1902–1918

Susa Young Gates ’e ’o Joseph F. Smith

E heheura’a nō ni’a i te ao vārua

E tamāhine ’o Susa Young Gates nā Brigham Young. ’Ua fānauhia ’oia i Utaha ’e ’ua pa’ari i reira. E mea au nāna e pāpa’i, ’e e mea au nāna e tāvini i roto i te ’Ēkālesia a te Fatu.

Te Feiā Mo’a, 3:9–10, 64

I te ta’ata-pa’ari-ra’a mai Susa, e mea ma’i roa ’oia. ’Ua ani ’oia i te hō’ē ha’amaita’ira’a o te autahu’ara’a. I roto i te ha’amaita’ira’a, ’ua parau te Fatu ia Susa e hina’aro ’oia ’ia rave Susu i te ’ohipa i roto i te hiero.

Te Feiā Mo’a, 3:193–94

I muri a’e te ha’amaita’ira’a, ’ua maita’i roa mai Susa. ’Ua rave ’oia i tōna taime nō te ha’api’i mai nō ni’a i tōna ’ā’amu ’utuāfare. I tōna ’itera’a mai i te mau melo o tōna ’utuāfare tei pohe ma te ’ore i bāpetizohia, ’ua haere atu ’oia i te hiero ’ia bāpetizohia ’oia nō rātou. E mea au roa nāna e paraparau i te ta’ata nō ni’a i te ’ohipa ’ā’amu ’utuāfare. Te mea pe’ape’a rā, e rave rahi ta’ata ’aita roa atu i ’ana’anatae.

Te Feiā Mo’a, 3:194–95, 206

I te tahi mahana, ’ua fārerei atu Susa i tōna hoa ia Joseph F. Smith, te peresideni o te ’Ēkālesia. E rave rahi hepetoma tō te peresideni Smith ma’ira’ahia. ’Ua ’ite Susa ē, tē ’oto ato’a nei ’oia nō te mea ’ua pohe tāna tamaiti. Tē ’oto ato’a nei ho’i ’oia nō te tahi atu mau mea e tupu nei nā te ao nei, mai te mau tama’i ’e te mau ma’i.

Te Feiā Mo’a, 3:197–99, 205–6

I tō Susa rā pārahira’a mai ’e te peresideni Smith, ’ua ’ana’anatae roa ’oia e paraparau ia Susa. ’Ua parau ’oia ia Susa ē, ’ua hōro’a mai te Atua i te hō’ē ’ōrama ta’a ’ē iāna. Nō ni’a ïa i te ao vārua, i reira te ta’ata e haere ai i muri a’e i tō rātou pohera’a. ’Ua pāpa’ihia tōna ’ōrama i ni’a i te hō’ē ’api parau. ’Ua hōro’a atu te peresideni Smith i te reira ia Susa ra, ’e ’ua ani ia Susa ’ia tai’o i te reira.

Te Feiā Mo’a, 3:206–7

’Ua tai’o Susa i te ’api parau. Tē parau nei te reira ē, e haere atu Iesu Mesia i te ao vārua. ’Ua tono atu ’oia ia ’Adamu, ia Eva ’e vetahi mau tāne ’e mau vahine ha’apa’o maita’i nō te ha’api’i i te mau vārua tei ore i fa’ari’i i te ’evanelia i tō rātou orara’a i te fenua nei. Tē tauturu nei rātou i teie mau vārua ’ia fa’aineine, ’ia nehenehe i te mau ta’ata ’ia bāpetizohia nō rātou i roto i te hiero.

Te Ha’api’ira’a Tumu ’e te mau Fafaura’a 138:11–19, 29–48 ; Te Feiā Mo’a, 3:206–7

’Ua fa’ahiahia roa Susa i te tai’ora’a i te ’ōrama o te peresideni Smith. ’Ua ’ata’ata te peresideni Smith iāna. « Susa », ’ua parau ’oia « tē rave nei ’oe i te hō’ē ’ohipa rahi » ’Ua parau ’oia ia Susa ē, ’ua here ’oia ia Susa nō tōna fa’aro’o i te Fatu.

Te Feiā Mo’a, 3:221

’Ua pāpa’i Susa i te heheura’a i roto i tāna buka ’ā’amu. « ’Auē ho’i ē, ’ua riro teie ’ei tāmāhanahanara’a nō’u ! » ’ua parau ’oia. E hina’aro rahi tō Susa ’ia parau atu i te reira i tōna mau hoa ’e i te tahi atu mau melo o te ’Ēkālesia. ’Ua ’ite ’oia ē, e fa’auru te ’ōrama o te peresideni Smith i te feiā mo’a ’ia fa’aō mai i roto i te ’ohipa hiero nō te mau ta’ata i roto i te ao vārua.

Te Feiā Mo’a, 3:207