« លោកុប្បត្តិ ១:២៦–២៧ ៖ ‹ ទ្រង់ក៏បង្កើតមនុស្សឲ្យដូចរូបអង្គទ្រង់ › » សៀវភៅសិក្សាព្រះគម្ពីរសញ្ញាចាស់សម្រាប់គ្រូបង្រៀនថ្នាក់សិក្ខាសាលា ( ឆ្នាំ ២០២៦ )
« លោកុប្បត្តិ ១:២៦–២៧ ៖ ‹ ទ្រង់ក៏បង្កើតមនុស្សឲ្យដូចរូបអង្គទ្រង់ › » សៀវភៅសិក្សាព្រះគម្ពីរសញ្ញាចាស់សម្រាប់គ្រូបង្រៀនថ្នាក់សិក្ខាសាលា
លោកុប្បត្តិ ១–២; ម៉ូសេ ២–៣; អ័ប្រាហាំ ៤–៥ ៖ មេរៀនទី ៨
លោកុប្បត្តិ ១:២៦–២៧
« ទ្រង់ក៏បង្កើតមនុស្សឲ្យដូចរូបអង្គទ្រង់ »
ក្នុងអំឡុងពេលនៃការបង្កបង្កើតទីប្រាំមួយ ព្រះបានបង្កើតបុរស និងស្រ្តី ។ មនុស្សគ្រប់រូបនៅលើផែនដី គឺជាបុត្រា ឬបុត្រីជាទីស្រឡាញ់របស់ព្រះមាតាបិតាសួគ៌ ហើយមាននិស្ស័យ និងជោគវាសនាដ៏ទេវភាពមួយ ។ មេរៀននេះអាចជួយសិស្សយល់អំពីសារៈសំខាន់នៃអត្តសញ្ញាណ និងសក្តានុពលរបស់ពួកគេ ក្នុងនាមជាបុត្រាបុត្រីរបស់ព្រះមាតាបិតាសួគ៌ ។
ការរៀបចំរបស់សិស្ស ៖ សូមអញ្ជើញសិស្សឲ្យទន្ទេញ ឬមើលឡើងវិញនូវឃ្លាដំបូងនៃបាវចនាយុវនារី និងបព្វជិតភាពអើរ៉ុន ហើយគិតពិចារណាពីសារៈសំខាន់នៃសេចក្តីថ្លែងការណ៍នីមួយៗ ៖
សកម្មភាពរៀនសូត្រដែលអាចមាន
អត្តសញ្ញាណ និងស្លាកសម្គាល់
សូមពិចារណាគូរបន្ទាត់ពេលវេលាមួយនៅលើក្ដារខៀន ហើយអញ្ជើញសិស្សឲ្យបង្កើតបន្ទាត់ពេលវេលាផ្ទាល់ខ្លួនរបស់ពួកគេ នៅក្នុងសៀវភៅកំណត់ហេតុសិក្សារបស់ពួកគេ ។ តារាងពេលវេលាគំរូមួយត្រូវបានផ្តល់ឲ្យដូចខាងក្រោម ៖
សូមគូរបន្ទាត់ផ្តេកតំណាងឲ្យជីវិតរបស់អ្នក ហើយដាក់ស្លាកសម្គាល់វាជាមួយនឹងអត្តសញ្ញាណ ឬងារផ្សេងៗដែលអ្នកធ្លាប់មានកាលពីអតីតកាល កំពុងមាននៅបច្ចុប្បន្នកាល ឬរំពឹងថានឹងមាននាអនាគតកាល ។ ការណ៍នេះអាចរួមមានទាំង « មិត្ត », « សិស្ស » ឬមុខដំណែងកាងារ ឬការហៅដែលអ្នកធ្លាប់មាន ។ ខាងក្រោមនេះគឺជាឧទាហរណ៍មួយ ៖
-
តើអត្តសញ្ញាណ ឬងារមួយចំនួនដែលអ្នកបានជ្រើសរើសដើម្បីដាក់នៅលើបន្ទាត់ពេលវេលារបស់អ្នកមានអ្វីខ្លះ ? ហេតុអ្វី ?
-
តើអត្តសញ្ញាណ ឬងារទាំងនេះអាចជះឥទ្ធិពលលើជម្រើសដែលអ្នកធ្វើតាមវិធីណាខ្លះ ?
ប្រធាន រ័សុល អិម ណិលសុន បានពន្យល់ថាតើរបៀបដែលយើងដាក់ស្លាកសម្គាល់ខ្លួនឯងអាចជះឥទ្ធិពលលើយើងយ៉ាងដូចម្ដេច ។
ស្លាកទាំងឡាយអាចមានភាពរីករាយ ហើយប្រាប់ពីការគាំទ្ររបស់ក្មួយៗចំពោះរឿងវិជ្ជមានជាច្រើន ។ ស្លាកជាច្រើននឹងផ្លាស់ប្ដូរសម្រាប់ក្មួយៗ កាលពេលវេលាកន្លងទៅ ។ ហើយពុំមែនស្លាកទាំងអស់សុទ្ធតែមានតម្លៃស្មើគ្នានោះទេ ។ ប៉ុន្តែបើមានស្លាកណាមួយជំនួសឲ្យអត្តសញ្ញាណដ៏សំខាន់បំផុតរបស់ក្មួយៗ នោះលទ្ធផលអាចជាគ្រោះថ្នាក់ខាងវិញ្ញាណ ។ ( « Choices for Eternity » [ ការប្រជុំធម្មនិដ្ឋានសម្រាប់យុវមជ្ឈិមវ័យទូទាំងពិភពលោក ថ្ងៃទី ១៥ ខែ ឧសភា ឆ្នាំ ២០២២ ] នៅលើគេហទំព័រ broadcasts.ChurchofJesusChrist.org )
-
តើអ្នកគិតថា ស្លាកសម្គាល់មួយចំនួនអាចស្ទះខាងវិញ្ញាណយ៉ាងដូចម្ដេច ?
បុត្រាបុត្រីខាងវិញ្ញាណនៃព្រះមាតាបិតាសួគ៌
សូមអាន លោកុប្បត្តិ ១:២៦–២៧ និងសេចក្ដីថ្លែងការណ៍ខាងក្រោមពី « ក្រុមគ្រួសារ ៖ ការប្រកាសដល់ពិភពលោក » ដោយរកមើលការយល់ឃើញអំពីអត្តសញ្ញាណដ៏នៅអស់កល្បជានិច្ចរបស់អ្នក ។
លោកុប្បត្តិ ១:២៦–២៧ គឺជាវគ្គចំណេះចំណានខាងគោលលទ្ធិមួយ ។ សូមពិចារណាអញ្ជើញសិស្សឲ្យគូសចំណាំវគ្គបទគម្ពីរចំណេះចំណានខាងគោលលទ្ធិតាមរបៀបដែលងាយចំណាំ ដើម្បីឲ្យពួកគេអាចងាយរកវាឃើញ ។
មនុស្សទាំងអស់—ទាំងប្រុសទាំងស្រី—ត្រូវបានបង្កើតឡើងតាមរូបភាពនៃព្រះ ។ មនុស្សម្នាក់ៗសុទ្ធតែជាបុត្រា និងបុត្រីខាងវិញ្ញាណរបស់ព្រះមាតាបិតាសួគ៌ ដូច្នេះហើយមនុស្សម្នាក់ៗមានចរិត និងគោលដៅនៃព្រះ ។ ភេទប្រុសស្រី គឺជាលក្ខណៈពិសេសនៃអត្តសញ្ញាណ និងគោលបំណងរបស់បុគ្គលម្នាក់ៗនៅជីវិតមុនផែនដី ជីវិតរមែងស្លាប់ និងនៅអស់កល្បជានិច្ច ។ ( « The Family: A Proclamation to the World » នៅលើគេហទំព័រ ChurchofJesusChrist.org )
-
តើអ្នកទទួលបានការយល់ដឹងអ្វីខ្លះអំពីអត្តសញ្ញាណដ៏នៅអស់កល្បជានិច្ចរបស់អ្នក ?
សេចក្តីពិតមួយដែលសិស្សអាចរកឃើញនោះ គឺថា យើងជាបុត្រាបុត្រីរបស់ព្រះមាតាបិតាសួគ៌ ដែលបង្កើតឡើងតាមរូបភាពរបស់ទ្រង់ទាំងទ្វេ ។ ប្រសិនបើពួកគេមិនទាន់បានធ្វើដូច្នេះទេ សូមអញ្ជើញសិស្សឲ្យសរសេរពាក្យថា « បុត្រនៃព្រះ » នៅលើបន្ទាត់ពេលវេលារបស់ពួកគេ ។
-
តើអ្នកគិតថា វាមានន័យយ៉ាងណាដែលត្រូវបានបង្កើតឡើងតាមរូបភាពរបស់ព្រះ ?
ប្រធាន ថូម៉ាស អេស ម៉នសុន ( ឆ្នាំ ១៩២៧–២០១៨ ) បានចែកចាយការយល់ដឹងខាងក្រោមអំពីការណ៍ត្រូវបានបង្កើតឡើងតាមរូបភាពរបស់ព្រះ ។
ព្រះវរបិតាយើងមានព្រះកាណ៌ ដើម្បីស្តាប់ការអធិស្ឋានរបស់យើង ។ ទ្រង់មានព្រះនេត្រ ដើម្បីទតមើលសកម្មភាពទាំងឡាយរបស់យើង ។ ទ្រង់មានព្រះឱស្ឋ ដើម្បីមានព្រះបន្ទូលមកកាន់យើង ។ ទ្រង់មានព្រះទ័យ ដើម្បីផ្ដល់សេចក្ដីអាណិតអាសូរ និងក្ដីស្រឡាញ់ ។ ទ្រង់គឺមានពិត ។ ទ្រង់គឺមានព្រះជន្មរស់នៅ ។ យើងគឺជាបុតាបុត្រីរបស់ទ្រង់ ដែលបានបង្កើតឡើងតាមរូបអង្គទ្រង់ ។ យើងមានរូបដូចអង្គទ្រង់ ហើយទ្រង់មានរូបដូចយើង ។ ( « I Know That My Redeemer Lives » Ensign ខែ មេសា ឆ្នាំ ១៩៩០ ទំព័រ ៦ )
-
តើអ្នកគិតថា ហេតុអ្វីបានជាវានឹងមានសារៈសំខាន់ក្នុងការដាក់អត្តសញ្ញាណរបស់អ្នកក្នុងនាមជាបុត្ររបស់ព្រះ លើសពីអត្តសញ្ញាណផ្សេងទៀតដែលអ្នកមាន ?
សូមទុកពេលដើម្បីឲ្យសិស្សសញ្ជឹងគិតថាតើអត្តសញ្ញាណរបស់ពួកគេក្នុងនាមជាបុត្ររបស់ព្រះមានសារៈសំខាន់សម្រាប់ពួកគេយ៉ាងណានាពេលបច្ចុប្បន្ន ។ ការធ្វើដូច្នេះអាចអញ្ជើញព្រះវិញ្ញាណបរិសុទ្ធឲ្យថ្លែងទីបន្ទាល់អំពីសេចក្ដីពិត ឬជួយរៀបចំត្រៀមគំនិត និងដួងចិត្តរបស់សិស្ស ដើម្បីទទួលការបង្រៀន ។
-
តើឧបសគ្គអ្វីខ្លះដែលអាចធ្វើឲ្យពិបាកក្នុងការជឿ ឬចងចាំអត្តសញ្ញាណរបស់អ្នកជាបុត្ររបស់ព្រះ ដែលបានបង្កើតឡើងតាមរូបភាពរបស់ទ្រង់ ?
សូមពិចារណាសរសេរចម្លើយរបស់សិស្សចំពោះសំណួរមុននៅលើក្ដារខៀន ។ ចម្លើយដែលអាចមាន អាចជាមនុស្សមួយចំនួនអាចមិនយល់ថា ហេតុអ្វីបានជាការក្លាយជាបុត្ររបស់ព្រះមានសារៈសំខាន់ ថាពួកគេជួបការលំបាកក្នុងការទទួលអារម្មណ៍ពីសេចក្តីស្រឡាញ់របស់ព្រះ ឬថាពួកគេទទួលការរំខានពីអ្នកកំណត់អត្តសញ្ញាណដែលមិនសូវសំខាន់ ។ ប្រសិនបើសិស្សមានសំណួរអំពីភេទប្រុស ភេទស្រី សូមធ្វើតាមគំរូរបស់ព្រះអង្គសង្គ្រោះ នៅពេលអ្នកបង្រៀនគោលលទ្ធិរបស់ទ្រង់ ក្នុងរបៀបមួយដែលនាំមកនូវការយល់ដឹង ក្តីសង្ឃឹម និងការព្យាបាល ។ សូមថ្លែងទីបន្ទាល់ថា ព្រះស្រឡាញ់បុត្រាបុត្រីរបស់ទ្រង់ទាំងអស់ ហើយនឹងជួយសិស្សដោះស្រាយសំណួររបស់ពួកគេ នៅពេលពួកគេអនុវត្តគោលការណ៍នៃការទទួលបានចំណេះដឹងខាងវិញ្ញាណ ។
សម្រាប់គំនិតអំពីរបៀបជួយសិស្សដែលមានសំណួរអំពីភេទប្រុស ភេទស្រី សូមមើល សកម្មភាពរៀនសូត្របន្ថែម ។
ពាក្យពេចន៍នៃបទគម្ពីរ និងរបស់ព្យាការី
សូមផ្តល់សំណៅមេរៀនដែលមានចំណងជើងថា « ខ្ញុំជាកូនរបស់ព្រះ » ដល់សិស្ស ។ សូមអញ្ជើញសិស្សឲ្យស្វែងរកការបំផុសគំនិតពីព្រះ នៅពេលពួកគេសិក្សា ដើម្បីជួយពួកគេឲ្យស្គាល់ពីសារៈសំខាន់នៃអត្តសញ្ញាណដ៏ទេវភាពរបស់ពួកគេ ។ បន្ថែមពីលើសំណៅមេរៀននោះ អ្នកអាចអញ្ជើញសិស្សឲ្យមើលឡើងវិញនូវការបង្រៀនដែលមាននៅក្នុងបាវចនា យុវនារី និងបព្វជិតភាពអើរ៉ុន ។ សិស្សអាចធ្វើបែបនេះរៀងៗខ្លួន ឬជាក្រុមតូចៗ ។
នៅពេលសិស្សបានសិក្សារួចរាល់ហើយ អ្នកអាចអញ្ជើញពួកគេឲ្យចែកចាយអ្វីដែលពួកគេបានរៀនជាមួយថ្នាក់ទាំងមូល ឬជាក្រុមតូចៗ ។ អ្នកក៏អាចសួរសំណួរដូចខាងក្រោមនេះ ៖
-
ពីធនធានដែលអ្នកបានសិក្សា តើអ្នកបានយល់ឃើញថា អ្វីខ្លះមានន័យសម្រាប់អ្នក ?
-
តើការស្គាល់អត្តសញ្ញាណរបស់អ្នកក្នុងនាមជាបុត្ររបស់ព្រះអាចជះឥទ្ធិពលលើរបៀបដែលអ្នកយល់ឃើញអំពីខ្លួនអ្នក និងអ្នកដទៃយ៉ាងដូចម្ដេច ?
-
តើចំណេះដឹងអំពីអត្តសញ្ញាណ និងសក្ដានុពលដ៏ទេវភាពរបស់អ្នកបានជះឥទ្ធិពលលើជីវិតរបស់អ្នកយ៉ាងដូចម្ដេច ?
ប្រសិនបើសិស្សនឹងទទួលបានអត្ថប្រយោជន៍ពីការមើលឃើញឧទាហរណ៍អំពីរបៀបដែលការស្គាល់អត្តសញ្ញាណដ៏នៅអស់កល្បជានិច្ចរបស់ពួកគេអាចជះឥទ្ធិពលលើពួកគេ សូមពិចារណាមើលវីដេអូ « Running Toward the Light » ( ១៧:៣៤ ) ដែលមាននៅលើគេហទំព័រ ChurchofJesusChrist.org ចាប់ពីនាទីទី ១១:០០ ដល់ ១៥:១៩ ។ នៅក្នុងវីដេអូនេះ អែលឌើរ ពេត្រុស អិម ចនសុន នៃពួកចិតសិបនាក់ បានចែកចាយបទពិសោធន៍របស់លោកអំពីការដឹងថា លោកជាបុត្រារបស់ព្រះ និងឥទ្ធិពលដែលចំណេះដឹងនេះមានមកលើជីវិតរបស់លោក ។ ក្រោយពីមើលវីដេអូនេះរួច អ្នកអាចអញ្ជើញសិស្សពីរបីនាក់ឲ្យចែកចាយអ្វីដែលធ្វើឲ្យពួកគេចាប់អារម្មណ៍ពីសារលិខិតរបស់អែលឌើរ ចនសុន ។
សូមគិតពិចារណាពីអត្តសញ្ញាណរបស់អ្នក
សូមផ្តល់ពេលវេលាឲ្យសិស្ស ដើម្បីគិតពិចារណាពីអ្វីដែលពួកគេបានរៀនអំពីអត្តសញ្ញាណ និងសក្តានុពលរបស់ពួកគេ ក្នុងនាមជាបុត្រី និងបុត្រារបស់ព្រះមាតាបិតាសួគ៌ ។ សូមអញ្ជើញពួកគេឲ្យកត់ត្រានៅក្នុងសៀវភៅកំណត់ហេតុការសិក្សារបស់ពួកគេនូវចំណាប់អារម្មណ៍ ឬការយល់ដឹងដែលពួកគេបានទទួល ដែលពួកគេចង់ចងចាំ ។ សូមពិចារណាបញ្ចប់មេរៀនដោយច្រៀងបទ « ខ្ញុំជាកូនរបស់ព្រះ » រួមគ្នា រួចចែកចាយទីបន្ទាល់របស់អ្នកអំពីការធ្វើជាបុត្ររបស់ព្រះ ។
ទន្ទេញ
អ្នកអាចនឹងចង់ជួយសិស្សឲ្យទន្ទេញសេចក្ដីយោងចំណេះចំណានខាងគោលលទ្ធិ និងឃ្លាបទគម្ពីរគន្លឹះក្នុងអំឡុងមេរៀននេះ ហើយរំឭកវាក្នុងមេរៀនក្រោយៗទៀត ។ ឃ្លាបទគម្ពីរគន្លឹះសម្រាប់ លោកុប្បត្តិ ១:២៦–២៧ គឺ « ទ្រង់ក៏បង្កើតមនុស្សឲ្យដូចរូបអង្គទ្រង់ » ។ គំនិតសម្រាប់សកម្មភាពទន្ទេញ មាននៅក្នុងឯកសារឧបសម្ព័ន្ធដែលនៅក្រោម « សកម្មភាពរំឭកចំណេះចំណានខាងគោលលទ្ធិឡើងវិញ » ។