’Ātete–Tetepa 1830

Parley ’e Thankful Pratt

Te fa’aro’o nō te pe’e i te Vārua

E feiā fa’a’apu ’o Parley Pratt ’e ’o Thankful Pratt, i Ohio. I te hō’ē mahana, ’ua putapū Parley i te Vārua tē parau ra iāna ’ia fa’aru’e i tōna fare nō te ha’api’i i te ta’ata nō ni’a i te Bibilia.

Saints, 1:92

’Ua ho’o Parley ’e Thankful i tā rāua fare fa’a’apu. ’Aita rāua i ’ite i hea e haere, ’ua ti’aturi rā rāua ē, e ha’amaita’i te Atua ia rāua nō te tāvinira’a iāna.

Saints, 1:92

’Ua rave ’o Parley ’e ’o Thankful i te tahi ’ahu ’e te moni ’e ’ōu’a ihora i ni’a i te hō’ē pahī. ’A rātere ai rāua nā New York, ’ua parau te Vārua ia Parley ’ia pou mai i raro i te pahī. ’Ua ani Parley ia Thankful ’ia tāmau i tōna tere. ’Ua parau fafau atu ’oia ē nāna e haere atu iāna, e’ita e maoro roa. ’Ua tae mai te mana’o ē, e ’ohipa tā te Atua e hina’aro iāna ’ia rave i New York.

Saints, 1:92

E mea ātea tō Parley haerera’a. Ē tae a’era i te fare o te hō’ē ’orometua. ’Ua parau terā ’orometua ia Parley nō ni’a i te hō’ē buka huru ’ē tā te hō’ē ta’ata i hōro’a iāna. Nō roto mai te reira i te mau ’api ’auro, tei pāpa’ihia e mea maoro i teienei. Tōna i’oa, ’o te Buka a Moromona ïa. Nā te hō’ē taure’are’a tamāroa nō New York i ’īriti i te reira ma te mana o te Atua.

Saints, 1:92

E ānoenoe rahi tei tupu i roto ia Parley. ’Ua fa’a’ite te ’orometua ia Parley i te buka. Ma te ’ana’anatae rahi, ’ua ’īriti ’o Parley i te reira ’e ’ua ha’amata i te tai’o. ’Ua ma’iri te mau hora, e’ita rā tāna e nehenehe e fa’aea i te tai’o, ’aita ato’a e tāmā’a ’e ’aita e ta’oto. ’Ua parau te Vārua o te Fatu iāna ē, e parau mau te reira.

Saints, 1:92–93

Nō tōna au roa i te Buka a Moromona, ’ua hina’aro ’o Parley e ’imi i te ta’ata i ’īriti i te reira. ’Ua haere ’oia i te fare fa’a’apu a Semita mā, i reira tōna fārereira’a ia Hyrum, te taea’e o Iosepha. ’Ua paraparau rāua i terā pō tā’āto’a. ’Ua parau Hyrum ia Parley e parau mau te Buka a Moromona. ’Ua hōro’a ’oia ia Parley i tāna iho buka.

Saints, 1:93

’A tāmau noa ai ’oia i te tai’o, ’ua ha’api’i mai ’o Parley ē, ’ua fārerei Iesu Mesia i te mau ta’ata nō Amerika e mea maoro i teienei. Tē ’ite ra Parley ē, e mea faufa’a a’e te Buka a Moromona i te mau tao’a ato’a a tō te ao nei. Ieie rahi tōna ’ia ho’i ia Thankful ra nō te fa’a’ite iāna i te mea tāna i ’apo mai.

Saints, 1:93 ; 3 Nephi 11:1–12

’Ua parau Parley ia Thankful ’e te tahi atu mau melo o tōna ’utuāfare nō ni’a i te Buka a Moromona. ’Ua parau atu ’oia e aha tā te reira e ha’api’i nei nō ni’a ia Iesu Mesia. ’Oa’oa rahi tō Thankful ’ua pe’e ’o Parley i te Vārua ’e ’ua ’itehia mai iāna te ’ohipa tā te Atua i hina’aro iāna ’ia rave. Mai ia Parley, ’ua ha’api’i mai Thankful iho ē, e parau mau te Buka a Moromona.

Saints, 1:98–99