« លោកុប្បត្តិ ១:២៨–៣១; ២:១–២៥ ៖ ‹ គ្រួសារជាផ្នែកដ៏សំខាន់មួយនៅក្នុងផែនការរបស់ព្រះដ៏បង្កបង្កើត › » សៀវភៅសិក្សាព្រះគម្ពីរសញ្ញាចាស់សម្រាប់គ្រូបង្រៀនថ្នាក់សិក្ខាសាលា ( ឆ្នាំ ២០២៦ )
« លោកុប្បត្តិ ១:២៨–៣១; ២:១–២៥ ៖ ‹ គ្រួសារជាផ្នែកដ៏សំខាន់មួយនៅក្នុងផែនការរបស់ព្រះដ៏បង្កបង្កើត › » សៀវភៅសិក្សាព្រះគម្ពីរសញ្ញាចាស់សម្រាប់គ្រូបង្រៀនថ្នាក់សិក្ខាសាលា
លោកុប្បត្តិ ១–២; ម៉ូសេ ២–៣; អ័ប្រាហាំ ៤–៥ ៖ មេរៀនទី ៩
លោកុប្បត្ដិ ១:២៨–៣១; ២:១–២៥
« គ្រួសារជាផ្នែកដ៏សំខាន់មួយនៅក្នុងផែនការរបស់ព្រះដ៏បង្កបង្កើត »
បន្ទាប់ពីការបង្កបង្កើតលោកអ័ដាម និងនាងអេវ៉ា ព្រះវរបិតាសួគ៌បានរៀបអាពាហ៍ពិពាហ៍ឲ្យពួកលោក ។ ទ្រង់បានដាក់បញ្ញត្តិឲ្យពួកលោកបង្កើតកូនឲ្យចម្រើនជាច្រើនឡើងឲ្យបាននៅពេញពាសលើផែនដី ហើយឲ្យនៅជាប់នឹងគ្នាទៅវិញទៅមក ។ មេរៀននេះអាចជួយសិស្សឲ្យយល់អំពីតួនាទីដ៏សំខាន់នៃអាពាហ៍ពិពាហ៍ និងគ្រួសារនៅក្នុងផែនការនៃសេចក្ដីសង្គ្រោះរបស់ព្រះវរបិតាសួគ៌ ។
ការរៀបចំរបស់សិស្ស ៖ សូមអញ្ជើញសិស្សឲ្យសិក្សា « គ្រួសារ ៖ សេចក្ដីប្រកាសដល់ពិភពលោក » ដោយរកមើលការបង្រៀនដែលពិពណ៌នាអំពីមូលហេតុដែលគ្រួសារគឺជាស្នូលនៃផែនការនៃសេចក្ដីសង្គ្រោះរបស់ព្រះវរបិតាសួគ៌ ។
សកម្មភាពរៀនសូត្រដែលអាចមាន
នៅពេលពិភាក្សាអំពីសារៈសំខាន់នៃអាពាហ៍ពិពាហ៍ និងគ្រួសារនៅក្នុងផែនការនៃសេចក្តីសង្គ្រោះរបស់ព្រះវរបិតាសួគ៌ សូមជ្រាបថា សិស្សជាច្រើនបច្ចុប្បន្នមិនទទួលបទពិសោធន៍នូវស្ថានភាពគ្រួសារដ៏ល្អនោះទេ ។ សូមយកចិត្តទុកដាក់ចំពោះតម្រូវការ និងសំណួររបស់សិស្សទាំងឡាយ ។
អ្វីដែលសំខាន់
សូមពិចារណាសរសេរនៅលើក្តារខៀននូវប្រយោគមិនពេញលេញមួយ ឬច្រើន ដែលបង្ហាញពីរបៀបដែលវត្ថុ សកម្មភាព មនុស្ស និងអ្វីៗផ្សេងទៀត អាចជាផ្នែកសំខាន់នៃការសម្រេចបាននូវអ្វីមួយ ។ ឧទាហរណ៍ខាងក្រោមអាចមានអត្ថប្រយោជន៍ ។ សូមអញ្ជើញសិស្សឲ្យគិតអំពីរបៀបដែលពួកគេនឹងបំពេញចន្លោះនោះ បន្ទាប់មកសុំឲ្យសិស្សទាំងឡាយចែកចាយចម្លើយរបស់ពួកគេជាមួយនឹងថ្នាក់រៀនទាំងមូល ។ វាអាចមានប្រយោជន៍ក្នុងការពន្យល់ថាពាក្យ សំខាន់ ក៏អាចមានន័យថា ចាំបាច់ ឬ មានសារៈសំខាន់បំផុត ផងដែរ ។
ជាចំនុចសំខាន់នៃភាពជោគជ័យនៅសាលាពីព្រោះ ។
ជាចំនុចសំខាន់នៃសុភមង្គលក្នុងជីវិតពីព្រោះ ។
ដើរតួនាទីយ៉ាងសំខាន់ក្នុងជីវិតរបស់ខ្ញុំ ពីព្រោះ ។
ក្រោយពីសិស្សបានចែកចាយចម្លើយរបស់ពួកគេហើយ សូមបង្ហាញសេចក្ដីថ្លែងការណ៍ដូចខាងក្រោមពី « ក្រុមគ្រួសារ ៖ ការប្រកាសដល់ពិភពលោក » ហើយអញ្ជើញសិស្សម្នាក់ឲ្យអានវាឲ្យឮៗ ។ សុំឲ្យសិស្សក្នុងថ្នាក់រកមើលទិដ្ឋភាពដ៏សំខាន់នៃផែនការនៃសេចក្ដីសង្គ្រោះរបស់ព្រះវរបិតាសួគ៌របស់យើង ។
« ក្រុមគ្រួសារ ៖ ការប្រកាសដល់ពិភពលោក » ចែងថា ៖
យើងជាគណៈប្រធានទីមួយ និងក្រុមប្រឹក្សានៃពួកសាវកដប់ពីរនាក់នៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ សូមប្រកាសជាឱឡារិកថា អាពាហ៍ពិពាហ៍រវាងបុរស និងស្ត្រី គឺត្រូវបានតែងតាំងឡើងដោយព្រះ ហើយថាគ្រួសារជាផ្នែកដ៏សំខាន់មួយនៅក្នុងផែនការរបស់ព្រះដ៏បង្កបង្កើតសម្រាប់គោលដៅដ៏នៅអស់កល្បជានិច្ចនៃកូនចៅរបស់ទ្រង់ ។ ( « ក្រុមគ្រួសារ ៖ ការប្រកាសដល់ពិភពលោក » នៅលើបណ្ណាល័យដំណឹងល្អ )
-
តើអ្នកគិតថា ហេតុអ្វីបានជាអាពាហ៍ពិពាហ៍ និងគ្រួសារ ដើរតួនាទីដ៏សំខាន់បែបនេះនៅក្នុងផែនការនៃសេចក្តីសង្គ្រោះរបស់ព្រះវរបិតាសួគ៌ ?
-
តើអ្នកអាចមើលឃើញសាតាំងកំពុងព្យាយាមវាយប្រហារលើអាពាហ៍ពិពាហ៍ និងក្រុមគ្រួសារនៅក្នុងជំនាន់របស់យើងតាមរបៀបណាខ្លះ ?
សូមអញ្ជើញសិស្សឲ្យគិតអំពីសំណួរមួយចំនួនដែលពួកគេ ឬអ្នកផ្សេងទៀតអាចនឹងមានអំពីអាពាហ៍ពិពាហ៍ និងគ្រួសារ ។ ពួកគេអាចកត់ត្រាចម្លើយរបស់ពួកគេនៅក្នុងសៀវភៅកំណត់ហេតុការសិក្សារបស់ពួកគេ ។ ខណៈពេលពួកគេសិក្សានៅថ្ងៃនេះ សូមលើកទឹកចិត្តពួកគេឲ្យស្វែងរកសេចក្ដីពិត និងយកចិត្តទុកដាក់លើចំណាប់អារម្មណ៍ខាងវិញ្ញាណ ដែលអាចជួយដឹកនាំពួកគេក្នុងការស្វែងរកចម្លើយចំពោះសំណួរទាំងនេះ ។
ការបង្រៀនពីបទគម្ពីរ
សូមពន្យល់ថា អ្វីដែលព្រះវរបិតាសួគ៌បានធ្វើ បន្ទាប់ពីការបង្កបង្កើតផែនដី អាចជួយយើងយល់ពីតួនាទីដ៏សំខាន់នៃអាពាហ៍ពិពាហ៍ និងគ្រួសារនៅក្នុងផែនការរបស់ទ្រង់ ។ សូមបង្ហាញការណែនាំ និងធនធានទាំងឡាយដូចខាងក្រោម ហើយផ្តល់ពេលវេលាដល់សិស្ស ដើម្បីសិក្សាអំពីវា ។ អ្នកអាចឲ្យសិស្សក្នុងថ្នាក់សិក្សាអ្វីៗទាំងនេះរួមគ្នា ឬក៏អ្នកអាចរៀបចំសិស្សជាក្រុមៗ ដើម្បីសិក្សា និងពិភាក្សាអំពីធនធានទាំងនេះរួមគ្នា ។
ខណៈពេលសិស្សអានខគម្ពីរទាំងនេះក្នុង លោកុប្បត្តិ ២ អ្នកអាចពន្យល់ថា ពាក្យ ជាជំនួយ នៅក្នុង ខទី ១៨ សំដៅទៅលើ « ជំនួយដែលត្រូវនឹង ស័ក្ដិសមនឹង ឬដែលត្រូវគ្នានឹង » អ័ដាម ( សូមមើល footnote 18b ) ។ អ្នកក៏អាចពន្យល់ថា ដំណើររឿងរបស់នាងអេវ៉ា ដែលបានបង្កើតចេញពីឆ្អឹងជំនីររបស់លោកអ័ដាម គឺជានិមិត្តរូប ហើយអាចតំណាងឲ្យភាពជាដៃគូស្មើភាពគ្នារវាងស្វាមី និងភរិយា ( សូមមើល រ័សុល អិម ណិលសុន « Lessons from Eve » Ensign ខែ វិច្ឆិកា ឆ្នាំ ១៩៨៧ ទំព័រ ៨៧ ) ។
សូមសិក្សាសេចក្ដីថ្លែងការណ៍ និងបទគម្ពីរខាងក្រោម ដោយរកមើលភស្តុតាងនៃសារៈសំខាន់នៃអាពាហ៍ពិពាហ៍ និងគ្រួសារចំពោះព្រះ ។
ប្រធាន ស្ពែនស៊ើរ ដបុលយូ ឃឹមបឹល ( ឆ្នាំ ១៨៩៥–១៩៨៥ ) បានបង្រៀន ៖
ព្រះអម្ចាស់ … [ បាននាំ ] ទាំងលោកអ័ដាម និងនាងអេវ៉ា ដែលជាបុរសដំបូង និងស្ដ្រីដំបូងរបស់ទ្រង់នៅលើផែនដីនេះមកជួបគ្នា ហើយ[ បាន ] ធ្វើពិធីអាពាហ៍ពិពាហ៍ដ៏បរិសុទ្ធមួយ ដើម្បីឲ្យពួកលោកក្លាយជាស្វាមី និងភរិយា ។ ( Teachings of Presidents of the Church: Spencer W. Kimball [ ឆ្នាំ ២០០៦ ] ទំព័រ ១៩២ )
បទគម្ពីរដែលត្រូវសិក្សា ៖
លោកុប្បត្តិ ១:២៧–២៨ ( បទបញ្ញត្តិរបស់ព្រះចំពោះលោកអ័ដាម និងនាងអេវ៉ា )
លោកុប្បត្តិ ២:១៨, ២១–២៤ ( ការបង្កើតនាងអេវ៉ា )
លោកុប្បត្តិ ២:២៤ គឺជាវគ្គចំណេះចំណានខាងគោលលទ្ធិ ។ សូមពិចារណាអញ្ជើញសិស្សឲ្យគូសចំណាំវគ្គបទគម្ពីរចំណេះចំណានខាងគោលលទ្ធិតាមរបៀបដែលងាយចំណាំ ដើម្បីឲ្យពួកគេអាចងាយរកវាឃើញ ។
គោលលទ្ធិ និងសេចក្តីសញ្ញា ៤៩:១៥–១៧ ( ការបង្រៀនរបស់ព្រះអម្ចាស់ តាមរយៈព្យាការី យ៉ូសែប ស្ម៊ីធ )
-
តើសេចក្ដីពិតអ្វីខ្លះដែលអ្នករកឃើញ ដែលបង្ហាញពីសារៈសំខាន់នៃអាពាហ៍ពិពាហ៍ និងគ្រួសារ ចំពោះព្រះ ?
សិស្សអាចរកឃើញសេចក្ដីពិតមួយដែលស្រដៀងគ្នានឹងសេចក្ដីពិតដូចខាងក្រោមនេះ ៖
ព្រះបានដាក់បញ្ញត្តិឲ្យស្វាមី និងភរិយាទាំងឡាយមានកូន ( លោកុប្បត្តិ ១:២៨ ) ។
ស្វាមី និងភរិយាត្រូវតែមានចិត្តតែមួយ និងដើរតួជាដៃគូស្មើភាពគ្នា ( លោកុប្បត្តិ ២:១៨, ២៤ ) ។
អាពាហ៍ពិពាហ៍រវាងបុរស និងស្ត្រីត្រូវបានតែងតាំងឡើងដោយព្រះ ( គោលលទ្ធិ និងសេចក្ដីសញ្ញា ៤៩:១៥ ) ។
ផែនដីនេះត្រូវបានបង្កើតឡើង ដើម្បីផ្ដល់ជាកន្លែងមួយ ដែលបុត្រាបុត្រីរបស់ព្រះអាចកើតមកក្នុងក្រុមគ្រួសារ និងរីកចម្រើនរួមគ្នា ( គោលលទ្ធិ និងសេចក្តីសញ្ញា ៤៩:១៦–១៧ ) ។
ដោយជាផ្នែកមួយនៃការពិភាក្សារបស់អ្នកអំពីសេចក្ដីពិតទាំងនេះ វាអាចមានអត្ថប្រយោជន៍ក្នុងការពិភាក្សាអំពីសេចក្ដីថ្លែងការណ៍របស់ប្រធាន រ័សុល អិម ណិលសុន ដូចខាងក្រោមនេះ ។
ប្រធាន រ័សុល អិម ណិលសុន បានសង្កត់ធ្ងន់អំពីតួនាទីដ៏សំខាន់របស់ក្រុមគ្រួសារ បន្ទាប់ពីព្រះបានបង្កើតផែនដីនេះឡើង ។
ដោយសារតែទំហំដ៏ធំរបស់វា នោះភពផែនដីគឺជាផ្នែកមួយនៃកិច្ចការដែលកាន់តែមហិមាជាងទំហំរបស់វាទៅទៀត—នោះគឺជាផែនការដ៏មហិមារបស់ព្រះ ។ សរុបសេចក្តីយ៉ាងសាមញ្ញមក ផែនដីនេះត្រូវបានបង្កើតឡើង ដើម្បីឲ្យមានក្រុមគ្រួសារអាចរស់នៅបាន ។ ព្រះគម្ពីរពន្យល់ថា ស្វាមី និងភរិយា « នឹងត្រឡប់ជាសាច់តែមួយ ហើយគ្រប់ទាំងអស់នេះ ដើម្បីឲ្យផែនដីអាចបំពេញគោលបំណងនៃការបង្កបង្កើត » [ គោលលទ្ធិ និងសេចក្តីសញ្ញា ៤៩:១៦ ] ។ ( « The Creation » Ensign ខែ ឧសភា ឆ្នាំ ២០០០ ទំព័រ ៨៥ )
-
តើការចងចាំអំពីតួនាទីដ៏សំខាន់នៃអាពាហ៍ពិពាហ៍ និងគ្រួសារ នៅក្នុងផែនការរបស់ព្រះ អាចជះឥទ្ធិពលដល់ជម្រើសដែលអ្នកធ្វើក្នុងជីវិតរបស់អ្នកយ៉ាងដូចម្ដេច ?
-
តើសេចក្ដីពិត និងការបង្រៀនទាំងនេះអាចជួយយើងឆ្លើយតបដោយរបៀបណា នៅពេលយើងមើលឃើញគោលលទ្ធិនៃអាពាហ៍ពិពាហ៍ ឬគ្រួសារកំពុងទទួលរងការរិះគន់ ឬមើលស្រាលនោះ ?
-
តើអ្នកគិតថា ការធ្វើតាមបទដ្ឋានរបស់ព្រះវរបិតាសួគ៌ទាក់ទងនឹងអាពាហ៍ពិពាហ៍ និងគ្រួសារ អាចជួយអ្នកឲ្យប្រែក្លាយកាន់តែដូចទ្រង់យ៉ាងដូចម្ដេច ?
បង្កើតចម្លើយមួយ
ដើម្បីជួយសិស្សពន្យល់ពីអ្វីដែលពួកគេបានរៀនអំពីសារៈសំខាន់នៃអាពាហ៍ពិពាហ៍ និងគ្រួសារនៅក្នុងផែនការរបស់ព្រះ សូមពិចារណាចែកចាយសាច់រឿងមួយដូចខាងក្រោមនេះ ។ អ្នកអាចបត់បែនសាច់រឿងនេះតាមការចាំបាច់ ដើម្បីឲ្យវាទាក់ទងកាន់តែខ្លាំងទៅនឹងវប្បធម៌របស់អ្នក ព្រមទាំងជីវិតរបស់សិស្សអ្នកផងដែរ ។ ក្រោយពីចែកចាយសាច់រឿងនោះរួច សូមដាក់បង្ហាញការណែនាំសម្រាប់សិស្សដើម្បីបង្កើតចម្លើយមួយ ។
នៅក្នុងថ្នាក់មួយនៅសាលារបស់អេលីសាបិត ការពិភាក្សាមួយត្រូវបានធ្វើឡើងអំពីអាពាហ៍ពិពាហ៍ និងគ្រួសារ ។ អេលីសាបិតបានចែកចាយទស្សនៈខ្លះៗរបស់នាងអំពីអាពាហ៍ពិពាហ៍រវាងបុរស និងស្ត្រី និងសារៈសំខាន់នៃគូស្វាមីភរិយាដែលមានកូន ។ មិត្តរួមថ្នាក់របស់អេលីសាបិតជាច្រើននាក់បានចែកចាយយោបល់ដែលខុសពីនាង ។ បន្ទាប់ពីរៀនចប់ យុវជនម្នាក់ឈ្មោះ អ៊ីសាក ដែលរៀននៅក្នុងថ្នាក់សិក្ខាសាលារបស់អេលីសាបិត ផងដែរនោះ បានសួរអេលីសាបិតថា ហេតុអ្វីបានជានាងមានគំនិតហួសសម័យអំពីអាពាហ៍ពិពាហ៍ និងគ្រួសារបែបនេះ ។
ដោយប្រើអ្វីដែលអ្នកបានរៀននៅថ្ងៃនេះ សូមបង្កើតចម្លើយដែលអេលីសាបិតអាចចែកចាយជាមួយអ៊ីសាក ។ សូមបញ្ចូលសេចក្តីដូចខាងក្រោមនេះនៅក្នុងចម្លើយរបស់អ្នក ៖
-
ការពន្យល់មួយអំពីមូលហេតុដែលអាពាហ៍ពិពាហ៍ និងគ្រួសារមានសារៈសំខាន់ចំពោះព្រះវរបិតាសួគ៌ និងផែនការនៃសេចក្តីសង្គ្រោះរបស់ទ្រង់
-
ការបង្រៀនមួយ ឬច្រើនពីព្រះគម្ពីរ ឬពីថ្នាក់ដឹកនាំសាសនាចក្រទាំងឡាយ
-
ការអញ្ជើញដែលអេលីសាបិត អាចចែកចាយជាមួយអ៊ីសាកដែលអាចជួយគាត់បាន
បន្ទាប់ពីសិស្សមានពេលរៀបចំខ្លួនហើយ សូមផ្ដល់ឱកាសឲ្យពួកគេចែកចាយចម្លើយរបស់ពួកគេ ។ ពួកគេអាចចែកចាយវាជាមួយនឹងដៃគូ ឬនៅក្រុមតូចៗផងដែរ ។ អាចអញ្ជើញសិស្សស្ម័គ្រចិត្តពីរបីនាក់ឲ្យចែកចាយចម្លើយរបស់ពួកគេជាមួយថ្នាក់រៀន ឬឲ្យសម្តែងតាមសាច់រឿងផងដែរ ។
សូមទុកពេលឲ្យសិស្សគិតពិចារណាអំពីអ្វីដែលពួកគេបានរៀន និងទទួលអារម្មណ៍នៅថ្ងៃនេះ ។ ពួកគេអាចគិតអំពីសេចក្ដីពិតដែលពួកគេបានរៀនដែលបានឆ្លើយសំណួររបស់ពួកគេខ្លះៗ ។ សូមអញ្ជើញពួកគេឲ្យកត់ត្រារាល់ចំណាប់អារម្មណ៍ខាងវិញ្ញាណដែលពួកគេមាន នៅក្នុងសៀវភៅកំណត់ហេតុការសិក្សារបស់ពួកគេ ។ សូមថ្លែងទីបន្ទាល់អំពីសេចក្ដីពិតដែលអ្នកបានពិភាក្សានៅថ្ងៃនេះ ។
ទន្ទេញ
អ្នកអាចនឹងចង់ជួយសិស្សឲ្យទន្ទេញសេចក្ដីយោងចំណេះចំណានខាងគោលលទ្ធិ និងឃ្លាបទគម្ពីរគន្លឹះក្នុងអំឡុងមេរៀននេះ ហើយរំឭកវាក្នុងមេរៀនក្រោយៗទៀត ។ ឃ្លាបទគម្ពីរគន្លឹះសម្រាប់ លោកុប្បត្តិ ២:២៤ គឺ « មនុស្សប្រុស … នៅជាប់នឹងប្រពន្ធវិញ ហើយអ្នកទាំង២នោះនឹងត្រឡប់ជាសាច់តែ១សុទ្ធ » ។ គំនិតសម្រាប់សកម្មភាពទន្ទេញ មាននៅក្នុងឯកសារឧបសម្ព័ន្ធដែលនៅក្រោម « សកម្មភាពរំឭកចំណេះចំណានខាងគោលលទ្ធិឡើងវិញ » ។