« ម៉ូសេ ១:១–១១ ៖ ‹ យើងមានកិច្ចការសម្រាប់អ្នក … ជាបុត្រយើង › សៀវភៅសិក្សាព្រះគម្ពីរសញ្ញាចាស់សម្រាប់គ្រូបង្រៀនថ្នាក់សិក្ខាសាលា ( ឆ្នាំ ២០២៦ )
« ម៉ូសេ ១:១–១១ ៖ ‹ យើងមានកិច្ចការសម្រាប់អ្នក … ជាបុត្រយើង › សៀវភៅសិក្សាព្រះគម្ពីរសញ្ញាចាស់សម្រាប់គ្រូបង្រៀនថ្នាក់សិក្ខាសាលា
ម៉ូសេ ១; អ័ប្រាហាំ ៣ ៖ មេរៀនទី ៤
ម៉ូសេ ១:១–១១
« យើងមានកិច្ចការសម្រាប់អ្នក … ជាបុត្រយើង »
នៅលើភ្នំខ្ពស់ ម៉ូសេ « បានឃើញព្រះនៅប្រទល់មុខ ហើយគាត់បានទូលជាមួយនឹងទ្រង់ » ( ម៉ូសេ ១:២ ) ។ ព្រះបានមានបន្ទូលប្រាប់ម៉ូសេថា « អ្នកជាបុត្ររបស់យើង » ( ម៉ូសេ ១:៤ ) និងថា « យើងមានកិច្ចការសម្រាប់អ្នក » ( ម៉ូសេ ១:៦ ) ។ គោលបំណងនៃមេរៀននេះគឺដើម្បីជួយសិស្សឲ្យទទួលអារម្មណ៍ថា ពួកគេជាបុត្រាបុត្រីរបស់ព្រះ ហើយទ្រង់មានកិច្ចការសម្រាប់ពួកគេធ្វើ ។
ការរៀបចំរបស់សិស្ស ៖ សូមអញ្ជើញសិស្សឲ្យជញ្ជឹងគិត ឬសរសេរអ្វីដែលពួកគេជឿថា ជាគោលបំណងនៅក្នុងជីវិតរបស់ពួកគេ ។
សកម្មភាពរៀនសូត្រដែលអាចមាន
អ្វីមួយសម្រាប់ឲ្យអ្នកធ្វើ
សូមសរសេរលើក្ដារខៀនថា « ( ឈ្មោះរបស់អ្នក ) ខ្ញុំមានអ្វីមួយដែលខ្ញុំចង់ឲ្យអ្នកធ្វើ » ។ សូមសួរសិស្សថាតើពួកគេទទួលអារម្មណ៍យ៉ាងណា នៅពេលនរណាម្នាក់ប្រាប់ពួកគេថា គាត់មានអ្វីមួយដែលគាត់ចង់ឲ្យពួកគេធ្វើ ។ សូមពិចារណាសួរសំណួរខាងក្រោមនេះ ។
-
តើអ្នកទទួលអារម្មណ៍ផ្សេងគ្នាអាស្រ័យលើអ្នកសួរឬទេ ? ហេតុអ្វីទទួល ឬមិនទទួលអារម្មណ៍បែបនេះ ?
-
តើអ្នកនឹងទទួលអារម្មណ៍យ៉ាងណា ប្រសិនបើព្រះមានបន្ទូលបែបនេះមកកាន់អ្នក ? ហេតុអ្វី ?
សូមអញ្ជើញសិស្សឲ្យឆ្លើយសំណួរខាងក្រោមនេះនៅក្នុងសៀវភៅកំណត់ហេតុបទគម្ពីររបស់ពួកគេ ។
-
តើអ្នកជឿថា ព្រះមានកិច្ចការសម្រាប់អ្នកក្នុងជីវិតនេះឬទេ ? ហេតុអ្វីទទួល ឬមិនទទួលអារម្មណ៍បែបនេះ ?
-
តើអ្នកទទួលអារម្មណ៍ល្អប៉ុណ្ណាពេលអ្នកដឹងអំពីអ្វីដែលព្រះចង់ឲ្យអ្នកធ្វើ ?
-
តើអ្នកគិតថា អ្នកនឹងត្រូវដឹងអ្វីខ្លះអំពីព្រះ និងខ្លួនឯងដើម្បីជំរុញទឹកចិត្តក្នុងការធ្វើកិច្ចការនោះ ?
ខណៈពេលសិស្សកំពុងសិក្សា ម៉ូសេ ១ នៅក្នុងមេរៀននេះ សូមអញ្ជើញពួកគេឲ្យស្វែងរកជំនួយតាមរយៈព្រះវិញ្ញាណបរិសុទ្ធ ដើម្បីដឹងបន្ថែមទៀតអំពីខ្លួនឯង អំពីព្រះជាម្ចាស់ និងអំពីអ្វីដែលទ្រង់សព្វព្រះទ័យចង់ឲ្យពួកគេធ្វើនៅក្នុងជីវិតនេះ ។
គំរូរបស់ម៉ូសេ
សូមអញ្ជើញសិស្សឲ្យស្វែងរកព្រះគម្ពីរម៉ូសេ នៅក្នុងមុក្ដាដ៏មានតម្លៃមហិមា ។ សូមពន្យល់ថា ព្រះបានបើកសម្ដែងព្រះគម្ពីរម៉ូសេតាមរយៈព្យាការី យ៉ូសែប ស្ម៊ីធ នៅពេលលោកធ្វើការបកប្រែដ៏បំផុសគំនិតក្នុង លោកុប្បត្តិ ១ ដល់ លោកុប្បត្តិ ៦:១៣ ។ វាមាននូវពាក្យពេចន៍ដែលព្រះបានត្រាស់បង្គាប់ម៉ូសេឲ្យកត់ត្រា ( ម៉ូសេ ១:៤០ ) ។
សូមពិចារណាបង្ហាញរូបភាពរបស់ម៉ូសេដូចខាងក្រោមនេះ ។
-
តើអ្នកដឹងអ្វីខ្លះអំពីម៉ូសេ និងជីវិតរបស់លោក ?
ប្រសិនបើចាំបាច់ សូមពន្យល់ថា មុនពេលព្រះអម្ចាស់ធ្វើអព្ភូតហេតុតាមរយៈម៉ូសេ ដើម្បីដឹកនាំរាស្ដ្រទ្រង់ចេញពីទាសភាព ម៉ូសេបានកើតមកជាសាសន៍អ៊ីស្រាអែល ( រាស្ត្រនៃសេចក្ដីសញ្ញារបស់ព្រះ ) ប៉ុន្តែត្រូវបានចិញ្ចឹមដោយគ្រួសាររាជវង្សអេស៊ីព្ទ ។ នៅទីបំផុត លោកត្រូវភៀសខ្លួនពីស្រុកអេស៊ីព្ទទៅកាន់ទឹកដីថ្មីមួយ ដើម្បីរក្សាជីវិតរបស់លោក ដោយត្រូវចាកចេញពីគ្រួសារតែមួយគត់ដែលលោកបានស្គាល់ ។
-
ប្រសិនបើអ្នកស្ថិតក្នុងស្ថានភាពរបស់ម៉ូសេវិញ តើអ្នកអាចនឹងមានគំនិតអ្វីខ្លះអំពីគោលបំណងសម្រាប់ជីវិតរបស់អ្នក ?
មួយរយៈក្រោយពីម៉ូសេបានភៀសខ្លួនចេញពីស្រុកអេស៊ីព្ទ ព្រះអង្គសង្គ្រោះបានលេចមក « ប្រទល់មុខ » ម៉ូសេ( ម៉ូសេ ១:២ ) ។ ព្រះយេស៊ូវគ្រីស្ទដែលជាព្រះមួយអង្គដែលគង់នៅជាមួយព្រះវរបិតាសួគ៌ ទ្រង់បានមានបន្ទូលទៅកាន់ម៉ូសេ ប្រៀបដូចជាព្រះដែលជាព្រះវរបិតាដែរ ។ ដូច្នេះ យើងអាចអានខគម្ពីរទាំងនេះ ដើម្បីយល់កាន់តែច្បាស់អំពីព្រះវរបិតា និងព្រះរាជបុត្រា ។ ម៉ូសេបានរៀនច្រើនអំពីព្រះវរបិតាសួគ៌ និងទំនាក់ទំនងរបស់ទ្រង់ជាមួយព្រះរាជបុត្រា ដែលដឹកនាំលោកឲ្យធ្វើកិច្ចការដ៏សំខាន់មួយ ។ ដើម្បីជួយសិស្សឲ្យរកឃើញនូវអ្វីដែលម៉ូសេបានរៀន សូមគូរតារាងខាងក្រោមនៅលើក្ដារខៀន ។ ក្នុងសកម្មភាពនេះ សិស្សអាចចម្លងតារាងនេះដាក់ក្នុងសៀវភៅកំណត់ហេតុការសិក្សារបស់ពួកគេ ឬបំពេញវាជាមួយមិត្តរួមថ្នាក់នៅលើក្ដារខៀន ។
|
ព្រះវរបិតាសួគ៌ និងព្រះយេស៊ូវគ្រីស្ទ |
ម៉ូសេ |
|---|---|
សូមអាន ម៉ូសេ ១:១–១១ ដោយស្រមៃថាតើការមានបទពិសោធន៍នេះនឹងមានលក្ខណៈយ៉ាងដូចម្ដេច ។ នៅលើតារាង សូមសរសេរអ្វីដែលខគម្ពីរទាំងនេះបង្រៀនអំពីព្រះវរបិតាសួគ៌ ព្រះយេស៊ូវគ្រីស្ទ និងម៉ូសេ ។
វិធីផ្សេងទៀតដើម្បីសិក្សាខគម្ពីរទាំងនេះ គឺបង្ហាញវីដេអូ « I Am a Son of God » ចាប់ពីនាទីទី ០:០០ ដល់ ២:៤៩ ។ ក្រោយពីមើលវីដេអូនេះរួច អ្នកអាចអញ្ជើញសិស្សឲ្យអានខគម្ពីរទាំងនោះ ដោយរកមើលសេចក្ដីថ្លែងការណ៍ ឬសេចក្ដីលម្អិតសំខាន់ៗដែលមិនមាននៅក្នុងវីដេអូ ។
សូមអញ្ជើញសិស្សឲ្យចែកចាយអ្វីដែលពួកគេបានរកឃើញនៅក្នុងបទគម្ពីរ នៅពេលពួកគេបានបំពេញតារាង និងមូលហេតុដែលវាអាចជារឿងដ៏សំខាន់ ឬមានអត្ថន័យចំពោះពួកគេ ។ បើចាំបាច់ សូមសួរសំណួរខាងក្រោមនេះ ។
-
តើអ្វីទៅដែលអ្នកមានចំណាប់អារម្មណ៍អំពីព្រះវរបិតាសួគ៌ និងព្រះយេស៊ូវគ្រីស្ទ ? ហេតុអ្វី ?
ខណៈពេលសិស្សកំពុងចែកចាយ សូមរកមើលវិធីដើម្បីបញ្ជាក់ពីភាពអស្ចារ្យរបស់ព្រះ ។ អ្នកអាចស្នើសិស្សឲ្យចង្អុលបង្ហាញឃ្លាដែលរំលេចពីព្រះចេស្ដារបស់ទ្រង់ ។
-
តើព្រះបានមានបន្ទូលប្រាប់ម៉ូសេអំពីអ្វីខ្លះ នៅក្នុង ខទី ៤, ៦–៧ ដែលអាចអនុវត្តចំពោះអ្នកដែរនោះ ?
សិស្សអាចនឹងកត់សម្គាល់ឃើញសេចក្ដីពិតមួយដូចជា ៖ ពួកយើងគឺជាបុត្រាបុត្រីរបស់ព្រះ ហើយទ្រង់មានកិច្ចការសម្រាប់ឲ្យយើងធ្វើ ។ សូមពិចារណាអញ្ជើញសិស្សឲ្យកត់ត្រាសេចក្ដីពិតនេះនៅក្នុងព្រះគម្ពីររបស់ពួកគេ ឬគូសសម្គាល់ឃ្លាដែលបង្រៀនអំពីវា ។
-
តើការដឹងពីភាពអស្ចារ្យរបស់ព្រះធ្វើឲ្យការក្លាយជាបុត្ររបស់ទ្រង់កាន់តែមានន័យយ៉ាងណា ?
-
តើការយល់ដឹងថា ពួកយើងជាបុត្រាបុត្រីរបស់ព្រះអាចជួយយើងឲ្យយល់ពីគោលបំណងមួយ ឬច្រើនរបស់យើងក្នុងជីវិតនេះយ៉ាងដូចម្ដេច ?
ចំណាំ៖ វាអាចនឹងមានប្រយោជន៍ក្នុងការដឹងថា នៅក្នុងមេរៀនបន្ទាប់ស្ដីពី ម៉ូសេ ១:១២–២៦ សិស្សនឹងសិក្សាពីរបៀបដែលការយល់ដឹងរបស់ម៉ូសេអំពីអត្តសញ្ញាណរបស់គាត់ ក្នុងនាមជាបុត្រារបស់ព្រះបានផ្ដល់អំណាចដល់គាត់ ដើម្បីទប់ទល់នឹងការល្បួងរបស់សាតាំង ។ ដូចគ្នានេះផងដែរ មេរៀនស្ដីពី លោកុប្បត្តិ ១:២៦–២៧ នៅក្នុងសប្តាហ៍បន្ទាប់ នឹងជួយសិស្សឲ្យទទួលអារម្មណ៍ដឹងពីសារៈសំខាន់នៃអត្តសញ្ញាណ និងសក្តានុពលរបស់ពួកគេ ក្នុងនាមជាបុត្រាបុត្រីរបស់ព្រះមាតាបិតាសួគ៌ ។
កិច្ចការដែលព្រះមានសម្រាប់យើង
ដើម្បីជួយសិស្សឲ្យជញ្ជឹងគិតពីរបៀបដែលព្រះមានកិច្ចការដ៏សំខាន់មួយសម្រាប់បុត្រាបុត្រីរបស់ទ្រង់ សូមពិចារណាធ្វើសកម្មភាពដូចខាងក្រោម ។
សូមគូររូបដំបងចំនួនបីនៅក្នុងសៀវភៅកំណត់ហេតុការសិក្សារបស់អ្នក ។ សូមស្វែងយល់អំពីកិច្ចការដែលព្រះមានសម្រាប់បុគ្គលទាំងឡាយ នៅក្នុងឧទាហរណ៍ខាងក្រោម ហើយដាក់ស្លាកលើរូបដំបងនោះ ។ បន្ទាប់មកសរសេរចម្លើយចំពោះសំណួរខាងក្រោម នៅជាប់ឬខាងក្រោមរូបនីមួយៗ ។
-
ម៉ូសេ ។ ស្វែងយល់អំពីពាក្យ « ម៉ូសេ » នៅក្នុង ៖ Bible Dictionary ឬ សេចក្ដីណែនាំដល់បទគម្ពីរទាំងឡាយ ។
-
ហ្គីរីស ( បុរសម្នាក់កើត និងធំធាត់នៅប្រទេសនេប៉ាល់ ដែលបានរកឃើញដំណឹងល្អ ហើយនៅទីបំផុតបានផ្លាស់ទៅរដ្ឋយូថាហ៍ ) ។ សូមអានអត្ថបទខាងក្រោម ឬមើល « I Have a Work for Thee » ( ១០:២៥ ) ពីនាទីទី ០:១៨ ដល់ ១:១២ ។
10:25
ជាច្រើនឆ្នាំក្រោយមក នៅពេលជនភៀសខ្លួនជាង ១៥០០ នាក់មកពីជំរុំនៅប្រទេសនេប៉ាល់ត្រូវបានផ្លាស់ទីទៅរដ្ឋយូថាហ៍ ហ្គីរីសទទួលអារម្មណ៍បំផុសគំនិតឲ្យជួយពួកគេ ។ ដោយចេះនិយាយភាសាកំណើតបានស្ទាត់ និងយល់ដឹងអំពីវប្បធម៌ផងនោះ ហ្គីរីសបានបម្រើការជាអ្នកបកប្រែ គ្រូបង្រៀន និងអ្នកប្រឹក្សា ។ … សាខាមួយដែលប្រើភាសានេប៉ាល់ត្រូវបានបង្កើតឡើង ហើយក្រោយមក ហ្គីរីស បានបម្រើជាប្រធានសាខានោះ ។ គាត់ក៏បានជួយនៅក្នុងការបកប្រែព្រះគម្ពីរមរមនទៅជាភាសានេប៉ាល់ផងដែរ ។ ( ចន ស៊ី ភីងគ្រី ជុញ្ញ័រ « I Have a Work for Thee » Liahona ខែ វិច្ឆិកា ឆ្នាំ ២០១៧ ទំព័រ ៣២ )
-
បងស្រីដែលមានការបាក់ទឹកចិត្ត ។ សូមអានអត្ថបទខាងក្រោមនេះ ។
ថ្ងៃមួយមានបងស្រីដែលបាក់ទឹកចិត្តម្នាក់បានទូលអង្វរថា « ឱ! ព្រះអម្ចាស់អើយ តើការងារបម្រើផ្ទាល់របស់ខ្ញុំគឺជាអ្វីទៅ ? » ទ្រង់បានតបថា « សូមយកចិត្តទុកដាក់លើមនុស្សដទៃ » ។ … ចាប់តាំងពីពេលនោះមក គាត់បានរកឃើញអំណរជាប្រចាំ ក្នុងការយកចិត្តទុកដាក់លើអស់អ្នកដែលត្រូវបានគេបំភ្លេចចោល ហើយព្រះបានធ្វើការតាមរយៈគាត់ដើម្បីប្រទានពរដល់មនុស្សជាច្រើន ។ ( ចន ស៊ី ភីងគ្រី ជុញ្ញ័រ « Have a Work for Thee » Liahona ខែ វិច្ឆិកា ឆ្នាំ ២០១៧ ទំព័រ ៣៣ )
អ្នកអាចជំនួសរឿងរបស់ហ្គីរីស ឬរបស់បងស្រីដែលបាក់ទឹកចិត្តនោះ ជាមួយនឹងឧទាហរណ៍មួយទៀតដែលអ្នកដឹងនៅសម័យទំនើបនេះ ។
វាអាចមានប្រយោជន៍ក្នុងការបង្ហាញសំណួរខាងក្រោមនេះនៅលើក្ដារខៀន ។
-
តើបុគ្គលនោះបានធ្វើអ្វីខ្លះដើម្បីជួយអ្នកដទៃ ហើយនាំពួកគេមករកព្រះយេស៊ូវគ្រីស្ទ ?
-
ហេតុអ្វីបានជាព្រះដែលគួរឲ្យស្រឡាញ់អាចនឹងចង់ឲ្យពួកគេធ្វើកិច្ចការនេះ ?
-
តើពួកគេបានត្រៀមខ្លួនយ៉ាងពិសេសដើម្បីជួយដោយរបៀបណា ? ឬតើពួកគេបានជួយតាមរបៀបពិសេសឬផ្ទាល់ខ្លួនដោយរបៀបណា ?
ខណៈពេលសិស្សកំពុងចែកចាយអ្វីដែលពួកគេបានរកឃើញ សូមរកមើលរបៀបដើម្បីបញ្ជាក់ឲ្យច្បាស់ថា មិនមែនកិច្ចការទាំងអស់ដែលព្រះអម្ចាស់សព្វព្រះទ័យចង់ឲ្យយើងធ្វើសុទ្ធតែធំ ឬសម្បើមនោះទេ ប៉ុន្តែវាតែងតែសំខាន់ចំពោះព្រះអម្ចាស់ និងចំពោះបុត្រាបុត្រីរបស់ទ្រង់ដែលយើងបម្រើ ។ ភារកិច្ច និងទំនួលខុសត្រូវជាក់លាក់ដែលព្រះអម្ចាស់អាចនឹងប្រទានដល់យើង នឹងជួយយើងឲ្យចូលរួមក្នុងកិច្ចការនៃសេចក្ដីសង្គ្រោះ និងភាពតម្កើងឡើងរបស់ទ្រង់ ( សូមមើល ម៉ូសេ ១:៣៩ ) ។ ឥឡូវនេះ អាចនឹងមានកិច្ចការដែលទ្រង់ចង់ផ្តោតទៅលើផងដែរ ប៉ុន្តែនៅពេលអនាគត ទ្រង់អាចនឹងស្នើឲ្យយើងផ្តោតទៅលើអ្វីផ្សេង ។
កិច្ចការសម្រាប់អ្នក
សូមគូររូបដំបងថែមមួយទៀត ហើយសរសេរឈ្មោះរបស់អ្នកនៅខាងក្រោមវា ។
អែលឌើរ ចន ស៊ី ភីងគ្រី ជុញ្ញ័រ ក្នុងពួកចិតសិបនាក់បានថ្លែងទីបន្ទាល់ ៖
ព្រះបានថ្លែងទៅម៉ូសេថា « យើងមានកិច្ចការសម្រាប់អ្នក » ( ម៉ូសេ ១:៦ ) ។ តើបងប្អូនធ្លាប់ឆ្ងល់ទេថា តើព្រះវរបិតាសួគ៌មានកិច្ចការសម្រាប់បងប្អូនឬអត់ ? តើមានអ្វីសំខាន់ៗដែលទ្រង់បានរៀបចំឲ្យបងប្អូន—គឺសម្រាប់បងប្អូនជាពិសេស—ដើម្បីសម្រេចឲ្យបានឬទេ ? ខ្ញុំសូមថ្លែងទីបន្ទាល់ថា ចម្លើយនោះ គឺថា ពិតជាមានមែន ! ( « I Have a Work for Thee » Liahona ខែ វិច្ឆិកា ឆ្នាំ ២០១៧ ទំព័រ ៣២ )
សូមពិចារណាអញ្ជើញសិស្សឲ្យនិយាយការអធិស្ឋានដោយស្ងាត់ស្ងៀម ហើយស្វែងរកវិវរណៈពីព្រះអម្ចាស់ នៅពេលពួកគេឆ្លើយសំណួរមួយចំនួនឬទាំងអស់ខាងក្រោម ជុំវិញរូបដំបងរបស់ពួកគេ ។ វាអាចនឹងមានប្រយោជន៍ក្នុងការពន្យល់ថា សិស្សទាំងឡាយអាចនឹងមិនទទួលបានចម្លើយពេញលេញចំពោះសំណួរទាំងនេះនៅក្នុងថ្នាក់នោះទេ ។ សូមអញ្ជើញពួកគេឲ្យបន្តជញ្ជឹងគិត ហើយអធិស្ឋានអំពីពួកវា ។
-
តើខ្ញុំកំពុងធ្វើអ្វីរួចទៅហើយដែលអាចជាផ្នែកនៃកិច្ចការរបស់ព្រះសម្រាប់ខ្ញុំក្នុងជីវិតនេះ ?
-
តើព្រះបានបើកសម្ដែងអ្វីដល់ខ្ញុំរួចហើយអំពីអ្វីដែលទ្រង់សព្វព្រះទ័យចង់ឲ្យខ្ញុំធ្វើ ? ( នេះអាចរួមបញ្ចូលទាំងពរជ័យបព្វជិតភាព ការហៅបម្រើ ពរជ័យអយ្យកោ និងពេលវេលានៃវិវរណៈផ្សេងទៀត ) ។
-
តើព្រះអាចនឹងសព្វព្រះទ័យចង់ឲ្យខ្ញុំធ្វើកិច្ចការរបស់ទ្រង់ក្នុងគ្រួសាររបស់ខ្ញុំ ? នៅក្នុងវួដឬសាខារបស់ខ្ញុំដោយរបៀបណា ?
-
នៅពេលនេះឬពេលអនាគត តើព្រះអាចនឹងសព្វព្រះទ័យចង់ឲ្យខ្ញុំរៀបចំខ្លួនដើម្បីជួយអ្នកដទៃយ៉ាងដូចម្ដេច ?
ប្រសិនបើមិនមែនជារឿងផ្ទាល់ខ្លួនពេកទេ សូមអញ្ជើញសិស្សឲ្យចែកចាយចំណាប់អារម្មណ៍ឬអារម្មណ៍ដែលពួកគេទទួលបានពីអ្វីដែលពួកគេបានសិក្សានៅថ្ងៃនេះ ។ សូមពិចារណាចែកចាយទីបន្ទាល់ និងអារម្មណ៍របស់អ្នកអំពីគោលការណ៍នៅក្នុងមេរៀននេះ ។