Dinhi niini nga epistola gidayeg ni Apostol Pablo si Filemon tungod sa iyang hugot nga pagtuo ug sa iyang gugma alang sa Manluluwas ug sa kauban nga mga miyembro sa Simbahan. Gitambagan niya si Filemon nga dawaton og balik ang milayas niyang ulipon nga si Onesimo isip usa ka igsoon diha sa ebanghelyo.
Filemon
Gitambagan ni Pablo si Filemon nga dawaton og balik ang milayas niyang ulipon nga si Onesimo isip usa ka igsoon diha sa ebanghelyo
Isip mga miyembro sa Simbahan, kanunay kitang makasugat og bag-ong mga tawo. Hunahunaa nga dunay usa ka bag-ong tawo nga mipasakop sa inyong ward o branch. Diha sa imong scripture study journal, pagsulat bahin sa sosyal nga mga hagit nga mahimong masinati sa usa ka tawo kon mopasakop sa Simbahan o mobalhin ngadto sa bag-ong ward o branch. Kon mipasakop ka sa Simbahan o mibalhin ngadto sa bag-ong ward o branch sa bag-ong mga katuigan, ihulagway ang bisan unsang sosyal nga mga hagit nga imong nasinati.
Paghunahuna bahin sa mosunod nga mga pangutana: Unsaon nimo pagtratar ang bag-ong mga miyembro sa inyong ward o branch? Unsaon nimo pagtratar ang mga miyembro sa Simbahan nga lahi og batasan, dunay lahi nga mga interes, o nahisakop sa lahi nga sosyal nga grupo kay kanimo?
Samtang magtuon ka sa epistola ni Apostol Pablo ngadto ni Filemon, pangitaa ang kamatuoran nga makagiya nimo sa imong mga inter-aksyon kauban ang mga miyembro sa Simbahan.
Atol sa iyang unang pagkabilanggo didto sa Roma, samtang napaubos sa house arrest, misulat si Pablo kang Filemon, kinsa tingali usa ka Gresyanhon nga kinabig ngadto sa Simbahan. Sama sa narekord diha sa Filemon 1:1–3, gisugdan ni Pablo ang iyang epistola pinaagi sa pagpangumusta ni Filemon ug sa uban, lakip na ang kongregasyon nga nagpundok sa balay ni Filemon.
Basaha ang Filemon 1:4–7, nga mangita kon nganong gidayeg ni Pablo si Filemon. Dinhi niining konteksto ang pulong pagpakaambit nagpasabut sa pag-apil ug pakigdait ug ang mga pulong nga “makapalambo sa kahibalo” nagpasabut nga mahimong aktibo o moepekto.
Mahimong makatabang nga masayud nga sa dihang miingon si Pablo nga “ang mga kasingkasing sa mga balaan nakatagamtam sa kahayahay” (Filemon 1:7), gipasabut niya nga ang ilang kasingkasing napamaya ni Filemon.
Ang nag-unang katuyoan ni Pablo sa pagsulat ngadto ni Filemon mao ang pagsulbad og sitwasyon nga naglambigit ni Filemon ug sa iyang sulugoon, o ulipon, nga ginganlan og Onesimo. Si Onesimo milayas ug posible nga nangawat og butang gikan ni Filemon (tan-awa sa Filemon 1:18). Ang pagpangulipon wala isipa nga dautan sulod sa kultura sa Judeo-Kristiyano sa Bag-ong Tugon ug gisuportahan sa balaod sa Roma. Ang mga silot alang sa milayas nga mga ulipon naglakip sa grabe nga paglatus, pagbutang og simbolo sa agtang sa ulipon, o gani pagpatay. Human sa paglayas, nasugatan ni Onesimo si Apostol Pablo.
Basaha ang Filemon 1:8–12, nga mangita sa gihangyo ni Pablo, o kinasingkasing nga gipangamuyo, nga buhaton ni Filemon. Hibaloi nga diha sa bersikulo 8, ang pulong nga pagsugo nagpasabut og pagmando ug ang kinahanglan pagabuhaton nagpasabut og tukma o haum.
Kon ikaw ang naa sa posisyon ni Filemon, unsa kaha ang imong hunahunaon o bation sa dihang nadawat nimo ang hangyo ni Pablo?
