Ang mga miyembro gikan sa Judea mipanaw ngadto sa Antioquia ug mitudlo sa kinabig nga mga Hentil nga kinahanglan sila nga kasirkunsidahan (pagtuli) aron maluwas. Silang Pablo ug Bernabe misulti sa isyu ngadto sa mga Apostoles sa Jerusalem. Kini nga kalihokan, usahay gitawag nga komperensya sa Jerusalem, gihimo sa mga A.D. 49–50. Niini nga komperensya si Pedro mipamatuod nga ang Dios moluwas sa matinud-anong mga Judeo ug mga Hentil, bisan og sila pagtuli man o dili. Si Santiago misuporta sa mga pulong ni Pedro pinaagi sa paggamit sa mga pulong sa kasulatan. Ang mga Apostoles mipadala og mga sulat ngadto sa mga miyembro sa Simbahan sa Antioquia, Siria, Cilicia nagpasabut nga ang pagtuli wala kinahanglana alang sa kaluwasan. Si Pablo mipili ni Silas isip iyang misyonaryo nga kompanyon ug misugod sa iyang ikaduhang misyon.
Pinaagi sa dinasig nga tambag, si Pedro ug ang ubang mga Apostoles mitino nga ang pagtuli wala na kinahanglana
Isulat ang dili mominus lima ka dagkong mga desisyon nga imong kinahanglan nga buhaton karon ug sa umaabut:
Pamalandung unsaon nimo sa pagtubag ang mosunod nga mga pangutana:
Ngano nga maalamon ang pagpangayo sa tabang sa Dios kon maghimo og importante nga mga desisyon?
Unsay imong mabuhat aron makahibalo sa kabubut-on sa Dios alang kanimo?
Samtang magtuon ka sa Mga Buhat 15, pangitaa ang mga kamatuoran nga makagiya nimo samtang maningkamot ka sa pagkahibalo sa kabubut-on sa Dios alang kanimo.
Aron mas makasabut sa Mga Buhat 15, importante nga makahibalo nga samtang silang Pablo ug Bernabe mibisita sa Antioquia, ang pipila ka mga Judeo gikan sa Judea kinsa nakabig ngadto sa Kristiyanismo mihimo og piho nga mga pag-angkon kalabut unsay kinahanglan nga buhaton sa mga kinabig nga hentil aron maluwas. Kini nga mga lalaki, ug ang uban sama kanila, nailhan nga mga “Judaizers” tungod kay sila miinsister nga ang mga kinabig nga hentil kinahanglan usab nga makabig ngadto sa Judaismo.
Basaha ang Mga Buhat 15:1, nga mangita kon unsay gusto niining mga tawhana nga gikan sa Judea nga kinahanglang buhaton sa mga kinabig nga hentil aron maluwas.
Isip kabahin sa pakigsaad nga gihimo ni Abraham, ang Dios misugo nga ang tanang mga lalaki kinsa mosulod ngadto sa pakigsaad uban Kaniya kinahanglang tulion. Ang pagtuli “gihimo pinaagi sa pagputol sa ‘unod sa yamis’ sa lalaki nga mga masuso ug sa mga hamtong. Kadto kinsa modawat niini makatagamtam sa mga kahigayunan ug makadawat sa mga katungdanan sa pakigsaad” (tan-awa sa Giya ngadto sa mga Kasulatan, “Pagtuli,” scriptures.lds.org). Ang pagtuli nahimong timaan o pahinumdom sa pakigsaad nga gihimo sa mga tawo uban sa Dios. Ang nabatasan gihimo sa panahon ni Moises ug nagpadayon nga nabatasan sa balay ni Israel hangtud sa panahon sa Manluluwas.
Basaha ang Mga Buhat 15:2–3, nga mangita unsay nahitabo human silang Pablo ug Bernabe nakadungog niini nga mga tawo nga ang mga kinabig nga hentil kinahanglan nga tulion. Ang pulong nga “dili diyutayng panagkabangi ug panaglalis” (Mga Buhat 15:2) nagpasabut nga ang mga miyembro sa Simbahan nakiglalis nilang Pablo ug Bernabe nga kinahanglan nga tulion ang mga Hentil.
Sumala sa bersikulo 2, unsay ilang gideterminar nga kinahanglang buhaton?
Basaha ang Mga Buhat 15:4–6, nga mangita unsay nahitabo sa dihang si Pablo ug ang uban miabut sa Jerusalem. Ang mga pulong nga “pag-usisa niining butanga” in bersikulo 6 nagpasabut sa pagtinambagay.
