុងដំណើរនៃភាពជាសិស្សរបស់យើង ។ …
ហេតុអ្វីព្រះវរបិតាសួគ៌ប្រទានជំនួយយ៉ាងច្រើនដល់យើង ? ដោយសារទ្រង់ស្រឡាញ់យើង ។ ហើយដោយសារតែ ដូចទ្រង់បានមានបន្ទូលអំពីអង្គទ្រង់ផ្ទាល់ថា « នេះហើយជាកិច្ចការរបស់យើង និងសិរីល្អរបស់យើង—គឺដើម្បីនាំឲ្យមានអមតភាព និងជីវិតដ៏នៅអស់កល្បជានិច្ចដល់មនុស្ស » ( ម៉ូសេ ១:៣៩ ) ។ ( « Our Father, Our Mentor » Ensign ខែ មិថុនា ឆ្នាំ ២០១៦ ទំព័រ ៥ )
សូមអញ្ជើញសិស្សឲ្យជ្រើសរើសវិធីមួយចំនួនដែលមានអត្ថន័យបំផុតសម្រាប់ពួកគេ នៅពេលពួកគេឆ្លើយតបទៅនឹងសំណួរខាងក្រោម ។
-
តើអ្វីទាំងនេះអាចជួយយើងឲ្យឈានទៅរកជីវិតដ៏នៅអស់កល្បជានិច្ចបានដូចម្ដេច ?
-
តើវិធីទាំងនេះបានជួយអ្នកឲ្យបានកាន់តែដូចជាព្រះវរបិតាសួគ៌យ៉ាងដូចម្ដេច ?
សូមអញ្ជើញសិស្សទាំងឡាយឲ្យចែកចាយវិធីមួយដែលពួកគេបានជ្រើសរើស និងចម្លើយរបស់ពួកគេចំពោះសំណួរខាងលើ ។ សូមរកមើលវិធីដើម្បីអរគុណ និងបញ្ជាក់គុណតម្លៃដល់ពួកគេសម្រាប់ចម្លើយរបស់ពួកគេ ។ ប្រសិនបើសិស្សមិនផ្តោតលើព្រះអង្គសង្គ្រោះដោយឯកឯងទេ សូមយោងទៅ យ៉ូហាន ៣:១៦ និងម៉ូសាយ ៤:២ ហើយស្នើសិស្សឲ្យចែកចាយពីរបៀបដែលព្រះអង្គសង្គ្រោះជួយពួកគេឲ្យរីកចម្រើន និងឲ្យក្លាយកាន់តែដូចជាព្រះវរបិតាសួគ៌ ។
ការដឹងគុណចំពោះព្រះវរបិតាសួគ៌
ដើម្បីជួយសិស្សឲ្យមានអារម្មណ៍ដឹងគុណកាន់តែខ្លាំងចំពោះព្រះវរបិតាសួគ៌ និងកិច្ចការរបស់ទ្រង់ ដើម្បីនាំមកនូវអមតភាព និងជីវិតដ៏នៅអស់កល្បជានិច្ច សូមអញ្ជើញពួកគេឲ្យស្វែងរកជំនួយពីព្រះអម្ចាស់ នៅពេលពួកគេឆ្លើយតបទៅនឹងសំណួរខាងក្រោម នៅក្នុងសៀវភៅសិក្សារបស់ពួកគេ ។ ម្យ៉ាងទៀត សិស្សអាចបញ្ចូលក្នុងសៀវភៅកំណត់ហេតុនូវព័ត៌មានដែលបង្ហាញពីការដឹងគុណរបស់ពួកគេចំពោះព្រះវរបិតាសួគ៌ ចំពោះអ្វីដែលទ្រង់ធ្វើសម្រាប់ពួកគេ ។
-
នៅថ្ងៃនេះ តើអ្នកបានស្វែងយល់ ឬមានអារម្មណ៍ដឹងអ្វីខ្លះដែលអ្នកចង់ចងចាំ ?
-
តើអ្នកមានអារម្មណ៍ដូចម្ដេចចំពោះព្រះវរបិតាសួគ៌ និងព្រះយេស៊ូវគ្រីស្ទ និងចំពោះអ្វីដែលទ្រង់ទាំងទ្វេធ្វើដើម្បីជួយអ្នកត្រឡប់មករកទ្រង់វិញ ?
ទន្ទេញ
អ្នកអាចនឹងចង់ជួយសិស្សឲ្យទន្ទេញសេចក្ដីយោងចំណេះចំណានខាងគោលលទ្ធិ និងឃ្លាបទគម្ពីរគន្លឹះក្នុងអំឡុងមេរៀននេះ ហើយរំឭកវាក្នុងមេរៀនក្រោយៗទៀត ។ ឃ្លាគន្លឹះក្នុងព្រះគម្ពីរគឺ « នេះហើយជាកិច្ចការរបស់យើង និងសិរីល្អរបស់យើង—គឺដើម្បីនាំឲ្យមានអមតភាព និងជីវិតដ៏នៅអស់កល្បជានិច្ចដល់មនុស្ស » ។ គំនិតសម្រាប់សកម្មភាពទន្ទេញ មាននៅក្នុងឯកសារឧបសម្ព័ន្ធដែលនៅក្រោម « សកម្មភាពរំឭកចំណេះចំណានខាងគោលលទ្ធិឡើងវិញ » ។