« Te Parau Pa’ari », Te mau ’ā’amu o Te Ha’api’ira’a Tumu ’e te mau Fafaura’a (2024)
« Te Parau Pa’ari », Te mau ’ā’amu o Te Ha’api’ira’a Tumu ’e te mau Fafaura’a
Fepuare 1833
Te Parau Pa’ari
Te ture nō te ea a te Fatu
’Ua ani manihini Iosepha i te tahi mau tāne o te ’Ēkālesia, ’ia ruru mai iāna i te tahua hope’a o te fare toa a Newel ’e Ann Whitney. I reira, ’ua ha’api’i mai rātou i te ’evanelia ’e te tahi atu mau tumu parau, ’e ’ua pure rātou ’ei pupu. ’Ua pi’i rātou i teie mau rurura’a, te Fare ha’api’ira’a a te mau peropheta.
Te Ha’api’ira’a Tumu ’e te mau Fafaura’a 88:117–137 ; Te Feiā Mo’a, 1:166
E rave rahi tāne e puhipuhi ra i te paipu ’e e ’amu’amu ra i te taho ’ava’ava i roto i te mau ha’api’ira’a. E fa’arumaruma te auauahi i te piha, ’e e fa’arepo te taho ’ava’ava i te tahua. I muri a’e i te mau rurura’a, e ta’uma Emma Smith i te piha i ni’a nō te tāmā i reira. E mea reporepo mau te reira !
Te Feiā Mo’a, 1:167
’Ua ’ui’ui Emma ’e ’ua ’ui’ui fa’ahou i te tahua, ’aita rā te taho ’ava’ava e mā roa. ’Ua parau ’oia ia Iosepha nō terā fifi.
Te Feiā Mo’a, 1:167
’Ua fa’aro’o Iosepha ia Emma. Te fa’aro’ora’a iāna, ’ua arata’i ia Iosepha ’ia uiui e aha te mana’o o te Fatu nō ni’a i te ’ava’ava.
Te Feiā Mo’a, 1:167
Nō reira ’ua ui atu Iosepha i te Fatu nō ni’a i te ’ava’ava. ’Ua parau te Fatu ia Iosepha ē, e Parau Pa’ari tāna nā te feiā mo’a.
Te Ha’api’ira’a Tumu ’e te mau Fafaura’a 89:1–9 ; Te Feiā Mo’a, 1:167
Tē parau nei te Fatu i te feiā mo’a ’eiaha e puhipuhi i te ’ava’ava, e ’amu’amu i te taho, ’aore rā e inu i te ’ava ’aore rā, i te mau « inu ve’ave’a », ’oia ho’i, te taofe ’e te tī.
Te Ha’api’ira’a Tumu ’e te mau Fafaura’a 89:1–9 ; Te Feiā Mo’a, 1:167
’Ua ha’api’i ato’a te Fatu i te feiā mo’a ē, e mea maita’i te mau huero ’e te mau mā’a hotu nō te ’amu. ’Ua parau ato’a ’oia e nehenehe rātou e ’amu i te i’o pua’a i te tahi taime.
Te Ha’api’ira’a Tumu ’e te mau Fafaura’a 89:10–17 ; Te Feiā Mo’a, 1:168
’Ua parau te Fatu ia Iosepha ē, te feiā mo’a e mā’iti e ha’apa’o i tāna Parau Pa’ari, e pāruruhia rātou. ’Ua parau fafau te Fatu e ha’amaita’ihia tō rātou ea, te ’ite ’e te pūai. ’Ua parau Iosepha i te mau tāne o te fare ha’api’ira’a a te mau peropheta, i te Parau Pa’ari a te Fatu.
Te Ha’api’ira’a Tumu ’e te mau Fafaura’a 89:18–21 ; Te Feiā mo’a, 1:168
’Ua fa’aru’e te mau tāne e vai ra i roto i te piha, i tā rātou taho ’ava’ava ’e tā rātou paipu i roto i te auahi, nō te fa’a’ite ē tē hina’aro nei rātou e ha’apa’o i te Parau Pa’ari a te Fatu.
Te Feiā Mo’a, 1:168