Basaha ang Mga Buhat 15:7–11 nga mangita unsay gisulti ni Pedro sa konseho. Ang pulong nga “hataas nga lantugi” sa bersikulo 7 nagpasabut nga ang mga Apostoles maisugong naglalis sa isyu sa pagtuli.
Tubaga ang mosunod nga mga pangutana diha sa imong scripture study journal: Unsa sa imong hunahuna ang gipasabut ni Pedro sa dihang miingon siya nga ang Dios “tali kanato [ang nakabig nga mga Judeo] ug kanila [ang nakabig nga mga Hentil] siya wala maghimog kalainan” (Mga Buhat 15:9)?
Si Pedro mao ang senior nga Apostol dinhi sa yuta ug, busa, gitugutan sa pagpamulong alang sa Ginoo. Ang dinasig nga deklarasyon ni Pedro nga ang mga Hentil wala magkinahanglan nga kasirkunsidahan usa ka ehemplo sa ginoo nga naggiya sa Iyang Simbahan pinaagi sa pagpadayag ngadto sa Iyang mga Apostoles (tan-awa sa Mga Buhat 1:2).
Gikan niini nga mga bersikulo, atong makat-unan ang mosunod nga mga kamatuoran: Makahibalo kita sa kabubut-on sa Ginoo pinaagi sa Iyang buhi nga mga propeta ug mga apostoles. Ikonsiderar ang pagsulat niini nga kamatuoran diha sa imong kasulatan duol sa Mga Buhat 15:6–7.
Sa atong panahon, unsa ang pipila ka paagi nga ang buhi nga mga Apostoles makatabang nato nga makahibalo sa mga pagpadayag nga ilang nadawat?
Basaha ang Mga Buhat 15:12–15, nga mangita kon sa unsa nga paagi mitubag ang mga tawo sa deklarasyon ni Pedro nga ang pagtuli wala kinahanglana sa kaluwasan.
Si Pedro ang nagdumala niini nga komperensya, ug makita nga si Santiago ang nag-conduct sa miting. Si Santiago half-brother ni Jesukristo ug ang unang bishop sa kongregasyon sa Simbahan sa Jerusalem. Sumala sa narekord sa Mga Buhat 15:16–18, gikutlo ni Santiago si propeta Amos (tan-awa sa Amos 9:11–12) sa pagpakita nga ang deklarasyon ni Pedro nahiuyon sa mga pulong sa mga propeta, sumala sa narekord sa mga kasulatan.
Base sa unsay gitudlo ni Santiago, atong makat-unan ang mosunod nga kamatuoran: Makahibalo kita sa kabubut-on sa Ginoo pinaagi sa pagtuon sa mga kasulatan. Ikonsiderar ang pagsulat niini nga kamatuoran diha sa imong mga kasulatan duol sa Mga Buhat 15:15–18.
Basaha ang Mga Buhat 15:19–20, nga mangita kon unsay gitambag ni Santiago sa buhaton sa mga lider sa Simbahan.
Ang pulong hukom sa bersikulo 19 nagpasabut nga sugyot o rekomendasyon. Misulti si Santiago sa iyang pagsuporta sa polisiya nga gipahibalo ni Pedro, kinsa nagdumala sa Simbahan sa Mga Buhat 15:7–11 (tan-awa sa Bruce R. McConkie, Doctrinal New Testament Commentary, 3. vols. [1965–73], 2:143). Sa Mga Buhat 15:20, tan-awa unsa nga mga bahin sa balaod ni Moises ang gisulti ni Santiago nga kinahanglan gihapon nga sundon sa mga kinabig.
Ang konseho nakahukom sa pagpadala og mga sulat ngadto sa mga miyembro sa Simbahan nagpahayag nga ang sirkunsidahan wala kinahanglana alang sa kaluwasan ug nga kini mao ang hiniusang desisyon sa mga Apostoles. Ang Unang Kapangulohan ug ang Korum sa Napulog Duha ka mga Apostoles nagsunod niining sama nga praktis sa atong panahon sa pagahatag og dinasig nga giya ngadto sa mga miyembro sa Simbahan.
Gikan niini nga asoy sa Mga Buhat 15, atong makat-unan ang mosunod nga kamatuoran: Pinaagi sa pagtinambagay ug pagtinguha og pagpadayag gikan sa Dios, ang mga lider sa Simbahan makadawat og inspirasyon mahitungod sa malisud nga mga problema.
Imahe
Elder D. Todd Christofferson
Aron mas makasabut sa unsa nga paagi kini nga kamatuoran may kalabutan sa Simbahan karon, ikonsiderar ang mosunod nga pamahayag ni Elder D. Todd Christofferson sa Korum sa Napulog Duha ka mga Apostoles. Human mogamit sa mga ehemplo sa Mga Buhat 10 ug Mga Buhat 15 sa paghulagway sa unsang paagi ang Manluluwas “mahimong mogiya sa Iyang kaugalingon ngadto sa Iyang mga sulugoon sa indibidwal o maglihok isip konseho,” miingon si Elder Christofferson: “Kining sama nga mga sumbanan gisunod karon sa gipahiuli nga Simbahan ni Jesukristo. Ang Presidente sa Simbahan mopahibalo o mopasabut sa mga doktrina basi sa gipadayag kaniya (tan-awa sa, alang sa pananglitan sa, D&P 138). Ang doktrinal nga pagpasabut moabut usab pinaagi sa hiniusa nga council sa Unang Kapangulohan ug sa Korum sa Napulog Duha ka mga Apostoles (tan-awa sa, pananglitan sa, Opisyal nga Pahayag 2). Ang deliberasyon sa council sagad maglakip sa pagtimbang-timbang sa mga kasulatan, sa mga pagtulun-an sa mga lider, ug o sa nangagi nga gipanghimo sa Simbahan. Apan sa katapusan, sama sa Simbahan sa Bag-ong Tugon, ang tuyo dili lang ang panag-uyon tali sa council apan ang pagpadayag gikan sa Dios. Proseso kini nga naglakip sa katarungan ug hugot nga pagtuo aron maangkon ang hunahuna ug kabubut-on sa Ginoo” (“Ang Doktrina ni Kristo,” Ensign or Liahona, Mayo 2012, 87–88).
Basaha ang Mga Buhat 15:28–29, nga mangita unsay gisulat sa mga Apostoles ug mga elder sa ilang mga sulat ngadto sa mga miyembro sa Simbahan. Ang mga pulong “ang dili pagdat-og kaninyo sa bisan unsang luwan gawas lamang sa pipila ka kinahanglanong butang” sa bersikulo 28 nagpasabut nga ang mga tawo wala na kinahanglana nga mosunod pa og dugang nga gikan sa mga tawo ug dili gikan sa Dios.
Sumala sa Mga Buhat 15:28, sa unsa nga paagi nga ang mga Apostol nasayud sa kabubut-on sa Dios kabahin sa mga kinahanglanon alang sa nakabig nga mga Hentil?
Wala lamang modasig ang Espiritu Santo sa mga Apostoles samtang sila nagtinambagay, apan Siya mihatag og kumpirmado nga saksi nga ang ilang desisyon sakto. Gikan sa Mga Buhat 15:28 atong makat-unan nga usa ka paagi nga kita makahibalo sa kabubut-on sa Ginoo mao ang pinaagi sa inspirasyon sa Espiritu Santo.
Ribyuha ang imong lista sa dagkong mga desisyon gikan sa sinugdanan sa leksyon. Diha sa imong scripture study journal, ipasabut unsaon nimo pagggamit ang mga pulong sa moderno nga mga propeta ug ang mga kasulatan sa pag-angkon sa direksyon sa Ginoo karon ug sa umaabut nga mga sirkumstansya.
Si Pablo ug ang uban mihatud sa sulat sa mga Apostoles ngadto sa mga miyembro sa Simbahan sa Antioquia
Ang Mga Buhat 15:30–41 nagpasabut nga pipila ka mga lider sa Simbahan mihatud sa sulat sa mga Apostoles ngadto sa mga miyembro sa Simbahan sa Antioqiua. Dayon, human makasangyaw didto sa Antioquia, si Pablo mihangyo ni Bernabe sa pag-uban kaniya sa pagbisita sa mga dapit nga ilang gisangyawan sa ilang unang misyon. Si Bernabe gusto nga modala ni Marcos, apan si Pablo nagdumili tungod kay si Marcos mibiya kanila atol sa ilang unang misyon. Human sa panaglalis tali niining duha ka bantugang mga lider sa Simbahan, nasulbad ra dihang si Bernabe nakahukom sa pagdala ni Marcos kaniya ngadto sa Cipro ug si Pablo mipili ni Silas isip kompanyon ug misugod sa iyang ikaduhang misyon.
Dili sala nga dili mouyon sa uban. Sama sa gihulagway niini nga asoy, imbis nga makiglalis kinahanglang maningkamot kita sa pagpangita og kasulbaran sa atong pagkawala pagkasinabtanay.
Isulat ang mosunod sa ubos sa imong mga assignment karong adlawa diha sa imong scripture study journal:
Akong natun-an ang Mga Buhat 15 ug nahuman kini nga leksyon sa (petsa).
Dugang nga mga pangutana, mga hunahuna, ug mga pagsabut nga gusto nakong ipakigbahin sa akong magtutudlo: