Fepuare 1832

’Ua ha’api’i Iosepha ’e ’o Sidney i te parau nō te ra’i

E ’ōrama nō ni’a i te mau ha’amaita’ira’a a te Atua nō tāna mau tamari’i

I te hō’ē mahana, tē tai’o ra Iosepha Semita ’e ’o Sidney Rigdon i te Bibilia. ’Ua tai’o rāua nō ni’a i te ’ohipa e tupu i te mau ta’ata i muri a’e i tō rātou pohera’a. ’Ua feruri Iosepha ’e ’o Sidney i te mea tā rāua i tai’o, ’e ’ua hina’aro rāua ’ia ha’api’i rahi mai ā.

Te Ha’api’ira’a Tumu ’e te mau Fafaura’a 76:11–18

’Ua hōro’a te Fatu ia rāua i te hō’ē ’ōrama fa’ahiahia mau. ’Ua ’ite rāua i te Metua i te ao ra ’e ia Iesu Mesia e hā’atihia ra e te mau melahi. ’Ua fa’aro’o rāua i te hō’ē reo i te paraura’a ē, e Tamaiti Iesu nā te Atua. Tē parau ra te reo ē, ’ua pohe Iesu nō tātou ’e i muri iho ’ua ti’afa’ahou mai—’ua ora fa’ahou mai ’oia. Nō te mea ’ua nā reira ’oia, e ti’afa’ahou ato’a mai tātou.

Te Ha’api’ira’a Tumu ’e te mau Fafaura’a 76:19–24, 39–43

’Ua ha’api’i mai Iosepha ’e ’o Sidney ē i muri mai i tō tātou ti’afa’ahoura’a, e ora tātou i roto hō’ē o nā vāhi e toru i te ao ra, tei pi’ihia te mau bāsileia. Te feiā ’o tei ’ore i fa’ari’i i te ’evanelia a Iesu Mesia, e haere rātou i te bāsileia tiretia. ’Ua fa’aau te Fatu i teie bāsileia i te māramarama o te mau feti’a.

Te Ha’api’ira’a Tumu ’e te mau Fafaura’a 76:81–86

’Ua ha’api’i ato’a mai Iosepha ’e ’o Sidney nō ni’a i te hō’ē bāsileia tei pi’ihia te bāsileia teretetiera. Teie bāsileia nō te feiā ïa e ora nei i te orara’a maita’i, ’aita rā rātou e ha’apa’o hope roa i te ’evanelia a Iesu Mesia. E ’ere rātou i te mea pūai i roto i tō rātou fa’aro’o iāna. ’Ua fa’aau te Fatu i teie bāsileia i te māramarama o te ’āva’e.

Te Ha’api’ira’a Tumu ’e te mau Fafaura’a 76:71–80

Te bāsileia teitei roa a’e ’o te bāsileia tiretiera ïa. I roto i teie bāsileia ’ua rave te mau ta’ata i te mau fafaura’a, ’aore rā te mau parau fafau, ’e te Atua ’e ’ua tāpe’a i tā rātou mau fafaura’a. ’Ua tātarahapa rātou ’e ’ua pe’e ia Iesu Mesia. E ora rātou i pīha’i iho i te Metua i te ao ra ’e ia Iesu ē a muri noa atu ’e e riro mai mai ia Rāua te huru. ’Ua fa’aau te Fatu i teie bāsileia i te māramarama o te mahana.

Te Ha’api’ira’a Tumu ’e te mau Fafaura’a 76:50–70

’Ua parau te Fatu ia Iosepha ’e ia Sidney ’eiaha e fa’a’ite i te mau mea ato’a tā rāua i ’ite mata i roto i tā rāua ’ōrama. ’Ua hina’aro rā ’oia ’ia pāpa’i rāua i te tahi noa ma’a vāhi iti o te reira ’e ’ia fa’a’ite i te reira ia vetahi ’ē. E rave rahi melo o te ’Ēkālesia tei ’ana’anatae i te parau atu i te ta’ata nō ni’a i teie ’ōrama.

Te Ha’api’ira’a Tumu ’e te mau Fafaura’a 76:113–119; Te Feiā Mo’a, 1:149–50

’Ua au ’ore vetahi mau ta’ata i te ’ōrama. Nō te mea e mea ta’a ’ē te reira i te mea tā rātou i ti’aturi na. Terā rā, ’ua māuruuru te rahira’a o te feiā mo’a i te ’itera’a nō ni’a i teie heheura’a. E fa’a’itera’a te reira ia rātou ē, ’ua here te Metua i te ao ra i tāna mau tamari’i ’e ’ua ’īriti i te ’ē’a nō te ho’i atu iāna ra.

Te Feiā Mo’a, 1:149–50