« Sidney ’e Phebe Rigdon », Te mau ’ā’amu o te Ha’api’ira’a Tumu ’e te mau Fafaura’a (2024)
« Sidney ’e Phebe Rigdon », Te mau ’ā’amu o te Ha’api’ira’a Tumu ’e te mau Fafaura’a
’Ātopa–Novema 1830
Sidney ’e Phebe Rigdon
Taui i tō rāua orara’a nō te fa’ari’i i te ’evanelia
Tē haere ra ’o Parley Pratt ’e te tahi pu’era’a e fa’a’ite i te ’evanelia i te mau ’īnitia nō Amerika. I ni’a i tō rātou tere, hina’aro atu ra Parley e tāpe’a nō te fārerei i tōna hoa ia Sidney Rigdon. E ’orometua ’o Sidney tei ha’api’i ia Parley nō ni’a ia Iesu Mesia i roto i te Bibilia. I teienei, ’ua hina’aro Parley e ha’api’i ia Sidney nō ni’a ia Iesu i roto i te Buka a Moromona.
Te Ha’api’ira’a Tumu ’e te mau Fafaura’a 32 ; Saints, 1:99
’Ua parau Parley ia Sidney nō ni’a i te Buka a Moromona ’e ’ua ani iāna ’ia tai’o i te reira. ’Aita ’o Sidney i pāpū roa, nō te mea rā ho’i e hoa rāua ’o Parley, parau a’era ’oia ē e nā reira ’oia.
Saints, 1:100
I tō Sidney tai’ora’a i te Buka a Moromona, ’ua noa’a tōna ’ite ē nō ’ō mai te reira i te Atua. ’Ua fa’a’ite ’oia i tōna mana’o i tāna vahine, ’o Phebe.
Saints, 1:101
’Aita rā Sidney i pāpū e aha tē rave i muri iho. Mai te mea e bāpetizo ’oia, e ’ere ïa ’oia i tāna ’ohipa ’ei ’orometua i roto i tāna ’ēkālesia. Nāhea ïa ’oia e aupuru ai ia Phebe ’e tā rāua nā tamari’i e ono ? E aha ïa te mana’o o te mau ta’ata i roto i tāna ’ēkālesia ? ’Ua pure ’oia i te Metua i te ao ra nō te ani i te tauturu, ’e ’ua tae mai te mana’o hau.
Saints, 1:101 ; Te Ha’api’ira’a Tumu ’e te mau Fafaura’a 19:23
Ui atu ra Sidney ia Phebe ē, ’ua ineine ānei ’oia ’ia fa’aru’e i tō rāua orara’a fāna’o nō te tomo i roto i teie ’ēkālesia ’āpī nā muri iāna. « ’O tō’u hina’aro ’ia rave i te hina’aro o te Atua », ’ua parau ’oia, « ora noa atu ’e pohe noa atu. » ’Ua fa’aoti rāua e bāpetizo ia rāua.
Saints, 1:101
A muri a’e, ’ua fārerei Sidney i te peropheta Iosepha Semita. ’Ua hōro’a te Fatu ia Sidney i te hō’ē poro’i nā roto ia Iosepha. ’Ua parau ’oia ē, ’ua ’ite ’oia i te mau mea maitata’i tā Sidney i rave ’e ’ua fa’aro’o i tāna mau pure. ’Ua parau te Fatu ia Sidney ē, e ’ohipa rahi tāna nāna e rave. E rave ’o Sidney i te tahi mau ’ohipa rarahi.