Si Presidente Boyd K. Packer, Presidente sa Korum sa Napulog Duha ka mga Apostoles mipasabut sa kaimportante sa mubo nga kinatibuk-ang pagpasabut sa plano sa kaluwasan sa sinugdanan sa matag tuig sa seminary:
Imahe
Presidente Boyd K. Packer
“Usa ka kinatibuk-ang pagpasabut sa ‘plano sa kalipay’ … , kon hisgutan kini sa pagsugod pa lang ug balikan sa panagsa, dako kaayo og bili ngadto sa … imong mga estudyante. …
“Ang mga batan-on matingala ‘ngano?’—Ngano nga kita gisugo sa pagbuhat sa pipila ka mga butang, ug ngano nga kita gisugo sa dili pagbuhat sa ubang mga butang? Ang kahibalo sa plano sa kalipay, bisan anaa sa outline nga porma, makapahunahuna sa batan-ong mga hunahuna og ‘ngano’” (“The Great Plan of Happiness,” in Teaching Seminary: Preservice Readings [Church Educational System manual, 2004], 69–70, LDS.org; tan-awa sa Alma 12:32).
Kini nga leksyon naghatag og mubo nga kinatibuk-ang pagpasabut sa plano sa kaluwasan ug nagtutok sa importante nga tahas ni Jesukristo ug sa Iyang Pag-ula niana nga plano.
Ang tahas ni Jesukristo sa Kinabuhi nga Wala Dinhi sa Yuta
Unsaon nimo sa pagtubag kon dunay mangutana nimo nganong si Jesukristo importante diha nimo?
Sa leksyon karon imong makat-unan ang mahitungod sa tahas ni Jesukristo sa plano sa Langitnong Amahan sa kaluwasan. Samtang ikaw magtuon, pangitaa ang mga kamatuoran nga makatabang nimo sa pagpalig-on sa imong hugot nga pagtuo diha ni Jesukristo.
Drowinga ang mosunod nga tsart sa imong scripture study journal. Imong isulat ang mga doktrina sa imong tsart samtang magtuon ka niini nga leksyon.
Si Jesukristo Mao ang Sentro sa Plano sa Langitnong Amahan
Kinabuhi sa Wala pa Dinhi sa Yuta
Mortal nga Kinabuhi
Kinabuhi Human dinhi sa Yuta
Ang plano sa Langitnong Amahan sa atong kaluwasan naglangkob sa tulo ka mga bahin: ang atong kinabuhi nga wala pa dinhi sa yuta, nga nag-una sa atong pisikal nga pagkatawo; ang atong mortal nga kinabuhi; ug ang atong kinabuhi human dinhi sa yuta.
Basaha ang mosunod nga pamahayag, ug markahi ang mga pulong nga naghulagway sa mga limitasyon nga atong nasinati sa atong kinabuhi nga wala pa dinhi sa yuta:
“Kita nagpuyo isip espiritu nga mga anak sa atong Amahan sa Langit sa wala pa kita matawo dinhi sa yuta [tan-awa sa Mga Buhat 17:28–29; Abraham 3:22–26]. Hinoon, kita dili sama sa atong Langitnong Amahan, ni kita mahisama Kaniya ug makatagamtam sa tanang mga panalangin nga Iyang natagamtaman nga wala ang kasinatian sa pagpakabuhi sa pagka-mortal uban sa pisikal nga lawas.
“Ang tibuok katuyoan sa Dios—Ang iyang buhat ug Iyang himaya—mao nga ang matag usa nato makatagamtam sa Iyang tanang mga panalangin [tan-awa sa Moises 1:39]. Mihatag Siya og hingpit nga plano aron matuman ang Iyang katuyoan. Kita nakasabut ug midawat niini nga plano sa wala pa kita moanhi sa yuta. …
“… Aron mouswag ug mamahimong sama sa Dios, ang kada usa kanato kinahanglan makaangkon og lawas ug masulayan atol sa usa ka panahon sa pagsulay dinhi sa yuta” (Isangyaw ang Akong Ebanghelyo: Usa ka Giya sa Misyonaryo nga Pangalagad [2004], 56–57).
Sa dihang gipresentar sa Langitnong Amahan ang Iyang plano sa kalipay, atong nahibaloan nga usa ka manluluwas ang gikinahanglan sa pagpatuman niini nga plano. Si Lucifer, usa sa espiritu nga anak sa Langitnong Amahan, mirebelde batok sa plano sa Langitnong Amahan. Siya nailhan nga Satanas.
Basaha ang Moises 4:1–3, nga mangita sa unsay gibungat ni Satanas ngadto sa Langitnong Amahan.
Unsay gibungat ni Satanas sa Langitnong Amahan?
Sa Moises 4:2 atong nahibaloan nga si Jesukristo mao ang gipili gikan sa sinugdanan sa pagbuhat sa kabubut-on sa Langitnong Amahan. Sa imong tsart, sa kolum sa “Kinabuhi nga Wala pa Dinhi sa Yuta” isulat ang mosunod nga doktrina nga atong nakat-unan gikan niini nga tudling: Si Jesukristo gipili didto sa kinabuhi nga wala pa dinhi sa yuta nga mahimong Manunubos sa katawhan.
Human mapili si Jesukristo nga mohimo sa plano sa Langitnong Amahan sa kaluwasan, usa ka yuta kinahanglan nga buhaton diin kita makaangkon og pisikal nga lawas ug makaangkon og kasinatian.
Basaha ang Mga Hebreohanon 1:1–2, nga mangita sa tahas ni Jesukristo sa paglalang sa yuta.
Gikan niini nga mga bersikulo atong makat-unan ang mosunod nga doktrina: Ubos sa direksyon sa Langitnong Amahan, si Jesukristo milalang niini nga yuta. Isulat kini nga doktrina sa kolum sa “Kinabuhi nga Wala pa Dinhi sa Yuta” sa imong tsart sa scripture study journal.
Imahe
linaw sa bukid
Hunahunaa ang katahum sa yuta ug sa mga higayon kanus-a ug sa mga dapit nga kamo tinud-anay nga nagpasalamat niini. Sa imong scripture study journal, tubaga ang mosunod:
Ihulagway ang panahon sa dihang kamo nakapasalamat sa katahum sa yuta.
Sa unsang paagi nga ang pagkasayud nga si Jesukristo ang milalang niini nga yuta makaapekto sa imong mga pagbati mahitungod Kaniya?
Ang tahas ni Jesukristo sa Mortal nga Kinabuhi
Sa atong pag-anhi sa yuta ug pag-angkon og pisikal nga lawas, atong nasinati ang ubang mga babag nga makapugong nato nga mahimong sama sa Langitnong Amahan ug pagbalik ngadto sa Iyang presensya. Duha sa mga babag mao ang pisikal nga kamatayon ug espirituhanon nga kamatayon? Ang pisikal nga kamatayon mao ang pagkabulag sa lawas ug sa espiritu, ug ang espirituhanon nga kamatayon mao ang pagkabulag gikan sa Dios. Basaha ang mosunod nga pamahayag, ug markahi ang mga pulong nga naghulagway sa duha ka mga babag nga atong masinati sa atong mortal nga kinabuhi:
“Sa pagkamortal kita nagpuyo diin kita ubos sa pisikal ug espirituhanon nga kamatayon. Ang Dios adunay perpekto, mahimayaon, imortal nga lawas sa unod ug mga bukog. Aron mahimong sama sa Dios ug mobalik ngadto sa Iyang presensya, kita usab kinahanglang dunay perpekto, imortal nga lawas sa unod ug bukog. Hinoon, tungod sa Pagkapukan ni Adan ug ni Eva, ang matag tawo dinhi sa yuta dunay dili perpekto, mortal nga lawas ug sa katapusan mamatay. Kon dili pa tungod sa Manluluwas nga si Jesukristo, ang kamatayon mao unta ang katapusan sa tanang paglaum sa umaabut nga kinabuhi uban sa Langitnong Amahan.
“Apil sa pisikal nga kamatayon, ang sala usa ka dakong babag nga maoy makapugong nato nga mahisama sa atong Amahan sa langit ug mobalik ngadto sa Iyang presensya. Sa atong mortal nga kahimtang sa kasagaran matintal ta, mosupak sa mga sugo sa Dios, ug makasala. … Bisan og usahay makita kini nga lahi, ang sala kanunayng mosangput sa pagkadili malipayon. Ang sala maoy makaingon nga mobati nga sad-an ug maulaw. Tungod sa atong mga sala, dili kita makahimo sa pagbalik aron mopuyo uban sa Langitnong Amahan gawas kon kita mapasaylo ug mahugasan.
“… Sama sa pisikal nga kamatayon, dili kita makabuntog sa mga epekto sa sala nga kita-kita ra. Wala kitay mahimo kon wala ang Pag-ula ni Jesukristo” (Isangyaw ang Akong Ebanghelyo, 59).
Sa wala pa matawo si Jesus sa yuta, human makahibalo si Jose nga si Maria nagpaabut nga manganak, usa ka anghel ang mibisita kaniya sa usa ka damgo. Basaha ang Mateo 1:21, nga mangita kon unsay gisulti sa anghel ngadto ni Jose.
Gikan sa gisulti sa anghel nga buhaton ni Jesus, atong nahibaloan nga si Jesukristo mianhi aron sa pagluwas nato gikan sa atong mga sala. Isulat kini nga doktrina sa kolum sa “Mortal nga Kinabuhi” sa imong tsart.
Mahimo kitang maluwas gikan sa atong mga sala tungod sa Pag-ula ni Jesukristo. Ang Pag-ula naglakip sa pag-antus, kamatayon ug Pagkabanhaw ni Jesukristo.
Imahe
Kristo sa Getsemani, Pagkalansang sa krus, nabanhaw nga Kristo
Ang Pag-ula ni Jesukristo
Tubaga ang mosunod nga mga pangutana diha sa imong scripture study journal.
Unsay kinahanglan natong buhaton aron maluwas gikan sa atong mga sala pinaagi sa Pag-ula ni Jesukristo?
Sumala sa Mga Buhat 2:32, unsay angay pa gayud natong buhaton?
Ang tahas ni Jesukristo sa Kinabuhi nga Human na Dinhi sa Yuta
Nawad-an ba kamo og minahal nga sakop sa pamilya o higala tungod sa kamatayon?
Tungod sa atong kahibalo sa plano sa atong Langitnong Amahan sa kaluwasan, nasayud kita nga sa kamatayon ang mga espiritu sa tanang mga tawo mosulod sa kalibutan sa espiritu.
Basaha ang 1 Pedro 3:18–20 ug 1 Pedro 4:6, nga mangita sa unsay gibuhat ni Jesus human dayon sa iyang kamatayon.
Basaha ang Doktrina ug mga Pakigsaad 138:18–19, 30–32, nga mangita sa unsay gibuhat ni Jesukristo aron masangyaw ang ebanghelyo ngadto sa tanan didto sa kalibutan sa espiritu. (Doktrina ug mga Pakigsaad 138 usa ka pagpadayag mahitungod sa kalibutan sa espiritu nga nadawat ni Presidente Joseph F. Smith samtang siya namalandong sa pagbisita sa Manluluwas sa mga espiritu sa mga patay samtang ang Iyang lawas diha sa lubnganan.)
I-summarize unsay gibuhat ni Jesukristo aron masangyaw ang ebanghelyo ngadto sa tanan didto sa kalibutan sa espiritu:
Ang Manluluwas nabanhaw sa ikatulong adlaw human sa Iyang kamatayon (tan-awa sa 1 Mga Taga-Corinto 15:4). Kon ang tawo mabanhaw, ang iyang espiritu ug pisikal nga lawas maghiusa, dili na gayud magkabulag pag-usab (tan-awa sa D&P 138:17).
Imahe
Si Jesukristo uban ni Maria
Ang nabanhaw nga Ginoo
Basaha ang 1 Mga Taga-Corinto 15:20–22, nga mangita kon sa unsa nga paagi nga ang Pagkabanhaw ni Jesukristo makaapekto sa matag usa kanato.
Sa imong tsart, sa kolum sa “Kinabuhi nga Human Dinhi sa Yuta” isulat ang mosunod nga doktrina: Tungod sa Pagkabanhaw ni Jesukristo, ang tanang mga tawo mabanhaw.
Basaha ang Pinadayag 20:12, mangita kon unsay mahitabo sa matag usa kanato human kita mabanhaw.
Ang basahon sa kinabuhi magrepresentar sa mga hunahuna ug mga aksyon sa tawo niini nga kinabuhi, ingon man usab rekord kini nga gitipigan sa langit sa mga matarung (tan-awa sa Giya ngadto sa Kasulatan, “Basahon sa Kinabuhi”). Kita pagahukman dili lamang sa atong mga buhat apan usab sa atong mga hunahuna, mga pulong, ug mga tinguha (tan-awa sa Mosiah 4:30; Alma 12:14; D&P 137:9).
Basaha ang Juan 5:22, nga mangita kon kinsa ang mohukom nato. (Mahimo nimong isulat ang Juan 5:22 sa margin sa imong kasulatan duol sa Pinadayag 20:12.)
Sa imong tsart, sa kolum sa “Kinabuhi nga Human Dinhi sa Yuta” isulat ang mosunod nga doktrina: Si Jesukristo mohukom sa tanang mga tawo.
Ang katuyoan gayud sa plano sa Langitnong Amahan mao ang paghatag sa tanan Niyang mga anak og oportunidad nga makaangkon og kinabuhing dayon, o kahimayaan, nga nagpasabut nga mahimong sama sa Langitnong Amahan ug magpuyo uban Kaniya sa kahangturan sa mahangturong mga pamilya. Hunahunaa ang imong pamilya karon ug ang pamilya nga imong gilauman sa umaabut.
Sa imong scripture study journal, isulat ang ngano nga importante nimo nga makapuyo uban sa Langitnong Amahan ug sa mga sakop sa pamilya sa kahangturan.
Basaha ang Juan 3:5, 16–17, mangita kon unsay angay buhaton sa matag usa nato aron makadawat og kinabuhing dayon (o walay katapusang) kinabuhi.
Sa pagtuo sa Bugtong Anak nagpasabut sa paggamit sa hugot nga pagtuo diha kang Jesukristo ug magpuyo sumala sa Iyang ebanghelyo.
Sa imong tsart, sa kolum sa “Kinabuhi nga Human Dinhi sa Yuta” isulat ang mosunod nga doktrina: Kon atong gamiton ang hugot nga pagtuo diha ni Jesukristo ug magpuyo sumala sa Iyang ebanghelyo, nan kita makadawat og kinabuhing dayon.
Hunahuna pag-usab ang pangutana sa sinugdanan sa leksyon: “Unsaon nimo sa pagtubag kon dunay mangutana nimo nganong si Jesukristo importante diha nimo?” Sa imong scripture study journal, isulat ang imong tubag niini nga pangutana base sa unsay imong nakat-unan ug gibati panahon sa imong pagtuon karon.
Ikonsiderar ang paggamit sa tsart nga imong gibuhat diha sa imong scripture study journal sa pagtudlo sa imong pamilya o sa uban mahitungod sa tahas ni Jesukristo sa plano sa Langitnong Amahan sa kaluwasan.
Isulat ang mosunod sa ubos sa assignment karon diha sa imong scripture study journal.
Ako nakatuon sa leksyon sa “Ang Plano sa Kaluwasan” ug nakompleto kini sa (petsa).
Dugang nga mga pangutana, mga hunahuna, ug mga pagsabut nga gusto nakong ipakigbahin sa akong magtutudlo: