Si Jesus midayeg ni Juan Bautista ug mipamatuod nga si Juan miandam sa agianan sa Iyang pagpangalagad. Samtang si Jesus nagkaon uban sa usa ka Pariseo, usa ka mahinulsulon nga babaye mipakita sa iyang hugot nga pagtuo ug gugma alang kang Jesus.
Si Jesus nagdayeg ni Juan Bautista ug nagpamatuod sa misyon ni Juan
Unsay imong mahinumduman mahitungod ni Juan Bautista?
Sa imong scripture study journal, paglista og daghang kamatuoran mahitungod ni Juan Bautista kutob sa imong mahinumduman.
Hunahunaa ang usa ka tag-as nga gilis sa sagbot ug usa ka tawo nga nagsul-ob og humok, mahal nga panaput ug nagpuyo sa usa ka palasyo. Samtang ikaw naghunahuna mahitungod niini, basaha ang Lucas 7:24–26, nga mangita kon unsay gitudlo sa Manluluwas mahitungod ni Juan Bautista.
Sa imong hunahuna sa unsa nga paagi si Juan Bautista lahi gikan sa usa ka bagakay ug sa usa ka tawo nga nagpuyo sa kaharuhay?
Dili sama sa usa ka bagakay, nga mauyog o mahuyop sa hangin, si Juan Bautista lig-on ug dili matarug sa iyang pagpamatuod ug sa pagbuhat sa iyang misyon. Mipuyo siya sa awaaw ug nagsul-ob og saput nga hinimo sa buhok sa kamelyo nga sapnot kaayo. Kay sa magtinguha og pisikal nga mga kaharuhay, si Juan nagtinguha sa pagbuhat sa kabubut-on sa Dios.
Imahe
Juan Bautista nagtudlo
Si Jesus miingon nga si Juan Bautista “labaw pa gani sa usa ka propeta” (Lucas 7:26). Basaha ang Lucas 7:27–28, nga mangita kon nganong si Juan Bautista talagsaon taliwala sa mga propeta.
Sa dihang miingon si Jesus, “igapadala ko ang akong magsasangyaw nga magauna kanimo; siya mao ang magaandam sa imong dalan sa atubangan mo” (Lucas 7:27), Siya mikutlo sa usa ka panagna nga nahisulat gatusan na katuig ang milabay nga namulong sa usa ka “sinugo” kinsa “magaandam sa dalan sa atubagan [sa Mesiyas]” (Malaquias 3:1). Gikan niini nga mga bersikulo atong makat-unan nga si Juan Bautista mao ang propeta nga gi-orden nang daan sa pag-andam sa dalan ug pagbunyag sa Anak sa Dios.
Sa unsa nga paagi giandam ni Juan Bautista ang dalan alang sa pag-anhi ni Jesukristo?
Imahe
Propeta Joseph Smith
Ang Propeta Joseph Smith misulti sa mosunod mahitungod sa Lucas 7:28: “Si Jesus nga adunay pinakagamay nga pang-angkon sa katungod sa gingharian sa Dios, ug [sa ingon] pinakaubos nga ilhon [sa ilang kaandam nga motuo] isip usa ka propeta; sama nga daw Siya misulti—‘Siya nga giisip nga pinakagamay diha kaninyo mas labaw pa kay ni Juan—kana mao Ako’” (Mga Pagtulun-an sa mga Presidente sa Simbahan: Joseph Smith [2007], 96).
Sa Lucas 7:29–35 atong mabasa nga daghang mituo sa mga pagtulun-an ni Jesus, apan ang mga Pariseo ug mga magbabalaod nga nanambong misalikway sa Iyang mga pagtulun-an. Si Jesus mipasabut nga ilang gisalikway ang kamatuoran nga walay pagtagad kon Siya o si Juan Bautista ba ang nagtudlo niini.
Samtang si Jesus nakigsalo ni Simon nga Pariseo, usa ka babaye naghugas sa tiil ni Jesus uban sa iyang mga luha
Nakahunahuna ka ba sukad kon mapasaylo ka ba sa imong mga sala?
Samtang ikaw magtuon sa nahibilin sa Lucas 7, pangitaa ang mga kamatuoran nga makatabang kanimo kon ikaw naghunahuna kon ikaw mapasaylo ba.
Atong mabasa sa Lucas 7:36 nga usa ka Pariseo nga ginganlan og Simon midapit ni Jesus ngadto sa usa ka kumbira diha sa iyang panimalay. Niini nga matang sa kumbira, ang mga bisita molingkod o mosandig og mga kutson libut sa mubo nga lamesa, nga ang ilang mga tiil gituy-od palayo sa lamesa. Ang mga kabus gitugutan sa pagkuha sa mga salin nga pagkaon gikan sa mga kumbira, busa dili ikahibulong ang pagsulod sa usa ka dili dinapit nga mga tawo nga mosulod sa panimalay atol sa kumbira (tan-awa sa James E. Talmage, Jesus the Christ, ika-3 ed. [1916], 261).
Basaha ang Lucas 7:37–39, nga mangita kon kinsa ang misulod niining piho nga kumbira nga walay imbitasyon.
Hinumdumi nga ang babaye mipakita sa iyang gugma alang sa Manluluwas pinaagi sa paghugas, paghalok, ug pagdihog sa Iyang mga tiil. Ang “pahumot nga sinulod sa usa ka tibodtibod nga alabastro” (Lucas 7:37) usa ka botelya nga puno sa mahalon nga lana nga pahumot.
Sumala sa Lucas 7:39, unsay gihunahuna ni Simon sa dihang nakita niya unsay gibuhat sa babaye?
Nasabtan ang gihunahuna ni Simon, si Jesus mitudlo sa usa ka sambingay mahitungod sa duha ka mangungutang ug sa usa ka tigpautang. Ang tigpautang mao ang usa ka tawo nga magpahulam og kwarta; ang mangungutang mao ang usa ka tawo nga manghulam og kwarta. Ang mangungutang miuyon nga bayaran ang tigpautang o mapreso.
Basaha ang Lucas 7:40–43, ug hunahunaa kon kinsa sa matag indibidwal ang girepresentar sa sambingay.
Kopyaha ang mosunod nga tsart diha sa imong scripture study journal. Isulat diha sa mga blangko si Simon ang Pariseo, ang babaye, ug Jesus, sumala sa girepresentar sa matag indibidwal diha sa sambingay. (Lat-angi ang luna sa “Mangungutang” nga mga kolum aron sulatan og dugang pa nga impormasyon alang sa sunod nga assignment.)
Tigpautang =
Mangungutang kinsa utangan og 50 ka denario =
Mangungutang kinsa utangan og 500 ka denario =
Imahe
Elder James E. Talmage
Si Elder James E. Talmage sa Korum sa Napulog Duha ka mga Apostoles mitudlo mahitungod sa pagkamaabiabihon nga kasagarang ipakita sa mga tagbalay ngadto sa ilang bisita sa panahon ni Jesus. “Kustombre nianang panahona ang pagtagad sa inila nga bisita uban sa dayag nga pagtagad, sa pagdawat kaniya uban sa usa ka halok sa pag-abiabi, sa paghatag og tubig alang sa paghugas sa mga abug gikan sa iyang mga tiil, ug lana sa pagdihog sa iyang buhok ug bangas” (Jesus the Christ, 261).
Basaha ang Lucas 7:44–46, nga mangita sa kalainan tali sa unsa nga paagi giabiabi ni Simon si Jesus ngadto sa iyang kumbira ug sa unsa nga paagi gitagad sa babaye si Jesus.
Diha sa tsart sa imong scripture study journal, ilista diha sa tukma nga mga kolum ang pipila ka mga kalainan tali sa unsa nga paagi gitagad ni Simon si Jesus ug sa unsa nga paagi gitagad Siya sa babaye.
Sa dili direkta nga pagkatandi ni Simon ngadto sa mangungutang nga nakautang og 50 ka denario, si Jesus nagsugyot nga siya kinahanglan usab nga mapasaylo sa iyang mga sala.
Basaha ang Lucas 7:47–50, nga mangita sa unsay naghimo niini nga posible nga madawat sa babaye ang kapasayloan. Mahimo nimong markahan unsay imong nakit-an.
Imahe
Elder Bruce R. McConkie.
Si Elder Bruce R. McConkie sa Korum sa Napulog Duha ka mga Apostoles mikomentaryo kalabut sa hugot nga pagtuo niini nga babaye: “Agig sukaranan si Jesus nag-ingon: ‘Ang iyang sala daghan, apan siya mituo kanako, gihinulsulan ang iyang mga sala, gibunyagan sa akong mga tinun-an, ug ang iyang mga sala gihugasan diha sa mga tubig sa bunyag. Karon siya nangita kanako aron ipakita ang walay kinutuban nga pagpasalamat sa usa nga kaniadto hugaw, apan karon limpyo na. Ang iyang pasalamat walay utlanan ug ang iyang gugma dili masukod, tungod kay siya gipasaylo sa makadaghan’” (Doctrinal New Testament Commentary, 3 vols. [1965–73], 1:265).
Ang mosunod mao ang pipila ka mga baruganan nga atong makat-unan gikan niini nga istorya: Samtang naggamit kita sa atong hugot nga pagtuo pinaagi sa pagpakita sa atong gugma ug paghalad ngadto sa Ginoo, kita makasinati sa Iyang kapasayloan, ug samtang kita magdawat sa kapasayloan sa Ginoo, mapuno kita sa tinguha sa paghigugma ug pag-alagad Kaniya gani sa mas labaw pa.
Si Elder Neil L. Andersen sa Korum sa Napulog Duha ka mga Apostoles mipamatuod sa gugma ug kapasayloan nga anaa alang kanatong tanan:
Imahe
Elder Neil L. Andersen
“Adunay daghang matang sa personal nga katakus ug katarung. Gani ang paghinulsol maoy usa ka panalangin alang kanatong tanan. Matag usa kanato nagkinahanglang mobati sa mga bukton sa kalooy sa Manluluwas pinaagi sa kapasayloan sa atong mga sala.
“Sa milabay nga katuigan, gihangyo ako sa pagpakigkita sa usa ka tawo kinsa, kaniadto sa wala pa ang among panagkita, nakabaton og usa ka panahon sa gubot nga pagpuyo. Isip sangputanan sa iyang sayop nga mga pagpili, nawala ang iyang pagkamiyembro sa Simbahan. Dugay na siyang mibalik sa Simbahan ug matinud-anon nga nagsunod sa mga sugo, apan ang iyang mga kalihokan kaniadto mihamok kaniya. Sa pagpakigkita kaniya, akong gibati ang iyang kaulaw ug ang iyang dakong pagbasol sa paghiklin sa iyang mga pakigsaad. Human sa among interbyu, akong gibutang ang mga kamot diha sa iyang ulo aron sa paghatag kaniya og panalangin sa priesthood. Sa wala pa mosulti og usa ka pulong, gibati ko og labihan ka dako nga pagbati sa gugma ug pagpasaylo sa Manluluwas alang kaniya. Human sa pagpanalangin, kami naggakos ug ang mga tawo madayagon nga mihilak.
“Natingala ko sa nagliyok nga mga bukton sa kalooy ug gugma sa Manluluwas alang sa mahinulsulon, bisan unsa ka maakuhon ang gisalikway nga sala. Ako mopamatuod nga ang Manluluwas makahimo ug andam nga mopasaylo sa atong mga sala. Gawas sa mga sala niadtong pipila kinsa mipili sa kapildihan human makahibalo sa kahingpitan, walay sala nga dili mapasaylo. Pagkatalagsaon nga kahigayunan alang sa matag usa kanato nga mopalayo gikan sa atong mga sala ug mduol ngadto ni Kristo. Ang balaan nga pagpasaylo maoy pinakatam-is nga bunga sa ebanghelyo, ang pagkuha sa sala ug kasakit nga gikan sa atong mga kasingkasing ug pagpuli niinisa hingpit nga kalipay ug kalinaw sa tanlag” (“Paghinulsol … Aron Ako Moayo Kaninyo,” Ensign o Liahona, Nob. 2009, 40–41).
Kompletoha ang usa o duha sa mosunod nga mga assignment diha sa imong scripture study journal:
Hunahunaa ang usa ka panahon sa dihang nasinati nimo ang pagpasaylo sa Ginoo. Sa walay pagtug-an sa labing personal nga panghitabo nga nagkinahanglan sa pagpasaylo sa Ginoo, isulat ang imong mga hunahuna ug mga pagbati alang sa Manluluwas.
Gamita unsay imong nakat-unan gikan sa imong pagtuon sa Lucas 7 sa pagsulat kon sa unsa nga paagi ikaw motubag sa mga higala kinsa naghunahuna kon sila mapasaylo ba sa ilang mga sala.
Isulat ang mosunod diha sa ubos sa mga assignment karong adlawa sa imong scripture study journal:
Akong natun-an ang Lucas 7:18–50 ug nakompleto kini nga leksyon sa (petsa).
Dugang nga mga pangutana, mga hunahuna, ug mga panlantaw nga gusto nakong ipakigbahin uban sa akong magtutudlo: