« អ័ប្រាហាំ ៣ ៖ ជីវិតមុនផែនដី » សៀវភៅសិក្សាព្រះគម្ពីរសញ្ញាចាស់សម្រាប់គ្រូបង្រៀនថ្នាក់សិក្ខាសាលា ( ឆ្នាំ ២០២៦ )
« អ័ប្រាហាំ ៣ ៖ ជីវិតមុនផែនដី » សៀវភៅសិក្សាព្រះគម្ពីរសញ្ញាចាស់សម្រាប់គ្រូបង្រៀនថ្នាក់សិក្ខាសាលា
ម៉ូសេ ១; អ័ប្រាហាំ ៣ ៖ មេរៀនទី ៣
អ័ប្រាហាំ ៣
ជីវិតមុនផែនដី
ក្នុងការនិមិត្តមួយ ព្រះយេហូវ៉ាបានបង្ហាញ អ័ប្រាហាំ នូវកិច្ចការ និងការបង្កបង្កើតរបស់ទ្រង់ ។ ទ្រង់ក៏បានបង្ហាញ អ័ប្រាហាំ អំពីជីវិតមុនផែនដី រួមទាំងវិញ្ញាណដែលមានត្រកូលខ្ពស់ និងធំៗត្រូវបានជ្រើសរើសឲ្យធ្វើជាអ្នកដឹកនាំក្នុងជីវិតរមែងស្លាប់ ។ មេរៀននេះអាចជួយសិស្សយល់ពីរបៀបដែលចំណេះដឹងអំពីជីវិតមុនផែនដីនៅក្នុងផែនការរបស់ព្រះវរបិតាសួគ៌ អាចជួយពួកគេក្នុងជីវិតរបស់ពួកគេបាន ។
ការរៀបចំរបស់សិស្ស ៖ សូមអញ្ជើញសិស្សឲ្យសួរមិត្ត ឬសមាជិកគ្រួសារអំពីអ្វីដែលពួកគេដឹងអំពីជីវិតមុនផែនដី និងរបៀបដែលការដឹងអំពីជីវិតមុនផែនដីអាចជួយពួកគេបាន ។
សកម្មភាពរៀនសូត្រដែលអាចមាន
តើអ្នកអាយុប៉ុន្មានហើយ ?
សូមអញ្ជើញសិស្សមួយចំនួនឲ្យចែកចាយអំពីអាយុរបស់ពួកគេ ។
សូមចង្អុលបង្ហាញថា អាយុដែលពួកគេបានចែកចាយ គឺជារយៈពេលដែលពួកគេមាននៅក្នុងរូបកាយរបស់ពួកគេ ក្នុងជីវិតរបស់ពួកគេ ។ វិញ្ញាណរបស់យើងមានអាយុកាលយូរជាងរូបកាយរបស់យើងទៅទៀត ។ មុនចាប់កំណើត យើងបានរស់នៅជាមួយព្រះវរបិតាសួគ៌ និងព្រះអង្គសង្គ្រោះ ព្រះយេស៊ូវគ្រីស្ទ ។ យើងហៅការណ៍នេះថា ជីវិតមុនផែនដី ។
សូមឲ្យសិស្សសរសេរចម្លើយរបស់ពួកគេ ចំពោះសំណួរខាងក្រោម នៅក្នុងសៀវភៅកំណត់ហេតុការសិក្សារបស់ពួកគេ ។
-
តើអ្នកដឹងអ្វីខ្លះអំពីជីវិតមុនផែនដី ?
-
តើចំណេះដឹងអំពីជីវិតមុនផែនដីអាចជួយអ្នកបានដោយរបៀបណា ?
សូមលើកទឹកចិត្តសិស្សឲ្យបន្ថែមចម្លើយរបស់ពួកគេ នៅពេលពួកគេបន្តមេរៀននេះ ។ សូមលើកទឹកចិត្តពួកគេឲ្យស្វែងរកជំនួយពីព្រះវរបិតាសួគ៌ តាមរយៈព្រះវិញ្ញាណបរិសុទ្ធ ដើម្បីរៀនពីរបៀបដែលចំណេះដឹងអំពីជីវិតមុនផែនដីអាចជួយពួកគេបាន ។
អ្វីដែលយើងរៀនពីអ័ប្រាហាំ
ដើម្បីជួយសិស្សឲ្យដឹងថា គម្ពីរអ័ប្រាហាំបានមកពីណា នោះអ្នកអាចអញ្ជើញពួកគេឲ្យចែកចាយអ្វីដែលពួកគេដឹង ឬចែកចាយដូចខាងក្រោមនេះខ្លះៗតាមពាក្យសម្តីរបស់អ្នកផ្ទាល់ ។
អ័ប្រាហាំ បានកត់ត្រាបទពិសោធន៍មួយដែលអាចជួយយើងយល់បន្ថែមទៀតអំពីជីវិតមុនផែនដី ។ អ័ប្រាហាំបានកើតប្រហែលជា ២,០០០ ឆ្នាំ មុនការចាប់កំណើតនៃព្រះយេស៊ូវគ្រីស្ទ ។ លោកបានកត់ត្រាសេចក្ដីលម្អិតមួយចំនួននៃជីវិតរបស់លោក រួមនឹងការនិមិត្តដែលលោកបានទទួលពីព្រះ ដែលអាចរកបាននៅក្នុងគម្ពីរអ័ប្រាហាំ ។ កំណត់ត្រាដ៏ពិសិដ្ឋនេះ មានដើមកំណើតមកពីរមូរស្លឹកប៉ប្រក់ ដែលបានរកឃើញនៅប្រទេសអេស៊ីព្ទ ហើយសមាជិកសាសនាចក្រក៏បានទិញយក ។ បន្ទាប់មក កំណត់ត្រានេះត្រូវបានបង្ហាញដល់ព្យាការី យ៉ូសែប ស្ម៊ីធ តាមរយៈអំណោយទាន និងព្រះចេស្ដានៃព្រះ ។
សូមអាន អ័ប្រាហាំ ៣:១១–១២, ២១ ដើម្បីមើលអ្វីដែលព្រះអម្ចាស់បានបង្រៀនអ័ប្រាហាំ ។
-
តើអ្នកចាប់អារម្មណ៍អ្វីខ្លះពីក្នុងខគម្ពីរទាំងនេះ ?
-
តើសេចក្តីពិតអ្វីខ្លះដែលអ្នកបានរៀនអំពីព្រះអម្ចាស់ ?
នៅពេលដែលសិស្សចែកចាយ សូមអញ្ជើញពួកគេឲ្យចង្អុលបង្ហាញឃ្លា ឬខគម្ពីរដែលពួកគេទទួលបានការយល់ដឹងដើម្បីឲ្យសិស្សផ្សេងទៀតអាចគូសចំណាំឃ្លា ឬខគម្ពីរទាំងនោះ ប្រសិនបើពួកគេចង់ធ្វើ ។
-
តើការយល់ដឹងអំពីសេចក្តីពិតទាំងនេះអំពីព្រះយេស៊ូវគ្រីស្ទអាចមានឥទ្ធិពលលើអ្នកយ៉ាងដូចម្តេចឥឡូវនេះ ?
-
តើអ្នកបានធ្វើជាសាក្សី ឬដកពិសោធន៍នូវសេចក្តីពិតទាំងនេះអំពីព្រះអង្គសង្គ្រោះនៅក្នុងជីវិតរបស់អ្នកយ៉ាងដូចម្ដេច ?
ជីវិតមុនផែនដីរបស់យើង
បន្ទាប់ពីបានដឹងអំពីភាពអស្ចារ្យនៃជីវិតមុនផែនដីរបស់ព្រះយេស៊ូវគ្រីស្ទ ( សូមមើល អ័ប្រាហាំ ៣:១៦–២១ ) អ័ប្រាហាំក៏បានដឹងអំពីជីវិតមុនផែនដីរបស់យើងផងដែរ ។ មុននឹងអានអ្វីដែលព្រះអម្ចាស់បានបង្ហាញអ័ប្រាហាំ សូមស្រមៃមើលថាតើវានឹងទៅជាយ៉ាងណា ប្រសិនបើអ្នកអាចមើលជីវិតមុនផែនដីរបស់អ្នក ជាមួយព្រះវរបិតាសួគ៌ និងព្រះយេស៊ូវគ្រីស្ទនោះ ។ សូមពិចារណាពីរបៀបដែលវាអាចជះឥទ្ធិពលលើរូបអ្នក ។
សូមទុកពេលគ្រប់គ្រាន់ឲ្យសិស្សស្រមៃមើលអំពីឥទ្ធិពលនៃការត្រួតពិនិត្យមើលខ្លួនឯងនៅក្នុងស្ថានភាពជីវិតមុនផែនដីរបស់ពួកគេ ជាមួយព្រះវរបិតាសួគ៌ និងព្រះយេស៊ូវគ្រីស្ទ ។
អ័ប្រាហាំ ៣:២២–២៣ គឺជាវគ្គចំណេះចំណានខាងគោលលទ្ធិ ។ សូមពិចារណាអញ្ជើញសិស្សឲ្យគូសចំណាំវគ្គបទគម្ពីរចំណេះចំណានខាងគោលលទ្ធិតាមរបៀបដែលងាយចំណាំ ដើម្បីឲ្យពួកគេអាចងាយរកវាឃើញ ។
សូមអាន អ័ប្រាហាំ ៣:២២–២៣ ដោយស្វែងរកអ្វីដែលអ័ប្រាហាំបានរៀននៅក្នុងការនិមិត្តរបស់លោកអំពីជីវិតមុនជីវិតលើផែនដីនេះ ។ វាអាចនឹងមានប្រយោជន៍ ក្នុងការដឹងថា « បញ្ញាទាំងឡាយ » នៅក្នុងខគម្ពីរទាំងនេះសំដៅដល់វិញ្ញាណនៅជីវិតមុនផែនដី ។
-
តើសេចក្ដីពិតអ្វីខ្លះដែលអ្នកគិតថាអ័ប្រាហាំអាចបានដឹង ឬយល់ច្បាស់ជាងមុនដោយសារតែបទពិសោធន៍នេះ ?
សូមសរសេរសេចក្តីពិតផ្សេងៗដែលសិស្សចែកចាយនៅលើក្ដារខៀន ។ ប្រសិនបើសិស្សមិនលើកឡើងទេ សូមបន្ថែមចំណុចខាងក្រោមនេះ ៖ ព្រះបានជ្រើសរើសកូនវិញ្ញាណដែលមានត្រកូលខ្ពស់ និងធំៗរបស់ទ្រង់ឲ្យធ្វើជាអ្នកត្រួតត្រា មុនពេលពួកគេកើតមក ។ ការណ៍នេះត្រូវបានហៅជាញឹកញាប់ថា ការតែងតាំងទុកជាមុន ។
-
តើអ្នកគិតថា និយមន័យរបស់ពិភពលោកនៃពាក្យ « អ្នកដែលមានត្រកូលខ្ពស់ និងធំៗ » នឹងខុសពីនិយមន័យរបស់ព្រះអម្ចាស់យ៉ាងដូចម្ដេច ?
តើយើងជាផ្នែកមួយនៃអ្នកដែលមានត្រកូលខ្ពស់ និងធំៗដែរឬទេ ?
នៅក្នុងការប្រជុំធម្មនិដ្ឋានទូទាំងពិភពលោក ប្រធាន រ័សុល អិម ណិលសុន បានមានប្រសាសន៍អំពីរបៀបមួយដែលសេចក្តីពិតត្រូវបានបង្រៀននៅក្នុង អ័ប្រាហាំ ៣ អនុវត្តចំពោះអ្នក ។
ព្រះវរបិតាសួគ៌របស់យើងបានរក្សាទុកវិញ្ញាណដ៏អស្ចារ្យៗបំផុតជាច្រើន—ប្រហែលជាខ្ញុំអាចនិយាយថាជាក្រុមដ៏ល្អបំផុតរបស់ទ្រង់—សម្រាប់ដំណាក់កាលចុងក្រោយនេះ ។ ពួកវិញ្ញាណដ៏អស្ចារ្យៗ ជាវីរបុរសទាំងនោះ—អ្នកដែលសំខាន់បំផុតទាំងនោះ—គឺជាប្អូនៗ ! … ប្អូនៗគឺជាមនុស្សល្អបំផុតដែលព្រះអម្ចាស់បានបញ្ជូនមកកាន់លោកិយនេះ ។ ប្អូនៗមានសមត្ថភាពដើម្បីកាន់តែឆ្លាត និងកាន់តែឈ្លាសវៃ ហើយមានឥទ្ធិពលទៅលើពិភពលោកជាងជំនាន់មុនៗ ! ( « សង្ឃឹមអ៊ីស្រាអែល » [ ការប្រជុំធម្មនិដ្ឋានទូទាំងពិភពលោកសម្រាប់យុវវ័យ ថ្ងៃទី ៣ ខែ មិថុនា ឆ្នាំ ២០១៨ ] ទំព័រ ៨, ១៦ )
សូមពិចារណាអញ្ជើញសិស្សឲ្យគូសចំណាំបទគម្ពីររបស់ពួកគេតាមរបៀបដែលនឹងជួយពួកគេចងចាំនូវអ្វីដែលប្រធាន ណិលសុន បានបង្រៀន ។ បន្ទាប់ពី ខទី ២២ ពួកគេអាចនឹងសរសេរឃ្លា « រួមទាំងខ្ញុំ » ឬពួកគេអាចសរសេរឈ្មោះរបស់ពួកគេនៅខាងលើឈ្មោះរបស់អ័ប្រាហាំ នៅក្នុង ខទី ២៣ ឬពួកគេប្រហែលជាអាចភ្ជាប់ អ័ប្រាហាំ ៣:២២–២៣ ជាមួយនឹងសេចក្ដីថ្លែងការណ៍របស់ប្រធាន ណិលសុន ខាងលើនៅក្នុងបណ្ណាល័យដំណឹងល្អ ។
ប្រសិនបើមានប្រយោជន៍ សូមផ្តល់ពេលខ្លះដល់សិស្សដើម្បីស្វែងយល់បន្ថែមអំពីជីវិតមុនផែនដី ។ ពួកគេអាចសិក្សា « ជីវិតមុនផែនដី » នៅក្នុងសេចក្ដីណែនាំដល់បទគម្ពីរទាំងឡាយ ឬTopical Guide ។ ឬសិស្សអាចបង្កើតខ្សែច្រវាក់បទគម្ពីរ ដោយភ្ជាប់ខគម្ពីរអំពីជីវិតមុនផែនដីដូចជា យេរេមា ១:៤–៥; អាលម៉ា ១៣:៣–៤ និងគោលលទ្ធិ និងសេចក្តីសញ្ញា ១៣៨:៥៥–៥៦ ។ សូមឲ្យសិស្សចែកចាយនូវអ្វីដែលពួកគេបានរកឃើញ និងមូលហេតុដែលវាមានអត្ថន័យចំពោះពួកគេ ។
សូមធ្វើដូចខាងក្រោមជាក្រុមតូចៗ រួចបង្ហាញគំនិតខ្លះៗរបស់ពួកគេដល់ថ្នាក់ទាំងមូល ។
សូមស្រមៃថា មាននរណាម្នាក់ក្នុងថ្នាក់របស់អ្នកមិនប្រាកដទេថាតើ អ័ប្រាហាំ ៣:២២–២៣ អនុវត្តចំពោះពួកគេដោយរបៀបណា ។
រៀបចំដូចខាងក្រោម ៖
-
សេចក្ដីសង្ខេបអំពីអ្វីដែល អ័ប្រាហាំ ៣:២២–២៣ និងប្រធាន ណិលសុន បានបង្រៀន ។
-
គំនិតសម្រាប់របៀបដែលអ្នក ឬយុវវ័យផ្សេងទៀតអាចជះឥទ្ធិពលដល់អ្នកដទៃសម្រាប់ការល្អ ឬនាំពួកគេឲ្យខិតកាន់តែជិតព្រះយេស៊ូវគ្រីស្ទ ។
-
អ្នកមានអារម្មណ៍ថា ការយល់ដឹងរបស់អ្នកអំពីជីវិតមុនផែនដីអាចជួយអ្នកក្នុងជីវិតរបស់អ្នកយ៉ាងដូចម្ដេច ។
នៅពេលសិស្សចែកចាយ សូមរកមើលរបៀបដែលសមរម្យដើម្បីបញ្ជាក់ថា ព្រះវរបិតាសួគ៌បានបញ្ជូនពួកគេមកទីនេះនៅពេលនេះ ដើម្បីជួយអ្នកដទៃឲ្យចូលមកកាន់តែជិតទ្រង់ ។ ផងដែរ សូមថ្លែងពាក្យគួរសម និងការសរសើរចំពោះសិស្សដែលស្ម័គ្រចិត្តចូលរួម ។ ការធ្វើបែបនេះជួយសិស្សឲ្យដឹងថា អ្នកឲ្យតម្លៃលើការរួមចំណែករបស់ពួកគេ ។ ការខិតខំប្រឹងប្រែងរបស់អ្នកអាចជួយបង្កើនការជំរុញទឹកចិត្តរបស់ពួកគេ ក្នុងការចែកចាយគំនិតរបស់ពួកគេជាមួយថ្នាក់រៀនម្តងទៀត ។
សម្រាប់ការបំពាក់បំប៉នបន្ថែម សូមមើល « បង្កើតបរិយាកាសមួយ ដែលមនុស្សទាំងអស់ទទួលបានការគោរព ហើយដឹងថា ការរួមចំណែករបស់ពួកគេមានតម្លៃ » នៅក្នុង ជំនាញការអភិវឌ្ឍគ្រូបង្រៀន ។
សូមពិចារណាចែកចាយការថ្លែងទីបន្ទាល់របស់អ្នកអំពីសេចក្តីពិតនៅក្នុងមេរៀននេះ ។
ទន្ទេញ
អ្នកអាចនឹងចង់ជួយសិស្សឲ្យទន្ទេញសេចក្ដីយោងចំណេះចំណានខាងគោលលទ្ធិ និងឃ្លាបទគម្ពីរគន្លឹះក្នុងអំឡុងមេរៀននេះ ហើយរំឭកវាក្នុងមេរៀនក្រោយៗទៀត ។ ឃ្លាបទគម្ពីរគន្លឹះគឺ « កាលជាវិញ្ញាណ យើង ‹ ត្រូវបានបង្កើតឡើងមុនកំណើតលោកិយមកម្ល៉េះ › » ។ គំនិតសម្រាប់សកម្មភាពទន្ទេញ មាននៅក្នុងឯកសារឧបសម្ព័ន្ធដែលនៅក្រោម « សកម្មភាពរំឭកចំណេះចំណានខាងគោលលទ្ធិឡើងវិញ » ។