Hibaloi ang mga pulong nga “kang kinsa ako nahimong iyang amahan samtang ako binilanggo” (Filemon 1:10). Usa ka kahulugan sa verb nga nahimong amahan [beget] mao ang paghatag og kinabuhi sa usa ka tawo. Samtang nabilanggo si Pablo, gitabangan niya nga magsugod og bag-ong kinabuhi si Onesimo isip usa ka sumusunod ni Jesukristo.
Sama sa narekord diha sa Filemon 1:13–14, gusto ni Pablo nga magpabilin si Onesimo kaniya aron makaabag si Onesimo kaniya, apan dili gusto ni Pablo nga mobuhat sa ingon nga wala ang pagtugot ni Filemon.
Basaha ang Filemon 1:15–16, nga mangita kon giunsa pag-awhag ni Pablo si Filemon nga matan-aw ang iyang relasyon uban sa bag-ong nakabig nga si Onesimo. Ikonsiderar ang pagmarka o pagsulat sa unsay imong makit-an.
Nganong ang pagtan-aw kang Onesimo isip usa ka “igsoon nga minahal” (Filemon 1:16) nahimong lisud alang kang Filemon?
Usa ka kamatuoran nga atong makat-unan gikan sa bersikulo 16 mao nga managsoon kita diha sa ebanghelyo.
Kitang tanan espiritu nga mga anak sa atong Langitnong Amahan (tan-awa sa Mga Hebreohanon 12:9), ug sa ingon managsoon ang tanan. Agig dugang, pinaagi sa mga ordinansa sa bunyag ug pagkumpirma, sa padayon nga pagpakita og hugot nga pagtuo diha ni Jesukristo, ug kanunay nga paghinulsol, natawo kita sa espirituhanong paagi Niining paagiha mahimo kitang mga anak nga lalaki ug mga anak nga babaye ni Jesukristo (tan-awa sa Mosiah 5:7) ug, busa, managsoon diha sa Iyang pamilya sa pakigsaad. Bisan pa man sa atong gender, kultura, edad, kaagi, o sosyal nga kahimtang, mahimo kitang magkatugbang diha sa gingharian sa Dios.
Samtang magbasa ka sa mosunod nga pamahayag ni Presidente Spencer W. Kimball, pangita og mga paagi diin ang kamatuoran nga kita managsoon diha sa ebanghelyo makaimpluwensya sa paagi sa pagtratar nato sa usag usa, ilabi na ang bag-ong mga miyembro sa Simbahan:
Imahe
President Spencer W. Kimball
“Kanunay kong madasig pinaagi sa pagbasa sa mubo nga epistola ni Pablo ngadto kang Filemon; nagtudlo kini kanato og usa ka baruganan ug usa ka diwa kalabut sa panag-igsoonay diha sa ebanghelyo. …
“Usa kini ka inspirasyon ug hingpit nga kalipay nga makita kining samang diwa nga naglihok sa tibuok Simbahan, nga makita ang mga Santos nga mihangup ug mitabang ug miabag ug nag-ampo alang niadtong inadlaw nga misulod sa gingharian sa Ginoo. Padayon sa pagtinabangay sa usag usa—ug sa daghan pa nga mosulod sa Simbahan. Abi-abiha sila ug higugmaa ug pakigdait kanila.
“Subo lang, dunay panagsa nga mga panghitabo diin ang uban kanato wala mobuhat sa ingon, mga istorya sa uban kinsa misalikway niadtong gidawat sa Ginoo pinaagi sa bunyag. Kon ang Ginoo wala ‘ikaulaw ang pagtawag kanilag mga igsoon’ (Heb. 2:11), busa, atong himoon ang, … pagkupot sa kamot sa atong mga kaigsoonan ug magpakabana ug mohigugma kanila” (“Always a Convert Church: Some Lessons to Learn and Apply This Year,” Ensign, Sept. 1975, 4).
Tubaga ang mosunod nga mga pangutana diha sa imong scripture study journal:
Sa imong hunahuna nganong importante man nga masabtan nga mga managsoon kita diha sa ebanghelyo?
Kanus-a man ka nakakita og usa ka tawo nga mitratar sa uban isip isigka-igsoon diha sa ebanghelyo! Unsa ang maayong mga resulta nga miabut tungod sa maong kamabination ug gugma?
Sulati ang usa ka tawo diha sa inyong ward o branch nga tingali nagkinahanglan nga mobati nga gihigugma ug gidawat. Mahimo usab nimong dayegon ang tawo sa iyang mga gasa ug mga tampo ug ipahayag ang imong pagpakabana isip igsoon diha sa ebanghelyo. Inig human nimo og sulat, irekord ang summary niini diha sa imong scripture study journal:
Aron makaandam sa pag-ila og dugang nga kamatuoran nga gihulagway diha sa epistola ni Pablo ngadto kang Filemon, paghunahuna og usa ka higayon sa dihang ang usa ka tawo nakapasilo o nakasala kanimo.
Basaha ang Filemon 1:17, nga mangita sa gitambag ni Pablo nga buhaton ni Filemon alang ni Onesimo, ang milayas nga ulipon ni Filemon.
Gihangyo ni Pablo si Filemon nga dawaton og balik si Onesimo ngadto sa iyang panimalay nga dili mopahamtang kaniya sa grabe nga mga silot nga kasagarang madawat sa milayas nga mga ulipon. Sama sa gihulagway diha sa instruksyon ni Pablo ngadto kang Filemon, atong makat-unan nga ang mga disipulo ni Jesukristo mopadangat og kalooy ug kapasayloan ngadto sa uban.
Nganong lisud man usahay ang pagpadangat og kalooy ug kapasayloan ngadto sa uban?
Ipasabut nga ang pagpadangat og kalooy ug kapasayloan niadtong nakasala kanato wala magpasabut nga nagtugot kanila nga makalikay sa mga sangputanan sa ilang mga lihok, ni nagpasabut kini og dali nga pagpahiuli sa atong pagsalig diha kanila. Hinoon, nagpasabut kini nga nagpakita kita og kalooy ngadto sa uban ug kalimtan ang kahiubos, kasuko, o kasakit nga tingali atong gihambin. Kon tukma, mahimo usab natong tugutan kadtong nakasala nato nga mabalik ang atong pagsalig.
Basaha ang Filemon 1:18–21, nga mangita sa gitanyag nga buhaton ni Pablo alang ni Onesimo.
Sama sa pagpataliwala ni Pablo alang ni Onesimo, si Jesukristo mopataliwala alang kanato ug mangamuyo sa atong kawsa atubangan sa Langitnong Amahan (tan-awa sa D&P 45:3–5). Gibayaran usab ni Jesukristo ang espirituhanong utang nga atong nahimo alang sa atong mga sala.
Sa unsang paagi nga ang paghinumdom sa unsay nahimo ni Jesukristo alang kanato makatabang nga atong mapadangat ang kalooy ug kapasayloan ngadto sa uban?
Tubaga ang usa o dugang pa sa mosunod nga mga hugpong sa mga pangutana diha sa imong scripture study journal (siguroha nga dili isulat ang bisan unsang butang nga personal ra kaayo o pribado):
Kanus-a man nga ikaw, sama ni Filemon, nagkinahanglan nga mopadangat og kalooy ug kapasayloan ngadto sa laing tawo? Giunsa man nimo sa pagpadangat og kalooy ug pagpasaylo niining tawhana? Sa unsang paagi ka napanalanginan sa pagbuhat sa ingon?
Kanus-a man nga ikaw, sama ni Onesimo, naglaum nga makadawat og kalooy ug kapasayloan gikan sa laing tawo? Giunsa man nimo sa pagtinguha ang kalooy ug kapasayloan niining tawhana? Sa unsang paagi ka napanalanginan sa pagbuhat sa ingon?
Kanus-a man nga ikaw, sama ni Pablo, miserbisyo isip tigpataliwala tali sa usa ka tawo nga nagtinguha nga pasayloon ug sa tawo nga nagkinahanglan nga mopadangat og kapasayloan ug kalooy? Giunsa man nimo sa pagtabang ang nakasala nga makadawat og kapasayloan ug ang nasad-an nga tawo nga makapasaylo sa nakasala?
Hunahunaa kon unsay imong mabuhat aron makapadangat og kalooy ug kapasayloan ngadto sa uban. Samtang magtinguha ka nga malakip, makadawat, ug makapadangat og kapasayloan ngadto sa uban, ang Ginoo motabang nimo sa imong mga paningkamot.
Isulat ang mosunod sa ubos sa mga assignment karong adlawa diha sa imong scripture study journal:
Akong natun-an ang Filemon ug nahuman kini nga leksyon sa (petsa).
Dugang nga mga pangutana, mga hunahuna, ug mga pagsabut nga gusto nakong ipakigbahin sa akong magtutudlo: